ခီဖျိတၢ်ပာ်ပနီၣ်ဃာ်၀ဲတၢ်ဟံတၢ်ကစီၣ်အခွဲးအဃိ ၦၤမၤတၢ်ကစီၣ်ဖိတဖၣ်အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ် IPCM ထုးထီၣ်ပာ်ဖျါ

လါအ့ဖြ့ၣ် ၂၉ သီႇ ၂၀၂၄ နံၣ်ႇ ခ့ၣ်အဲးစံၣ်

ဖဲအပူၤကွံာ်တလါအံၤလါအ့ဖြ့ၣ် ၁၆ သီ ဒီး ၂၁ သီအနံၤန့ၣ် ကရ့ၣ်နံၣ်ကီၢ်ကတီၢ်ဘၢၣ်စၢၤပၢပြးကီၣ်ကး(IEC)ဒီး ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ၀ဲတၢ်ဟံတၢ်ကစီၣ်လၢအအိၣ်ဒီးတၢ်ပာ်ပနီၣ်အံၤအဃိ ၦၤဟံတၢ်ကစီၣ်ဖိသ့ၣ်တဖၣ်ဘၣ်ယိၣ်ဘၣ်ဘှီတၢ်အဂ့ၢ်န့ၣ် ကီၢ်ပယီၤတၢ်ကစီၣ်သဘျ့ကီၣ်ကး(IPCM)ထုးထီၣ် ပာ်ဖျါ စံး၀ဲဖဲလါအ့ဖြ့ၣ် ၂၆ သီအနံၤန့ၣ် လီၤႉ

တၢ်ကစီၣ်ဒီးတၢ်ဘိးဘၣ်ရၤလီၤဘၣ်ဃးတၢ်သိၣ်တၢ်သီတၢ်ဘျၢလၢကရူၢ်ကရၢ(၂)ဒူၣ်အံၤထုးထီၣ်ပာ်ဖျါ၀ဲဒၣ်အံၤန့ၣ် တၢ်ဂ့ၢ်တၢ်ကျိၤတနီၤန့ၣ်ခီဖျိမၤပျံၤမၤဖုး၀ဲၦၤဟံတၢ်ကစီၣ်ဖိအတၢ်ဘံၣ်တၢ်ဘၢဒီးတၢ်ဟံတၢ်ကစီၣ်လၢသဘျ့အဃိ ကဲထီၣ်၀ဲဒၣ်တၢ်ကိၢ်တၢ်ဂီၤတၢ်ဘၣ်ယိၣ်ဘၣ်ဘှီလၢကီၢ်ပယီၤတၢ်ကစီၣ်ဒီးၦၤဟံတၢ်ကစီၣ်ဖိတဖၣ်အဂီၢ်အဂ့ၢ်န့ၣ် (IPCM)စံး၀ဲန့ၣ်လီၤႉ

ဒ်သိးကရူၢ်ကရၢဘၣ်ထွဲလၢအိိၣ်ဟီၣ်က၀ီၤပူၤတဖၣ်ဒီးၦၤဟံတၢ်ကစီၣ်ဖိတဖၣ်အံၤအဘၢၣ်စၢၤတၢ်ဖုၣ်ထံၣ်ဖုၣ်ထီ သုတအိၣ်ထီၣ်တဂ့ၤအဂီၢ်ဒီးတကးဒံးဘၣ်ဒ်သိးတၢ်ဘၣ်ယိၣ်ဘၣ်ဘှီသုတကဲထီၣ်လၢၦၤဟံတၢ်ကစီၣ်ဖိတဖၣ်တဂ့ၤ အဂီၢ် ဘၣ်တၢ်ထုးထီၣ်ပာ်ဖျါ၀ဲဒ်အံၤလီၤအဂ့ၢ်န့ၣ် IPCM ပှၤပၢၤလီၢ်ဆ့ၣ်နီၤ နါဖီဂ့ၤ စံး၀ဲန့ၣ်လီၤႉ

အ၀ဲစံး၀ဲလၢ“ကီၢ်ပယီၤပူၤကယဲၢ်မ့ၢ်ၦၤမၤတၢ်ကစီၣ်ဖိလၢအလဲၤဟံတၢ်ကစီၣ်လၢတၢ်ဒုးတၢ်ယၤကဲထီၣ်အလီၢ်သ့ၣ် တဖၣ်အံၤန့ၣ်လၢအ၀ဲသ့ၣ်အဂီၢ်(IPCM)ဘၣ်ယိၣ်လၢတၢ်ဘံၣ်တၢ်ဘၢႇတၢ်ဒီတဒၢတအိၣ်လၢအ၀ဲသ့ၣ်အဂီၢ်ဘၣ်လီၤႉတမ့ၢ်ထဲလၢကရ့ၣ်နံၣ်ဒီးကညီအဟီၣ်က၀ီၤပူၤဧိၤဘၣ်ႉကလုာ်ဒူၣ်ဟီၣ်က၀ီၤလၢအဂၤဒီးကီၢ်ခီတဖၣ်အပူၤစ့ၢ်ကီး ကရူၢ်ကရၢ ဘၣ်ထွဲဒီးၦၤဟံတၢ်ကစီၣ်ဖိတဖၣ်အဘၢၣ်စၢၤပတအဲၣ်ဒိးလၢတၢ်ဘၣ်ဂံာ်ဂူာ်ကကဲထီၣ်ဘၣ်အဃိ ဒ်သိးတၢ်အုၣ်ကီၤသး ကအိၣ်တခါခါအဂီၢ်ဘၣ်တၢ်ဆီၣ်တခူထုးထီၣ်၀ဲလံာ်ဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ

လၢ(IPCM)လံာ်တၢ်ပာ်ဖျါအပူၤန့ၣ်စ့ၢ်ကီးဆီၣ်တခူထီၣ်၀ဲ ကရူၢ်ကရၢဘၣ်ထွဲလၢအမုၢ်လၢ်ကွၢ်စိဖဲၣ်ဒရၢၣ်ဒံၣ်မိၣ်ခြ့ၣ်စံၣ် ကီၢ်စၢဖှိၣ်အံၤတဖၣ်လၢကသ့ၣ်ညါပာ်ကဲလူၤပိာ်မၤထွဲ၀ဲဒၣ်တၢ်ဟံကစီၣ်လၢသဘျ့ဒီးအလုၢ်အၦ့ၤ သ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤဆီၣ်တခူထီၣ်၀ဲဒၣ်န့ၣ်လီၤႉ

ၦၤဟံတၢ်ကစီၣ်ဖိတဖၣ်မ့နုာ်လီၤဟံတၢ်ကစီၣ်လၢပျီပူၤန့ၣ်ကဘၣ်ဟံစိ၀ဲဒၣ်တၢ်ပျဲႇကဘၣ်ပာ်ဖျါထီၣ်တၢ်ကစီၣ်သန့ အမံၤႇၦၤဟံတၢ်ကစီၣ်ဖိအမံၤ(အကး)ႇတၢ်လီၢ်တၢ်ကျဲလၢကလဲၤဟံတၢ်ကစီၣ်ဒီးကလဲၤဟံတၢ်ကစီၣ်တၢ်ဂ့ၢ်တၢ်ကျိၤသ့ၣ်တဖၣ်ဒီး ၦၤလၢအမ့တလူၤပိာ်မၤထွဲတၢ်သိၣ်တၢ်သီအံၤဘၣ်န့ၣ်ကဟံ၀ဲဒၣ်အရ့အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သး ထုးထီၣ်ပာ်ဖျါ၀ဲဖဲအပူၤကွံာ်လါအ့ဖြ့ၣ် ၂၁ သီ အနံၤန့ၣ်လီၤႉ

ဒ်န့ၣ်အသိးဖဲလါအ့ဖြ့ၣ် ၁၆ သီအနံၤန့ၣ်စ့ၢ်ကီး လၢကရ့ၣ်နံၣ်ကီၢ်စဲၣ်အပူၤ (IEC)ထုးထီၣ်ပာ်ဖျါနဲၣ်လီၤစ့ၢ်ကီး၀ဲ တၢ်ဂ့ၢ်(၈) ထံၣ်လၢၦၤဟံတၢ်ကစီၣ်သဘျ့လၢအဟံတၢ်ကစီၣ်ဃုာ်ဒီးကီၢ်ပူၤကီၢ်ချၢတၢ်ကစီၣ်တဖၣ်ကဘၣ်လူၤပိာ် မၤထွဲတၢ်နဲၣ်လီၤ အံၤသ့ၣ်တဖၣ်န့ၣ်လီၤႉ

ဒ်(IPCM)လံာ်တၢ်ထုးထီၣ်ပာ်ဖျါပူၤပာ်ဖျါ၀ဲအသိးန့ၣ်ၦၤဟံတၢ်ကစီၣ်ဖိသ့ၣ်တဖၣ်ကလူၤပိာ်မၤထွဲတၢ်သိၣ်တၢ်သီဒီး ဒ်န့ၣ်အသိးတၢ်သိၣ်တၢ်သီတၢ်ဘျၢလၢၦၤမၤတၢ်ကစီၣ်ဖိကဘၣ်လူၤပိာ်မၤထွဲ၀ဲဒၣ်သ့ၣ်တဖၣ်အံၤန့ၣ် လါကဟဲလါမ့ၤ ၃ သီ အနံၤန့ၣ် ကထုးထီၣ်ပာ်ဖျါ၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

(Independent Press Council Myanmar-IPCM)အံၤဘၣ်တၢ်ကရၢကရိဒုးအိၣ်ထီၣ်အီၤဖဲအပူၤကွံာ် ၂၀၂၃ လါဒံၣ်စ့ဘၢၣ်အခါဒီး အတၢ်ပညိၣ်တၢ်မုၢ်လၢ်ခီန့ၣ် ဒ်သိးတၢ်ကသုးထီထီၣ်၀ဲတၢ်သဘျ့ႇ ဟီၣ်က၀ီၤပူၤဒီး ထံဂုၤကီၢ်ဂၤ တၢ်ကစီၣ်ကီၣ်ကးသ့ၣ်တဖၣ်အံၤကဆဲးကျိးဖီၣ်လိာ်စုကန့ၢ်၀ဲဒၣ်အဂီၢ်န့ၣ်လီၤႉ