လါမ့ၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် သထူၣ်ကီၢ်ဆၣ်အပူၤ တၢ်လဲၤမၤလီၤၦီၢ်တပျဲကျိတိၤ ၀ံၤလီၢ်ခံ ပယီၤသုးက့ၤခးလီၤကဒါကျိဖးဒိၣ်တပယူာ်ဃီဒီး ခီဖျိကျိဖးဒိၣ်အံၤအဃိ ကမျၢၢ်သံ၀ဲဒၣ်(၂)ဂၤႇ ဘၣ်ဒိ(၄)ဂၤ အကျါပၣ်ဃုာ်၀ဲဒၣ်ဖိသၣ်(၂)ဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
ဖဲအပူၤကွံာ်လါမ့ၤ ၁၁ သီ ဂီၤခီ ၂ နၣ်ရံၣ်ဘျဲၣ်အဆၢကတီၢ်န့ၣ် တၢ်လဲၤမၤပိၢ်ဖးထီၣ်၀ဲဒၣ်တပျဲကျိတိၤလၢအိၣ်၀ဲဒၣ် ဖဲသထူၣ်ကီၢ်ဆၣ်ဒီးဘံလ့ကီၢ်ဆၣ်အဘၢၣ်စၢၤ ၀့ၢ်တကူၣ်-မီၣ်လမၠဲၣ်ကျဲအံၤဒီး ဖဲန့ၣ်၀ံၤတကတီၢ်ဃီဖဲဂီၤခီ ၇ နၣ်ရံၣ် ဃၣ်ဃၣ်အဆၢကတီၢ် သုးကီၣ်ကးအမျိာ်သုး(၃၁၄)က့ၤခးလီၤကဒါ၀ဲကျိဖးဒိၣ်လၢဒူသ၀ီပူၤအဃိ ၦၤကမျၢၢ်သံ ဘၣ်ဒိ ဘၣ်ထံးကဲထီၣ်အသးဒ်အံၤလီၤအဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ
ဘၣ်ဃးတၢ်ဂ့ၢ်ကဲထီၣ်သးအံၤ ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲလၢ“စးထီၣ်လၢ ၁၀ သီ တုၤလၢခဲအံၤန့ၣ် ပယီၤသုးခးစိ၀ဲဒၣ်ကျိဖးဒိၣ်ဆူဒူသ၀ီပူၤကိးမုၢ်နၤကိးမုၢ်ဆါလီၤႉ သုးကီၣ်ကးတဖုအံၤအတၢ်ဒိသူၣ်ဒိသးလၢ ကမျၢၢ် ထံဖိကီၢ်ဖိအဖီခိၣ်တအိၣ်ဘၣ်ႉတၢ်ဒုးကဲထီၣ်သးမ့ၢ်ဂ့ၤႇတကဲထီၣ်သးဘၣ်မ့ၢ်ဂ့ၤန့ၣ်ခးစိကျိဖးဒိၣ်ဆူဒူသ၀ီပူၤထီဘိ အဃိဘၣ်သံ၀ဲဒၣ်ၦၤကမျၢၢ်ထံဖိကီၢ်ဖိႇဘၣ်ဟးဂီၤကမျၢၢ်အဟံၣ်အဃီတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ
သုးကီၣ်ကးအမျိာ်သုး(၃၁၄)လၢအခးလီၤကျိဖးဒိၣ်အံၤအိၣ်ဆီလီၤအသးဘူး၀ဲဒၣ်ဒီးတပျဲကျိတိၤထဲဒၣ်တတၢၣ်လီၤ ဒီးဒ်န့ၣ်အသိးပယီၤသုးခးလီၤကျိဖးဒိၣ်ဘျီ၀ဲအံၤလီၤတဲာ်ပိၢ်ဖးထီၣ်၀ဲလၢလါအီၣ်ဃၢၤသ၀ီပူၤ(၅) ဖျၢၣ်ႇ သ၀ီဃၢၤ ၂ ဖျၢၣ်ဒီး ဖဲန့ၣ်တံစီၣ်မ့ထိဒီးအမါနီၢ်မၠးသ့အံၤသံ၀ဲဒၣ်ဒီးၦၤဒီမါ၀ံၤခံဂၤအံၤအဖိမုၣ်လၢအမ့ၢ် နီၢ်ဖၠူၤဖၠူၤ(၁၀)နံၣ်ႇ နီၢ်မုၣ်ခၠံးခၠံး(၄)နံၣ် ခံဂၤအံၤဃုာ်ဒီးတံမီၤကၠံႇမုဂါစ့ၤစ့ၤသ့ၣ်တဖၣ်အံၤဘၣ်ဒိ၀ဲဒၣ်ဒီးကျိဖးဒိၣ်အက့အခီအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ
လၢန့ၣ်အမဲာ်ညါခီဖျိလၢကျိဖးဒိၣ်အံၤအဃိဟံၣ်တၢ်သူၣ်ထီၣ်ဟးဂီၤလီၤၦီၢ်၀ဲဒၣ်(၂)ဖျၢၣ်ဒီးဒ်န့ၣ်အသိးဟံၣ်အဂုၤအဂၤ လၢအဘၣ်၀ဲဒၣ်ဒီးကျိဖးဒိၣ်အက့အခီတဆံးတက့ၢ်စ့ၢ်ကီးအိၣ်၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါအ့ဖြ့ၣ် ၂၅ သီအနံၤန့ၣ်စ့ၢ်ကီး သုးကီၣ်ကးအမျိာ်သုးတဒူၣ်ဃီ၀ဲအံၤခးလီၤ၀ဲဒၣ်ကျိဖးဒိၣ် အဃိ မယါကိ(မရမ်းကုန်း)သ၀ီဖိပိာ်ခွါဘၣ်ဒိ၀ဲဒၣ်နးနးတဂၤဒံးဒီးလၢန့ၣ်အမဲာ်ညါကျိဖးဒိၣ်အက့အခီဘၣ်၀ဲဒၣ် ၦၤဟံၣ်ၦၤဃီ (၈)ဖျၢၣ်ဒီးရီဘၢၣ်ကျီးအူအီၣ်ကွံာ်၀ဲဒၣ်တဘ့ၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
