Home တၢ်ကစီၣ် သုးဟံးန့ၢ်တၢ်စိတၢ်ကမီၤ(၃)နံၣ်ဘျဲၣ်အတီၢ်ပူၤကီၢ်ဆၣ်လၢတၢ်ထုးထီၣ်၀ဲ (Martial Law) အိၣ် ၆၁ ဘ့ၣ်

သုးဟံးန့ၢ်တၢ်စိတၢ်ကမီၤ(၃)နံၣ်ဘျဲၣ်အတီၢ်ပူၤကီၢ်ဆၣ်လၢတၢ်ထုးထီၣ်၀ဲ (Martial Law) အိၣ် ၆၁ ဘ့ၣ်

152
0

လါမးရှး ၆ သီႇ ၂၀၂၄ နံၣ်ႇ ခ့ၣ်အဲးစံၣ်

စးထီၣ်လၢ (၂၀၂၁) သုးဟံးန့ၢ်တၢ်စိတၢ်ကမီၤတုၤလၢတနံၣ်အံၤ (၂၀၂၄) နံၣ်လါမးရှး (၃) သီန့ၣ် ကီၢ်ပယီၤဒီတဘ့ၣ်အပူၤကီၢ်ဆၣ်လၢတၢ်ဘိးဘၣ်ရၤလီၤ၀ဲ (Martial Law) သုးတၢ်ပၢတၢ်ပြးအံၤအိၣ်၀ဲ (၆၁) ဘ့ၣ်လံအဂ့ၢ် (Data for Myanmar) ထုးထီၣ်ပာ်ဖျါ၀ဲ ဖဲလါမးရှး(၅)သီအနံၤန့ၣ်လီၤႉ

ကီၢ်ဆၣ်လၢတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ကရူၢ်ဒီးပယီၤသုးအဘၢၣ်စၢၤသ့ၣ်တဖၣ်အံၤန့ၣ် သုးကီၣ်ကးထုးထီၣ်ဘိးဘၣ်ရၤလီၤ၀ဲလၢအမ့ၢ် (Martial Law) ဒီး ဖဲ(၂၀၂၁)နံၣ်ထီၣ်အခါန့ၣ် ကီၢ်ဆၣ်လၢအပာ်ဃုာ်လၢ သုးတၢ်ပၢတၢ်ပြးန့ၢ်အိၣ်ထဲ(၈)ဘ့ၣ်လီၤဒီးဘၣ်ဆၣ် ဖဲ(၂၀၂၃)အတီၢ်ပူၤန့ၣ် ကီၢ်ဆၣ်လၢတၢ်ဘိးဘၣ်ရၤလီၤ၀ဲလၢအမ့ၢ် (Martial Law) အံၤအိၣ်၀ဲ(၄၈)ဘ့ၣ်ဒီးတနံၣ်အံၤ(၂၀၂၄) အတီၢ်ပူၤန့ၣ်ဟဲအါထီၣ်ကဒီး၀ဲ(၅)ဘ့ၣ် ခဲလၢာ်ကီၢ်ဆၣ်ပာ်ဖှိၣ်အိၣ်၀ဲ(၆၁)ဘ့ၣ်လံန့ၣ်လီၤႉ

ကီၢ်ဆၣ်လၢသုးကီၣ်ကးဘိးဘၣ်ရၤလီၤလၢအမ့ၢ် (Martial Law) သ့ၣ်တဖၣ်န့ၣ်မ့ၢ်၀ဲ ကခၠ့ၣ်ႇ ကရ့ၣ်နံၣ်ႇ ကညီႇ ခၠီႇ တလၢၤႇ ယိၤဒိၣ်ကီၢ်စဲၣ်ပူၤ ကီၢ်ဆၣ်ခဲလၢာ်(၂၅)ဘ့ၣ်လၢ စကဲႇ တနီသရံၣ်ႇ ပကိႇ ၀့ၢ်တကူၣ်ႇ မကွ့ကီၢ်ခီဒိၣ်န့ၣ် ကီၢ်ဆၣ်ခဲလၢာ်(၃၃)ဘ့ၣ်ဒီး ဒ်န့ၣ်အသိးဖဲလါမးရှး ၄ သီအနံၤန့ၣ် လၢယိၤဒိၣ်ကီၢ်စဲၣ်ကလံၤစိး မၤတိၤႇ နမတူႇ နၣ်မ်စၤ ၀့ၢ်သ့ၣ်တဖၣ်အံၤသုးကီၣ်ကးဘိးဘၣ်ရၤလီၤ၀ဲလၢအမ့ၢ် (Martial Law) သုးတၢ်ပၢတၢ်ပြးန့ၣ်လီၤႉ

