လါယူၤလံ ၈ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကၠဲးထိၣ်ကီၢ်ဆၣ်အပူၤ ဖဲလါယူၤလံ ၆ သီအနံၤ ခီဖျိပယီၤသုးခးလီၤကျိဖးဒိၣ်လၢလီၢ်က၀ီၤဒူသ၀ီပူၤအဃိ ၦၤကမျၢၢ်ဘၣ်ဒိ၀ဲဒၣ်(၆)ဂၤအကျါပၣ်ဃုာ် ဖိသၣ်လၢအသးနံၣ် တၦဲၤဒံးဘၣ်(၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲလါယူၤ ၆ သီ မုၢ်ဃ့ၢ်လီၤ ၂ နၣ်ရံၣ်ဘျဲၣ်အဆၢကတီၢ် ပယီၤသုးခီၣ်ချ့သုးရ့ၣ်(ခမရ-၂)လၢအိၣ်(မီၤတူၤကိ) သ့ၣ်တဖၣ် အံၤ ခးလီၤ၀ဲဒၣ်ကျိဖးဒိၣ်(၅)ဖျၢၣ်လီၤတဲာ်ပိၢ်ဖးထီၣ်၀ဲဒၣ်လၢတကွံပူၤသ၀ီအခိၣ်အဃၢၤအဃိ ဘၣ်ဒိ၀ဲဒၣ်ၦၤကမျၢၢ် (၆)ဂၤ တကးဒံးဘၣ်အမဲာ်ညါသိလ့ၣ်တခိၣ်ဃုာ်ဒီးဟံၣ်တဖျၢၣ်စ့ၢ်ကီးဘၣ်၀ဲဒၣ်ဒီးကျိဖးဒိၣ် အက့အခီဟးဂီၤ၀ဲအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
ကျိဖးဒိၣ်အဃိၦၤကမျၢၢ်လၢအဘၣ်ဒိ(၆)ဂၤန့ၣ်မ့ၢ်၀ဲ တကွံပူၤသ၀ီ မီၤအီၤသဲဖၠူၤ(၈)နံၣ်ႇ မီၤခၠံၣ်ဆါကိၤ(၁၂)နံၣ်ႇ မီၤကၠီၤစွၤအူ(၁၃)နံၣ်ႇ မီၤ၀့ကိၤကိၤ(၁၉)နံၣ်ႇ ဒီၤခ့ၤသဲၣ်(၄၉)နံၣ်ဒီး တက့ၣ်ခံသ၀ီ အူစၤဂ့ၤ(၅၁)နံၣ် သ့ၣ်တဖၣ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါတကတီၢ်ဃီဖဲဟါခီ ၇း၀၀ နၣ်ရံၣ်ဘျဲၣ်အဆၢကတီၢ်စ့ၢ်ကီး ပယီၤသုးတဒူၣ်ဃီ၀ဲအံၤ ခးလီၤကဒီး ကျိဖးဒိၣ်(၃)ဖျၢၣ် လီၤတဲာ်ပိၢ်ဖးဒိၣ်၀ဲဒၣ်လၢတကွံပူၤသ၀ီဃၢၤ(၁)ဖျၢၣ်ဒီးလၢတကွံပူၤ-ဖီဒ့ၣ်ညါထၣ်သ၀ီဘၢၣ်စၢၤ (၂)ဖျၢၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်တလါအံၤလါယူၤလံ ၄ သီ မုၢ်နၤခီ ၉း၃၀ ဃၣ်ဃၣ်အဆၢကတီၢ်စ့ၢ်ကီး ပယီၤသုးတဒူၣ်ဃီ၀ဲအံၤ ခီဖျိအ၀ဲသ့ၣ်ခးလီၤကျိဖးဒိၣ်(၃)ဖျၢၣ်ဆူဒူသ၀ီပူၤအဃိ ကယၣ်၀့စ့ၣ်သ၀ီဖိဘၣ်ဒိဒံး ၀ဲဒၣ်(၁)ဂၤအသိးဟံၣ်ဃီ တၢ်သူၣ်ထီၣ်ဃုာ်ဒီးကျီၢ်ဘၣ်ဒိဘၣ်ထံးကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကၠဲးထိၣ်ကီၢ်ဆၣ်ပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤပယီၤသုးအံၤခးလီၤ၀ဲကျိဖးဒိၣ်ဆူဒူသ၀ီကမျၢၢ်အိၣ်ဆိး တၢ်လီၢ် ခဲအံၤခဲအံၤဒီး အပူၤကွံာ်လါယူၤတလါအတီၢ်ပူၤ ခီဖျိပယီၤသုးအတၢ်ခးလီၤကျိဖးဒိၣ်အံၤအဃိ ၦၤကမျၢၢ်သံ(၅)ဂၤ ဘၣ်ဒိ၀ဲဒၣ်(၁၀)ဂၤအဂ့ၢ်န့ၣ် သ့ၣ်ညါဘၣ်ဒ်ကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤႉ