လါယူၤ ၆ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကီးတရံး၀့ၢ်ပူၤ ကၠိတနီၤန့ၣ်သုးကီၣ်ကးဟ့ၣ်တၢ်ဆီၣ်သနံးလၢ ကအိးထီၣ်ကဒါက့ၤအဂ့ၢ်န့ၣ် ၦၤလၢအဘူးဒီးသုးကီၣ်ကးအကၠိတဖၣ်စံး၀ဲန့ၣ်လီၤႉ
ကီးတရံး၀့ၢ်ပူၤခီဖျိဒုးယၤတၢ်အိၣ်သးတဂၢၢ်တကျၢၤဒံးဘၣ်အဃိ ၦၤကမျၢၢ်က့ၤအိၣ်လၢအဟံၣ်အဃီ တအိၣ်ခဲလၢာ်ဒံးဘၣ်ဒီးဒ်န့ၣ်အသိး တနံၣ်အံၤတၢ်မၤလိနံၣ်အဂီၢ် ၦၤကၠိဖိဟဲဆဲးလီၤမံၤအိၣ်စှၤကိာ်ဖိလီၤဒီး ဘၣ်ဆၣ် သုးကီၣ်ကးမၢၦၤအိးထီၣ်န့ၢ်ဆူၣ်ကၠိသ့ၣ်တဖၣ်အဂ့ၢ်န့ၣ် ၦၤလၢအဘူးဒီးသုးကီၣ်ကး အကၠိတဖၣ် စံး၀ဲဒ်အံၤန့ၣ်လီၤႉ
“မ့မ့ၢ်လၢနီၣ်ဂံၢ်(၁)တီၤထီကၠိခီန့ၣ်တအိးထီၣ်တသ့ဘၣ်အဃိၦၤဟဲက့ၤထီၣ်ကၠိႉ ၀့ကၠံကၠိန့ၣ် ဟဲပာ်ဖှီၣ်က့ၤဒီး နီၣ်ဂံၢ်(၁)တီၤထီကၠိအဃိၦၤကၠိဖိခဲလၢာ်အိၣ်အဂၤ (၁၀၀)ဘျဲၣ်ႉ ကၠိလၢအဂၤတဖၣ်န့ၣ်မ့ၣ်အူအီၣ်၀ဲအိၣ်စ့ၢ်ႉ ခီဖျိၦၤကၠိဖိတအိၣ်ဘၣ် အဃိအိးထီၣ်ကၠိတသ့ဘၣ်နါက့အိၣ်စ့ၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
ကီးတရံး၀့ၢ်ပူၤ ၦၤကမျၢၢ်လၢအဃ့ၢ်ထီၣ်တဖၣ်က့ၤအိၣ်လၢ၀့ၢ်ပူၤအိၣ်၀ဲတနီၤဒီးဘၣ်ဆၣ် ခီဖျိတၢ်အိၣ်သးတဂၢၢ် တကျၢၤဒံးဘၣ်အဃိ ၦၤကမျၢၢ်လၢအတက့ၤအိၣ်ဒံးလၢ၀့ၢ်ပူၤ အိၣ်ဒံး၀ဲအဖီခိၣ် ခီဖျိသုးကီၣ်ကးတဲပျံၤလၢ ကဟံဆူၣ်ကွံာ်အ၀ဲသ့ၣ်တၢ်စုလီၢ်ခီၣ်ခိၣ် အဃိၦၤကမျၢၢ်က့ၤအိၣ်ကဒါအိၣ်၀ဲတနီၤ အဂ့ၢ်န့ၣ် ကီးတရံးကမျၢၢ်လၢ အမၤစၢၤၦၤဃ့ၢ်မှံ ဟးဖျိးတဂၤ စံးဘၣ်တ့ၢ်ဃာ်ခ့ၣ်အဲးစံၣ်-ကညီတၢ်ကစီၣ် ဖဲလါမ့ၤအပူၤန့ၣ်လီၤႉ
ကီးတရံး၀့ၢ်ပူၤတကီၢ်ခါခဲအံၤလၢကက့ၤနုာ်လီၤအိၣ်အဂီၢ်တၢ်ဘံၣ်တၢ်ဘၢတအိၣ်ဒံး၀ဲဘၣ်အဃိ ၦၤကမျၢၢ်လၢ အတၢ်ကီတၢ်ခဲအိၣ်လၢကစးစံၣ်ဟးဃ့ၢ်တဖၣ်က့ၤအိၣ်၀ဲဒီး ဒ်န့ၣ်အသိးကၠိတဖၣ်အါဒၣ်တက့ၢ်မ့ၢ်လၢ ၦၤကၠိဖိတအိၣ်ဘၣ်အဃိတၢ်အိးထီၣ်တသ့ဘၣ် အဂ့ၢ်န့ၣ် ကၠိဖိမိၢ်ပၢ်လၢအိၣ်၀့ၢ်ပူၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“နကက့ၤအိၣ်အဂီၢ်တၢ်ဘံၣ်တၢ်ဘၢတအိၣ်လီၤတံၢ်လီၤဆဲးဒံးဘၣ်ႉကက့ၤပာ်ဖိလၢကၠိအဂီၢ်ဒု