လါယူၤ ၂၅သီႇ ၂၀၂၄နံၣ်ႇ ခ့ၣ်အဲးစံၣ်ႇ
ပယီၤသုးပဒိၣ်ဟံန့ၢ်ဆူၣ်ကွံာ်၀ဲတၢ်စိကမီၤလၢသၢနံၣ်အတီၢ်ပူၤႇကီၢ်ပယီၤအပူၤထံဖိကီၢ်ဖိကမျၢၢ်အဂၤ(၁၃ႉ၃)ကကွဲၢ်သဂၢၢ်ဘၣ်၀ဲတၢ်အီၣ်တၢ်အီတၢ်တကူတလၢဘၣ်အဂ့ၢ်ႇ(United Nations Devolvement Programmer-UNDP Myanmar)ဘီမုၢ်စၢဖှိၣ်ကရၢတၢ်ဂုၤထီၣ်ပသီထီၣ်တၢ်ရဲၣ်တၢ်ကျဲၤထုးထီၣ်ပာ်ဖျါ၀ဲလၢအတၢ်ပာ်ဖျါအပူၤဖဲမဟါလါယူၤ(၂၄)သီအနံၤန့ၣ်လီၤႉ
ဒ်(UNDP)အတၢ်ပာ်ဖျါအိၣ်၀ဲအသိးန့ၣ်“သုးကီၣ်ကးဟံန့ၢ်ဆူၣ်တၢ်စိကမီၤလၢသၢနံၣ်အတီၢ်ပူၤကီၢ်ပယီၤအပူၤထံဖိကီၢ်ဖိကမျၢၢ်ၦၤလၢအမၤသ့အီၣ်အိၣ်အနီၣ်ဂံၢ်နီၣ်ဒွး(၅၀)မျးကယၤစှၤလီၤကွံာ်၀ဲဒီးကမျၢၢ်(၇၅)မျးကယၤၦၤနီၣ်ဂံၢ်(၄၂)ကကွဲၢ်အိၣ်၀ဲလၢတၢ်ဖှီၣ်တၢ်ယာ်တၢ်လီၤဘၣ်ယိၣ်အပူၤအမဲာ်ညါၦၤနီၢ်ဂံၢ်(၁၃ႉ၃)ကကွဲၢ်သဂၢၢ်ဘၣ်၀ဲတၢ်အီၣ်တၢ်အီတကူတလၢကဲထီၣ်၀ဲအဂ့ၢ်”ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါႇ(၂၀၂၀)နံၣ်တုၤလၢ(၂၀၂၂)နံၣ်အတီၢ်ပူၤဘီမုၢ်စၢဖှိၣ်ကရၢ(ကုလသမဂ္ဂ)တၢ်ဂုၤထီၣ်ပသီထီၣ်အတၢ်တိစၢၤမၤစၢၤ(၄၀)မျးကယၤလီၤစှၤကွံာ်၀ဲဒီးတကတီၢ်ဃီၦၤကညီတၢ်ဒိသူၣ်ဒိသးဂ့ၢ်၀ီတၢ်ခီဆၢစ့ပာ်ဖှိၣ်စ့မိၢ်ၦၢ်အတၢ်ရဲၣ်တၢ်ကျဲၤတဖၣ်တကူတလၢအိၣ်ထီၣ်၀ဲဒၣ်အဂ့ၢ်ပာ်ဖျါစ့ၢ်ကီး၀ဲန့ၣ်လီၤႉ
ဒ်န့ၣ်အသိးႇသုးဟံးန့ၢ်တၢ်စိကမီၤလၢသၢနံၣ်အတီၢ်ပူၤကီၢ်ပယီၤထံကီၢ်အမုၢ်ကျိၤ၀ဲၤကွာ်ဂ့ၢ်၀ီသ့ၣ်တဖၣ်စ့ၢ်ကီးလီၤပအၣ်ကွံာ်၀ဲကယီကယီဒီးဂံၢ်ခီၣ်ထံးတၢ်အီၣ်တၢ်အီတဖၣ်အၦ့ၤဒိၣ်ထီၣ်အါထီၣ်၀ဲတလၢအခၢးအမဲာ်ညါထံဖိကီၢ်ဖိတဖၣ်ကဖံးမၤအီၣ်အီအဂီၢ်တၢ်ကီတၢ်ခဲအိၣ်ထီၣ်၀ဲအဃိတၢ်လီၤဘၣ်ယိၣ်အိၣ်ထီၣ်၀ဲလၢကမျၢၢ်ၦၤဖှီၣ်ၦၤယာ်ဖိ(၂၅)ကကွဲၢ်အသးသမူအဂီၢ်အဂ့ၢ်(UNDP)ပာ်ဖျါတ့ၢ်စ့ၢ်ကီး၀ဲဖဲ(၂၀၂၄)လါဖ့ၤဘြူၤအါရံၤ(၂၈)သီအနံၤအတီၢ်ပူၤအိၣ်စ့ၢ်ကီး၀ဲန့ၣ်လီၤႉ
တကတီၢ်ဃီႇခီဖျိကီၢ်ပယီၤအပူၤထံရုၢ်ကီၢ်သဲးတၢ်သဘံၣ်သဘုၣ်ဒီးတၢ်တၤတၢ်တဖၣ်အံၤကဲထီၣ်၀ဲအဖီခိၣ်ႇလၢတၢ်ကဘှါဆှဲ၀ဲကီၢ်ပယီၤတၢ်ဖှီၣ်တၢ်ယာ်တၢ်ဂ့ၢ်ကီတဖၣ်အံၤအဂီၢ်(ဘီမုၢ်စၢဖှိၣ်ကရၢ)အံၤတိစၢၤမၤစၢၤတ့ၢ်၀ဲကီၢ်ပယီၤအပူၤၦၤဘၣ်ကီဘၣ်ခဲဖိအဂၤ(၂)ကကွဲၢ်လံဒီးဆူမဲာ်ညါ(၂၀၂၅)နံၣ်ကတၢၢ်အပူၤတိာ်လီၤပာ်၀ဲလၢကမၤစၢၤ၀ဲကီၢ်ဆၣ်(၇၇)ဘ့ၣ်အပူၤကမျၢၢ်(၈)ကကွဲၢ်တုၤလၢအန့ၢ်အဂ့ၢ်(UNDP)ပာ်ဖျါ၀ဲဒၣ်န့ၣ်လီၤႉ
ဒ်န့ၣ်အသိးႇလၢတၢ်ဘှါဆှဲကီၢ်ပယီၤအတၢ်ဖှီၣ်တၢ်ယာ်ဒီးသုးထီထီၣ်က့ၤကီၢ်ပယီၤထံကီၢ်အဂီၢ်တကီၢ်ခါခဲအံၤ(ဘီမုၢ်စၢဖှိၣ်ကရၢ)ဟူးဂဲၤသကိး၀ဲထဲလၢကီၢ်ပူၤတကးဘၣ်ႇကျဲးစၢးဟူးဂဲၤ၀ဲမၤသကိးတၢ်ဒီးထံဂုၤကီၢ်ဂၤသိၣ်မှံၤသ့ၣ်တဖၣ်အိၣ်၀ဲအဂ့ၢ်ပာ်ဖျါ၀ဲန့ၣ်လီၤႉ