ကၠဲးထိၣ်ကီၢ်ဆၣ် တနံၤဃီတကတီၢ်ဃီအတီၢ်ပူၤပယီၤသုးခးလီၤကျိဖးဒိၣ်အဃိ ဟံၣ်ဟးဂီၤ ၆ ဖျၢၣ်

လါမ့ၤ ၁ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲအပူၤကွံာ်လါအ့ဖြ့ၣ် ၂၈ သီ လၢတနံၤဃီတၢ်ဆၢ်ကတီၢ်တကတီၢ်ဃီအတီၢ်ပူၤ ခီဖျိပယီၤသုးခးလီၤကျိဖးဒိၣ်အဃိ ၦၤကမျၢၢ်အဟံၣ်အဃီ ဟးဂီၤ ၀ဲဒၣ် ၆ ဖျၢၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ

ဖဲလါအ့ဖြ့ၣ် ၂၈ သီ ဟါခီ ၉း၄၅ တၢ်ဆၢကတီၢ်တကတီၢ်ဃီအပူၤန့ၣ် သုးကီၣ်ကးအမျိာ်သုး(၃၁၀)လၢအိၣ် ကၠဲးထိၣ်ကီၢ်ဆၣ် သ့ၤစ့ၤယၣ်အံၤတဖၣ် ခးလီၤ၀ဲကျိဖးဒိၣ်(၂)ဖျၢၣ်ဒီး ပယီၤသုးလၢပကိကီၢ်ခီ ၀ီကီၢ်ဆၣ်မုၢ်ထီၣ် ကွ့ၣ်ကၠံသီခါဖၠၣ်လီၢ်ခံပျီပူၤအံၤတဖၣ်ခးလီၤစိ၀ဲကျိဖးဒိၣ်(၅)ဖျၢၣ်ဆူကၠဲးထိၣ်ကီၢ်ဆၣ်ပူၤ လီၤတဲာ်ပိၢ်ဖးထီၣ်၀ဲဒၣ်လၢ (ခယွဲသ၀ီ) ထ့တဲက၀ီၤဒ့ပူၤက၀ီၤဒ့ချၢအဃိ ဟံၣ်ဘၣ်ဟးဂီၤ၀ဲဒၣ်ဒ်အံၤလီၤအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲန့ၣ်လီၤႉ

အ၀ဲစံး၀ဲလၢ“ဒုၣ်ဒါအမျိာ်သုး(၃၁၀)န့ၣ်အိၣ်၀ဲဒၣ်ဖဲကၠဲးထိၣ်ကီၢ်ဆၣ် သ့ၤစ့ၤယၣ်မီၤနီၤ ခးလီၤ၀ဲဒၣ်ကျိဖးဒိၣ်(၂)ဖျၢၣ်ႉ မ့၀ံၤပယီၤသုးလၢအိၣ်ပကိကီၢ်ခီန့ၣ်ခးလီၤ၀ဲဒၣ်(၅)ဖျၢၣ်ႉခဲလၢာ်ခး၀ဲဒၣ်(၇)ဖျၢၣ်ႉတၢ်နွံဖျၢၣ်အံၤန့ၣ်လီၤတဲာ်၀ဲဒၣ်ဖဲ (ခယွဲသ၀ီ)ထ့တဲက၀ီၤဒ့အခိၣ်အဃၢၤဒီးသ၀ီပူၤန့ၣ်လီၤမီၤနီၤႉလီၤတဲာ်လၢသ၀ီပူၤဘျီဘၣ်၀ဲဒၣ်ၦၤကမျၢၢ်ဟံၣ်ၦၤဟံၣ်ဟးဂီၤႉခးလီၤ၀ဲဒၣ်န့ၣ်တနံၤဃီတၢ်ဆၢကတီၢ်တဘျီဃီလီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါဒူသ၀ီတၢ်လီၢ်လၢပယီၤသုးခးလီၤကျိဖးဒိၣ်အံၤန့ၣ်တၢ်ဒုးတၢ်ယၤကဲထီၣ်တအိၣ်၀ဲဒၣ်ဘၣ်ဒီး ဒ်န့ၣ်အသိးအပူၤကွံာ်ပယီၤသုးခးလီၤကျိဖးဒိၣ်အိၣ်ထီဘိလီၤဒီးခီဖျိၦၤကမျၢၢ်တဖၣ်ဟးစံၣ်ပလဲာ်ဆိဃာ်သးအဃိ ကျိဖးဒိၣ်လီၤတဲာ်ဘျီ၀ဲအံၤတၢ်သံတၢ်ဘၣ်ဒိဘၣ်ထံးတအိၣ်၀ဲဒၣ်ဘၣ်အဂ့ၢ်န့ၣ် ပဒိၣ်စီၤအ့နဲၤ စံး၀ဲအသိးသ့ၣ်ညါ ဘၣ်န့ၣ်လီၤႉ

တၢ်လၢပကိကီၢ်ခီ ၀ီကီၢ်ဆၣ်ဒီး ကၠဲးထိၣ်ကီၢ်ဆၣ်အံၤန့ၣ်အဘၢၣ်စၢၤအိၣ်၀ဲဒၣ် ကိာ်လိာ်ကျိ ထံကျိတခီတ၀ၢ်၀ၢ် လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

ဒ်န့ၣ်အသိးဒူသထူၣ်ကီၢ်ရ့ၣ် သထူၣ်ကီၢ်ဆၣ်ဒီးဘံလ့ကီၢ်ဆၣ်အပူၤ စးထီၣ်ဖဲလါမးရှးတုၤဃီၤလၢလါအ့ဖြ့ၣ် ဘူးကလၢာ်န့ၣ် တၢ်ဒုးကဲထီၣ်တအိၣ်ခီဖျိပယီၤသုးခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်လၢဒူသ၀ီပူၤအဃိ ၦၤကမျၢၢ်သံဘၣ်ဒိဘၣ်ထံးႇကၠိတၢ်သူၣ်ထီၣ်ဃုာ်ဒီးၦၤကမျၢၢ်အဟံၣ်အဃီဟးဂီၤတကးဒံးဘၣ်တၢ်မုၢ်တၢ်ဘိႇရီဘၢၣ်ကျီးသ့ၣ်တဖၣ်အူအီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