Home တၢ်ကစီၣ် ပယီၤသုးခးလီၤကျိဖးဒိၣ်အဃိ ၀့ၣ်ဆှါက၀ီၤဒ့ပူၤ ကမျၢၢ်သံ(၂)ဂၤဒီးဘၣ်ဒိ(၄)ဂၤ

ပယီၤသုးခးလီၤကျိဖးဒိၣ်အဃိ ၀့ၣ်ဆှါက၀ီၤဒ့ပူၤ ကမျၢၢ်သံ(၂)ဂၤဒီးဘၣ်ဒိ(၄)ဂၤ

154
0

လါမးရှး ၁၅ သီႇ ၂၀၂၄ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်၀့ၢ်ဃၢၤ ဖဲမဟါလါမးရှး ၁၄ သီ မုၢ်နၤခီ အဆၢကတီၢ်န့ၣ် ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ၀့ၣ်ဆှါက၀ီၤဒ့ပူၤအဃိ ကမျၢၢ်သံ(၂)ဂၤဒီးဘၣ်ဒိ၀ဲဒၣ်(၄)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲမဟါမုၢ်နၤခီ ၁၁ နၣ်ရံၣ်ဃၣ်ဃၣ်အဆၢကတီၢ် ကါညံၣ်နီၣ်ပယီၤသုး(၂၇၅)သုးကလၢၤအံၤ ခးလီၤ၀ဲဒၣ်ကျိဖးဒိၣ် လီၤတဲာ်ပိၢ်ဖးထီၣ်၀ဲလၢ ၀့ၣ်ဆှါက၀ီၤဒ့(၇)ပူၤ တဖျၢၣ်အဃိ ဖံသးၦၢ်(၇၀)ဘျဲၣ်ဒီး အဖိခွါ(၄၀)ဘျဲၣ်အံၤသံ၀ဲတဘျီဃီဒီး ဖံသးၦၢ်အဖိမုၣ်ဘၣ်ဒိ၀ဲဒၣ်နးနး(၂)ဂၤန့ၣ်လီၤႉ

ဒ်န့ၣ်အသိးတကတီၢ်ဃီခီဖျိကျိဖးဒိၣ်လီၤတဲာ်ပိၢ်ဖးထီၣ်စ့ၢ်ကီးလၢ၀့ၣ်ဆှါက၀ီၤဒ့(၁)ပူၤတဖျၢၣ်အဃိ ဖဲန့ၣ်ၦၤကမျၢၢ်ဘၣ်ဒိၣ်၀ဲ(၂)ဂၤ အဂ့ၢ်န့ၣ် ဟီၣ်က၀ီၤဂံၢ်ခီၣ်ထံး ၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ

ခီဖျိပယီၤသုးခးလီၤကျိဖးဒိၣ်အဃိ တကီၢ်ခါခဲအံၤ ၀့ၣ်ဆှါၦၤကမျၢၢ်တဖၣ်ဃ့ၢ်ထီၣ်ခဲလၢာ်လံအဂ့ၢ်န့ၣ် လီၢ်က၀ီၤဂံၢ်ခီၣ်ထံး ၦၤဟ့ၣ်တၢ်ဖိလၢအိၣ်ဘူးဖဲန့ၣ်တဂၤ စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ

အ၀ဲစံး၀ဲလၢ“ခဲအံၤပယီၤသုး(၃၅၇)သုးရ့ၣ်န့ၣ်ၦၤလဲၤခးအီၤမီၤႉတၢ်မၢၤဖဲ၀့ၣ်ဆှါသ၀ီန့ၣ်ၦၤစံၣ်လၢာ်လံစံၣ်သီသ၀ီလီၤႉတၢ်ဖဲမဂီၤန့ၣ်ကျိဖးဒိၣ်လီၤလဲးလိးလီၤမီၤနီၤႉ စးထီၣ်ဖဲမုၢ်၀ါထီၣ် ၄ နၣ်ရံၣ်န့ၣ်သီၣ်လဲးလိးလီၤႉ ခဲအံၤမးကဘီယူၤ ဟဲဒံးႉအသီၣ်န့ၣ်သီၣ်လၢမဟါလံဘၣ်ဆၣ်အသီၣ်စှၤဒံးႉပယီၤသုးလၢအိၣ်(၂၇၅)သုးရ့ၣ်တဖၣ်န့ၣ် ခးလီၤစၢၤကျိဖးဒိၣ် ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

ဒ်န့ၣ်အသိးဖဲတနံၤအံၤလါမးရှး ၁၅ သီ ဂီၤခီ ၄ နၣ်ရံၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်ထီၣ်ခး၀ဲမၠၣ်၀တံၣ် သ့ၣ်ကါညံၣ်နီၣ်ပယီၤသုးခီၣ်ချ့သုးရ့ၣ်(ခမရ-၃၅၆)ႇ(၃၅၇)သုးရ့ၣ်တၢ်လီၢ် တၢ်ဒုးကဲထီၣ်အဃိ ပယီၤသုးကဘီယူၤဟဲခးလီၤစၢၤ၀ဲတၢ်လၢပျီပူၤအဂ့ၢ်န့ၣ် လီၢ်က၀ီၤၦၤဟ့ၣ်တဖၣ်ကစီၣ်ဖိတဖၣ် စံး၀ဲ န့ၣ်လီၤႉ

ဘၣ်ဃးတၢ်ဂ့ၢ်ကဲထီၣ်သးအံၤ ၀့ၣ်ဆှါကမျၢၢ်လၢအဃ့ၢ်ထီၣ်တဂၤ စံး၀ဲလၢ “ခဲအံၤ၀့ၣ်ဆှါန့ၣ်ၦၤဟဲခးလီၤဒီးကဘီ ယူၤမီၤႉတၢ်မၢၤခီကဘီယူၤန့ၣ်ဟဲခးလီၤတၢ်န့ၣ်တမ့ၢ်၀့ၣ်ဆှါဘၣ်ႉဟဲခးလီၤ၀ဲလၢသ့ၣ်ကါညံၣ်နီၣ်ဒုးယၤ(ဗျူဟာ)တၢ်လီၢ်သ့ၣ်တဖၣ်န့ၣ်မီၤႉပယီၤသုးတၢ်လီၢ်တဖၣ်န့ၣ်ခီၦၤလဲၤထီၣ်ခးမီၤနီၤႉခီဖျိၦၤလဲၤထီၣ်တၢ်လီၢ်တဖၣ်အံၤအဃိပယီၤသုးဟဲခးလီၤတၢ်ဒီးကဘီယူၤႉတၢ်မၢၤဖဲမဟါကျိဖးဒိၣ်လီၤတဲာ်န့ၣ်ၦၤတဲလၢၦၤကမျၢၢ်သံအိၣ်ႇအသံအဘၣ်ဒိၦဲၤဂၤလဲၣ်ခီန့ၣ်ယတသ့ၣ်ညါခဲလၢာ်စ့ၢ်ဘၣ်”အဂ့ၢ်န့ၣ် စံး၀ဲန့ၣ်လီၤႉ

ဖဲအပူၤကွံာ်လါမးရှး ၇ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် ထီၣ်မၤန့ၢ်ကွံာ်၀ဲဒၣ် မၠၣ်၀တံၣ် သ့ၣ်ကါညံၣ်နီၣ် ပယီၤသုးခီၣ်ချ့သုးရ့ၣ်(ခမရ-၃၅၅)သုးကလၢၤအံၤဒီး ဖဲန့ၣ်တၢ်မၤန့ၢ်ဃုာ်၀ဲဒုၣ်ဒါ အကျိဖးဒိၣ်ႇ ကျိဖိဃုာ်ဒီးကျိချံၦာ်သၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤႉ

တၢ်ကဲသးဖဲန့ၣ်၀ံၤလီၢ်ခံခီဖျိတၢ်ဒုးဆဲးကဲထီၣ်ကိးမုၢ်နံၤဒဲးဒီးကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်ခဲအံၤ ခဲအံၤအဃိဒူသ၀ီၦၤကမျၢၢ်လၢအိၣ်ဘူးဖဲသ့ၣ်ကါညံၣ်နီၣ်အခိၣ်အဃၢၤတဖၣ်ဘၣ်ဃ့ၢ်ထီၣ်၀ဲဒၣ်အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