လါအ့ဖြ့ၣ် ၂၂ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် (သုးက့ ၁) ဖၣ်အၣ်ကီၢ်ဆၣ် ဒူသ၀ီအပူၤ ဖဲလါအ့ဖြ့ၣ် ၂၀ သီ အနံၤ ခီဖျိပယီၤသုးကဘီယူၤ ဟဲခးလီၤတၢ်အဃိၦၤကမျၢၢ်ဘၣ်ဒိ၀ဲဒၣ်(၂)ဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
ဖဲလါအ့ဖြ့ၣ် ၂၀ သီ ဟါခီ ၈း၃၀ တုၤလၢ ၉ နၣ်ရံၣ်ဘျဲၣ်အဆၢကတီၢ်န့ၣ် လၢဖၣ်အၣ်ကီၢ်ဆၣ်အပူၤ ပယီၤသုးကဘီယူၤဟဲတ့ၢ်လီၤ၀ဲမ့ၣ်ပိၢ်လၢ(ဟၣ်တရဲး)ကရူၢ် နိၣ်အီလၢ်ဒီးဖှၣ်ဂီၤသ၀ီႇ မဲၢ်ကနးခံကရူၢ် ထံကၠီၤခံသ၀ီအခိၣ်အဃၢၤဒီး ဖဲန့ၣ်လီၤတဲာ်ပိၢ်ဖးထီၣ်၀ဲလၢထံနုာ်သ၀ီ သီခါဖၠၣ်ကရၢၢ်ပူၤအဃိ ကမျၢၢ်ပိာ်မုၣ် ဘၣ်ဒိ၀ဲဒၣ် ၂ ဂၤအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ
အ၀ဲစံး၀ဲလၢ“ကဘီယူၤန့ၣ်အဟဲကွံာ်လီၤတၢ်ဖဲဖှၣ်ဂီၤ လ့ခီၣ်ထံး နိၣ်အီလၢ်ဒီးတးပီသ၀ီအဘၢၣ်စၢၤဆၢလာ်ႉ ဟဲကွံာ်လီၤ၀ဲတဘျုး၀ီညါႉမ့၀ံၤကွံာ်လီၤ၀ဲဒၣ်လၢ(ထံကၠီၤခံ)ဒီးလၢထံနုာ်သ၀ီပူၤႉကျိဖးဒိၣ်န့ၣ်လီၤတဲာ်၀ဲဒၣ်လၢထံနုာ်သီခါဖၠၣ်ကရၢၢ်ပူၤတဖျၢၣ်ႉ ကျိဖးဒိၣ်အက့အခီန့ၣ်ဘၣ်၀ဲဒၣ်သီခါဖၠၣ်ႇမ့၀ံၤဘၣ်ဒိ၀ဲဒၣ်ၦၤသ၀ီဖိ ၂ ဂၤႉ ဖဲကဘီယူၤ ဟဲကွံာ်လီၤတၢ်အခါအ၀ဲသ့ၣ်လဲၤစံၣ်အိၣ်လၢသီခါဖၠၣ်ဘျီကျိဖးဒိၣ်လီၤတဲာ်အက့ဖျိးဘၣ်အ၀ဲသ့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ
ၦၤသ၀ီဖိကမျၢၢ်လၢအဘၣ်ဒိခံဂၤအံၤန့ၣ်မ့ၢ်၀ဲ ထံကီၠၤခံသ၀ီ မုဂါဖံသါပူး(၈၁)နံၣ် ဒီး မဲၢ်သဲသ၀ီ နီၢ်ခၠံၣ်ခၠံၣ်မူ(၁၀)နံၣ် ကျိဖးဒိၣ်အက့အခီဘၣ်၀ဲဒၣ်အစုအခီၣ်သ့ၣ်တဖၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ
ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ်ဒူသ၀ီလၢကဘီယူၤဟဲခးလီၤတၢ်အံၤအပူၤကွံာ်တၢ်ဒုးတၢ်ယၤကဲထီၣ်တအိၣ်၀ဲဘၣ်ဒီးဒ်န့ၣ်အသိးကဘီယူၤ ဟဲခးလီၤတၢ်ဘျီ၀ဲအံၤကွံာ်လီၤ၀ဲမ့ၣ်ပိၢ်အါမးဒီးဘၣ်ဆၣ်မ့ၢ်အတ့ၢ်လီၤ၀ဲဒၣ်ခဲလၢာ် ၦဲၤဖျၢၣ်လဲၣ်န့ၣ်တၢ်ဃုသ့ၣ်ညါမၤလီၤတံၢ်အီၤအဖၢမုၢ်လီၤအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ
ဒ်န့ၣ်အသိးဘၣ်ဃးကဘီယူၤဟဲခးလီၤတၢ်အံၤန့ၣ် တၢ်ပၢၢ်ဆၢသုးဖိလၢအိၣ်ဘူးဖဲန့ၣ်တဂၤ စံး၀ဲလၢ“တၢ်ဒုးကဲထီၣ် တအိၣ်နီမံၤဘၣ်အဟဲခးလီၤ၀ဲဒ်လဲၣ်န့ၣ်တယးတဘၣ်ဘၣ်ႉကဘီယူၤဟဲခးတၢ်န့ၣ်ၦၤတပလီၢ်သးနီမံၤဘၣ်ႉ ဟဲခးဃီၤတၢ်ဆိမိၣ်၀ဲလၢၦၤသုးဖိအိၣ်ဒ်န့ၣ်ဧါသၢၣ်ႉတၢ်တဘျီညါအံၤခးလီၤ၀ဲဖးအါညါႉအဟဲခးလီၤတၢ်န့ၣ်အဘူးဒီးတးပီသ၀ီလီၤဘၣ်ဆၣ်တၢ်မၢၤအအိၣ်လၢထံကျိ၀ၢ်မုၢ်ထီၣ်တကပၤႉတးပီသ၀ီခီဒုအိၣ်လၢမုၢ်နုာ်တကပၤ”အဂ့ၢ်န့ၣ် စံး၀ဲန့ၣ်လီၤႉ
ပယီၤသုးကဘီယူၤသ့ၣ်တဖၣ်အံၤတချုးလၢအ၀ဲသ့ၣ်ဟဲခးလီၤတၢ်ဒံးဘၣ်အခါန့ၣ်ဟဲဆှၣ်ဃာ်တၢ်အိၣ်၀ဲဒီး ဒ်န့ၣ်အသိးဖဲကဘီယူၤဟဲခးလီၤတၢ်ဘျီ၀ဲအံၤအခါန့ၣ်ၦၤသ၀ီဖိဟးစံၣ်ပလဲာ်သးအိၣ်၀ဲဒီးဘၣ်ဆၣ်ခဲအံၤၦၤသ၀ီဖိ ဟဲက့ၤအိၣ်လၢအဟံၣ်အဃီလံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ
