တၢ်ဒုးကဲထီၣ်တအိၣ်ပယီၤသုးခးလီၤကျိဖးဒိၣ်အဃိ ကမျၢၢ်သံ(၂)ဂၤႇ ဘၣ်ဒိ(၅)ဂၤ

လါမ့ၤ ၂၆ သီႇ ၂၀၂၄ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ ဖဲလါမ့ၤ ၂၄ သီအနံၤန့ၣ် ပယီၤသုးလၢအိၣ်ဘံလ့၀့ၢ် က၀ီၤဒ့(၈) မၠ့ၤသၤတီၤကျိဖးဒိၣ်လူၢ်တဖၣ်အံၤ ခးလီၤ၀ဲကျိဖးဒိၣ်ဆူသထူၣ်ကီၢ်ဆၣ်ဒူသ၀ီပူၤအဃိ ကမျၢၢ်သံ၀ဲဒၣ်(၂)ဂၤဒီး ဘၣ်ဒိ၀ဲဒၣ်(၅)ဂၤ အဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါစံး၀ဲန့ၣ်လီၤႉ

သထူၣ်ကီၢ်ဆၣ်အပူၤ ဖဲလါမ့ၤ ၂၄ သီ ဂီၤခီ ၁၀း၃၀ အဆၢကတီၢ် ပယီၤသုး(ခလရ-၈)ခးလီၤကျိဖးဒိၣ်(၅)ဖျၢၣ် လီၤတဲာ်ပိၢ်ဖးထီၣ်၀ဲဒၣ်လၢဖယါစ့ၣ််ကရူၢ် သထ့ကိသ၀ီပူၤအဃိ ၦၤကမျၢၢ်သံဘၣ်ဒိဘၣ်ထံးဘၣ်ဟဲကဲထီၣ်အသး ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ၦၤကမျၢၢ်လၢအသံ(၂)ဂၤန့ၣ်မ့ၢ်၀ဲ သထ့ကိသ၀ီဖိလၢအမ့ၢ် ကိၤယဲလ့ထ့(၃၀)နံၣ်ဒီး မၣ်မိမိ(၃၅)နံၣ်အံၤဒီး မ့မ့ၢ်ၦၤလၢအဘၣ်ဒိဘၣ်ထံး(၅)ဂၤန့ၣ်မ့ၢ်၀ဲ မးအ့မံၣ်စၤႇမးမ့ၤစူၣ်မိၤႇမးပါအံၣ်စၤႇအူထိမၠ့ၣ်ႇဖိနၣ်သံသ့ၣ်တဖၣ်ဒီး ၦၤဒိအကျါပၣ်ဃုာ်၀ဲဖိသၣ်(၁)ဂၤအဂ့ၢ်န့ၣ် ဒူသထူၣ်ကီၢ်ရ့ၣ် တၢ််မၤနီၣ်စရီပူၤ အသိးသ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါလၢကျိဖးဒိၣ်အံၤအဃိၦၤကမျၢၢ်အဟံၣ်အဃီဘၣ်ဟးဂီၤ၀ဲဒၣ်(၁၀)ဖျၢၣ်ဒီး ဒ်အသိးတဟါဃီဖဲဟါခီ ၆ နၣ်ရံၣ်ဘျဲၣ်အဆၢကတီၢ်စ့ၢ်ကီး ခီဖျိသုးကီၣ်ကးအမျိာ်သုး(၃၁၄)လၢအိၣ်ထံၣ်ဖိညၣ်လံၣ်အံၤ ခးလီၤစ့ၢ်ကီး၀ဲ ကျိးဖဒိၣ်(၅)ဖျၢၣ် လီၤတဲာ်ပိၢ်ဖးထီၣ်၀ဲဒၣ်လၢစွ့ၣ်ယီၣ်ပၠၤသ၀ီအခိၣ်အဃၢၤအဃိတၢ်မုၢ်တၢ်ဘိသ့ၣ်တဖၣ်ဟးဂီၤ ၀ဲဒၣ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

