လါမ့ၤ ၁၈ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ်အပူၤ ဖဲမဟါလါမ့ၤ ၁၇ သီ တနံၤဃီအတီၢ်ပူၤ ပယီၤသုးခးလီၤကျိဖးဒိၣ်(၉)ဖျၢၣ်အဃိ ကမျၢၢ်ဘၣ်ဒိ(၁)ဂၤဒီးဟံၣ်ဟးဂီၤ၀ဲဒၣ်(၄)ဖျၢၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ ဆှၢထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤႉ
သထူၣ်ကီၢ်ဆၣ်ပူၤ ဖဲလါမ့ၤ ၁၇ သီ ဂီၤခီ ၁၁ နၣ်ရံၣ်ဘျဲၣ်အဆၢကတီၢ် ပယီၤသုးခီၣ်သုးရ့ၣ်(ခမရ-၉)လၢအိၣ် ၀့ပၣ်သ၀ီပူၤသ့ၣ်တဖၣ်အံၤ ခးလီၤ၀ဲဒၣ်ကျိဖးဒိၣ်(၃)ဖျၢၣ်လီၤတဲာ်ပိၢ်ဖးထီၣ်၀ဲလၢ(သုံးအိမ်စု)သ၀ီပူၤ ၂ ဖျၢၣ်အဃိ ကျိဖးဒိၣ်အက့အခီဘၣ်၀ဲဒၣ်စီၤညၣ်ထူ(၁၅)နံၣ်အံၤဒီးကမျၢၢ်အဟံၣ်ဟးဂီၤ၀ဲဒၣ်(၂)ဖျၢၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ်ပူၤ အသိးသ့ၣ်ညါဘၣ်န့ၣ်လီၤႉ
ဒ်န့ၣ်အသိးတကတီၢ်ဃီဖဲဟါခီ ၅ နၣ်ရံၣ်အဆၢကတီၢ် သုးကီၣ်ကးအမျိာ်သုး(၃၁၄)လၢအိၣ်ထံဖိညၣ်လံၣ်အံၤ ခးလီၤစ့ၢ်ကီး၀ဲကျိဖးဒိၣ်(၆)ဖျၢၣ်လီၤတဲာ်ပိၢ်ဖးထီၣ်၀ဲလၢစွ့ၣ်ယီၣ်ပၠးသ၀ီပူၤ(၁)ဖျၢၣ်ဒီးသ၀ီချၢ(၅)ဖျၢၣ်အဃိ ကမျၢၢ်ဟံၣ်ဟးဂီၤ၀ဲဒၣ်(၂)ဖျၢၣ် တၢ်ထူၣ်တၢ်ဘိစ့ၢ်ကီးဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါဖဲတၢ်တနံၤဃီ၀ဲအံၤ ဖဲမုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ် ပယီၤသုး(ခလရ-၈)လၢအိၣ် ဘံလ့တိၤတဖၣ်အံၤ ခးလီၤကျိဖးဒိၣ် ၃ ဖျၢၣ် ဆူကၠဲးထိၣ်ကီၢ်ဆၣ် ဒူသ၀ီပူၤအဃိ ဖိ၀ါသ့ၤသ၀ီဖိ စီၤထူကပီၤ (ကိး)စီၤထူထူ ၁၄ နံၣ်အံၤ ကျိဖးဒိၣ်အက့အခီဘၣ်အီၤဒီး ဒ်န့ၣ်အသိးဟံၣ်ဘၣ်၀ဲဒၣ်ဒီးကျိဖးဒိၣ် အက့အခီတဖျၢၣ်ႇ တၢ်ဟးလီၢ်လီၤၦီၢ်၀ဲဒၣ်တဖျၢၣ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သထူၣ်ကီၢ်ဆၣ်အပူၤ သုးကီၣ်ကးအမျိာ်သုး(၃၁၄)ဒီး(ခမရ-၉)သုးရ့ၣ်နီၣ်ဂံၢ်လၢအိၣ်ဖျါတၢ်ဖီခိၣ်သ့ၣ်တဖၣ်အံၤ စးထီၣ်ဖဲတၢ်လဲၤမၤပိၢ်ဖးထီၣ်တပျဲကျိတိၤ၀ံၤလီၢ်ခံတုၤလၢခဲအံၤတစုန့ၣ်အ၀ဲသ့ၣ်ခးလီၤ၀ဲဒၣ်ကျိဖးဒိၣ်တလီၢ်လီၢ်ဆူ ဒူပူၤသ၀ီပူၤအဃိၦၤကမျၢၢ်ဘၣ်ဃ့ၢ်ထီၣ်ႇဘၣ်သံဘၣ်ဒိဘၣ်ထံးဒီးဟံၣ်တၢ်သူၣ်ထီၣ်စ့ၢ်ကီးဟးဂီၤကဲထီၣ်သးတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
