(BGF)ဟံၣ်ဖိဃီဖိတဖၣ်တဘၣ်ထီထီၣ်(ဆၣ်)တၢ်ပနီၣ်လၢအသိလ့ၣ်လိၤဘၣ်အဂ့ၢ်ႇလီၢ်ခၢၣ်သးကမံတံာ်ဟ့ၣ်လီၤတၢ်ကလုၢ်

လါယူၤလံ ၃သီႇ ၂၀၂၄နံၣ်ႇ ခ့ၣ်အဲးစံၣ်ႇ

သုးခိးကီၢ်ဆၢ(BGF)အဟံၣ်ဖိဃီတဖၣ်ႇတဘၣ်ထီထီၣ်၀ဲ(BGF)သုးသိလ့ၣ်(ဆၣ်)အတၢ်ပနီၣ်လၢအသိလ့ၣ်အလိၤဒီးဟးဒိး၀ဲဘၣ်အဂ့ၢ်ႇကညီကီၢ်စဲၣ်(သုးခိးကီၢ်ဆၢ)လီၢ်ခၢၣ်သးၦၤဟ့ၣ်ကူၣ်ဟ့ၣ်ဖးတၢ်ဒီးပၢဆှၢရဲၣ်ကျဲၤကမံတံာ်ထုးထီၣ်ဘိးဘၣ်ရၤလီၤ၀ဲလံာ်ဟ့ၣ်တၢ်ကလုၢ်တဘ့ၣ်ဖဲအပူၤကွံာ်လါယူၤအသီ(၂၀)အနံၤအဂ့ၢ်ႇသ့ၣ်ညါဘၣ်န့ၣ်လီၤႉ

လံာ်ဘိးဘၣ်ရၤလီၤတၢ်ကလုၢ်အပူၤပာ်ဖျါ၀ဲလၢ“သုးခိးကီၢ်ဆၢ(BGF)အသုးခိၣ်စိႇသုးခိၣ်ယီၤႇသုးမုၢ်သံၣ်ဘိဃုာ်ဒီးၦၤသုးဖိခဲလၢာ်အဒူၣ်ဖိထၢဖိတဖၣ်အံၤလ့ၤတက့ၤတဘၣ်ထီထီၣ်၀ဲ(BGF)သုးသိလ့ၣ်တၢ်ပနီၣ်လၢအမ့ၢ်၀ဲ(ဆၣ်)အက့ၢ်အဂီၤအံၤဘၣ်”အဂ့ၢ်ႇပာ်ဖျါ၀ဲလၢလံာ်တၢ်ကလုၢ်အပူၤန့ၣ်လီၤႉ

ဘၣ်ဃးတၢ်ဟ့ၣ်လီၤတၢ်ကလုၢ်ဒ်အံၤန့ၣ်ခီဖျိတကီၢ်ခါခဲအံၤသုးခိးကီၢ်ဆၢ(BGF)အဒူၣ်ဖိထၢဖိတနီၤသူ၀ဲ(ဆၣ်)တၢ်ပနီၣ်လၢအသိလ့ၣ်လိၤဒီးဟးထီၣ်က့ၤလီၤလၢဟီၣ်က၀ီၤပူၤအိၣ်၀ဲအဃိဒီးတၢ်အံၤတမ့ၢ်တၢ်လၢအကြၢး၀ဲဘၣ်၀ဲဘၣ်အဖီခိၣ်တၢ်ထုးထီၣ်ဟ့ၣ်လီၤတၢ်ကလုၢ်ဒ်အံၤလီၤအဂ့ၢ်(BGF)သုးဟီၣ်က၀ီၤနီၢ်ဂံၢ်-၂ႇအဒုးယၤခိၣ်ႇသုးခိၣ်ဒိၣ်စိစီၤတ့ၤ၀့စံးဘၣ်ကညီကွဲၤလ့လိၤဒ်အံၤန့ၣ်လီၤႉ

