လါယူၤလံ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် သထူၣ်ကီၢ်ဆၣ်အပူၤ ဖဲမဟါလါယူၤလံ ၁၆ သီအနံၤ တၢ်မၤပိၢ်ဖးထီၣ်ကဒီး၀ဲဘိၣ်ခါကွ့တိၤတဘိလၢအိၣ်ကၠဲဘူးသ၀ီဃၢၤအံၤဒီးတိၤလီၤၦီၢ်ဟးဂီၤဒီတဘိတကးဒံးဘၣ် ပယီၤသုးတကပၤစ့ၢ်ကီးက့ၤခးလီၤကဒါကျိးဖးဒိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါမုၢ်နၤခီ ၁၀ နၣ်ရံၣ်ဘျဲၣ်အဆၢကတီၢ် ဘိၣ်ခါကွ့တိၤလၢအိၣ်ဖဲကၠဲဘူး–ကမၣ်စဲၣ်သ၀ီဘၢၣ်စၢၤအံၤ တၢ်မၤပိၢ်ဖး ထီၣ်၀ဲဒီးဖဲန့ၣ်၀ံၤလီၢ်ခံ တဂီၤအံၤန့ၣ်သုးကီၣ်ကးအမျိာ်သုး(၃၁၄)ခးလီၤ၀ဲဒၣ် ကျိဖးဒိၣ်ကအိၣ်လၢ ယဲၢ်ဖျၢၣ်ဃုဖျၢၣ်ညါ အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ
အ၀ဲစံး၀ဲလၢ“ဖဲမနၤ ၁၀း၁၈ မံးနံးအဆၢကတီၢ်န့ၣ် နၢ်ဟူတၢ်ပိၢ်ထီၣ်သီၣ်မီၤနီၤႉ မုၢ်၀ါထီၣ်ဘျီပဆဲးကျိးပၦၤ တဲ၀ဲလၢ ဘိၣ်ခါကွ့တိၤထီၣ်တဲာ်ၦၤမၤဟးဂီၤအီၤမီၤႉမ့၀ံၤတိၤဟးဂီၤလီၢ်ခံဖဲတဂီၤညါအံၤ(၈)နၣ်ရံၣ်ဘျဲၣ်န့ၣ် သုးကီၣ်ကး အမျိာ်သုး (၃၁၄)ခးလီၤကျိဖးဒိၣ်ကအိၣ်လၢ(၆)ဖျၢၣ်ဃၣ်ဃၣ်ညါႉကျိဖးဒိၣ်န့ၣ်မ့ၢ်အလီၤတဲာ်လိၤဖဲလဲၣ်ဒီးတၢ်ဘၣ်ဒိဘၣ်ထံးအိၣ်ႇ တအိၣ်န့ၣ်တသ့ၣ်ညါအဂ့ၢ်အကျိၤနီမံၤဘၣ်အဃိတဲတသ့ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီ တၢ်ကစီၣ် ဖဲတနံၤအံၤန့ၣ်လီၤႉ
လၢန့ၣ်အမဲာ်ညါဘိၣ်ခါကွ့တိၤဟးဂီၤအဖီခိၣ်ခီဖျိသိလ့ၣ်ႇဆဲးကၢးသ့ၣ်တဖၣ်လ့ၢ်ထီၣ်လ့ၢ်လိၤတသ့လၢၤဘၣ်အဃိ တကီၢ်ခါခဲအံၤသိလ့ၣ်သ့ၣ်တဖၣ်ဘၣ်ဟးဆှဲးလဲၤက့ၤကျဲလၢမိကီႇမယါကိႇစွ့ၣ်ယီၣ်ပၠးသ၀ီတကပၤအသိး ဘၣ်ဃးတၢ်မၤ ပိၢ်ဖးထီၣ်တိၤအံၤမ့ၢ်ကရူၢ်ကရၢဖဲလဲၣ်တဒူၣ်မၤ၀ဲလဲၣ်န့ၣ်တဲလီၤတံၢ်တသ့ဒံးဘၣ်အဂ့ၢ်န့ၣ် ပဒိၣ်စီၤအ့နဲၤ စံး၀ဲန့ၣ်လီၤႉ
