ကၠီၣ်တဲၣ်ကးတံာ်ကွံာ်တၢ်ၦ့ၤကျီၢ်ႇပနၢ်အဃိလီၢ်က၀ီၤအပူၤကျီၢ်ႇပနၢ်အၦ့ၤလီၤ၀ဲကွ့ၢ်ကွ့ၢ်

လါယူၤလံ ၁၀သီႇ ၂၀၂၄နံၣ်ႇ ခ့ၣ်အဲးစံၣ်ႇ

ကီၢ်ကၠီၣ်တဲၣ်တကပၤကးတံာ်ကွံာ်၀ဲတၢ်ၦ့ၤကျီၢ်ႇပနၢ်လၢကၠီၣ်တဲၣ်ဒီးကညီကီၢ်စဲၣ်ကျဲတၢ်စိာ်ဆှၢတီၣ်ဆါတကကပၤအဃိႇကညီကီၢ်စဲၣ်ဟီၣ်က၀ီၤတဖၣ်အပူၤႇကျီၢ်ႇပနၢ်အၦ့ၤလီၤ၀ဲကွ့ၢ်ကွ့ၢ်အဂ့ၢ်ႇၦၤဆါတၢ်ၦ့ၤတၢ်ဖိတဖၣ်စံး၀ဲန့ၣ်လီၤႉ

စးထီၣ်ဖဲအပူၤကွံာ်လါမ့ၤအတီၢ်ပူၤႇကီၢ်ကၠီၣ်တဲၣ်တကပၤကးတံာ်ကွံာ်၀ဲတၢ်ၦ့ၤကျီၢ်ပနၢ်လၢအဟဲနုာ်လၢကညီကီၢ်စဲၣ်ဒီးကၠီၣ်တဲၣ်ကီၢ်ဆၢတၢ်ဟးထီၣ်က့ၤလီၤကျဲတဆီအဃိႇဟီၣ်က၀ီၤပူၤတၢ်ၦ့ၤက့ၤကျီၢ်ပနၢ်တအိၣ်လၢၤ၀ဲဘၣ်ဒီးကျီၢ်ပနၢ်တဖၣ်အၦ့ၤလီၤကွံာ်၀ဲအဆးတဖၣ်အဆးကွ့ၢ်ကွ့ၢ်အဂ့ၢ်ႇလူၢ်ပျဲၢ်ကီၢ်ဆၣ်လီၢ်က၀ီၤဖိလၢအလဲၤဆါပနၢ်(၆)ဒုဖဲႇကီၢ်ဆၢကျဲတၢ်လီၢ်တတီၤအပူၤတဂၤႇစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ယစးထီၣ်ဆှၢပာ်ယပနၢ်န့ၣ်စးထီၣ်လၢတၢ်ကိၢ်ခါအခါလံၤလံၤလံႇယပနၢ်ခဲလၢာ်န့ၣ်(၆)ဒုႇတဒုန့ၣ်ယဘၣ်ပာ်က့ၤအၦ့ၤဖဲစ့ယိၤတကလးခံကထိဘးလီၤႉယဘၣ်ပာ်ဖဲန့ၣ်န့ၣ်အိၣ်လၢခံလါဘျဲၣ်ညါႉလၢန့ၣ်တကပၤတၦ့ၤ၀ဲဘၣ်အဃိခဲအံၤယကဘၣ်က့ၤမူၤကဒါက့ၤလၢယသ၀ီလီၤႉထဲပၦ့ၤဒုးအီၣ်လီၢ်ဘိန့ၣ်ယရှူလံ”အဂ့ၢ်စံး၀ဲန့ၣ်လီၤႉ

