လါမ့ၤ ၇ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကရ့ၣ်နံၣ်ကီၢ်စဲၣ် ဖါဆီကီၢ်ဆၣ်ဒီးဘီၤလခဲကီၢ်ဆၣ်အဘၢၣ်စၢၤ ဖဲမဟါလါမ့ၤ ၆ သီအနံၤန့ၣ် ကရ့ၣ်နံၣ်တၢ်ပၢၢ်ဆၢသုး ပာ်ဖှိၣ်ခးလီၤတဲာ်၀ဲဒၣ်သုးကီၣ်ကးအကဘီယူၤတဘ့ၣ်ဒီး ဖဲန့ၣ်တၢ်သံတၢ်ဘၣ်ဒိဘၣ်ထံး အိၣ်၀ဲအဂ့ၢ်န့ၣ် Karenni Nationalities Defense Force(KNDF) စံး၀ဲန့ၣ်လီၤႉ
ဖဲမဟါဂီၤခီ ၁၁ နၣ်ရံၣ်ဃၣ်ဃၣ်အဆၢကတီၢ်န့ၣ် သုးကီၣ်ကးအကဘီယူၤလၢအဟဲထီၣ်(စစ်ကူ)လၢဖါဆီ၀့ၢ်အံၤ ကရ့ၣ်နံၣ်တၢ်ပၢၢ်ဆၢသုးပာ်ဖှိၣ်ခးလီၤတဲာ်ကွံာ်၀ဲလီၤတဲာ်၀ဲဒၣ်လၢဘီလခဲကီၢ်ဆၣ်ပူၤဒီးဘၣ်ဆၣ်မ့မ့ၢ်တၢ်သံတၢ်ဘၣ်ဒိဘၣ်ထံးနီၣ်ဂံၢ်န့ၣ်မၤလီၤတံၢ်တန့ၢ်ဒံးဘၣ်အဂ့ၢ်န့ၣ် (KNDF)တၢ်ဘိးဘၣ်ရၤလီၤမူဒါခိၣ် စီၤတၢ်အဲၣ်စိ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“မ့ၢ်လီၤဖဲမဟါလါမ့ၤ ၆ သီအနံၤန့ၣ် သုးကီၣ်ကးအကဘီယူၤလၢအဟဲဖဲဖါဆီ၀့ၢ်အံၤ ကရ့ၣ်နံၣ် တၢ်ပၢၢ်ဆၢ သုးပာ်ဖှိၣ်ခးလီၤတဲာ်ကွံာ်၀ဲဒၣ်မီၤနီၤႉကဘီယူၤလၢအလီၤတဲာ်တဘ့ၣ်အံၤပသ့ၣ်ညါဘၣ်လၢအ လီၤတဲာ် ၀ဲဒၣ်လၢဘီလခဲ ကီၢ်ဆၣ်အပူၤလီၤႉဖဲကဘီယူၤလီၤတဲာ်အခိၣ်အဃၢၤန့ၣ်ကဘီယူၤလၢအဂၤတဘ့ၣ်ဟဲမၤစၢၤတၢ်မီၤနီၤႉတကးဒံးဘၣ်ဖဲကဘီယူၤလီၤတဲာ်အခိၣ်အဃၢၤန့ၣ်တၢ်ဒုးကဲထီၣ်၀ဲဒၣ်လၢခံခီခံကပၤအဘၢၣ်စၢၤႉကဘီယူၤလီၤတဲာ် ဘျီ၀ဲအံၤသုးကီၣ်ကး တကပၤသံဘၣ်ဒိဘၣ်ထံးအိၣ်ဘၣ်ဆၣ်အသံဘၣ်ဒိဘၣ်ထံးနီၣ်ဂံၢ်န့ၣ်ပပာ်ဂၢၢ်ပာ်ကျၢၤမၤလီၤတံၢ်အီၤတန့ၢ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ
ဘၣ်ဃးကရ့ၣ်နံၣ်တၢ်ပၢၢ်ဆၢသုးပာ်ဖှိၣ်ခးလီၤတဲာ်သုးကီၣ်ကးအကဘီယူၤတၢ်ဂ့ၢ်ဘျီ၀ဲအံၤန့ၣ် ပထံၣ်ဘၣ်လၢသုး ကီၣ်ကးတကပၤထုးထီၣ်ပာ်ဖျါတၢ်ကစီၣ်လီၤလီၤဆီဆီတအိၣ်နီမံၤဒံးဘၣ်န့ၣ်လီၤႉ
ဒ်န့ၣ်အသိး(၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ကလုာ်ဒူၣ်တၢ်ပၢၢ်ဆၢသုးပာ်ဖှိၣ်ဒီး(PDF)ခးလီၤတဲာ်၀ဲဒၣ် သုးကီၣ်ကးအကဘီယူၤအိၣ်လံ၀ဲ(၇)ဘ့ၣ်ဒီးမ့ပာ်ဖှိၣ်ဒီးခဲအံၤတဘ့ၣ်န့ၣ်အိၣ်၀ဲဒၣ်ခဲလၢာ်(၈)ဘ့ၣ်လံအဂ့ၢ်န့ၣ် တၢ်ကစီၣ်သန့ပာ်ဖျါထီၣ်၀ဲအသိးသ့ၣ်ညါဘၣ်န့ၣ်လီၤႉ
ကရ့ၣ်နံၣ်တၢ်ပၢၢ်ဆၢသုးပာ်ဖှိၣ်အံၤလၢကထီၣ်မၤန့ၢ်၀ဲဖါဆီ၀့ၢ်အံၤအဂီၢ်ဖဲလါမ့ၤ ၄ သီအနံၤန့ၣ် နုာ်လီၤခး၀ဲဒၣ် သုးကီၣ်ကးအခီၣ်သုးရ့ၣ်(ခလရ-၁၃၄)ဒီး(ခလရ-၁၃၅)သုးရ့ၣ်အံၤဒီးဖဲန့ၣ်တၢ်ဒုးကဲထီၣ်၀ဲဒၣ်လၢခံခီခံကပၤ အဘၢၣ်စၢၤအိၣ်၀ဲကိးမုၢ်နံၤဒဲးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကးဒံးဘၣ်လၢန့ၣ်အမဲာ်ညါသုးကီၣ်ကးအံၤဒ်သိးအ၀ဲသ့ၣ်သုတဘၣ်ဟ့ၣ်ဆှူကွံာ်အသုးကလၢၤတဂ့ၤအဂီၢ်န့ၣ် သူ၀ဲဒၣ်ကဘီယူၤဟဲခးလီၤတၢ်လၢပျီပူၤတပယူာ်ဃီတုၤလၢခဲအံၤတစုအဂ့ၢ်န့ၣ် (KNDF)ၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ
