လါအီကူာ် ၉ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤလါဖါသးစၢ်ခိၣ်နၢ်ဖိခိၣ်ဖးအံၤ ၂၀၂၃ နံၣ် အဂီၢ် ၦၤဟူးဂဲၤထံရူၢ်ကီၢ်သဲးဖိစီၤအဲလ်ဘၢၣ်ခၠိၤဒိးန့ၢ်ဘၣ်၀ဲအဂ့ၢ်န့ၣ် (Phan Foundation)ထုးထီၣ်ဘိးဘၣ်ရၤလီၤ၀ဲလၢအ (facebook page)ပူၤဖဲတနံၤအံၤလါအီကူာ် ၉ သီအနံၤန့ၣ်လီၤႉ
စီၤအဲလ်ဘၢၣ်ခၠိၤလၢအဒိးန့ၢ်ဘၣ်ခိၣ်ဖးအံၤတကီၢ်ခါမ့ၢ်သးစၢ်တဂၤလၢအဟူးဂဲၤလၢကညီထံရူၢ်ကီၢ်သဲးတၢ်ဖံးတၢ်မၤပူၤတဂၤအသိးလၢကညီသးစၢ်ကရၢ(KYO)ကရူၢ်တကပၤစ့ၢ်ကီးမ့ၢ်၀ဲဒၣ်ခိၣ်နၢ်တဂၤဒီးဒ်န့ၣ်အသိးစးထီၣ်(၂၀၂၁) သုးဟံန့ၢ် တၢ်စိတၢ်ကမီၤလီၢ်ခံန့ၣ်အ၀ဲနုာ်ပၣ်ဃုာ်၀ဲဒၣ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤဒီတကတီၢ်တုၤလၢ ခဲအံၤတစု အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢတၢ်တပာ်သူၣ်ပာ်သးအပူၤဒိးန့ၢ်ဘၣ်ခိၣ်ဖးအဖီခိၣ်ကဲထီၣ်တၢ်သူၣ်ဒူသးဒူလၢခါဆူညါတၢ်ဖံးတၢ်မၤတၢ်ဟူးတၢ်ဂဲၤ အပူၤဒိၣ်မးဒီးတကးဒံးဘၣ်ၦၤကလုာ်ကတုၤလၢဖီတၢၣ်အဂီၢ်တသ့ဖဲအသ့ကပာ်ဖှိၣ်မၤသကိးတၢ်အဂ့ၤကတၢၢ်အဂ့ၢ်န့ၣ် စီၤအဲလ်ဘၢၣ်ခၠိၤ လၢအဒိးန့ၢ်ဘၣ်(Phan Foundation)ခိၣ်ဖးအံၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤ န့ၣ်လီၤႉ
အ၀ဲစံး၀ဲလၢ“လၢတၢ်တမုၢ်လၢ်အပူၤယဒိးန့ၢ်ဘၣ်ခိၣ်ဖးတခါအံၤအဖီခိၣ်လၢတၢ်မၤတၢ်လၢတၢ်ဖံးတၢ်မၤဘၣ်ဃးတၢ်ဟူးဂဲၤကညီသးစၢ်တၢ်ဖံးတၢ်မၤမ့ၢ်ဂ့ၤဒီးတၢ်ပၣ်ဃုာ်မၤသကိးတၢ်လၢတၢ်ပၢၢ်ဆၢတၢ်ဖံးတၢ်မၤပူၤမ့ၢ်ဂ့ၤန့ၣ်ကဲထီၣ်တၢ်သူၣ်ခုသးခုတၢ်သူၣ်ဒူသးဒူလၢယဂီၢ်ဒိၣ်မးလီၤႉတၢ်လၢယအဲၣ်ဒိးတဲန့ၣ်ယမၤန့ၢ်ဘၣ်ခိၣ်ဖးတခါအံၤန့ၣ်ယပာ်ကဖၢ လၢယသးလီၤ ဘၣ်ဆၣ်ယပာ်အီၤလၢတမ့ၢ်ယတၢ်ဘၣ်ႉခီဖျိယမၤယၦၤကလုာ်အတၢ်ဖံးတၢ်မၤဒီးယၦၤကလုာ်ပာ် ပနီၣ်ယၤလီၤ မီၤနီၤႉ တၢ်တခါအံၤမ့ၢ်မူဒါဒီးခါဆူညါယကဘၣ်အိၣ်မူဂ့ၤထီၣ်ႇဂုာ်ကျဲးစၢးအါထီၣ်ဒီးဒ်သိးၦၤကလုာ် ကတုၤလၢဖီတၢၣ်အဂီၢ်န့ၣ် တၢ်လၢယမၤသ့န့ၣ်ယကမၤအဂ့ၤကတၢၢ်လီၤ”အဂ့ၢ်န့ၣ် စံး၀ဲန့ၣ်လီၤႉ
