ကီၢ်သူလ့ၤသုးမုၢ်ဒိၣ်ကမၤဆူၣ်ထီၣ်သးသဟီၣ်ဒီးတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤအဂ့ၢ်(KWO)ဆီၣ်တခူထီၣ်

လါယူၤလံ ၄ သီႇ ၂၀၂၄ နံၣ်ႇ ခ့ၣ်အဲးစံၣ်

တလါအံၤလါယူၤလံ ၅ သီ လၢအလီၤဘၣ်၀ဲကီၢ်သူလ့ၤသုးမုၢ်ဒိၣ်မုၢ်နံၤၦဲၤထီၣ်(၇၅)၀ီတ၀ီဒီး လၢမုၢ်နံၤအံၤအဖီခိၣ် ကီၢ်သူလ့ၤသုးမုၢ်ဒိၣ်ကမၤဆူၣ်ထီၣ်မၤဂ့ၤထီၣ်သးသဟီၣ်ဒီးတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤဒီး ကအိၣ်ဒီး တၢ်ခီၣ်ခိၣ်ဟံမူဒါအါထီၣ်လၢတၢ်မၤပူၤအဂ့ၢ်န့ၣ် လီၢ်ခၢၣ်သး ကညီပိာ်မုၣ်ကရၢ(KWO)ဆီၣ်တခူပာ်ဖျါထီၣ် အလံာ်ယုၢ် ဖဲတနံၤအံၤလါယူၤလံ ၄ သီ အနံၤန့ၣ်လီၤႉ

ဒ်(KWO)အလံာ်ဟ့ၣ်ယုၢ်တၢ်ပာ်ဖျါပူၤအသိးန့ၣ် ကီၢ်သူလ့ၤသုးမုၢ်ဒိၣ်အံၤကျဲးစၢးတ့ၢ်တၢ်အဂ့ၤကတၢၢ်ဘၣ်ဆၣ် ခါဆူညါ ကဘၣ်ဂုာ်ကျဲးစၢးအါန့ၢ်အလီၢ်လၢအကဲထီၣ်ဒသုးမုၢ်ဒိၣ်လၢအစဲၤနီၢ်ဒလၢတုၤထီၣ်ထီၣ်ဘးဒ်ဟီၣ််ခိၣ်ဘီမုၢ် ပာ်ပနီၣ်အီၤ သ့အသိးဒီးလၢန့ၣ်အမဲာ်ညါကဘၣ်မၤဆူၣ်ထီၣ်မၤဂ့ၤထီၣ်သးသဟီၣ်ဒီးတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤတကးဒံးဘၣ်ကအိၣ်ဒီးတၢ်ခီၣ်ခိၣ်ဟံမူဒါအါထီၣ်လၢတၢ်မၤပူၤအဂ့ၢ်န့ၣ် စံး၀ဲန့ၣ်လီၤႉ

ဘၣ်ဃး(KWO)အလံာ်ဟ့ၣ်ယုၢ်ဆူကီၢ်သူလ့ၤသုးမုၢ်ဒိၣ်မုၢ်နံၤဆၢက့ၤအဖီခိၣ်ဘျီ၀ဲအံၤန့ၣ် ကရၢခိၣ် နီၢ်ကညီဖီ စံး၀ဲလၢ “ပတဲလၢအ၀ဲသ့ၣ်ကဘၣ်မၤဂ့ၤထီၣ်သးသဟီၣ်တၢ်တူၢ်ခီၣ်ပာ်သးလၢတၢ်ပၢၢ်ဆၢပူၤစံးတၢ်န့ၣ်ပမ့ကွၢ်ခဲအံၤ ပယီၤသုးဟံန့ၢ် ဆူၣ်တၢ်စိတၢ်ကမီၤဘျီန့ၣ်ၦၤက့ၤခီၣ်ဆၢအီၤလၢထံကီၢ်ဒီတဘ့ၣ်အပူၤလီၤႉၦၤပယီၤဖိလၢအိၣ်၀့ၢ်ပူၤဒၣ်လဲာ်ဟဲထီၣ်မၤတၢ်ပၢၢ်ဆၢမီၤနီၤႉပအဲၣ်ဒိးလၢကဘၣ်မၤဆူၣ်ထီၣ်၀ဲတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤလၢကနၢ်ပၢၢ်၀ဲဘၣ်မနုၤအဃိပၦၤကညီအံၤဘၣ်ပၢၢ်ဆၢတၢ်လဲၣ်ႇအတၢ်မုၢ်လၢ်ကွၢ်စိအ၀ဲသ့ၣ်မ့နၢ်ပၢၢ်၀ဲဘျဲးဘျဲးဘျီးဘျီးန့ၣ်သးလၢအအဲၣ်ဒိးနုာ်လီၤပၣ်ဃုာ်လၢသုးပူၤမ့ၢ်ဂ့ၤႇကဒီသဒၢဒူဖိသ၀ီဖိႇဒုၣ်ဒါတၢ်သ့ၣ်တဖၣ်န့ၣ်ကအိၣ်၀ဲဒၣ်မီၤႉအဃိတၢ်သ့ၣ်တဖၣ်အံၤပ အဲၣ်ဒိးလၢကမၤဂ့ၤ ထီၣ်၀ဲမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

တကးဒံးဘၣ်လၢန့ၣ်အမဲာ်ညါခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤ ခီဖျိလၢကီၢ်သူလ့ၤသုးမုၢ်ဒိၣ်အတၢ်ဟူးတၢ်ဂဲၤ အံၤအဃိပယီၤသုးကလၢၤဖျိးကွံာ်၀ဲဒၣ်တစှၤန့ၢ်အဖျၢၣ်(၈၀)ဘျဲၣ်ညါဒီးလၢတၢ်န့ၣ်အဃိအလီၢ်အိၣ်လၢပကဘၣ်ပာ် ပနီၣ်သုးမုၢ်ဒိၣ်အတၢ်ဟ့ၣ်လီၤသးအံၤအသိးအလီၢ်အိၣ်စ့ၢ်ကီးလၢကမျၢၢ်ထံဖိကီၢ်ဖိတဖၣ်ကဆီၣ်ထွဲပာ်ဖှိၣ်မၤသကိးတၢ်အဂ့ၢ်န့ၣ် (KWO)ကရၢခိၣ် နီၢ်ကညီဖီ စံးအါထီၣ်၀ဲန့ၣ်လီၤႉ

“ပကညီသုးမုၢ်ဒိၣ်ဒုမၤအမူဒါလၢၦဲၤဒိၣ်ကတၢၢ်လီၤပမ့က့ၤထိၣ်သတြီၤက့ၤအီၤန့ၣ်ႉဘၣ်မနုၤအဃိလဲၣ်န့ၣ်အမူဒါလၢ ကဘၣ်ဒုးဖျိးကွံာ်သုးမီၤစိရိၤႇကဘၣ်ဒီသဒၢကမျၢၢ်တဖၣ်န့ၣ်မၤ၀ဲဂ့ၤကတၢၢ်လီၤႉပမ့က့ၤကွၢ်န့ၣ်တၢ်လီၢ်တၢ်ကျဲလၢ အိၣ်ပကီၢ်သူလ့ၤပူၤန့ၣ်သုးကလၢၤဖျိးကွံာ်တစှၤန့ၢ်အဖျၢၣ်(၈၀)ဘၣ်ႉလၢတၢ်ထီၣ်ဒုးန့ၢ်ကဒါအဃိမ့ၢ်ဂ့ၤႇလၢသုးမုၢ်ဒိၣ်အတၢ်ဟူးတၢ်ဂဲၤအဖီခိၣ်အ၀ဲသ့ၣ်ဘၣ်ထုးကွံာ်သးမ့ၢ်ဂ့ၤတၢ်သ့ၣ်တဖၣ်အံၤကဲထီၣ်၀ဲဒၣ်တၢ်ပာ်ပနီၣ်အ၀ဲသ့ၣ်တခါႉ အဃိပအဲၣ် ဒိးလၢပၢပြးတကပၤမ့ၢ်ဂ့ၤပကဘၣ်ဟံထီၣ်မူဒါႉကမျၢၢ်တဖၣ်စ့ၢ်ကီးကြၢးဆီၣ်ထွဲပၣ်ဃုာ်မၤသကိးတၢ်လၢ ဆၢကတီၢ်ခဲအံၤ အလီၢ်အိၣ်သၦၢ်ကတၢၢ်လီၤ”အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးဆၢကတီၢ်ခဲအံၤကညီသုးမုၢ်ဒိၣ်အံၤမ့ၢ်မၤလၢၦဲၤမူဒါဖဲဘၣ်ကွၢ်ဆၢၣ်မဲာ်တၢ်သဘံၣ်သဘုၣ်ႇတၢ်ဘၣ် ဂံာ်ဂူာ်ႇ တၢ်ဒုးတၢ်ယၤႇတၢ်ကီတၢ်ခဲတၢ်နးတၢ်ဖှီၣ်လၢကျဲအကပၤကပၤဒီးဘၣ်ဆၣ်အ၀ဲသ့ၣ်မ့ဘၣ်ကွၢ်ဆၢၣ်မဲာ်၀ဲ ဒ်လဲၣ်သနါက့ တဟ့ၣ်အဃၣ်ႇတတ့ၢ်စၢ်လီၤအဂံၢ်အဘါနီတဘျီဘၣ်မ့မ့ၢ်တခီလၢကဒိးန့ၢ်က့ၤကညီကီၢ်အဂီၢ် ဒီသဒၢပၢၤ ဃာ်စၢၤ၀ဲ ကမျၢၢ်အသးသမူႇဟံၣ်ဃီတၢ်စုလီၢ်ခီၣ်ခိၣ်တုၤဒၣ်လဲာ်လုၢ်ထီၣ်ကွံာ်အသးသမူလၢၦၤကလုာ် အဂီၢ်အဃိ ပကြၢးပာ်ပနီၣ် ပာ်လၤပာ်ကပီၤဆီၣ်ထွဲအ၀ဲသ့ၣ်အဂ့ၢ်န့ၣ် (KWO)လံာ်ဟ့ၣ်ယုၢ်တၢ်ပာ်ဖျါအပူၤ စံး၀ဲန့ၣ်လီၤႉ