သုးကီၣ်ကးအံၤတၢ်ဒုးကဲထီၣ်မ့ၢ်ဂ့ၤႇတကဲထီၣ်ဘၣ်မ့ၢ်ဂ့ၤအ၀ဲသ့ၣ်ခးလီၤကျိဖးဒိၣ်ဆူဒူပူၤသ၀ီပူၤထီဘိလီၤဒီး ခီဖျိကျိဖးဒိၣ်အံၤအဃိၦၤကမျၢၢ်တဖၣ်ဘၣ်ဒိၣ်လၢတၢ်ပျံၤတၢ်ဖုးတၢ်ဘၣ်ယိၣ်အပူၤတကးဒံးဘၣ်ၦၤဖံးအီၣ်မၤအီၣ် တချုးစ့ၢ်ကီး၀ဲဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ

အ၀ဲစံး၀ဲလၢ“သုးကီၣ်ကးတဖုအံၤပမ့ဘၣ်ကွၢ်န့ၣ်တၢ်ဒုးကဲထီၣ်သးမ့ၢ်ဂ့ၤ၊တကဲထီၣ်ဘၣ်မ့ၢ်ဂ့ၤန့ၣ်ပာ်ပနီၣ်ထံဖိကီၢ်ဖိကမျၢၢ်ဒ်တၢ်ခးပနီၣ်ဒီးကွံာ်လီၤ၀ဲဒၣ်ကျိဖးဒိၣ်ဆူဒူသ၀ီတဖၣ်အပူၤထီဘိလီၤႉကွံာ်လီၤဒီးမုၢ်နၤမုၢ်ဆါႇကမျၢၢ်တဖၣ် န့ၣ်ဘၣ်အိၣ်ဒီးတၢ်ပျံၤတၢ်ဖုးတၢ်ဘၣ်ထီဘိ၀ံၤဘျီန့ၣ်ဖံးအီၣ်မၤအီၣ်တချုးႇမ့၀ံၤကွၢ်ဆၢၣ်မဲာ်ဘၣ်အီအီတလၢတၦဲၤႇ မုၢ်ကျိၤ၀ဲၤကွာ်စ့ၢ်ကီးလီၤတူာ်လီၤကာ်၀ဲဒၣ်ႉပဒူသထူၣ်ကီၢ်ရ့ၣ်(သုးက့ ၁)အံၤပမ့ဘၣ်ကွၢ်ၦၤကမျၢၢ်တဖၣ် ဘၣ်အိၣ်ဒီး တၢ်ပျံၤတၢ်ဖုးထီဘိလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ

လၢန့ၣ်အမဲာ်ညါသုးကီၣ်ကး(ခလရ-၈)သုးရ့ၣ်အံၤညီနုၢ်ခးလီၤ၀ဲဒၣ်ကျိဖးဒိၣ်ဆူကရူၢ်(၃)ဘ့ၣ်ပူၤလၢအမ့ၢ် ကဒံၣ်ပူၤကရူၢ်ႇဃိၣ်တန့ကရူၢ်ဒီးတီၤယၤကရူၢ် ဒူသ၀ီသ့ၣ်တဖၣ်အံၤအပူၤ ထီဘိလီၤအဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤႉ

ဒ်န့ၣ်အသိးသထူၣ်ကီၢ်ဆၣ်ပူၤ ဖဲမဟါလါမ့ၤ ၂၅ သီ မုၢ်ဃ့ၢ်လီၤအဆၢကတီၢ်စ့ၢ်ကီး ပယီၤသုး(၃၁၄)သုးရ့ၣ် ခးလီၤစ့ၢ်ကီး၀ဲဒၣ်ကျိဖးဒိၣ်(၃)ဖျၢၣ် လီၤတဲာ်ပိၢ်ဖးထီၣ်၀ဲဒၣ်လၢနီၣ်ကတိးသ၀ီဃၢၤဒီး အခါဖဲန့ၣ်မ့ၢ်လၢၦၤကမျၢၢ် လ့ၢ်ထီၣ်လ့ၢ်လိၤတအိၣ်ဘၣ်အဃိတၢ်သံတၢ်ဘၣ်ဒိဘၣ်ထံးတအိၣ်၀ဲဒၣ်ဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