အပူၤကွံာ်ကီၢ်ကၠီၣ်တဲၣ်တကပၤအိးထီၣ်၀ဲတၢ်ၦ့ၤကျီၢ်ႇပနၢ်အဆၢကတီၢ်ကျီၢ်ႇပနၢ်ဒိၣ်ဆံၣ်ပြံသွါတၢ်အိၣ်သးအဖီခိၣ်ႇအၦ့ၤအိၣ်၀ဲလၢစ့ယိၤခံကလးဘျဲၣ်ထီၣ်ဘးတုၤလၢသၢကလးဘျဲၣ်အိၣ်၀ဲဘၣ်ဆၣ်ႇတကီၢ်ခါခဲအံၤဒ်ကီၢ်ဆၢစ့တၢ်ဒိးလဲအိၣ်၀ဲအသိးန့ၣ်ႇကျီၢ်ႇပနၢ်တဒုအိၣ်က့ၤထဲတကလးဘျဲၣ်အဃိလၢဟီၣ်က၀ီၤသ၀ီတဖၣ်အပူၤအၦ့ၤအိၣ်တ့ၢ်က့ၤထဲစ့ပယီၤ(၅)ကလီၢ်ကၠးလီၤအဂ့ၢ်ႇလီၢ်က၀ီၤဖိလၢအလုၢ်အီၣ်သးသမူလၢတၢ်ဘုၣ်အီၣ်ကျီၢ်ပနၢ်တဖၣ်စံး၀ဲန့ၣ်လီၤႉ

တကးဒံးဘၣ်ႇခီဖျိၦၤၦ့ၤကျီၢ်ႇပနၢ်တအိၣ်၀ဲလၢၤဘၣ်ဒီးအၦ့ၤသ့ၣ်တဖၣ်လီၤ၀ဲဒ်အံၤအဃိကျီၢ်ႇပနၢ်လၢတၢ်ဆှၢထီၣ်၀ဲဆူကီၢ်ဆၢႇလၢအအိၣ်ကတာ်ထီတဖၣ်တၢ်ဘၣ်ဒိဆါလီၤက့ၤ၀ဲအိၣ်၀ဲအသိးႇဒူသ၀ီတနီၤအပူၤလီၢ်က၀ီၤဖိလၢလိၣ်ဘၣ်စ့ႇဒိဆါလီၤကျီၢ်တဖၣ်သနာ်က့ဘၣ်ခီၣ်ရှူ၀ဲအသးအိၣ်၀ဲအဂ့ၢ်ႇကီၢ်ဆၢသ၀ီတဖျၢၣ်အပူၤႇလီၢ်က၀ီၤဖိလၢအဘုၣ်ကျီၢ်တဂၤစံး၀ဲစ့ၢ်ကီး၀ဲန့ၣ်လီၤႉ

တကတီၢ်ဃီႇကၠီၣ်တဲၣ်တကပၤကးတံာ်ကွံာ်တၢ်ၦ့ၤကျီၢ်ပနၢ်အံၤခီဖျိလၢတၢ်ဂ့ၢ်မနုၤအဃိလဲၣ်န့ၣ်ႇတၢ်တသ့ၣ်ညါ၀ဲဘၣ်ႇဘၣ်ဆၣ်ကျီၢ်ႇပနၢ်လၢအဟဲနုာ်လၢကီၢ်ပယီၤတကပၤအံၤအၦ့ၤတကြၢးကၢကီၣ်ဘၣ်အဃိႇပတုာ်၀ဲတၢ်မၤကၤၦ့ၤကျီၢ်ႇပနၢ်တၢ်မၤအဂ့ၢ်ႇၦၤလၢအဘူးဒီးၦၤမၤကၤဆါကျီၢ်ကစၢ်တဂၤစံး၀ဲန့ၣ်လီၤႉ

ဒ်န့ၣ်အသိးႇတၢ်ကးတံာ်ကွံာ်၀ဲတၢ်ၦ့ၤကျီၢ်ပနၢ်လၢကီၢ်ဆၢကျဲတကပၤအံၤန့ၣ်ႇတနံၣ်အံၤမ့ၢ်တၢ်ကဲထီၣ်အသးအဆိကတၢၢ်တဘျီအဃိၦၤမၤကၤကျီၢ်ႇပနၢ်ဖိတဖၣ်ဘၣ်ခီၣ်ရှူ၀ဲအသးအိၣ်၀ဲဂ့ၢ်ႇသ့ၣ်ညါဘၣ်န့ၣ်လီၤႉ