ဒ်န့ၣ်အသိးတၢ်မၤပိၢ်ဖးထီၣ်ဘိၣ်ခါကွ့တိၤ၀ံၤလီၢ်ခံခီဖျိကဘီယူၤဟဲဆှၣ်တၢ်ဒီးပယီၤသုးခးလီၤကျိဖးဒိၣ်အဃိ လီၢ်က၀ီၤကမျၢၢ် လၢအိၣ်တၢ်ခိၣ်တၢ်ဃၢၤဖဲန့ၣ်သ့ၣ်တဖၣ်ဘၣ်အိၣ်ဒီးတၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ
“ဖဲမနၤကမျၢၢ်တဖၣ်နၢ်ဟူတၢ်ပိၢ်ထီၣ်ဘျီဒူသ၀ီခိၣ်ဃၢၤဖဲန့ၣ်တဖၣ်န့ၣ်ဟီၣ်ခိၣ်ဟူးမီၤႉအဃိအ၀ဲသ့ၣ်ဆိမိၣ်လၢၦၤမၤ ဟးဂီၤတၢ်တမံၤမံၤဧါႇမ့ၢ်ကဘီယူၤဟဲကွံာ်လီၤခီဧါႉဖဲန့ၣ်တၢ်ပိၢ်ထီၣ်၀ံၤဘျီကဘီယူၤဟဲတဘ့ၣ်ႉကဘီယူၤဟဲအခါန့ၣ် ပိၢ်ထီၣ်ဒံးတထံၣ်ဒံးႉမ့ၢ်အပိၢ်ထီၣ်ဖဲလဲၣ်ခီန့ၣ်အ၀ဲသ့ၣ်တသ့ၣ်ညါလီၤတံၢ်စ့ၢ်ဘၣ်ႉတၢ်ပိၢ်ထီၣ်ဘျီအ၀ဲသ့ၣ်ဘၣ်မံလၢဟံၣ်ဖီလာ်ႉမုၢ်၀ါထီၣ်ဘျီအ၀ဲသ့ၣ်သ့ၣ်ညါလၢတၢ်မၤဟးဂီၤတိၤဘျီဘၣ်ယိၣ်၀ဲလၢပယီၤကခးလီၤကြီကျိဖးဒိၣ်လၢဒူသ၀ီႇတၢ်ဘၣ်ဒိဘၣ်ထံးကအိၣ်ထီၣ်အဃိဘၣ်အိၣ်၀ဲလၢတၢ်ပျံၤတၢ်ဖုးထီဘိန့ၣ်လီၤ”အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ် လီၤႉ
ဘိၣ်ခါကွ့တိၤအံၤခီဖျိအိၣ်၀ဲဒၣ်လၢသ၀ီဃၢၤသ၀ီခံဖျၢၣ်ဘၢၣ်စၢၤအဃိ တၢ်မၤပိၢ်ဖးထီၣ်တိၤဘျီ၀ဲအံၤ ၦၤကမျၢၢ်တၢ်သံ တၢ်ဘၣ်ဒိဘၣ်ထံးတအိၣ်၀ဲဘၣ်အသိး တိၤအံၤအိၣ်ဘူး၀ဲဒီးတပျဲကျိတိၤအံၤထဲခံတၢၣ်ဘျဲၣ်လီၤ အဂ့ၢ်န့ၣ် လီၢ်က၀ီၤ ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ
ဒ်တၢ်မၤနီၣ်စရီပူၤအိၣ်အသိးန့ၣ်တနံၣ်ဃီ၀့ၢ်တကူၣ်–မီၣ်လမၠဲၣ်ကျဲ အပူၤကွံာ်လါမ့ၤ ၁၁ သီ ဒီး ၂၃ သီအနံၤန့ၣ် တၢ်မၤပိၢ်ဖးထီၣ်၀ဲတပျဲကျိတိၤႇတီၤကလ့တိၤကဲထီၣ်တ့ၢ်ဒံး၀ဲဒီးခဲအံၤမ့ပာ်ဖှိၣ်ဃုာ်ဘိၣ်ခါကွ့တိၤအံၤန့ၣ် တၢ်မၤဟးဂီၤ တိၤခဲလၢာ်အိၣ်လံ၀ဲ(၃)ဘိလံ အဂ့ၢ်န့ၣ် သ့ၣ်ညါဘၣ်န့ၣ်လီၤႉ