လါမ့ၤ ၁၇သီႇ ၂၀၂၄နံၣ်ႇ ခ့ၣ်အဲးစံၣ်ႇ
ဖဲလါမ့ၤ(၁၄)သီအနံၤန့ၣ် ကီၢ်ပယီၤကလုာ်ဒူၣ်ခိၣ်နၢ်လၢအထီဒါ၀ဲသုးကီၣ်ကးတဖၣ် လဲၤထံၣ်လိာ်သးဒီး ကီၢ်ယပၣ်ထံဂုၤကီၢ်ဂၤ၀ဲၤကျိၤ ကိာ်တိာ်ခိၣ်-၂ KOMURA Masahiro ဒီးဖဲန့ၣ်အဆၢကတီၢ် (KNU) ကညီဒီကလုာ်စၢဖှိၣ်ကရၢဃ့ထီၣ်၀ဲယပၣ်ပဒိၣ်ဃုာ်ဒီးသိၣ်မှံၤထံကီၢ်တဖၣ် လၢကဟ့ၣ်တၢ်ဆီၣ်သနံး ဆူ သုးကီၣ်ကးအအိၣ်အဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် ပဒိၣ်စီၤကွဲၤထူ၀့ စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတနံၤအံၤလါမ့ၤ(၁၇)သီအနံၤန့ၣ်လီၤႉ
တၢ်လဲၤထံၣ်လိာ်သးဒီးကီၢ်ယပၣ်ထံဂုၤကီၢ်ဂၤ၀ဲၤကျိၤ ကိာ်တိာ်ခိၣ်-၂ ဘျီ၀ဲအံၤအတၢ်ပညိၣ်မ့ၢ်ဒ်သိး တၢ်ကသ့ၣ်ညါဘၣ်၀ဲကီၢ်ပယီၤထံရုၢ်ကီၢ်သဲး တၢ်အိၣ်သးဒီးကလုာ်ဒူၣ်အတၢ်မိၣ်န့ၢ်သးလီတဖၣ်ဒီးတကးဒံးဘၣ်အမဲာ်ညါဃ့ထီၣ်ယပၣ်ပဒိၣ်ဃုာ်ဒီးဒီးသိၣ်မှံၤထံကီၢ်သ့ၣ်တဖၣ်လၢကဟ့ၣ်တၢ်ဆီၣ်သနံးဆူ သုးကီၣ်ကးတဖၣ်အံၤအအိၣ်လၢကသ့ဆိမိၣ်တဲသကိးတၢ်လၢခါဆူညါထံရူၢ်ကီၢ်သဲးတၢ်ဆီတလဲအဂ့ၢ်န့ၣ် (KNU)ကရၢခိၣ် ပဒိၣ်စီၤကွဲၤထူ၀့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“ပတၢ်လဲၤထံၣ်လိာ်သးခီန့ၣ်တၢ်ပညိၣ်မ့ၢ်၀ဲဒ်သိးပကပာ်ဖျါထီၣ်ကီၢ်ပယီၤထံရုၢ်ကီၢ်သဲးအတၢ်အိၣ်သးႇဒီးပထံၣ်လိာ်န့ၣ်တမ့ၢ်ပထံၣ်လိာ်ထဲပဒိၣ်တဖၣ်ဘၣ်ပထံၣ်လိာ်တ့ၢ်ဒီးဘျီၣ်ဒိၣ်ခၢၣ်စးကိာ်တိၤခိၣ်ခံဂၤတဂၤလၢအမၤသကိးတၢ်ဒီးအ့ရှၢၣ်သ့ၣ်တဖၣ်လီၤႉတၢတမံၤန့ၣ်ပပာ်ဖျါထီၣ်၀ဲဒၣ်ကီၢ်ပယီၤအတၢ်ဂ့ၢ်ကီအံၤန့ၣ်မ့ၢ်၀ဲထံရုၢ်ကီၢ်သဲးအတၢ်ဂ့ၢ်ကီဒီးၦၤလၢဒုးအိၣ်ထီၣ်၀ဲတၢ်ဂ့ၢ်ကီသ့ၣ်တဖၣ်အံၤန့ၣ်မ့ၢ်၀ဲသုးအၦၤဘၣ်မူဘၣ်ဒါတဖၣ်အဃိတၢ်သ့ၣ်တဖၣ်အံၤကလုာ်ဒူၣ်ဒီးထံဖိကီၢ်ဖိတတူၢ်လိာ်ဘၣ်အဖီခိၣ်ဂဲၤဆၢထၢၣ်ဒီဒါက့ၤ၀ဲႇဒီးပပာ်ဖျါစ့ၢ်ကီး၀ဲလၢပကဘၣ်သူၣ်ထီၣ်ဖဲၣ်ဒရဲၣ်ကီၢ်စၢဖှိၣ်တံၢ်နီၢ်န့ၣ်လီၤႉ
ခံမံတမံၤန့ၣ်ပပာ်ဖျါ၀ဲလၢသုးန့ၣ်ကအိၣ်လၢထံရုၢ်ကီၢ်သဲးအတၢ်တီခိၣ်ရိၢ်မဲဒ်သိးအက့ၢ်အဂီၤလၢအဟ့ၣ်စိဟ့ၣ်ကမီၤတၢ်အခဲအံၤန့ၣ်ပတူၢ်လိာ်၀ဲတန့ၢ်ဘၣ်ႇသုးအတၢ်မၤဘၣ်ထွဲအသးဒီးထံရုၢ်ကီၢ်သဲးန့ၣ်ကဘၣ်ပတုာ်ကွံာ်၀ဲဖဲစိၤအခဲအံၤလီၤႉသၢခါတခါန့ၣ်သုးတဖုအံၤလၢအမၤကမၣ်တ့ၢ်ၦၤဟီၣ်ခိၣ်ဖိခွဲးယာ်တဖၣ်အံၤတၢ်ဆီတလဲအဆၢကတီၢ်ဒ်သိးတၢ်တီတၢ်တြၢ်ကအိၣ်ထီၣ်အဂီၢ်အ၀ဲသ့ၣ်ကဘၣ်ဟ့ဟံမူဟံဒါဒီးပဃ့ထီၣ်စ့ၢ်ကီးယပၣ်ထံကီၢ်ပဒိၣ်ကိာ်တိၤၦၤမူဘၣ်ဒါတဖၣ်လၢကဘၣ်မၤသကိးတၢ်ဒီးထံကီၢ်အသိၣ်မှံၤလၢကဟ့ၣ်တၢ်ဆီၣ်သနံးဆူသုးကီၣ်တဖၣ်အံၤအအိၣ်ဒ်သိးကသ့ဆိကမိၣ်တဲသကိးတၢ်လၢခါဆူညါထံကီၢ်တၢ်အိၣ်သးအဂီၢ်”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါပာ်ဖျါထီၣ်ဃုာ်စ့ၢ်ကီး၀ဲကတီၢ်ယံာ်ထံရူၢ်ကီၢ်သဲးတၢ်ဂ့ၢ်ကီအတၢ်ကျဲၤဘၣ်တၢ်အစၢတဖၣ်အသိးႇကတီၢ်ဖုၣ်ကမျၢၢ်ဂ့ၢ်၀ီအဂီၢ်ပာ်ဖျါ၀ဲ ကညီကီၢ်စဲၣ် သုးက့(၇)အပူၤ လီၢ်အိၣ်ကဒုဖိအကလီၢ်(၁၀)ဘျဲၣ်အတၢ်အိၣ်မူတၢ်ကီတၢ်ခဲတၢ်သ့ၣ်တဖၣ်ဆူယပၣ်ပဒိၣ်ဒီးကိတိာ်ၦၤဘၣ်မူဘၣ်ဒါ တဖၣ်အအိၣ်ဒ်သိးကၠီၣ်တဲၣ်ကဟ့ၣ်၀ဲတၢ်တိစၢၤမၤစၢၤအဂ့ၢ်န့ၣ် ပဒိၣ် စီၤကွဲၤထူ၀့ စံးအါထီၣ်၀ဲန့ၣ်လီၤႉ
တကးဒံးဘၣ်ႇတၢ်လဲၤထံၣ်လိာ်သးဘျီ၀ဲအံၤအပူၤ ယပၣ်ထံကီၢ်ပဒိၣ်ဃုာ်ဒီးကိတိာ်ခိၣ်နၢ်တဖၣ်အံၤအိၣ်ဒီးတၢ်သးစၢၢ်ဆၢလၢကီၢ်ပယီၤထံရုၢ်ကီၢ်သဲး တၢ်ဂ့ၢ်အဖီခိၣ်ဒီးယပၣ်ကီၢ်ပဒိၣ်သ့ၣ်တဖၣ်အံၤတမ့ၢ်လၢအတူၢ်လိာ်ပာ်ပနီၣ်၀ဲသုးကီၣ်ကးတဖုအံၤအတၢ်ဖံးတၢ်မၤဘၣ်အဂ့ၢ်န့ၣ် ပဒိၣ် စီၤကွဲၤထူ၀့ စံး၀ဲအသိးသ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါယပၣ်ထံကီၢ်ကိတိာ်ခိၣ်နၢ်တဖၣ်အဲၣ်ဒိး၀ဲဒၣ်လၢကီၢ်ပယီၤအံၤကဟဲက့ၤကဒါက့ၤလၢဒံၣ်မိၣ်ကရ့ၣ်စံၣ်အကျဲနီၢ်နီၢ်ဒီး အဲၣ်ဒိး၀ဲဒၣ်လၢၦၤလၢအဘၣ်ထွဲဘၣ်ဃးတဖၣ်ကထံၣ်လိာ်ကတိၤတၢ်အဃိဒ်သိးတၢ်ထံၣ်လိာ်ကတိၤတၢ်ကအိၣ်အဂီၢ်တသ့ဖဲအသ့ကဂုာ်ကျဲးစၢး ဆီၣ်ထွဲ၀ဲလၢသနၢၣ်ဒၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ကရၢခိၣ် ပဒိၣ်စီၤကွဲၤထူ၀့ စံး၀ဲဒၣ်န့ၣ်လီၤႉ
ဖဲတၢ်လဲၤထံၣ်လိာ်သးဒီးကီၢ်ယပၣ်ထံဂုၤကီၢ်ဂၤ၀ဲၤကျိၤ ကိာ်တိာ်ခိၣ်-၂ ဘျီ၀ဲအံၤန့ၣ်ႇ (KNU) ကရၢခိၣ် ပဒိၣ်စီၤကွဲၤထူ၀့ႇ ဒီကလုာ်တၢ်ဃူတၢ်ဖိးပဒိၣ် (NUG)ကူၣ်သ့ဒီးဆူၣ်ချ့ကိတိာ်ခိၣ် စီၣ်၀့ၤစိႇခၠီဒီကလုာ်သုးမုၢ်(CNF)အနဲၣ်ရွဲၣ်ခိၣ်ကျၢၢ် စလဲသလၣ်ဟဲႇ ကရ့ၣ်နံၣ်တၢ်ပၢၢ်ဆၢကရူၢ်ကရၢခၢၣ်စးႇ ရခၢၣ်ၦၤဂ့ၢ်၀ီကရူၢ်ကရၢခၢၣ်စးဃုာ်ဒီးတလၢၤၦၤဂ့ၢ်၀ီကရူၢ်ကရၢခၢၣ်စးသ့ၣ်တဖၣ်ပၣ်ဃုာ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