အဃိလၢမုၢ်နံၤအံၤအဖီခိၣ်စံးဘျုးဒီးပာ်ပနီၣ်၀ဲကမျၢၢ်ႇမိၢ်ပၢ်တဖၣ်လၢအဟ့ၣ်လီၤအဖိလၢသုးမုၢ်ဒိၣ်အပူၤႇ သူၣ်ဘီၣ်သးစၢ်လၢသးဆူၣ်နုာ်လီၤမၤတၢ်လၢကညီသုးမုၢ်ဒိၣ်အပူၤအံၤတဖၣ်ဒီးဒ်န့ၣ်အသိးကညီဒီကလုာ်သုးမုၢ်ဒိၣ် ခိၣ်နၢ်သိၣ်ဒူႇထံဖိကီၢ်ဖိကမျၢၢ်လၢအဂဲၤလိာ်မၤသကိးတၢ်လၢကညီဒီကလုာ်တၢ်ထူၣ်ဖျဲးအဂီၢ်တဖၣ်ကပူၤဖျဲးဒီး တၢ်ကီတၢ်ခဲတၢ်နးတၢ်ဖှီၣ်ႇကမၤန့ၢ်အီၣ်ကဲပူၤဒုၣ်ပူၤဒါကိးဂၤဒဲးအဂ့ၢ်န့ၣ် (KWO)ဟ့ၣ်ထီၣ်အတၢ်ဆၢဂ့ၤဆၢ၀ါန့ၣ်လီၤႉ

ဖဲ(၁၉၅၆)နံၣ် လါယူၤလံ ၂၈ သီအနံၤ လၢဆီထံးကီၢ်ဆၣ် ဒီကလုာ်ခီကရဲးတၢ်အိၣ်ဖှိၣ်အပူၤန့ၣ် တၢ်ပာ်ဂၢၢ် ပာ်ကျၢၤ၀ဲကီၢ်သူလ့ၤသုးမုၢ်ဒိၣ်ဒုးယၤအတၢ်မၤကျဲအတၢ်ပညိၣ်သ့ၣ်တဖၣ်အံၤဒီးတၢ်က့ၤကွဲးလီၤပာ်လီၤမၤဂ့ၤထီၣ်က့ၤ တၢ်သူၣ်ထီၣ်ဆီလီၤတဖၣ်၀ံၤလီၢ်ခံ ဖဲလါယူၤလံ(၅)သီအနံၤန့ၣ် ဘၣ်တၢ်ပာ်ပနီၣ်က့ၤမုၢ်နံၤ၀ဲန့ၣ်လၢအမ့ၢ်ကီၢ်သူလ့ၤ သုးမုၢ်ဒိၣ်မုၢ်နံၤအံၤန့ၣ်လီၤႉ