လါအီကူး ၆သီ, ၂၀၂၄နံၣ်, ခ့ၣ်အဲးစံၣ်
ဒိးန့ၢ်ဘၣ်ဝဲတၢ်ကစီၣ်လၢဒ်သိးခ့ၣ်အဲၣ်ယူၣ်သုးက့(၁),(၃) ဒီး(၅)သ့ၣ်တဖၣ်ဒုးအိၣ်ထီၣ်ဝဲဒုးယၥ်ရဲၣ်ကျဲၤဖဲပှဲၤလိၥ်ကျိဟီၣ်ကဝီၤကန့ၢ်အဂီၢ် ခ့ၣ်အဲၣ်ယူၣ် ကရၢခိၣ်ခဲအံၤဒီး(KNLA)အသုးရိၣ်မဲခိၣ်ကျၢၢ်သ့ၣ်တဖၣ်ရဲၣ်ကျဲၤဝဲဒၣ်အဂ့ၢ်သုးကီၣ်ကးအခိၣ်မ့အီၣ်လဲၣ်တဲလီၤဝဲဖဲလါအူကူး(၅)သီအနံၤန့ၣ်လီၤ.
ဘၣ်ဃးဒီးတၢ်ဂ့ၢ်ဝဲအံၤန့ၣ် မ့အီၣ်လဲၣ်တၢ်မၤအိၣ်န့ၣ်ကမၤဝဲဒီးပတၢ်မၤအိၣ်န့ၣ်ကမၤအီၤအဂ့ၢ် (KNLA)အသုးရိၣ်မဲခိၣ်ကျၢၢ်သုးခိၣ်ကျၢၢ်စိ စီၤကၠီၣ်နံၣ် စံးဝဲဒ်အံၤန့ၣ်လီၤ.
အဝဲစံးဝဲလၢ“တဲဆၢက့ၤအလီၢ်တအိၣ်နီတမံၤဘၣ်.တဲဆၢသနၥ်က့အဘျုးတအိၣ်ဘၣ်. မ့အီၣ်လဲန့ၣ် အတၢ်မၤအိၣ်န့ၣ်ကမၤဝဲဒီး ပဝဲပတၢ်မၤအိၣ်န့ၣ်ပမၤန့ၣ်လီၤ.မတဂၤမၤဟးဂီၤ (NCA)လဲၣ်? မ့ၢ်ကလုၥ်ဒူၣ်မၤဟးဂီၤဧါ? မ့အီၣ်လဲၣ်မၤဟးဂီၤဧါ န့ၣ်ယဆိမိၣ်လၢဟီၣ်ခိၣ်ဒီဘ့ၣ်သ့ၣ်ညါထွဲလီၤ. မ့အီၣ်လဲၣ်န့ၣ်ပှၤတဲလၢပျုၢ်တၢ်စိတၢ်ကမီၤဒီးအဝဲဟံးထီၣ်မူဒါခဲအံၤန့ၣ်အနီၢ်ကစၢ်ဒၣ်ဝဲတီၣ်ထီၣ်အသးန့ၣ်ဟီၣ်ခိၣ်ဒီဘ့ၣ်သ့ၣ်ညါဒီးပှၤလၢနၢ်ပၢၢ်တၢ်သ့ၣ်တဖၣ်န့ၣ် ကနၢ်ပၢၢ်ဝဲလီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ခ့ၣ်အဲၣ်ယူၣ် အံၤဆဲးလီၤဝဲထံကီၢ်ဒီဘ့ၣ်တၢ်ပတုၤတၢ်ခးအလံၥ်ဃံးဃၥ်(NCA)ဘၣ်ဆၣ် အခိၣ်အနၢ်တနီၤန့ၣ်မၤထီဒါဝဲ(NCA)ဒီး ဟ့ၣ်ဝဲ(PDF)သ့ၣ်တဖၣ်သုးတၢ်သိၣ်လိ, ဟ့ၣ်လီၤဝဲဒၣ်တၢ်စုကဝဲၤဝံၤဒုးအိၣ်ထီၣ်ဝဲတၢ်ဒုးတၢ်ယၤလၢကညီကီၢ်စဲၣ်ပူၤအဂ့ၢ် သုးကီၣ်ကးအခိၣ် မ့အီၣ်လဲၣ် ပၥ်ဒ့ၣ်ပၥ်ကမၣ်တၢ်အိၣ်ဝဲဒၣ်စ့ၢ်ကီးန့ၣ်လီၤ.
လၢတၢ်ဂ့ၢ်ဝဲအံၤအဖီခိၣ်န့ၣ် တၢ်ဟံးန့ၢ်ဆူၣ်ထံကီၢ်တၢ်စိတၢ်ကမီၤန့ၣ်တမ့ၢ်တၢ်လၢအကြၢးအဘၣ် ဘၣ်န့ၣ် ပပၥ်ဖျါထီၣ်ပတၢ်ပၥ်သးဘၣ်ဆၣ်အဝဲဟံးဆူၣ်တၢ်စိတၢ်ကမီၤအဃိ တၢ်ဂ့ၢ်ပိၥ်ထွဲထီၣ်အခံခဲလၢၥ်န့ၣ် ခီဖျိ မ့အီၣ်လဲၣ် အဃိလီၤအဂ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အပှၤကတိၤတၢ်ပၢ ပဒိၣ်စီၤကျၢၤစ့ စံးဝဲဒၣ်ဒ်အံၤစ့ၢ်ကီးန့ၣ်လီၤ.
အဝဲစံးဝဲလၢ“ဘၣ်ဃးဒီးတၢ်ဂ့ၢ်ဝဲအံၤန့ၣ်ပထံၣ်လၢ တၢ်လၢအပူၤကွံၥ်ကဲထီၣ်သးတဆီဘၣ်တဆီန့ၣ် ခီဖျိလၢ မ့အီၣ်လဲၣ်အနီၢ်ကစၢ်န့ၣ်လီၤ.တၢ်မၤလၢတၢ်ဟံးန့ၢ်ဆူၣ်တၢ်စိတၢ်ကမီၤန့ၣ်တၢ်တကြၢးမၤဘၣ်န့ၣ် တၢ်ဟ့ၣ်ပလီၢ်အီၤ,ပတဲဒုးသ့ၣ်ညါပတၢ်ပၥ်သးသ့ၣ်တဖၣ်လီၤတံၢ်လီၤဆဲးလီၤ. ဘၣ်ဆၣ်ဒီးအဝဲမၤဝဲအဃိန့ၣ် တၢ်ကဲထီၣ်သးသ့ၣ်တဖၣ်ခဲလၢၥ်န့ၣ်ပထံၣ်လၢခီဖျိလၢအဝဲအဃိန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ ခီဖျိလၢ ထံဂုၤကီၢ်ဂၤဒီးထံကီၢ်လၢအအိၣ်ဘူးဒီးကီၢ်ပယီၤသ့ၣ်တဖၣ် မၤစၢၤတၢ်ပၢၢ်ဆၢရူၢ်ကရၢသ့ၣ်တဖၣ်လၢ ဒရိတၢ်သ့တၢ်ဘၣ်,တၢ်စုကဝဲၤ, သုးတၢ်သိၣ်လိဒီးတၢ်အီၣ်တၢ်အီသ့ၣ်တဖၣ်အဃိအဝဲသ့ၣ်ဘၣ်ဃၣ်ဝဲဒၣ်လၢတကီၢ်ခါခဲအံၤအဂ့ၢ်သုးကီၣ်ကးအခိၣ်မ့အီၣ်လဲၣ်စံးဝဲဒၣ်အိၣ်ဘၣ်ဆၣ် ထံကီၢ်လီၤတံၢ်လီၤဆဲးအမံၤတခီတယၢၤထီၣ်ဝဲဒၣ်ဘၣ်အဂ့ၢ်ပထံၣ်ဘၣ်ဝဲဒၣ်န့ၣ်လီၤ.
