လါယူၤလံ ၃၀သီ, ၂၀၂၄နံၣ်, ခ့ၣ်အဲးစံၣ်
သုးကီၣ်ကးဘိးဘၣ်ရၤလီၤဝဲကမျၢၢ်တၢ်ဘၣ်ကဲသုးဝံၤအလီၢ်ခံ,တၢ်လီၢ်အါတီၤအပူၤသူၣ်ဘီၣ်သးစၢ်လၢအဃ့ၢ်ပဒ့ၣ်အသးလၢသုးကီၣ်ကးကမျၢၢ်တၢ်ဘၣ်ကဲသုးသ့ၣ်တဖၣ်အံၤ,နုၥ်လီၤကဲဝဲသုးခိးကီၢ်ဆၢ(BGF)သုးဖိလၢကညီကီၢ်စဲၣ်အပူၤအိၣ်အါထီၣ်ဝဲအဂ့ၢ်,သုးခိးကီၢ်ဆၢ(BGF)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
သုးကီၣ်ကးကမျၢၢ်တၢ်ဘၣ်ကဲသုးအဃိ,ကညီကီၢ်စဲၣ်ဟီၣ်ကဝီၤတဖၣ်အပူၤသူၣ်ဘီၣ်သးစၢ်တဖၣ်တကးဘၣ်,ထံထၣ်စွ့ကညီသူၣ်ဘီၣ်သးစၢ်တဖၣ်စ့ၢ်ကီးလဲၤနုၥ်လီၤကဲဝဲသုးခိးကီၢ်ဆၢ(BGF)အပှၤသုးဖိအါထီၣ်ဝဲဒၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိလၢအဘူးဒီးသုးခိးကီၢ်ဆၢ(BGF)တဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“သူၣ်ဘီၣ်သးစၢ်တဖၣ်လဲၤနုၥ်လီၤဝဲလၢ(BGF)သုးအကျါအါထီၣ်ဝဲဒိၣ်မးလီၤ,အဝဲသ့ၣ်တဖၣ်အံၤအိၣ်ဆိးဝဲလၢဝ့ၢ်ပူၤတၢ်ဟးထၢဝဲသုးအဃိတအဲၣ်ဒိးလဲၤဝဲဘၣ်အဖီခိၣ်ဟဲထီၣ်ဝဲလၢအံၤန့ၣ်လီၤ,အခဲအံၤထံထၣ်စွ့ကညီသးစၢ်တဖၣ်မ့ၢ်ဂ့ၤ,ပယီၤကလုၥ်ဒူၣ်သးစၢ်တဖၣ်မ့ၢ်ဂ့ၤပၣ်ဃုၥ်ခဲလၢၥ်လီၤ,သးစၢ်တဖၣ်အံၤလဲၤနုၥ်ဝဲလၢဖီၣ်စုကဝဲၤကရူၢ်ကရၢလၢအဂၤတဖၣ်အိၣ်စ့ၢ်ကီးဝဲ,ဘၣ်ဆၣ်မ့မ့ၢ်လၢအလဲၤနုၥ်ကဲဝဲသုးခိးကီၢ်ဆၢ(BGF)အသုးန့ၣ်,အမျးကယၤအါန့ၣ်ဒံးကရူၢ်ကရၢလၢအဂၤတစဲးဖိန့ၣ်လီၤ,တကီၢ်ခါခဲအံၤသုးခိးကီၢ်ဆၢနါက့တအိၣ်ဃူပှၤနီတဖုဘၣ်အဃိအဝဲသ့ၣ်တဖၣ်ဆိမိၣ်လၢဟးပဒ့ၣ်သးအဆၢကတီၢ်ကအိၣ်ဆိးဘၣ်ဝဲလၢတၢ်ဘံၣ်တၢ်ဘၢပူၤအဃိကဘၣ်မ့ၢ်လဲၤနုၥ်ဝဲန့ၣ်လီၤအဂ့ၢ်,”စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ကညီကီၢ်စဲၣ်ဖၣ်အၣ်,ကြုၢ်တု,ဒီးလူၢ်ပျဲၢ်ကီၢ်ဆၣ်သ့ၣ်အပူၤသူၣ်ဘီၣ်သးစၢ်တဖၣ်စ့ၢ်ကီး,လၢတၢ်ကဟးပဒ့ၣ်ဝဲအသးလၢသုးကီၣ်ကးကမျၢၢ်တၢ်ဘၣ်ကဲသုးအဂီၢ်,နုၥ်လီၤဝဲလၢသုးခိးကီၢ်ဆၢ(BGF)သုးအပူၤအိၣ်ဝဲဒီး,နုၥ်လီၤအိၣ်ဆိးဝဲလၢဒူသဝီလီၢ်ကဝီၤပူၤအါထီၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံဝဲဒ်အံၤန့ၣ်လီၤ.
အဝဲစံးဝဲလၢ“ကြုၢ်တု,ခၠီဖၠါ,ကွဲၣ်သ့ၣ်တၢ်လီၢ်တဖၣ်အပူၤသးစၢ်တဖၣ်န့ၣ်နုၥ်လီၤကဲဝဲသုးခိးကီၢ်ဆၢ(BGF)အါမးန့ၣ်လီၤ,အဝဲသ့ၣ်တဖၣ်အံၤဟးပဒ့ၣ်ဝဲအသးလၢသုးကီၣ်ကးကမျၢၢ်တၢ်ဘၣ်ကဲသုးအသိး,လၢအဝဲတကပၤန့ၣ်အသုတၢ်ဖံးတၢ်မၤတအိၣ်ဘၣ်အဃိနုၥ်လီၤဝဲလၢသုးခိးကီၢ်ဆၢ(BGF)သုးကျါဒ်သိးကဒိးန့ၢ်ဘၣ်လါလဲအဂီၢ်န့ၣ်လီၤ,အဝဲသ့ၣ်တဖၣ်အံၤကဲသုးခိးကီၢ်ဆၢနါက့တဘၣ်လဲၤတၢ်မဲၥ်ညါဘၣ်,အိၣ်ဒၣ်ထဲဘၣ်အိၣ်ခိးဒူသဝီခိၣ်ဃၢၤတၢ်ဘံၣ်တၢ်ဘၢအဃိနုၥ်လီၤဝဲသုးခိးကီၢ်ဆၢလီၤအဂ့ၢ်”ကြုၢ်တုကွဲးသ့ၣ်(BGF)သးစၢ်အဒူၣ်ဖိထၢဖိတဂၤစံးဝဲန့ၣ်လီၤ.
တကဒံးဘၣ်,သးစၢ်လၢအလဲၤကဲဝဲသုးခိးကီၢ်ဆၢ(BGF)သုးသ့ၣ်တဖၣ်အံၤ,တၢ်ဟ့ၣ်ဝဲအဝဲသ့ၣ်တဖၣ်သုးတၢ်သိၣ်လိလၢလၢဖၣ်အၣ်ကွဲၢ်ကဘီကစၢၢ်ခီၣ်ထံး(BGF)သုးအတၢ်လီၢ်တၢ်ကျဲဒ်အမ့ၢ်(ဟိၤထဲ)တၢ်အိၣ်ဘှံးအလီၢ်ကရၢၢ်,မၠဲၣ်ကၠံငူၣ်ပါဒီၣ်မံၣ်(BGF)သုးရ့ၣ်တၢ်လီၢ်ဒီး,ရွ့ၣ်ကိၣ်ကိၤ(BGF)သုးရ့ၣ်တၢ်လီၢ်တဖၣ်အပူၤအိၣ်ဝဲအဂ့ၢ်,ပှၤလၢအဘူးဒီးသုးခိးကီၢ်ဆၢ(BGF)တဖၣ်စံးဝဲန့ၣ်လီၤ.
တကတီၢ်ဃီ,သးစၢ်လၢအလဲၤနုၥ်လီၤကဲဝဲသုးခိးကီၢ်ဆၢ(BGF)သုးဖိတဖၣ်အံၤလါတဘ့ၣ်န့ၣ်ဒိးန့ၢ်ဘၣ်ဝဲစ့လါလၢစ့ယိၤ(၃၀၀၀)ဘးအိၣ်ဝဲအသိးတနီၤဒိးန့ၢ်ဘၣ်ဝဲ(၅၀၀၀)ဘးအိၣ်စ့ၢ်ကီးဝဲအဂ့ၢ်,ပှၤလၢအဘူးဒီးသုးခိးကီၢ်ဆၢ(BGF)တဖၣ်စံးစ့ၢ်ကီးဝဲဒၣ်န့ၣ်လီၤ.
ဒ်န့ၣ်အသိး,ဖဲ(၂၀၂၄)နံၣ်လါယနူၤအါရံၤ(၂၂)သီအပူၤန့ၣ်သုးကီၣ်ကးအစုတီၤဖီလၥ်သုးခိးကီၢ်ဆၢ(BGF)အခိၣ်နၢ်တဖၣ်,ဘိးဘၣ်ရၤလီၤဝဲလၢကအိၣ်ပတုၥ်ကွံၥ်လၢသုးခိးကီၢ်ဆၢ(BGF)တၢ်ဖံးတၢ်မၤဒီးကဆီတလဲက့ၤအသးလၢကညီဒီကလုၥ်သုးမုၢ်ဒိၣ်(KNA)ဒီးကဟံဝဲတၢ်မုၥ်တၢ်ခုၣ်လၢကီၢ်ဆၣ်တဖၣ်အိၣ်ဝဲဘၣ်ဆၣ်တဆီတလဲဝဲအသးလၢၤဘၣ်ဒီး,ဖဲလါအ့ဖြ့ၣ်အပူၤသုးကီၣ်ကးထီၣ်မၤန့ၢ်က့ၤဝဲရၤမတံဝ့ၢ်ဝံၤအလီၢ်ခံ,အဝဲသ့ၣ်တဖၣ်က့ၤပၥ်ဖှိၣ်မၤသကိးက့ၤဝဲတၢ်ဒီးသုးကီၣ်ကးဒီးပၥ်လီၤဝဲတၢ်ဘံၣ်တၢ်ဘၢလၢဖၣ်အၣ်,လူၢ်ပျဲၢ်,ရၤမတံ,ကြုၢ်တုဝ့ၢ်ပူၤ,ဝ့ၢ်ချၢအိၣ်ဝဲအမဲၥ်ညါမၤအါထီၣ်ကဒီးဝဲအတၢ်အိၣ်ခိးတြဲၤဒီးတၢ်သမံသမိးလီၢ်တဖၣ်အါထီၣ်ကွ့ၢ်ကွ့ၢ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
