လါမ့ၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်က၀ီၤအပူၤ လါမ့ၤ ၁၅ သီ အတီၢ်ပူၤ တၢ်ဒုးကဲထီၣ်၀ဲ(၄၆)ဘျီဒီးဖဲန့ၣ်ပယီၤသုးတကပၤသံ၀ဲဒၣ်(၁၇)ဂၤႇဘၣ်ဒိ(၇)ဂၤအဂ့ၢ်န့ၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲမဟါလါမ့ၤ ၁၆ သီအနံၤန့ၣ်လီၤႉ
(သုးက့ ၅)ဟီၣ်က၀ီၤ စးထီၣ်တလါအံၤလါမ့ၤ ၁ သီတုၤလၢ ၁၅ သီအနံၤ တၢ်ဒုးကဲထီၣ်၀ဲဒၣ်လၢဟီၣ်က၀ီၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အၦၤဒီးပယီၤသုးအဘၢၣ်စၢၤအဃိ ပယီၤသုးတကပၤ သံဘၣ်ဒိဘၣ်ထံးကဲထီၣ်အသးဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဒ်မုၢ်တြီၢ်တၢ်ကစီၣ်လံာ်တၢ်ပာ်ဖျါပူၤပာ်ဖျါ၀ဲအသိးန့ၣ် ခံခီခံကပၤတၢ်ဒုးကဲထီၣ်အခါန့ၣ် သုးကီၣ်ကးတကပၤ သူ၀ဲဒၣ်ကဘီယူၤႇသူ၀ဲဒၣ်ဒြိဟးတ့ၢ်လီၤ၀ဲဒၣ်မ့ၣ်ပိၢ်လၢလီၢ်က၀ီၤကမျၢၢ်ဒူသ၀ီတၢ်အိၣ်တၢ်ဆိးတၢ်ဖံးအီၣ်မၤအီၣ် လီၢ်ကျဲကအိၣ်လၢကိးမုၢ်နံၤဒဲးဃၣ်ဃၣ်အဃိ ၦၤကမျၢၢ်အဟံၣ်ဟးဂီၤ၀ဲဒၣ်(၁၅)ဖျၢၣ်ဒီးဘၣ်ဟးဂီၤ၀ဲဒၣ်ဘုဖီတဖျၢၣ် အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိး(သုးက့ ၅)ဟီၣ်က၀ီၤအပူၤ ဖဲအပူၤကွံာ်လါအ့ဖြ့ၣ်ဒီတလါအတီၢ်ပူၤစ့ၢ်ကီး ပယီၤသုးဒီး(KNLA) သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲဒၣ်(၁၇၅)ဒီးဖဲန့ၣ်ပယီၤသုးသံ၀ဲ(၆၄)ဂၤႇဘၣ်ဒိ၀ဲဒၣ်(၃၅)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါတ့ၢ်၀ဲအသိးသ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါခီဖျိ(သုးက့ ၅)အၦၤဒီၣ်တဲာ်ကွံာ်၀ဲဒၣ်ပယီၤသုးအတၢ်အီၣ်တၢ်အီကျဲဒီးလဲၤက၀ီၤခး၀ဲဒၣ် ပယီၤသုးလၢဒြိမ့ၣ်ပိၢ်တလီၢ်လီၢ်အဃိ ပယီၤသုးအံၤဂုၤလီၢ်ခံကၢတီၢ်ဟးထီၣ်ကွံာ်၀ဲဒၣ်အသုးကလၢၤပူၤစ့ၢ်ကီး ဟဲအါထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤလီၢ်ခံဒုးယၤတၢ်သဘံၣ်သဘုၣ်ကဲထီၣ်၀ဲဒၣ်လၢကီၢ်ပယီၤခူပူၤ၀့ၢ်ပူၤႇ ကလုာ်ဒူၣ်ဖီၣ်စုက၀ဲၤ အဟီၣ်က၀ီၤတၢ်လီၢ်အါတီၤအပူၤဒီးဒ်န့ၣ်အသိးတုၤလၢခဲအံၤတစုတၢ်ဒုးအံၤတလီၤကယး ၀ဲဒၣ်ဘၣ်ဒီးမ့မ့ၢ်တခီဆဲးကဲ ထီၣ်ဒံး၀ဲဒၣ်အဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