တကီၢ်ခါခဲအံၤန့ၣ်ခီဖျိပတြီၤကီၢ်ခိၣ်ကျၢၢ်အူမၠ့ၣ်စွ့ၤဟံးန့ၢ်ဝဲဒၣ်တၢ်အိၣ်ဆူအိၣ်ချ့ခွဲးအဃိ လၢတၢ်ပၢတၢ်ပြးအဂီၢ်သုးကီၣ်ကးကရူၢ်လၢဘၣ်တၢ်တီခိၣ်ရိၣ်မဲအီၤလၢ မ့အီၣ်လဲၣ်အံၤန့ၣ်ကိးဝဲဒၣ်ဒီကလုၥ်တၢ်ဒီသဒၢဒီးတၢ်ဘံၣ်တၢ်ဘၢကီၣ်ကးတၢ်အိၣ်ဖှိၣ် ဖဲအပူၤကွံၥ်လါယူၤလံ ၃၁သီဒီး လၢပတြီၤကီၢ်ခိၣ်ကျၢၢ် အူမၠ့ၣ်စွ့ၣ်အလီၢ်န့ၣ် ဘၣ်တၢ်ပၥ်ထီၣ်က့ၤဝဲလၢ သုးကီၣ်ကးအခိၣ်မ့အီၣ်လဲၣ်အမဲၥ်ညါ မၤအါထီၣ်ကဒီးဝဲဂ့ၢ်ဂီၢ်အူသုးတၢ်ပၢတၢ်ြပးလၢ(၆)တီၢ်ပူၤအဂ့ၢ်သ့ၣ်ညါဘၣ်န့ၣ်လီၤ. သုးကီၣ်ကးအံၤဟံးန့ၢ်ဆူၣ်ကွံၥ်ထံကီၢ်တၢ်စိတၢ်ကမီၤဝံၤအလီၢ်ခံဖဲလါအ့ဖြ့ၣ်အတီၢ်ပူၤန့ၣ်ဘိးဘၣ်ရၤလီၤဝဲဂ့ၢ်ဂီၢ်အူသုးတၢ်ပၢတၢ်ြပးဒီးစံးဝဲလၢဂ့ၢ်ဂီၢ်အူသုးတၢ်ပၢတၢ်ြပးအံၤယံၤအါန့ၢ်(၂)တန့ၣ်ဘၣ် ဘၣ်ဆၣ် အခဲအံၤအဝဲသ့ၣ်မၤအါထီၣ်ဝဲ(၆)လါတဘျီန့ၣ်အိၣ်ဝဲ(၆)ဘျီလံန့ၣ်လီၤ.
ဒ်န့ၣ်အသိး အခဲအံၤန့ၣ် သုးကီၣ်ကးအခိၣ်မ့အီၣ်လဲၣ်အံၤ ဟံးဝဲမူဒါလီၢ်လၤသ့ၣ်တဖၣ်ဒ်အမ့ၢ် ထံကီၢ်တၢ်ပၢတၢ်ြပးကီၣ်ကးကိတိၥ်, ကီၢ်ပယီၤတၢ်ဒီသဒၢဝဲၤကျိၤခိၣ်ဒီးကီၢ်ပယီၤကီၢ်ခိၣ်ကျၢၢ်သ့ၣ်တဖၣ်န့ၣ်လီၤ.
မ့အီၣ်လဲၣ်အံၤ ဒ်သိးကဒိးန့ၢ်ဘၣ်ဝဲထံကီၢ်တၢ်စိတၢ်ကမီၤအဂီၢ် တၢ်လၢကဘၣ်မၤဝဲအိၣ်ဒီဒူၣ်အကျါ လၢကမၤဝဲတၢ်ဃုထၢအဂီၢ်မ့ၢ်ဂ့ၤ,ကမၤသဘှံးဝဲကီၢ်ဒီတဘ့ၣ်တၢ်ပၢၢ်ဆၢကရူၢ်ကရၢသ့ၣ်တဖၣ်အဂီၢ်န့ၣ်တၢ်ဆၢတကတီၢ် တလၢတလီၣ်လၢအဂီၢ်ဘၣ်အဃိ မၤအါထီၣ်ဝဲအသးနံၣ်တဘျီဝံၤတဘျီဘၣ်ဆၣ် တညီလၢၤလၢအဂီၢ်ဘၣ် န့ၣ်ပသမၢအလီၢ်တအိၣ်ဘၣ်အဂ့ၢ် ခ့ၣ်အဲၣ်ယူၣ် အပှၤကတိၤတၢ်ပၢပဒိၣ်စီၤကျၢၤစ့ စံးဝဲဒၣ်န့ၣ်လီၤ.