အ၀ဲစံး၀ဲလၢ“တၢ်ဂ့ၢ်ဘၣ်ဃးတၢ်ဟ့ၣ်လီၤတၢ်ကလုၢ်တခါန့ၣ်ခီန့ၣ်ႇတနီၤနီၤန့ၣ်ခီဖျိဟးဒိး၀ဲသိလ့ၣ်လၢအပၣ်ဃုာ်ဒီး(BGF)ဆၣ်တၢ်ပနီၣ်၀ံၤလဲၤ၀ဲဆူခူပူၤ၀့ၢ်ပူၤလၢဖၣ်အၣ်ႇမီၣ်လမၠဲၣ်ႇဒူသထူၣ်၀့ၢ်ပူၤသ့ၣ်တဖၣ်န့ၣ်အိၣ်၀ဲအဃိလီၤႉဒီးတၢ်အံၤတမ့ၢ်တၢ်ကြၢးတၢ်ဘၣ်ဘၤမီၤႉတၢ်လၢဒူၣ်ဖိထၢဖိဟံၣ်ဖိဃီဖိခီန့ၣ်တဟး၀ဲဒီးၦၤသုးဖိဘၣ်အဃိန့ၣ်တလိၣ်လၢဘၣ်ထီထီၣ်(ဆၣ်)တၢ်ပနီၣ်ဘၣ်ႉတၢ်ထုးထီၣ်တၢ်ကလုၢ်အံၤန့ၣ်အိၣ်တၢ်ဂ့ၢ်အံၤလီၤႉတၢ်ကီတၢ်ခဲလၢအဂၤဒုတအိၣ်ဘၣ်”အဂ့ၢ်စံး၀ဲဒၣ်န့ၣ်လီၤႉ

လၢန့ၣ်အမဲာ်ညါႇသုးခိးကီၢ်ဆၢဒူၣ်ဖိထၢဖိတဖၣ်အံၤခီဖျိမ့ၢ်၀ဲကမျၢၢ်တဖၣ်လီၤအဃိဒ်သိးကမျၢၢ်သ့ၣ်တဖၣ်ဒိး၀ဲသိလ့ၣ်အသိးန့ၣ်ကဘၣ်ဒိး၀ဲဒ်ကမျၢၢ်တဖၣ်လီၤအဂ့ၢ်ႇစံးအါထီၣ်၀ဲဒၣ်န့ၣ်လီၤႉ

တကတီၢ်ဃီႇလၢတၢ်ထီထီၣ်၀ဲ(ဆၣ်)တၢ်ပနီၣ်ဒီးဟးဒိး၀ဲသိလ့ၣ်သ့ၣ်တဖၣ်အကျါန့ၣ်ကမျၢၢ်လီၢ်က၀ီၤဖိလၢအတမ့ၢ်၀ဲသုးဟံၣ်ဖိဃီဖိဘၣ်ဒီးႇမ့ၢ်၀ဲၦၤမၤအီၣ်မုၢ်ကျိၤ၀ဲၤကွာ်တနီၤတဖၣ်ပၣ်ဃုာ်၀ဲအဃိဒ်သိးတၢ်သဘံၣ်ဘုၣ်တအိၣ်ဘၣ်အဂီၢ်တၢ်ဟ့ၣ်လီၤတၢ်ကလုၢ်လၢကလူၤပိာ်ထွဲ၀ဲအဂ့ၢ်ႇစံးစ့ၢ်ကီး၀ဲဒၣ်န့ၣ်လီၤႉ

ဒ်န့ၣ်အသိးႇလံာ်တၢ်ကလုၢ်ပူၤပာ်ဖျါ၀ဲလၢတၢ်ဘိးဘၣ်ရၤလီၤလံာ်၀ံၤအလီၢ်ခံႇၦၤတဂၤလၢ်လၢ်လၢမ့တလူၤပိာ်မၤထွဲ၀ဲဒ်တၢ်ကလုၢ်အသိးဘၣ်န့ၣ်ႇတၢ်ဂ့ၢ်ကီမ့ၢ်အိၣ်ထီၣ်ဘၣ်ဆၣ်တၢ်တဘှါရှဲန့ၣ်၀ဲဘၣ်အဂ့ၢ်ႇပာ်ဖျါ၀ဲဒၣ်န့ၣ်လီၤႉ