စးထီၣ်လၢသုးကီၣ်ကးဂဲၤလိာ်သူ၀ဲ (Martial Law) အံၤအခါန့ၣ် ဟီၣ်က၀ီၤကီၢ်ဆၣ်၀ဲန့ၣ်သ့ၣ်တဖၣ်အပူၤ တၢ်ထုးထီၣ်ပာ်ပနီၣ်တၢ်ဆၢကတီၢ်လၢမုၢ်နၤခီဟးထီၣ်တၢ်ချၢတန့ၢ်ဘၣ်ႇ တၢ်မၤဃံးထီၣ်တၢ်သမံသမိးႇ တၢ်ပာ်ပနီၣ်တၢ်စိာ်ထီၣ်စိာ်လီၤပနံာ်တၢ်ဖိတၢ်လံၤဒီးတၢ်အီၣ်တၢ်အီ ပယီၤသုးဟးဆှၣ်တၢ်ဖီၣ်ၦၤကမျၢၢ်အိၣ်အဃိ တၢ်ဘၣ်ဒိအိၣ်ထီၣ်၀ဲလၢၦၤဂ့ၢ်၀ီမုၢ်ကျိၤ၀ဲၤကွာ်တကပၤအဂ့ၢ်န့ၣ် ကမျၢၢ်လၢအိၣ်ဆိးသုးတၢ်ပၢတၢ်ပြးဖီလာ် သ့ၣ်တဖၣ်စံး၀ဲန့ၣ်လီၤႉ

“အ၀ဲသ့ၣ်ဘိးဘၣ်ရၤလီၤ၀ဲဒ်အံၤ၀ံၤလီၢ်ခံန့ၣ်တၢ်သမံသမိးတြဲၤနါက့ဟဲအါထီၣ်ႉ ဟးထီၣ်ဟးလီၤစ့ၢ်ကီး တဘၣ်တမုာ်လၢၤဘၣ်ႉ နမ့ၢ်ဟးထီၣ်ဟးလီၤန့ၣ်နဘၣ်လဲၤမၤလံာ်အုၣ်သးလၢက၀ီၤဒ့သးၦၢ်အအိၣ်ႉ နမၤလံာ်အုၣ်သးလံ မးန့ၣ်ၦၤသုးဖိအိၣ်လၢတြဲၤတဖၣ်န့ၣ်ဃ့အီၣ်စ့ဒံးႉ နမ့ၢ်တဟ့ၣ်ဘၣ်န့ၣ်တပျဲလဲၤနၤဘၣ်ႉ ဖဲလီၢ်ခံအံၤကဲထီၣ်ဒ်အံၤအါမး” အဂ့ၢ်န့ၣ် တနီသရံၣ်ကီၢ်ခီ ပလီကီၢ်ဆၣ်လီၢ်က၀ီၤကမျၢၢ်တဂၤစံး၀ဲန့ၣ်လီၤႉ

ဒ်န့ၣ်အသိးပလီကီၢ်ဆၣ်ဃုာ်ဒီးတနီသရံၣ်ကီၢ်ဆၣ်ႇ ကညီကီၢ်စဲၣ် ကီၣ်တရံးကီၢ်ဆၣ်ဒီးကၠးအ့စ့ၣ်ကၠံကီၢ်ဆၣ် တဖၣ်အပူၤန့ၣ် ဖဲ(၂၀၂၃)လါဖ့ၤဘြူၤအါရံၤထီၣ်အခါန့ၣ် သုးကီၣ်ကးထုးထီၣ်ဘိးဘၣ်ရၤလီၤ၀ဲ (Martial Law) ဒီး ဘၣ်ဆၣ်တုၤလၢခဲအံၤတၢ်လီၢ်သ့ၣ်တဖၣ်အံၤအပူၤတၢ်ဒုးကဲထီၣ်ဒံး၀ဲတယူာ်ဃီတုၤလၢခဲအံၤတစုအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ

သုးဟံးန့ၢ်တၢ်စိတၢ်ကမီၤအတီၢ်ပူၤ လၢကီၢ်ပယီၤတၢ်လီၢ်အါတီၢ်အပူၤတၢ်ဒုးကဲထီၣ်၀ဲလၢကလုာ်ဒူၣ်ဖီၣ်စုက၀ဲၤႇ တၢ်ဒီသဒၢကမျၢၢ်သုးပာ်ဖှိၣ်ဒီးသုးကီၣ်ကးအဘၢၣ်စၢၤအိၣ်၀ဲတစှၤန့ၢ်(၄၀၀၀)ဘျီဘၣ်အဂ့ၢ်န့ၣ် ကရူၢ်ကရၢလၢအအိၣ်ခိးဃုသ့ၣ်ညါကီၢ်ပယီၤတၢ်မုာ်တၢ်ခုၣ်တဖၣ်အတၢ်မၤနီၣ်စရီအပူၤ ပာ်ဖျါ၀ဲန့ၣ်လီၤႉ