တညီဘၣ်ႉၦၤလၢအက့ၤအိၣ်တဖၣ်န့ၣ်ခီဖျိအ၀ဲသ့ၣ်ဟးစံၣ် အိၣ်တၢ်ကီတၢ်ခဲအိၣ်အဃိအ၀ဲသ့ၣ်က့ၤအိၣ်လီၤႉ ဘၣ်ဆၣ်မ့မ့ၢ်ၦၤကၠိဖိထီၣ်ကၠိဒု ကအိၣ်စှၤလီၤႉကၠိတဖၣ်အါဒၣ်တက့ၢ်န့ၣ်ခီဖျိၦၤကၠိဖိတအိၣ်ဘၣ်အဃိၦၤအိးထီၣ် တသ့ဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ကီးတရံး၀့ၢ်ပူၤခီဖျိတၢ်ဒုးတၢ်ယၤကဲထီၣ်အဃိ ဖဲ(၂၀၂၃-၂၀၂၄)နံၣ်အခါန့ၣ် ကၠိလၢအိၣ်သုးကီၣ်ကးစုတီၤ ဖီလာ်တဖၣ် တမၤလိဘၣ်တၢ်တုၤ လၢနံၣ်ကတၢၢ်ဘၣ်ဒီးဒ်န့ၣ်အသိးတနံၣ်အံၤတၢ်အိၣ်သးနးဒိၣ်ထီၣ်ဒိၣ် န့ၢ်အပူၤကွံာ်အဃိတုၤလၢခဲအံၤၦၤကၠိဖိဟဲဆဲးလီၤမံၤအိၣ်စှၤကိာ်ဖိလီၤအဂ့ၢ်န့ၣ် ကီးတရံးကမျၢၢ်တဖၣ် စံး၀ဲန့ၣ်လီၤႉ
ကီးတရံး၀့ၢ်ပူၤအံၤက၀ီၤဒ့အိၣ်၀ဲဒၣ်(၇)ဘ့ၣ်ဒီး တီၤထီကၠိအိၣ်၀ဲဒၣ်(၅)ဖျၢၣ်လၢအမ့ၢ် နီၣ်ဂံၢ်(၁)တီၤထီကၠိႇ နီၣ်ဂံၢ်(၂)တီၤထီကၠိႇ ခၠီတီၣ်တီၤထီကၠိႇ တီၤပီၤယၣ် တီၤထီကၠိ ဒီး ၀့ကၠံတီၤထီကၠိဒီး တကီၢ်ခါခဲအံၤ မ့မ့ၢ်လၢ နီၣ်ဂံၢ်(၁)တီၤထီကၠိဒီး၀့ကၠံတီၤထီကၠိခီန့ၣ် က့ၤပာ်ဖှိၣ်အိးထီၣ်၀ဲတပူၤဃီအသိး နီၣ်ဂံၢ်(၂)တီၤထီကၠိ စ့ၢ်ကီး တၢ်အိးထီၣ်၀ဲဒီးခၠီတီၣ်ကၠိစ့ၢ်ကီးလၢတၢ်ကအိးထီၣ်က့ၤအီၤအဂီၢ်တၢ်ရဲၣ်တၢ်ကျဲၤအီၤအဖၢမုၢ်ဘၣ်ဆၣ် မ့မ့ၢ်လၢတီၤပီၤယၣ်တီၤထီကၠိအံၤခီန့ၣ်မ့ၣ်အူအီၣ်တ့ၢ်ဃာ် ၀ဲအဃိတၢ်အိးထီၣ်၀ဲတသ့ဘၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ
တနံၣ်အံၤတၢ်မၤလိနံၣ်အဂီၢ် ကၠိလၢအိၣ်သုးကီၣ်စးစုတီၤဖီလာ်တဖၣ်န့ၣ် ၦၤကၠိဖိဆဲးလီၤမံၤ အနီၣ်ဂံၢ်ခဲလၢာ် အိၣ်၀ဲ(၆ႉ၃)ကကွဲၢ်ဘျဲၣ်ဒီး ဘၣ်ဆၣ်အပူၤကွံာ်မဟိန့ၣ် ၦၤကၠိဖိဆဲးလီၤမံၤအိၣ်၀ဲ(၆ႉ၄၇)ကကွဲၢ် ဘျဲၣ်အဃိ တနံၣ်အံၤမ့ထိၣ်သတြီၤဒီး မဟိန့ၣ်ၦၤကၠိဖိနီၣ်ဂံၢ်စှၤလီၤ၀ဲဒၣ်အဂၤ(၈၀၀၀၀)ဘျဲၣ်ညါအဂ့ၢ်န့ၣ် သုးကီၣ်ကး ထုးထီၣ်ပာ်ဖျါ၀ဲန့ၣ်လီၤႉ
