လါယူၤ ၄ သီႇ ၂၀၂၄ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲလါယူၤ ၂ သီ အနံၤန့ၣ် တၢ်ပၢၢ်ဆၢသုးပာ်ဖှိၣ်လဲၤခးစဲးပြဲး၀ဲဒၣ်ပယီၤသုးကလၢၤတၢ်လီၢ်သ့ၣ်တဖၣ်ဒီး ဖဲန့ၣ်ခီဖျိပယီၤသုးက့ၤ ခးလီၤကဒါ ကျိဖးဒိၣ်ဆူသ၀ီပူၤအဃိကမျၢၢ်ပိာ်မုၣ်ဘၣ်ဒိ ၁ ဂၤ ဒီး ဟံၣ်ဟးဂီၤ၀ဲဒၣ် ၂ ဖျၢၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲ န့ၣ်လီၤႉ
ဖဲလါယူၤ ၂ သီ ဂီၤခီ ၇း၃၀ အဆၢကတီၢ် သုးကီၣ်ကးအမျိာ်သုး(၃၁၀)သုးရ့ၣ်၀ဲၤလီၢ်ခိၣ်သ့ၣ်လၢအိၣ် သ့ၤစ့ၤယၣ်အံၤဒီး ခီၣ်ချ့သုးရ့ၣ်(ခမရ-၂၀၇)လၢအိၣ်၀ါဒၣ်ကွ့သ့ၣ်တဖၣ်အံၤ ကညီဒီကလုာ်တၢ်ထူၣ်ဖျဲး သုးမုၢ်ဒိၣ်(KNLA) သုးပာ်ဖှိၣ် လဲၤခးစဲးပြဲး၀ဲဒီး ဖဲန့ၣ်ပယီၤသုးသ့ၣ်တဖၣ်အံၤ က့ၤခးလီၤကဒါကျိဖးဒိၣ် အဖျၢၣ်(၃၀)ဘျဲၣ်ဆူလီၢ်က၀ီၤသ၀ီပူၤသ၀ီချၢအဃိ ၦၤကမျၢၢ်ဘၣ်ဒိၦၤဟံၣ်ၦၤဃီဘၣ်ဟးဂီၤကဲထီၣ်၀ဲဒၣ်ဒ်အံၤ လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢကျိဖးဒိၣ်အံၤအဃိ မိၣ်ခမီၣ်သ၀ီ ဒီၣ်ခ့ၤလ့ယံၤ(၂၆)နံၣ်လၢအိၣ်ဒီီးဟုးသးအံၤဘၣ်၀ဲဒၣ်အခီၣ်ညါသး တကးဒံးဘၣ်စ့ၣ်ကွ့သ၀ီ အူသါထွ့ဒီးအူန့ၢ်မၠိ ၂ ဂၤအံၤအဟံၣ်အဃီလီၤၦီၢ်ဟးဂီၤ၀ဲဒၣ်အဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါစံး၀ဲန့ၣ်လီၤႉ
ဘၣ်ဃးတၢ်ဂ့ၢ်ကဲထီၣ်သးအံၤန့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤစံး၀ဲလၢ“စးထီၣ်ဖဲဲလါယူၤ ထီၣ်အံၤန့ၣ်သထူၣ်ကီၢ်ဆၣ်၊ကၠဲးထီၣ်ကီၢ်သ့ၣ်တဖၣ်အံၤန့ၣ်ပယီၤသုးခးလီၤ၀ဲဒၣ်ကျိဖးဒိၣ်ဆူဒူသ၀ီပူၤထီဘိလီၤႉ လီၤတဲာ်လၢသ၀ီပူၤသ၀ီချၢသ၀ီခိၣ်ဃၢၤႉမ့၀ံၤဖဲ ၂ သီအနံၤန့ၣ် ၦၤလဲၤခးအ၀ဲသ့ၣ်သုးရ့ၣ်၀ဲၤလီၢ်ခိၣ်သ့ၣ်ဘျီ အ၀ဲသ့ၣ်ခးစိကျိဖးဒိၣ်ဆူဒူသ၀ီမိၣ်ခမီၣ်ႇစ့ၣ်ကွ့ မ့၀ံၤဖဲ၀ၤဒၣ်ကွ့အခိၣ်အဃၢၤနါက့ခးလီၤ၀ဲအိၣ်စ့ၢ်ႉ မ့မ့ၢ်မိၣ်ခမီၣ် ဘၣ်ဒိၦၤပိာ်မုၣ်တဂၤန့ၣ်အိၣ်ဒီးအဟုးအသး(၆)လါမီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ
လၢန့ၣ်အမဲာ်ညါဟီၣ်က၀ီၤဒူသ၀ီသ့ၣ်တဖၣ်အံၤအပူၤတၢ်ဒုးကဲထီၣ်အိၣ်ဂ့ၤတအိၣ်ဘၣ်မ့ၢ်ဂ့ၤညီနုၢ်န့ၣ် ပယီၤသုး ခးလီၤကျိဖးဒိၣ်ထီဘိလီၤဒီး လၢကျိဖးဒိၣ်အံၤအဃိလီၢ်က၀ီၤကမျၢၢ်သ့ၣ်တဖၣ်ဘၣ်အိၣ်လၢတၢ်ဘၣ်ယိၣ်ဘၣ်ဘှီႇ တကးဘၣ်လၢအ၀ဲသ့ၣ်အဂီၢ်တၢ်ဘံၣ်တၢ်ဘၢတအိၣ်၀ဲဘၣ်အဂ့ၢ်န့ၣ် ပဒိၣ် စီၤအ့နဲၤ စံးအါထီၣ်၀ဲန့ၣ်လီၤႉ
ဒ်န့ၣ်အသိးလၢသထူၣ်ကီၢ်ဆၣ်အပူၤစ့ၢ်ကီး တၢ်ဒုးကဲထီၣ်ဂ့ၤတကဲထီၣ်ဂ့ၤ ပယီၤသုးအံၤသူ၀ဲဒၣ် ကျိဖးဒိၣ် ဟးခးလီၤနါစိၤတၢ်လၢလီၢ်က၀ီၤကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်အိၣ်၀ဲဒၣ်ခဲအံၤခဲအံၤအဃိ ၦၤကမျၢၢ်သံ ဘၣ်ဒိဘၣ်ထံးႇဟံၣ်တၢ်သူၣ်ထီၣ်တကးဒံးဘၣ်တၢ်မၤအီၣ်လီၢ်ကျဲတၢ်မုၢ်တၢ်ဘိစ့ၢ်ကီးဟးဂီၤကဲထီၣ်အသးတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
