မူကီၢ်ဆၣ်အပူၤ ပယီၤသုးသူတၢ်စုဆူၣ်ခီၣ်တကး မၤထီဒါၦၤဂ့ၢ်၀ီခွဲးယာ်အဃိ (၄)သီအတီၢ်ပူၤ ကမျၢၢ်သံ(၃) ဂၤ ဘၣ်ဒိ(၅)

လါဖ့ၤဘြူၤအါရံၤ ၄ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ လါဖ့ၤဘြူၤအါရံၤ(၂၈)သီ တုၤ လါမးရှး(၂)သီလၢ(၄)သီအတီၢ်ပူၤ ခီဖျိပယီၤသုးကျိၤနုာ်လီၤဒီးမၤထီဒါၦၤဟီၣ်ခိၣ်ဖိခွဲးယာ်အဃိ ကမျၢၢ်သံ(၃)ဂၤႇ ဘၣ်ဒိ(၅)ဂၤဒီးမ့ၣ်အူအီၣ်ဟးဂီၤကမျၢၢ်ဟံၣ်အါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ၀ဲ ဖဲလါမးရှး(၃)သီအနံၤန့ၣ်လီၤႉ

ပယီၤသုးကျိၤလၢအဟဲနုာ်လီၤလၢဒူသ၀ီပူၤသ့ၣ်တဖၣ်အံၤဖီၣ်မၤဆါမၤပယွဲကမျၢၢ်ဒီးဒွဲၣ်အူအီၣ်ကွံာ်၀ဲကမျၢၢ်အဟံၣ် အဃီတကးဒံးဘၣ်အမဲာ်ညါပယီၤသုးအံၤဖဲအ၀ဲသ့ၣ်နုာ်လီၤအဆၢကတီၢ်ခးလီၤကျိဖးဒိၣ်ဒီးတ့ၢ်လီၤ စ့ၢ်ကီးဒြိမ့ၣ်ပိၢ် အိၣ်၀ဲအဂ့ၢ်န့ၣ် မူကီၢ်ဆၣ် ၦၤမၤစၢၤၦၤဃ့ၢ်မှံဟးဖျိး သရၣ်စီၤစံးပတြၢၤ စံး၀ဲန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်မ့ၢ်နုာ်လီၤလၢသ၀ီပူၤန့ၣ်ဒွဲၣ်၀ဲၦၤသ၀ီဖိအဟံၣ်မီၤနီၤႉ အ၀ဲသ့ၣ်န့ၣ်ဟဲသုးဘူးထီၣ်အ သးလၢ နၣ်သၤကွ့မီၤႉ (နၣ်သၤကွ့)န့ၣ်အ၀ဲသ့ၣ်ဘှီထီၣ်၀ဲတိာ်ဘျီန့ၣ်အၦၤ သ့ၣ်တဖၣ်ဟဲထီၣ်၀ဲအိၣ်လၢ ကါတဆံယဲၢ်ခိၣ်ၦဲၤၦဲၤမီၤနီၤႉ ဒီးဖဲအ၀ဲသ့ၣ်သုးထီၣ်အဂံၢ်အကတီၢ်ခးလီၤကျိဖးဒိၣ်၊ကဘီယူၤစ့ၢ်ကီးဟဲခး လီၤစၢၤတၢ်အိၣ်၀ဲအဃိကမျၢၢ်သ့ၣ်တဖၣ်ဘၣ်ကွၢ်ဆၢမဲာ်၀ဲတၢ်၀ဲန့ၣ်သ့ၣ်တဖၣ်မီၤနီၤႉ မ့မ့ၢ်လၢတၢ်ဘၣ်ဒိ ဘၣ်ထံးဒီးတၢ်ဟးဂူာ်ဟးဂီၤခီန့ၣ်လီၤဘီလီမုၢ်ညါန့ၣ်လီၤႉ ဟဲခးလီၤတၢ်န့ၣ်ကဘီယူၤမးတကးဘၣ်အ၀ဲသ့ၣ် ဒြိစ့ၢ်ကီးဟဲတ့ၢ်လီၤမ့ၢ်ပိၢ်တဘျီန့ၣ်ကအိၣ်လၢအဖျၢၣ်တဆံထဲန့ၣ်ညါလီၤႉ မ့မ့ၢ်လၢအ၀ဲသ့ၣ်တၢ်ပၢတၢ်ပြး ခီန့ၣ်ဒုဟးဂီၤလၢာ်လံန့ၣ်ပတဲသ့မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါမူကီၢ်ဆၣ်အပူၤကမျၢၢ်လၢဘၣ်ဃ့ၢ်အိၣ်ကဒုသးတဖၣ်တနီၤန့ၣ်ဘၣ်ဃ့ၢ်၀ဲဒၣ်အဘျီဘၣ်အဘျီလံဒီး ဒူသ၀ီဒ်မ့ၢ် (နၣ်သၤကွ့ႇ တကိၤတဲၤႇ ယ့ၤဒွ့ကိကၠံဒီးယ့ၤဒွ့ကိလ့) သ၀ီၦၤကမျၢၢ်သံဘၣ်ဒိဘၣ်ထံး အိၣ်ထီၣ်၀ဲကိးနံၤဒဲး ဃၣ်ဃၣ်အသိးလၢကလဲၤကူဆါယါဘျါၦၤဆါလၢ၀့ၢ်ပူၤအဂီၢ်ဘၣ်ကွၢ်ဆၢမဲာ်၀ဲတၢ်ကီတၢ်ခဲအိၣ်အဂ့ၢ်န့ၣ် သရၣ်စီၤစံးပတြၢၤ စံးအါထီၣ်၀ဲန့ၣ်လီၤႉ

ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ်အပူၤ သုးကီၣ်ကးအသုးကျိၤဟဲနုာ်လီၤဒွဲၣ်အူအီၣ် ၦၤကမျၢၢ် အဟံၣ်ႇ ခးလီၤကျိဖးဒိၣ်ကျိဖိႇ ကဘီယူၤဟဲခးလီၤတၢ်ဟဲတ့ၢ်လီၤဒြိမ့ၣ်ပိၢ်ဒီးတကးဒံးဘၣ်အမဲာ်ညါ ပယီၤ သုးအံၤသူ၀ဲ တၢ်ခးလီၤမ့ၣ်အူအီၣ်တၢ်မ့ၣ်ပိၢ်ႇ နုာ်လီၤခးၦၤသ၀ီဖိဒီးကျိဖိဒီးဖီၣ်မၤဆါမၤပယွဲမၤသံၦၤလီၢ်က ၀ီၤဖိသ့ၣ်တဖၣ်န့ၣ်လီၤႉ

တကးဒံးဘၣ်လၢ(၄)သီအတီၢ်ပူၤအံၤမ့ၣ်အူအီၣ်ကွံာ်၀ဲၦၤလီၢ်က၀ီၤဖိဟံၣ်(၁၃)ဖျၢၣ်ႇ သ့ၣ်မုၣ်လီၢ်(၁)တခါႇ ကျီၢ်ဒဲ(၉) ဖျၢၣ်ႇ လ့ၣ်(၆)ခိၣ်ႇ စဲးထဲၣ်ဟီၣ်ခိၣ်အဆံး(၂)ခိၣ်ႇ သိၣ်လ့ၣ်ယီၢ်(၁)ခိၣ်ႇ ဘုဖီ(၅)ဖျၢၣ်ႇ စဲးဂံာ်ဘု(၁)ဖျၢၣ်ႇ စဲးအ့ၤကၠ့ၤ(၃)ဖျၢၣ်ႇ လ့ၣ်ယီၢ်(၂)ခိၣ်ႇ ပနံာ်တၢ်ပာ်ဖှိၣ်ဒၢး(၁)ဖျၢၣ်ႇ ဘုသး(၁၀၀၀)ထၢၣ်ဒီးပဲတၢ်သူၣ်တၢ်ဖျးလီၢ်သ့ၣ်တဖၣ်မ့ၣ်အူအီၣ်ဟးဂီၤ ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