လါမ့ၤ ၂ သီႇ ၂၀၂၄ နံၣ်ႇ ခ့ၣ်အဲးစံၣ်
(Medic)ကသံၣ်တၢ်မၤလိလၢခ့ၣ်အဲၣ်ယူၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးကသံၣ်၀ဲၤဒ့ ဒီး ထၢၣ်၀ံချၢဆူၣ်ချ့ကရၢ(BPHWT)ပာ်ဖှိၣ်အိးထီၣ်၀ဲအံၤန့ၣ် ကတီၢ်ခဲအံၤၦၤဖျိထီၣ်အိၣ်တုၤ၀ဲဒၣ်လၢ(၁၂၀)ဂၤလံဒီး ဖဲမဟါလါမ့ၤ ၁ သီအနံၤန့ၣ် တၢ်မၤ၀ဲတၢ်ပျၢ်တၢ်မၤလိမူးတၢ်ရဲၣ်တၢ်ကျဲၤအံၤဖဲ(သုးက့ ၇)ဟီၣ်က၀ီၤပူၤအဂ့ၢ်န့ၣ် သ့ၣ်ညါဘၣ် န့ၣ်လီၤႉ
ဖဲအပူၤကွံာ်(၂၀၂၂-၂၀၂၃)အတီၢ်ပူၤအခါန့ၣ်တၢ်မၤ၀ဲတၢ်ပျၢ်(Medic)ကသံၣ်တၢ်မၤလိ(၁)တ၀ီႇ(၂)၀ီတ၀ီအံၤဒီး ဖဲမဟါလါမ့ၤ ၁ သီအနံၤန့ၣ် တၢ်မၤကဒီး၀ဲတၢ်ပျၢ်(၃)၀ီတ၀ီ (Medic)ကသံၣ်တၢ်မၤလိအံၤဒီးခဲအံၤခီဖျိၦၤဖျိထီၣ် ကဒီး၀ဲဒၣ်(၄၀)ဂၤအဃိ တၢ်သၢဒူၣ်အံၤမ့ပာ်ဖှိၣ်ခဲလၢာ်န့ၣ်ၦၤဖျိထီၣ်၀ဲအိၣ်(၁၂၀)ဂၤလံအဂ့ၢ်န့ၣ် ထၢၣ်၀ံချၢဆူၣ်ချ့ကရၢ (BPHWT) ၦၤနဲၣ်တၢ် သရၣ်စီၤ၀့ကၠီၤ စံး၀ဲန့ၣ်လီၤႉ
“(Medic)တၢ်မၤလိအံၤပအိးထီၣ်၀ဲ(၂၀၂၂-၂၃-၂၄)ပူၤအံၤကဲထီ၀ဲဒၣ် ၃ ၀ီလံမီၤနီၤႉ လၢတၢတ၀ီအခါန့ၣ် ၦၤဖျိထီၣ် အဂၤ(၄၀)ႉမ့ပာ်ဖှိၣ်ဒီးမဟါတၢ်ပျၢ်ကၠိတကရူၢ်အံၤခဲလၢာ်ခဲအိၣ်၀ဲဒၣ်(၁၂၀)လံမီၤႉတၢ်မၤလိန့ၣ်တံာ်တာ်၀ဲ ဒၣ်(၁၂)လါႉ ၦၤသိၣ်န့ၢ်အ၀ဲသ့ၣ်(သံၤအိၤရံၤ)ခီန့ၣ်(၈)လါဒီးဘၣ်လီၤ(ဖရဲၣ်ထံၣ်ခၢၣ်)လၢကျိၣ်ယီၢ်လ့ဒီးမဲၢ်တီတၢ်ဆါဟံၣ်န့ၣ်(၄)လါမီၤနီၤႉၦၤလၢအဖျိထီၣ်တဖၣ်န့ၣ်ဘၣ်က့ၤမၤစၢၤတၢ်လၢအ၀ဲသ့ၣ်ဟီၣ်က၀ီၤပူၤလီၤႉၦၤကထီၣ်(Medic)တၢ်မၤလိအဂီၢ်န့ၣ်ပဃုထၢထီၣ်ၦၤကညီလၢအစှၤကတၢၢ်ကဘၣ်ဖျိဃာ်၀ဲဂံၢ်ခီၣ်ထံးကသံၣ်တၢ်မၤလိ(၆)လါမီၤနီၤႉမ့၀ံၤလၢပျီပူၤန့ၣ်တၢ်လဲၤခီဖျိကဘၣ်အိၣ်တနံၣ်မ့တမ့ၢ်ခံနံၣ်၀ံၤမးအထီၣ်၀ဲသ့ မီၤနီၤႉ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါသုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိထံလီၢ်ကီၢ်ပူၤတၢ်ဒုးတၢ်ယၤကဲထီၣ်ဒီးၦၤဘၣ်ဃ့ၢ်မှံဟးဖျိး အနီၣ်ဂံၢ်ဟဲအါထီၣ်အဃိလၢတၢ်ကူစါယါတကပၤစ့ၢ်ကီးလီၤစှၤဖးဒိၣ်ညါအဂ့ၢ်န့ၣ် သရၣ် စီၤ၀့ကၠီၤ စံးအါထီၣ်၀ဲန့ၣ် လီၤႉ
“ပထံပကီၢ်ပူၤန့ၣ်တၢ်ဒုးတၢ်ယၤအါမ့၀ံၤၦၤဘၣ်ဃ့ၢ်မှံဟးဖျိးစ့ၢ်ကီးအါႉ၀ံၤဒီးခဲအံၤခီဖျိ(CDM)တၢ်ဂ့ၢ်ကဲထီၣ်ဘျီ တၢ်ကူစါ ယါဘျါကသံၣ်သရၣ်သ့ၣ်တဖၣ်န့ၣ်လီၤတိၢ်လီၤစှၤဖးဒိၣ်ညါမီၤနီၤႉအါန့ၢ်အန့ၣ်န့ၣ်လီၤဆီဒၣ်တၢ်လၢပကီၢ်သူလ့ၤဟီၣ်က၀ီၤန့ၣ်ၦၤဃ့ၢ်မှံဟးဖျိးအိၣ်(၈၀၀၀၀၀)ဘျဲၣ်လံန့ၣ်ခ့ၣ်အဲၣ်ယူၣ်တဲ၀ဲဒ်န့ၣ်မီၤနီၤႉအဃိန့ၣ်တၢ်ကူစါယါဘျါ တၢ်ကွၢ်ၦၤဆါ အပတီၢ်ထီတဖၣ်န့ၣ်လိၣ်အါမးလီၤႉခဲအံၤကသံၣ်တၢ်မၤလိပျၢ်လံအဃိခါဆူညါနါက့ပတၢ်တိာ်ပာ်အိၣ်လၢပကကဆဲးအိးထီၣ်တၢ်မၤလိအစှၤကတၢၢ်တနံၣ်တဘျီမီၤနီၤႉ”အဂ့ၢ်န့ၣ် စံး၀ဲန့ၣ်လီၤႉ
(Medic)ကသံၣ်တၢ်မၤလိဘျီ၀ဲအံၤအပူၤန့ၣ် ကညီကလုာ်ဃုာ်ဒီးပလီၣ်ႇခၠီႇကလုာ်ဒူၣ်လၢအဂၤတဖၣ်စ့ၢ်ကီး ဟဲထီၣ်၀ဲဒၣ်အိၣ်အဂ့ၢ်န့ၣ် (BPHWT)ၦၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ် န့ၣ်လီၤႉ
နီၢ်ဖီကပီၤစိ လၢအဖျိထီၣ်၀ဲဒၣ်(Medic)ကသံၣ်တၢ်မၤလိ ၃ ၀ီတ၀ီအံၤ စံး၀ဲလၢ“ပဖျိထီၣ်၀ံၤန့ၣ်ပကက့ၤမၤစၢၤ က့ၤ တၢ်လၢပၦၤကလုာ်အဂီၢ်မီၤနီၤႉယဖျိထီၣ်တဘျီအံၤယသးခုဖးဒိၣ်ညါဘၣ်မနုၤအဃိလဲၣ်န့ၣ်ယတဆိကမိၣ်လၢ ယကထီၣ် ဘၣ်တၢ်မၤလိအံၤဘၣ်ႉခါဆူညါယကမၤစၢၤက့ၤတၢ်လၢယၦၤကလုာ်အဂီၢ်လၢပဟီၣ်က၀ီၤပူၤန့ၣ်ၦၤဘၣ်ကီဘၣ်ခဲဖိသ့ၣ်တဖၣ်အိၣ်စ့ၢ်မီၤနီၤႉယကမၤစၢၤအ၀ဲသ့ၣ်လၢတၢ်အိၣ်ဆူၣ်အိၣ်ချ့တကပၤဒ်န့ၣ်မီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
တၢ်မၤ၀ဲဒၣ်တၢ်ပျၢ်(Medic)ကသံၣ်တၢ်မၤလိမူးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ် စီၤကျၢၤစ့ႇ ခ့ၣ်အဲၣ်ယူၣ် လီၢ်ခၢၣ်သး စံၣ်ညီၣ်ကွီၢ်ခိၣ်ကျၢၢ် ပဒိၣ်နီၢ်မၠဲၤဖိႇ (KNLA)လီၢ်ခၢၣ်သးသုးကသံၣ်၀ဲၤဒ့ႇ (BPHWT) ဒီးကရ့ၣ်နံၣ်ဒီကလုာ်ဃူဖိးကရၢ( KNSO)ၦၤဘၣ်မူဘၣ်ဒါဃုာ်ဒီးၦၤစံၣ်လီၤတၢ်မၤလိဖိခဲလၢာ် ဟဲထီၣ်၀ဲဒၣ်(၇၀)ဂၤ ဃၣ်ဃၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ
