လါယူၤလံ ၁ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကီၢ်ဆၣ်သၢဘ့ၣ်အပူၤ ခီဖျိတၢ်ဒုးတၢ်ယၤႇ ကျိဖးဒိၣ်အဃိ ၦၤကမျၢၢ်အဂၤ(၄၀၀၀)ဘျဲၣ် လၢအဃ့ၢ်မှံဟးဖျိးတဖၣ်ဃ့ၢ်တၢ်ဒုးန့ၢ်(၁)နံၣ်ဘျဲၣ်လံဘၣ်ဆၣ် တုၤလၢခဲအံၤအ၀ဲသ့ၣ်က့ၤအိၣ်လၢအဟံၣ်အဃီတဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒူသထူၣ်ကီၢ်ရ့ၣ် ဘံလ့ႇဖၣ်အၣ်ႇသထူၣ်ကီၢ်ဆၣ်(၃)ဘ့ၣ်အံၤအပူၤ ခီဖျိတၢ်ဒုးတၢ်ယၤဒီးပယီၤသုးခးလီၤကျိဖးဒိၣ် အဃိ စးထီၣ်(၂၀၂၃)တုၤ(၂၀၂၄)လါမ့ၤန့ၣ် ဒူသ၀ီလၢအမ့ၢ်ချၢၣ်ဃဲၤႇလ့က့ၣ်ႇကျူမဲသ၀ီ ကမျၢၢ်(၄၂၂၃)ဂၤ ဘၣ်ဃ့ၢ်ထီၣ်ဟးစံၣ် အိၣ်လၢၦၤဒူၦၤသ၀ီႇလ့ပူၤကစၢၢ်ခိၣ်ကလိကျါန့ၢ်တနံၣ်ဘျဲၣ်လံဘၣ်ဆၣ် တုၤလၢခဲအံၤအ၀ဲသ့ၣ် က့ၤအိၣ်လၢအဟံၣ် အဃီ အဒူသ၀ီတဘူၣ်ဒံးဘၣ်ဘၣ်ဟးအိၣ်ကဒုသးအဖၢမုၢ်တုၤလၢခဲအံၤတစုအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ
ဒူသထူၣ်ကီၢ်ရ့ၣ် ကီၢ်ဆၣ်သၢဘ့ၣ် သ၀ီ(၃)ဖျၢၣ်အပူၤ တုၤလၢခဲအံၤခီဖျိတၢ်ဒုးတၢ်ယၤဒီးပယီၤသုးခးလီၤကျိဖးဒိၣ် အဃိ ဒူသ၀ီၦၤကမျၢၢ်သ့ၣ်တဖၣ်အံၤဘၣ်ဃ့ၢ်ထီၣ်ဟးစံၣ်အိၣ်တုၤလၢခဲအံၤတစုဒ်အံၤလီၤအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ
“ဘၣ်ဃးလၢၦၤဃ့ၢ်တၢ်ဒုးထီဘိတဖၣ်ဒ်သိးဘံလ့ကီၢ်ဆၣ် လ့ၣ်က့ၣ်သ၀ီဒီးချၢၣ်ဃဲၤသ၀ီန့ၣ်အိၣ်ဒီးသုးကလၢၤႉ သုးကလၢၤတဖၣ်အံၤၦၤမ့လဲၤခးစဲးပြဲးအီၤန့ၣ်က့ၤခးလီၤကဒါကျိဖးဒိၣ်လၢဒူသ၀ီပူၤႉအဃိဒူသ၀ီဖိတဖၣ်အိၣ်လၢသ၀ီပူၤတဘူၣ််ဘၣ်ဟးစံၣ်ပလဲာ်သးလၢတၢ်လီၢ်အဂၤလီၤႉဒ်န့ၣ်အသိးသထူၣ်ကီၢ်ဆၣ်(ကျူမဲသ၀ီ)နါက့ဒ်န့ၣ်လီၤဘၣ်ဆၣ်သုးကလၢၤတအိၣ်ဘၣ်ႉတၢ်မၢၤၦၤမ့လဲၤခးစဲးပြဲးအ၀ဲသ့ၣ်န့ၣ်သုးကီၣ်ကးအမျိာ်သုး(၄၀၂)မ့ၢ်ဂ့ၤႇ(ခလရ-၂၄)မ့ၢ်ဂ့ၤႇ (၂၀၇)မ့ၢ်ဂ့ၤႇ (ခမရ-၁)မ့ၢ်ဂ့ၤန့ၣ်က့ၤခးလီၤကျိဖးဒိၣ်ဆူသ၀ီပူၤန့ၣ်လီၤ” အဂ့ၢ်န့ၣ် စံး၀ဲန့ၣ်လီၤႉ
