ၦၤလီၢ်အိၣ်ကမှံဖိလၢအိၣ်(ရၤမတံ)သီခါဖၠၣ်ဒီးတၢ်ခိၣ်တၢ်ဃၢၤဖဲန့ၣ်တဖၣ်တၢ်ကသူၣ်ထီၣ်န့ၢ်၀ဲဒဲ(၃၀၀)ဖျၢၣ်

လါယူၤ ၇ သီႇ ၂၀၂၄ နံၣ်ႇ ခ့ၣ်အဲးစံၣ်

ခီဖျိတၢ်ဒုးတၢ်ယၤအဃိၦၤလီၢ်အိၣ်ကမှံဖိလၢအိၣ်ကီးတရံးႇ သ့ၣ်ဃးလီၤတီၢ်ဒီး၀့ၢ်ရှါသ့ၣ်တဖၣ်လၢဘၣ်ဟဲထီၣ်ဃ့ၢ်အိၣ်ကဒုအသးဆူရၤမတံ၀့ၢ်သီခါဖၠၣ်အပူၤဒီးသီခါဖၠၣ်အခိၣ်အဃၢၤသ့ၣ်တဖၣ်တၢ်ကသူၣ်ထီၣ်န့ၢ်၀ဲဒဲဖိ(၃၀၀)ဖျၢၣ်အဂ့ၢ်န့ၣ်သ့ၣ်ညါဘၣ်လၢၦၤမၤစၢၤၦၤလီၢ်အိၣ်ကမှံဖိအၦၤဘၣ်မူဘၣ်ဒါအအိၣ်န့ၣ်လီၤႉ

မ့ၢ်လၢတၢ်စူၤခါကတီၢ်တုၤဃီလံၤဒီးသီခါဖၠၣ်ကရၢၢ်ပူၤကၠိစ့ၢ်ကီးဘၣ်တၢ်စးထီၣ်အိးထီၣ်က့ၤလံအဃိၦၤလီၢ်အိၣ်ကမှံဖိသ့ၣ်တဖၣ်ဒ်သိးကအိၣ်ကဆိးဘၣ်လၢတၢ်သူၣ်ထီၣ်ပူၤအဂီၢ်ဒီးတၢ်ပာ်ပနီၣ်န့ၢ်၀ဲၦၤလီၢ်အိၣ်ကမှံဖိတၢ်လီၢ်တၢ်ကျဲပူၤအဂီၢ်ဘၣ်တၢ်ဒုးအိၣ်ထီၣ်န့ၣ်၀ဲဒၣ်ဒဲဖိ(၃၀၀)ဖျၢၣ်ဒ်အံၤလီၤအဂ့ၢ်ၦၤမၤစၢၤၦၤလီၢ်အိၣ်ကမှံဖိသရၣ်မုၣ်နီၢ်လါရှံစံး၀ဲဒ်အံၤန့ၣ်လီၤႉ

“ခီဖျိလၢအ၀ဲသ့ၣ်အိၣ်၀ဲဒၣ်လၢသီခါဖၠၣ်အကရၢၢ်အပူၤန့ၣ်တမ့ၢ်လၢအဒူၣ်အိၣ်စ့ၢ်ကီးဘၣ်ႉ မ့ၢ်လၢတၢ်စူၤခါဘၣ်လံဒီးသီခါန့ၣ်ဖၠၣ်န့ၣ်အိၣ်ဒီးကၠိအဃိခဲအံၤန့ၣ်ကၠိက့ၤထီၣ်လံအဖီခိၣ်န့ၣ်အ၀ဲသ့ၣ်အိၣ်၀ဲတသ့လၢၤဘၣ်ႉ အဃိန့ၣ်ပတၢၣ်ပီၣ်သကိးဒီး(Peace Council)၀ံၤဘျီန့ၣ်ပကြၢးတ့ၢ်ထီၣ်၀ဲဒၣ်ၦၤလီၢ်အိၣ်ကမှံတၢ်လီၢ်တစိာ်တလီၤဒ်န့ၣ်မီၤနီၤႉ ပဟးဃုန့ၢ် တၢ်မၤစၢၤ၀ံၤဘျီန့ၣ်ခဲခဲအံၤန့ၣ်ပယာ်လီၤလၢပကတ့ထီၣ်န့ၢ်အ၀ဲသ့ၣ်ဟံၣ်အဖျၢၣ်(၃၀၀)မီၤနီၤႉ ပမၤတၢ်တခါအံၤမ့ၢ်၀ံၤဘျီန့ၣ်ပကဟ့ၣ်ဒုးကဲထီၣ်၀ဲလၢၦၤလီၢ်အိၣ်ကမှံဖိအလီၢ်လၢကတီၢ်ဖုၣ်ဒ်န့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤလၢၦၤလီၢ်အိၣ်ကမှံဖိသ့ၣ်တဖၣ်အဂီၢ်တၢ်ဖီအီၣ်တ့ၤအီၣ်တၢ်ပီးတၢ်လီႇ နီၢ်ခိၣ်တၢ်ကဆှဲကဆှီႇ ထံအီနိအီဒီးတၢ်ဟးလီၢ်သ့ၣ်တဖၣ်တၢ်လိၣ်အိၣ်ဒံး၀ဲဒၣ်အသိးခါဆူမဲာ်ညါၦၤလီၢ်အိၣ်ကမှံဖိသ့ၣ်တဖၣ်အဂီၢ်တၢ်ကသူၣ်ထီၣ်န့ၢ်၀ဲဒၣ်တၢ်ဟ့ၣ်ကသံၣ်ဒၢးအအိၣ်၀ဲအဂ့ၢ်သရၣ်မုၢ်လါရှံစံးအါထီၣ်၀ဲဒၣ်န့ၣ်လီၤႉ

ခီဖျိလၢတၢ်ဒုးတၢ်ယၤအဃိၦၤလီၢ်အိၣ်ကမှံဖိလၢဟဲထီၣ်ဃ့ၢ်အိၣ်ကဒုအသးဖဲရၤမတံ၀့ၢ်အပူၤသ့ၣ်တဖၣ်အိၣ်ဆိး၀ဲဒၣ်လၢက၀ီၤဒ့နီၣ်ဂံၢ်(၅) ယ့ၤပူၤ သီၣ်ခါဖၠၣ်ကရၢၢ်အပူၤန့ၣ်ခံဖျၢၣ်ႇ န့ၤစိမၠၣ် သ၀ီအသီခါဖၠၣ်ကရၢၢ်အပူၤန့ၣ်တဖျၢၣ်ဒီးသီၣ်ခါဖၠၣ်ကရၢၢ်အခိၣ်အဃၢၤစ့ၢ်ကီးၦၤနီၣ်ဂံၢ်ခဲလၢာ်ထီၣ်ဘးလၢ(၂၀၀၀)ဂၤဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤႉ

ဒ်န့ၣ်အသိးတၢ်ဆီၣ်ထွဲမၤစၢၤဒီးတၢ်သူၣ်ထီၣ်န့ၢ်၀ဲဒၣ်ၦၤလီၢ်အိၣ်ကမှံဖိ(၂၀၀၀)ဂၤဃၣ်ဃၣ်အံၤအဂီၢ်ဒဲ(၃၀၀)ဖျၢၣ်အံၤန့ၣ်ဘၣ်သ့ၣ်သ့ၣ်တကူတလၢဒီးတဒိးန့ၢ်ဘၣ်၀ဲကိးဂၤဒဲဘၣ်အဂ့ၢ်ၦၤမၤစၢၤၦၤလီၢ်အိၣ်ကမှံဖိအၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

ဘၣ်ဃးဒီးတၢ်ဆီၣ်ထွဲမၤစၢၤသူၣ်ထီၣ်တ့ထီၣ်န့ၢ်၀ဲၦၤလီၢ်က၀ီၤဖိသ့ၣ်တဖၣ်အဂီၢ်ဒဲဖိတၢ်သူၣ်ထီၣ်တၢ်ရဲၣ်တၢ်ကျဲၤအံၤန့ၣ်ဟဲခီဖျိ၀ဲဒၣ်လၢ(CBO) (NGO)တၢ်ကရၢကရိဒီး(KNU/KNLA-P.C)သ့ၣ်တဖၣ်ပာ်ဖှိၣ်ရဲၣ်ကျဲၤန့ၢ်၀ဲဒၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

တကတီၢ်ဃီလၢတၢ်ကအံးထွဲကွၢ်ထွဲၦၤလီၢ်အိၣ်ကမှံဖိအံၤအဂီၢ်တၢ်ဒုးအိၣ်ထီၣ်စ့ၢ်ကီး၀ဲၦၤကွၢ်ထွဲတၢ်ဖိကမံးတံာ်တဖုအသိးတၢ်သူၣ်ထီၣ်ဘှီထီၣ်ဒဲသ့ၣ်တဖၣ်အံၤမ့ၢ်၀ံၤအလီၢ်ခံန့ၣ်တၢ်ရဲၣ်တၢ်ကျဲၤအိၣ်စ့ၢ်ကီး၀ဲလၢတၢ်ကဒုးသ့ၣ်ညါပာ်ဖျါထီၣ်၀ဲဒၣ်ၦၤလီၢ်အိၣ်ကမှံဖိဒဲက၀ီၤအ၀ဲအံၤလၢအိၣ်ဃုာ်၀ဲဒၣ်ဒီးအကမံးတံာ်သ့ၣ်တဖၣ်အဂ့ၢ်သ့ၣ်ညါဘၣ်လၢၦၤမၤစၢၤ ၦၤလီၢ်အိၣ်ကမှံအအိၣ်န့ၣ်လီၤႉ