လါမ့ၤ ၁သီႇ၂၀၂၄နံၣ်ႇ ခ့ၣ်အဲးစံၣ်ႇ
ကီၢ်သူလ့ၤကူၣ်သ့ႇဆူၣ်ချ့ႇစံာ်ၦဲၤသူၣ်ဖျးဒီးၦၤမၤတၢ်ဖိကရၢအကလုာ်ကလုာ်ကထိၣ်ဃူထိၣ်ဖိးသးဒီးဆၢထၢၣ်ဒီတဒၢတြီဆၢသကိးသုးမီၤစိရိၤႇဒီးမီၤစိရိၤၦၤဒိၣ်ကျိၣ်ဒိၣ်စ့လၢအဆီၣ်ထွဲမၤစၢၤ၀ဲသုးမီၤစိရိၤလၢကန့ၢ်စိန့ၢ်ကမီၤတဖၣ်အဂ့ၢ်ကီၢ်သူလ့ၤၦၤမၤတၢ်ဖိကရၢစၢဖှိၣ်(Felicitation Of Trade Unions KawthooLei-FTUK)ဆီၣ်တခူစံး၀ဲလၢအလံာ်ဟ့ၣ်ယုၢ်အပူၤႇဖဲတနံၤအံၤလါမ့ၤ(၁)သီႇလၢအလီၤဘၣ်၀ဲဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအံၤန့ၣ်လီၤႉ
ကီၢ်သူလ့ၤၦၤမၤတၢ်ဖိကရၢစၢဖှိၣ်အလံာ်ဟ့ၣ်ယုၢ်အပူၤစံး၀ဲလၢ“မီၤစိရိၤၦၤဒိၣ်ကျိၣ်ဒိၣ်စ့လၢအဖီၣ်ပျံၤႇဆီၣ်ထွဲမၤစၢၤ၀ဲသုးမီၤစိရိၤလၢတၢ်လီၢ်ခံတဖၣ်အံၤမ့ၢ်၀ဲတၢ်နိးတၢ်ဘျးလၢႇထံကီၢ်အတၢ်လဲၤထီၣ်လဲၤထီအဂီၢ်ဒီးႇမ့ၢ်၀ဲသူၣ်ဘီၣ်သးစၢ်တဖၣ်အဒုၣ်အဒါအသိးႇမ့ၢ်စ့ၢ်ကီး၀ဲၦၤမၤတၢ်ဖိႇထံဖိကီၢ်ဖိဃုာ်ဒီးထံကီၢ်ဒီတဘ့ၣ်ကမျၢၢ်တဖၣ်အဒုၣ်အဒါအဃိႇလၢ ပတၢ်ခွဲးတၢ်ယာ်အဂီၢ်ပကဘၣ်ဂဲၤလိာ်ႇဂဲၤဆၢထၢၣ်ဒီတဒၢတြီဆၢသကိးလၢကျဲအကလုာ်ကလုာ်အဂ့ၢ်’’ပာ်ဖျါ၀ဲလၢအလံာ်ဟ့ၣ်ယုၢ်အပူၤန့ၣ်လီၤႉ
လၢန့ၣ်အမဲာ်ညါႇကီၢ်သူလ့ၤကူၣ်သ့ႇဆူၣ်ချ့ႇစံာ်ၦဲၤသူၣ်ဖျးၦၤမၤတၢ်ဖိကရၢဒီးၦၤမၤတၢ်ဖိကရၢကရိလၢကအိၣ်ဖျဲၣ်ထီၣ်ကဒီး၀ဲလၢကီၢ်သူလ့ၤအပူၤတဖၣ်ႇကဘၣ်သ့ၣ်နီၣ်မၤလၤကပီၤ၀ဲဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအံၤအသိးန့ၣ်ႇကဘၣ်ပၣ်ဃုာ်ဂဲၤလိာ်သကိး၀ဲလၢၦၤမၤတၢ်ဖိဒီးထံဖိကီၢ်ဖိတဖၣ်ကထူၣ်ဖျဲးထီၣ်ကွံာ်လၢသုးမီၤစိရိၤသနူလၢအမၢဆူၣ်မၢစိးအီၣ်တူာ်အီၣ်ကလီၤ၀ဲကမျၢၢ်ထံဖိကီၢ်ဖိတဖၣ်လၢကျဲကလုာ်ကလုာ်အဂီၢ်အဂ့ၢ်ပာ်ဖျါ၀ဲလၢလံာ်ဟ့ၣ်ယုၢ်အပူၤစ့ၢ်ကီးန့ၣ်လီၤႉ
တကးဒံးဘၣ်ႇသဲစးလၢသုးမီၤစိရိၤဒီးမီၤစိရိၤတဖၣ်အနီၢ်ကစၢ်ဒၣ်၀ဲကွဲးထုးထီၣ်၀ဲဒီးကိး၀ဲလၢသဲးစးတၢ်သိၣ်တၢ်သီတဖၣ်အံၤန့ၣ်မ့ၢ်၀ဲသဲးစးအယီၤအဘျၣ်ႇလၢအမၤလီၤမၢ်ကွံာ်၀ဲၦၤထူလံၤဖိတဖၣ်အတၢ်န့ၢ်ပၢဘၣ်ဟီၣ်ခိၣ်ကပံာ်အဃိကူၣ်သ့ဆူၣ်ချ့ဒီးၦၤမၤတၢ်ဖိလၢတူၢ်ဘၣ်၀ဲမီၤစိရိၤသနူတဖၣ်ဘၣ်အိၣ်မူ၀ဲလၢတၢ်ကီတၢ်ခဲအါမံၤအပူၤအဂ့ၢ်လံာ်ဟ့ၣ်ယုၢ်အပူၤပာ်ဖျါ၀ဲန့ၣ်လီၤႉ
တကတီၢ်ဃီႇသုးကီၣ်ကးကိး၀ဲလၢသဲးစးဒီးႇစံး၀ဲလၢထံဖိကီၢ်ဖိကမျၢၢ်သူၣ်စၢ်သးဘီၣ်တဖၣ်ကဘၣ်ကဲ၀ဲသုးအသဲးစးအံၤန့ၣ်ႇမ့ၢ်၀ဲတၢ်မၢဆူၣ်မၢစိးတမံၤလၢအယီၢ်တံၢ်မၤသဘှံးကွံာ်၀ဲၦၤသူၣ်ဘီၣ်သးစၢ်တဖၣ်အတၢ်အိၣ်မူဒီးခါဆူညါထံကီၢ်ၦၤလုၢ်ဒိၣ်ၦ့ၤဒိၣ်တဖၣ်အတၢ်အိၣ်မူကီၢ်သူလ့ၤၦၤမၤတၢ်ဖိကရၢစၢဖှိၣ်စံးစ့ၢ်ကီး၀ဲဒၣ်န့ၣ်လီၤႉ
ဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအံၤႇမ့ၢ်၀ဲမုၢ်နံၤတနံၤလၢၦၤမၤတၢ်ဖိခဲလၢာ်သ့ၣ်နီၣ်ထီၣ်မၤလၤကပီၤ၀ဲၦၤမၤတၢ်ဖိတဖၣ်အတၢ်ဂဲၤလိာ်ႇအတၢ်တူၢ်ဆါခီၣ်ဆါသးႇတၢ်ဟ့ၣ်လီၤနီၢ်ခိနီၢ်သးဂံၢ်ဘါသွံၣ်ထံႇလၢတၢ်ကထူၣ်ဖျဲးထီၣ်၀ဲလၢၦၤဒိၣ်ကျိၣ်ဒိၣ်စ့တဖၣ်အတၢ်မၢဆူၣ်မၢစိးႇတၢ်အီၣ်တူာ်အီၣ်ကလီၤအကလုာ်ကလုာ်အစုပူၤန့ၣ်လီၤႉ
ဒ်န့ၣ်အသိးႇဟီၣ်ခိၣ်ဒီၣ်ဖျၢၣ်ၦၤမၤတၢ်ဖိအမုၢ်နံၤအံၤမ့ၢ်စ့ၢ်ကီး၀ဲတၢ်သ့ၣ်နီၣ်မၤလၤကပီၤက့ၤၦၤမၤတၢ်ဖိတဖၣ်အတၢ်ဂဲၤလိာ်ႇတၢ်ဃူတၢ်ဖိးလၢအဟဲစိာ်၀ဲတၢ်မၤနၢၤလၢၦၤမၤတၢ်ဖိတဖၣ်ကိးဂၤအဂီၢ်အဂ့ၢ်လံာ်ဟ့ၣ်ယုၢ်အပူၤပာ်ဖျါ၀ဲန့ၣ်လီၤႉ