ဒ်ကီၢ်ရ့ၣ်တၢ်မၤနီၣ်စရီပူၤအိၣ်အသိးန့ၣ် ကီၢ်ဆၣ်သၢဘ့ၣ်ပူၤ ဒူသ၀ီၦၤနီၣ်ဂံၢ်လၢအဃ့ၢ်ထီၣ်တဖၣ်န့ၣ် ဘံလ့ကီၢ်ဆၣ် လ့က့ၣ်သ၀ီ ဟံၣ်ဒူၣ်(၄၆၁) ဖျၢၣ် ၦၤနီၣ်ဂံၢ်(၂၅၅၁)ဂၤႇ ဖၣ်အၣ်ကီၢ်ဆၣ် ချၢၣ်ဃဲၤသ၀ီ ဟံၣ်ဒူၣ်(၇၆)ဖျၢၣ် ၦၤနီၣ်ဂံၢ် (၄၅၆)ဂၤ ဒီးမ့မ့ၢ်လၢသထူၣ်ကီၢ်ဆၣ် ကျူမဲသ၀ီန့ၣ် ဟံၣ်ဒူၣ်(၂၀၆)ဖျၢၣ် ၦၤနီၣ်ဂံၢ်(၁၂၁၆)ဂၤ သ၀ီသၢဖျၢၣ် ၦၤနီၣ်ဂံၢ် ပာ်ဖှိၣ်ခဲလၢာ်(၄၂၂၃)ဂၤ တုၤလၢခဲအံၤတက့ၤဘၣ်လၢဟံၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ၦၤကမျၢၢ်သ့ၣ်တဖၣ်အံၤဃ့ၢ်ထီၣ်န့ၢ်၀ဲဒၣ်တနံၣ်ဘျဲၣ်လံအဖီခိၣ်တုၤလၢခဲအံၤအ၀ဲသ့ၣ်တဖံးအီၣ်မၤအီၣ်ဘၣ်တၢ်အဃိ သဂၢၢ်ဘၣ်၀ဲဒၣ်အီၣ်အီတကူတလၢဒီးလၢမုၢ်ကျိၤ၀ဲၤကွာ်တၢ်ဂ့ၢ်ကီတကပၤစ့ၢ်ကီးသဂၢၢ်ဘၣ်၀ဲအသိး တၢ်ကီတၢ်ခဲသ့ၣ် တဖၣ်အံၤကမျၢၢ်ထံဖိကီၢ်ဖိဘၣ်ကွၢ်ဆၢၣ်မဲာ်၀ဲခဲလၢာ်ဃၣ်ဃၣ်အဂ့ၢ်န့ၣ် ကီၢ်ရ့ၣ် ၦၤကတိၤတၢ်ပၢ ပဒိၣ်စီမအ့နဲၤ စံးအါထီၣ်၀ဲန့ၣ်လီၤႉ
“ပမ့ဘၣ်ကွၢ်စးထီၣ်လၢသုးဟံးန့ၢ်တၢ်စိတၢ်ကမီၤလီၢ်ခံန့ၣ်ပထံၣ်ဘၣ်လၢကမျၢၢ်ထံဖိကီၢ်ဖိတဖၣ်န့ၣ်တမ့ၢ်ထဲလၢ သ၀ီသၢဖျၢၣ်အံၤဘၣ်ႇသ၀ီကိးဖျၢၣ်ဒဲးဘၣ်ကွၢ်ဆၢၣ်မဲာ်၀ဲတၢ်သ့ၣ်တဖၣ်အံၤန့ၣ်ပတဲသ့လီၤႉအိၣ်ဆိးလဲၤက့ၤဖံးမၤတ သဘျ့ႇလၢအ၀ဲသ့ၣ်အဂီၢ်နါက့တၢ်ဘံၣ်တၢ်ဘၢတအိၣ်ႇဘၣ်ဃ့ၢ်ပလဲာ်သးလၢတၢ်ဒုးတၢ်ယၤထီဘိႇဖံးအီၣ်မၤအီၣ်တၢ်တချုးအဃိဘၣ်ကွၢ်ဆၢၣ်မဲာ်၀ဲတၢ်အီၣ်တၢ်အီတလၢတၦဲၤဒီးမုၢ်ကျိၤ၀ဲၤကွာ်လီၤတူာ်လီၤကၤအိၣ်၀ဲဒၣ်န့ၣ်ပတဲသ့လီၤ မီၤႉဘၣ်မနုၤ လဲၣ်ပမ့ဘၣ်ကွၢ်န့ၣ်ၦၤဘၣ်ကွၢ်ဆၢၣ်မဲာ်ဘၣ်တၢ်ကီတၢ်ခဲအံၤဒီထံဒီကီၢ်လီၤႉတၢ်မၢၤအ၀ဲသ့ၣ်ဘၣ်ဃ့ၢ်ပလဲာ်သးထီဘိအဃိကီခဲဒိၣ်၀ဲတစဲးမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
တကတီၢ်ဃီကီၢ်ဆၣ်(၃)ဘ့ၣ်အံၤအမဲာ်ညါ လၢကၠဲးထိၣ်ကီၢ်ဆၣ်အပူၤစ့ၢ်ကီး ခီဖျိပယီၤသုးကျိၤနုာ်လီၤခးလီၤ ကျိဖးဒိၣ်အဃိ အပူၤကွံာ်လါယူၤတလါအတီၢ်ပူၤ ဖွ့ဖူကီၢ်ႇခရၢၢ်ႇ၀ီၢ်ကျီၢ်ကရူၢ်(၃)ဘ့ၣ် ကမျၢၢ်ပာ်ဖှိၣ် (၁၂ႇ၉၅၉)ဂၤ ဘၣ်ဃ့ၢ်ထီၣ်၀ဲအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်အပူၤ စးထီၣ်(၂၀၂၁)သုးဟံးန့ၢ်တၢ်စိတၢ်ကမီၤတုၤလၢတနံၣ်အံၤ(၂၀၂၄)လါမ့ၤန့ၣ် ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်ခဲလၢာ်အိၣ်၀ဲ(၁၄၃ႇ၅၂၉)ဂၤအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပာ်ဖျါ၀ဲ ဖဲအပူၤကွံာ်လါယူၤ ၂၀ သီအနံၤန့ၣ်လီၤႉ
