Home တၢ်ကစီၣ် မုၢ်တြီၢ်ကီၢ်ရ့ၣ် ခံသီအတီၢ်အပူၤ ပယီၤသုးသူဒြိတ့ၢ်လီၤမ့ၣ်ပိၢ်(၂၀၀)ဘျဲၣ် သ၀ီ(၃)ဖျၢၣ်ဘၣ်ဃ့ၢ်ထီၣ်

မုၢ်တြီၢ်ကီၢ်ရ့ၣ် ခံသီအတီၢ်အပူၤ ပယီၤသုးသူဒြိတ့ၢ်လီၤမ့ၣ်ပိၢ်(၂၀၀)ဘျဲၣ် သ၀ီ(၃)ဖျၢၣ်ဘၣ်ဃ့ၢ်ထီၣ်

157
0

လါမးရှး ၂၁ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)အပူၤ ခံသီအတီၢ်ပူၤ ပယီၤသုးသူ၀ဲဒြိတ့ၢ်လီၤ၀ဲဒၣ်မ့ၣ်ပိၢ်လၢကမျၢၢ် အိၣ်ဆိးလီၢ်ကျဲတၢ်ဖံးအီၣ်မၤအီၣ်လီၢ်ပူၤအိၣ်၀ဲအဖျၢၣ်(၂၀၀)ဘျဲၣ်ဒီး သ၀ီ(၃)ဖျၢၣ်ၦၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမဟါလါမးရှး ၂၀ သီအနံၤန့ၣ်လီၤႉ

(သုးက့ ၅)ဟီၣ်က၀ီၤအပူၤ လါမးရှး ၁၉ သီ ဒီး ၂၀ သီ လၢခံသီအတီၢ်ပူၤ ပယီၤသုးသူ၀ဲဒြိတ့ၢ်လီၤ၀ဲဒၣ်မ့ၣ်ပိၢ် လၢဘုသိၣ်ကီၢ်ဆၣ်ႇဒွဲၣ်လိကီၢ်ဆၣ်ႇလူၤသီကီၢ်ဆၣ် ဒူသ၀ီကမျၢၢ်တၢ်ဖံးအီၣ်မၤအီၣ်လီၢ်ကျဲပူၤ ခဲလၢာ်အိၣ်၀ဲ(၂၂၂)ဘျီ ဒီးလၢန့ၣ်အမဲာ်ညါသ၀ီ(၃)ဖျၢၣ် ဟံၣ်ဒူၣ်(၁၀၂)ဖျၢၣ် ၦၤနီၣ်ဂံၢ်(၁၂၅၁)ဂၤဘၣ်ဃ့ၢ်ထီၣ်၀ဲအဂ့ၢ်န့ၣ် မုၢ်တြီၢ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ဒ်မုၢ်တြီၢ်တၢ်ကစီၣ်လံာ်တၢ်ဖျါပူၤပာ်ဖျါ၀ဲအသိးန့ၣ်ဖဲလါမးရှး ၂၀ သီအနံၤန့ၣ် ပယီၤသုးသူ၀ဲဒြိတ့ၢ်လီၤ၀ဲဒၣ်မ့ၣ်ပိၢ် လၢဘုသိၣ်ကီၢ်ဆၣ် မဲၤကျီကရူၢ် ဘီးထၣ်သ၀ီဃၢၤ(၂၇)ဖျၢၣ်ဒီး ဒွဲၣ်လိကီၢ်ဆၣ် မးထီကရူၢ် စီၤချ့လိာ်သ၀ီဃၢၤန့ၣ် တ့ၢ်လီၤ၀ဲဒြိမ့ၣ်ပိၢ်(၈)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါတၢ်တနံၤဃီအံၤန့ၣ်ပယီၤသုးသူ၀ဲဒြိတ့ၢ်လီၤ၀ဲမ့ၣ်ပိၢ်လၢလူၤသီကီၢ်ဆၣ် ဘီသ့ၣ်ထၣ်ကရူၢ် ထူၣ်မီဒၢသ၀ီႇ တၤဒိၣ်ထၣ်သ၀ီႇနံဒိးထၣ်သ၀ီပူၤအိၣ်၀ဲ(၁၃၇)ဖျၢၣ်အဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

တကးဒံးဘၣ်ဖဲလါမးရှး ၁၉ သီ အနံၤန့ၣ်စ့ၢ်ကီး ပယီၤသုးသူ၀ဲဒြိတ့ၢ်လီၤ၀ဲမ့ၣ်ပိၢ်လၢ လူၤသီကီၢ်ဆၣ် ဘီသ့ၣ်ထၣ်ကရူၢ် ထူၣ်မီဒၢသ၀ီႇတၤဒိၣ်ထၣ်သ၀ီဒီးနံဒိးထၣ်သ၀ီအိၣ်၀ဲ(၅၀)ဖျၢၣ်န့ၣ်လီၤႉ ခီဖျိလၢပယီၤသုးသူဒြိ ဟးခးလီၤတၢ်လၢ ကမျၢၢ်ဒူသ၀ီတၢ်ဖံးအီၣ်မၤလီၢ်ကျဲပူၤဒ်အံၤအဃိ လူၤသီကီၢ်ဆၣ် ထူၣ်မီဒၢသ၀ီႇ တၤဒိၣ်ထၣ်သ၀ီႇ နံဒိးထၣ်သ၀ီဖိ ဘၣ်ဃ့ၢ် ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ဃးပယီၤသုးသူဒြိခးလီၤတၢ်လၢကမျၢၢ်တၢ်အိၣ်တၢ်ဆိးလီၢ်ကျဲဒ်အံၤအဖီခိၣ်န့ၣ် (သုးက့ ၅) ၦၤဘၣ်မူဘၣ်ဒါ လၢတအဲၣ်ဒိးပာ်ဖျါအမံၤတဂၤ စံး၀ဲလၢ“ပယီၤသုးကဘီယူၤန့ၣ်ဟဲဆှၣ်တၢ်လၢလါမးရှး ၁၈ သီအနံၤန့ၣ် ဟဲဆှၣ်တၢ် ဒီနံၤလီၤႉ တကးဒံးဘၣ် ဖဲ ၁၉ သီအနံၤန့ၣ်နါက့ ဟဲဆှၣ်တၢ်ဒီတနံၤစ့ၢ်လီၤႉ ပယီၤသုးသ့ၣ်တဖၣ်အံၤ သူကဒါက့ၤ၀ဲ ဒြိဘျီန့ၣ်ဟးခးလီၤက့ၤတၢ်လၢဒူသ၀ီပူၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါမးရှး ၂၀ သီအနံၤန့ၣ်လီၤႉ

ဖဲအပူၤကွံာ်လါမးရှး ၁၉ သီအနံၤန့ၣ် ခ့ၣ်အဲၣ်ယူၣ် (သုးက့ ၅)ဒြိကရူၢ်အၦၤလဲၤခး၀ဲဖၣ်ပူၣ် ပယီၤသုးကလၢၤသုးရ့ၣ် တၢ်လီၢ်သ့ၣ်တဖၣ်အဃိ ပယီၤသုးသံ၀ဲဒၣ်(၁)ဂၤဒီးဘၣ်ဒိ၀ဲဒၣ်(၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