စီၤအဲလ်ဘၢၣ်ခၠိၤအံၤ အပူၤကွံာ်(၂၀၁၉) လါအီကူာ် ၁၂ သီအနံၤ ခီဖျိအ၀ဲဒီးအသကိးခံဂၤမၤ၀ဲဒၣ်ကညီမၤထူရၤ မုၢ်နံၤတၢ်ရဲၣ်တၢ်ကျဲၤဖဲ၀့ၢ်တကူၣ်(မဟၤဘၤဒူၣ်လၣ်)ဖီကရၢၢ်မဲာ်ညါအဃိ ဘၣ်တၢ်ဖီၣ်အ၀ဲသ့ၣ်လၢပယီၤပၢၤကီၢ်သုး ဒီးဖဲန့ၣ်တၢ်ဒုးဃာ်အ၀ဲသ့ၣ်လၢ(အ့ၣ်စ့ၣ်)ဃိာ်ပူၤ ၁၇ သီဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ပဒိၣ်မါရှၤလါဖါသးစၢ်ခိၣ်နၢ်ဖိခိၣ်ဖးအံၤတၢ်လီၢ်တပူၤဂ့ၤတပူၤကဘၣ်မ့ၢ်ကညီသးစၢ်လၢသးနံၣ်အိၣ်(၃၅)နံၣ်ဆူဖီလာ် အသိးကဘၣ်မ့ၢ်လၢအဂဲၤလိာ်တၢ်လၢၦၤကလုာ်တၢ်လဲၤထီၣ်လဲၤထီအဂီၢ်ဒီးခိၣ်ဖးအံၤတနံၣ်တဘျီဘၣ်တၢ်ဃုထၢ ဟ့ၣ်လၤ ကပီၤ၀ဲကိးမုၢ်နံၣ်ဒဲးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဘၣ်ဃး(၂၀၂၃)သးစၢ်ခိၣ်နၢ်ဖိခိၣ်ဖးလၢတၢ်ဃုထၢ၀ဲဘျီ၀ဲအံၤန့ၣ် ပဒိၣ်မါရှၤလါဖါအဖိမုၣ်ဒိၣ် နၣ်ဘွါဘွါဖါ စံး၀ဲလၢ “ပပာ်ပနီၣ်၀ဲဒၣ်စီၤအဲလ်ဘၢၣ်ခၠိၤအတၢ်ဖံးတၢ်မၤတၢ်ဟူးတၢ်ဂဲၤသ့ၣ်တဖၣ်ဒီးပသးခုဒိၣ်မးလၢပဟ့ၣ်ဘၣ်အီၤပဒိၣ်မါရှၤ သးစၢ်ခိၣ်နၢ်ဖိခိၣ်ဖးအံၤဒိၣ်မးန့ၣ်လီၤႉသးစၢ်ခိၣ်နၢ်လၢအဂုာ်ကျဲးစၢးမၤတၢ်လၢၦၤတ၀ၢတၢ်ကရၢကရိပူၤဒ်သိးစီၤအဲလ်ဘၢၣ်ခၠိၤအံၤအိၣ်အါမးလီၤႉဒ်ပပါပာ်လုၢ်ပာ်ၦ့ၤ၀ဲသးစၢ်သ့ၣ်တဖၣ်အသိးပ၀ဲစ့ၢ်ကီးပပာ်လုၢ်ပာ်ၦ့ၤၦၤသးစၢ်သ့ၣ် တဖၣ်အတၢ်ဟူး တၢ်ဂဲၤလီၤ”အဂ့ၢ်န့ၣ် စံးလီၤ၀ဲလၢလံာ်ပာ်ဖျါအပူၤန့ၣ်လီၤႉ
လၢန့ၣ်အမဲာ်ညါပဒိၣ်မါရှၤသးစၢ်ခိၣ်နၢ်ဖိခိၣ်ဖးအံၤတၢ်ကဟ့ၣ်လီၤ၀ဲဒၣ်ဖဲတလါအံၤလါအီကူာ် ၁၂ သီ ကညီမၤထူရၤမုၢ်နံၤ တၢ်ရဲၣ်တၢ်ကျဲၤအပူၤအဂ့ၢ်န့ၣ် (Phan Foundation)အလံာ်တၢ်ပာ်ဖျါအပူၤ စံး၀ဲန့ၣ်လီၤႉ
ပဒိၣ်မါရှၤသးစၢ်ခိၣ်နၢ်ဖိခိၣ်ဖးအံၤဘၣ်တၢ်စးထီၣ်ဟ့ၣ်လီၤ၀ဲဒၣ်ဖဲ(၂၀၀၈)ဒီးတုၤလၢခဲအံၤန့ၣ် သးစၢ်လၢအဒိးန့ၢ် ဘၣ်ခိၣ်ဖးတၢ်လၤကပီၤအံၤ မ့ပာ်ဖှိၣ်ဃုာ်ဒီးစီၤအဲလ်ဘၢၣ်ခၠိၤန့ၣ်ခဲလၢာ်အိၣ်လံ၀ဲ(၁၆)ဂၤလံဒီး ဒ်န့ၣ်အသိးခိၣ်ဖးအံၤ အဂီၢ်တၢ်ဟ့ၣ်ဃုာ်စ့ၢ်ကီး၀ဲအမဲရကၤစ့ဒီၣ်လၣ်(၄၀၀၀)အဂ့ၢ်န့ၣ် သ့ၣ်ညါဘၣ်န့ၣ်လီၤႉ
အပူၤကွံာ်(၂၀၀၈)နံၣ် လါဖ့ၤဘြူၤအါရံၤ ၁၄ သီအနံၤ လၢကီၢ်ကၠီၣ်တဲၣ် မဲၢ်ဆီး၀့ၢ်ပူၤ ၦၤဖီၣ်စုက၀ဲၤဖိလၢတၢ်တသ့ၣ် ညါအမံၤ(၂)ဂၤ ဟဲခးသံ၀ဲဒၣ်ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်လီၢ်လံၤပဒိၣ်မါရှၤလၢအဟံၣ်ပူၤဒီး ဖဲန့ၣ်လီၢ်ခံလၢပၢ်ပဒိၣ် မါရှၤလါဖါဒီးမိၢ်နၣ်ကၠံၤစွ့ၤခံဂၤအံၤအဂီၢ် ဖိမုၣ်ဖိခွါ(၄)ဂၤ ပာ်ဖှိၣ်ထီၣ်သးစးထီၣ်ဒုးအိၣ်ထီၣ်၀ဲ(Phan Foundation) အံၤန့ၣ်လီၤႉ
