တၢ်စူၤထံဒိၣ်ထီၣ်၀ံၤလီၢ်ခံ(ဒူသထူၣ်ကီၢ်ရ့ၣ်)ကီၢ်ဆၣ်ကိးဘ့ၣ်ဒဲးသဂၢၢ်ဘၣ်ဘုဃၢ်လီၤတၢ်ဂ့ၢ်ကီ

လါစဲးပထ့ဘၢၣ် ၃ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ အပူၤကွံာ်တၢ်စူၤထံဒိၣ် ထီၣ်၀ံၤလီၢ်ခံ ကီၢ်ဆၣ်ကိးဘ့ၣ်ဒဲးဃၣ်ဃၣ်သဂၢၢ်ဘၣ်၀ဲဘုဃၢ်လီၤဒီးဘုအလၣ်သ့ၣ်တဖၣ်ဘီ၀ဲဒၣ်ခဲလၢာ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ စံး၀ဲန့ၣ်လီၤႉ

ဒူသထူၣ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤ အပူၤကွံာ်လါယူၤလံအခါန့ၣ်တၢ်စူၤတပယူာ်ဃီအဃိ ထံဒိၣ်ထီၣ်ထံနုာ်လီၤလၢဒူပူၤသ၀ီပူၤ,စံာ်ပူၤလုၢ်ဘၢ၀ဲဘုတဖၣ်န့ၢ်လၢအနွံညါအဃိ တနံၣ်အံၤဘုသံဘုဟးဂီၤ၀ဲဒၣ် အါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘုသံဘုဟးဂီၤအမဲာ်ညါတၢ်စူၤထံက့ၤလီၤအခါဘုလၢအတသံအိၣ်တ့ၢ်ဒံးသ့ၣ်တဖၣ်အဃၢ်လီၤဒီးအလၣ်သ့ၣ်တဖၣ် ဘီ၀ဲဒၣ်ခဲလၢာ်အဃိခါဆူညါဘုတဖၣ်တၢ်အိၣ်သးကဆဲးမၤသးဒ်လဲၣ်မးတသ့ၣ်ညါလၢၤဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

အ၀ဲစံး၀ဲလၢ“ပမ့ဘၣ်ကွၢ်လၢပကီၢ်ရ့ၣ်ဟီၣ်က၀ီၤကီၢ်ဆၣ်ကိးဘ့ၣ်ဒဲးန့ၣ်ဖဲထံဒိၣ်ထံလုၢ်ဘၢ၀ဲဒၣ်စံာ်ပျီ၀ံၤန့ၣ်ဘုလၢထံလုၢ်ဘၢအီၤအတသံဘၣ်အိၣ်တ့ၢ်သ့ၣ်တဖၣ်န့ၣ်ဘုအဃၢ်လီၤႉမ့၀ံၤအလၣ်သ့ၣ်တဖၣ်န့ၣ်ဂီၤဒ်သိးဘုသၣ်ဘီလၢတၢ်ဘၣ်ကူာ်အီၤအသိးလီၤမီၤနီၤႉအဃိန့ၣ်ဘုတဖၣ်န့ၣ်ကမၤက့ၤအသးဒ်လဲၣ်န့ၣ်ပတသ့ၣ်ညါဘၣ်ႉမ့ၢ်အသၣ်ကသ့ဒံးဧါႇ သၣ်တသ့လၢၤ ဘၣ်ခီဧါပတသ့ၣ်ညါဘၣ်ႉပမ့ဘၣ်ကွၢ်န့ၣ်ကယဲၢ်ဘုအလၣ်တဖၣ်န့ၣ်ဂီၤ၀ဲဒၣ်ခဲလၢာ်လီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါခီဖျိဘုဃၢ်လီၤဒီးဘုလၣ်သ့ၣ်တဖၣ်ဘီအါအါဂီၢ်ဂီၢ်အဃိလၢဘုကဖီထီၣ်သၣ်ထီၣ်အဂီၢ်တၢ်မုၢ်လၢ် တအိၣ်အါအါလၢၤဘၣ်ဒီးနံၣ်လၢကဟဲၦၤမၤအီၣ်စံာ်ဖိဃုာ်ဒီးၦၤလၢအတမၤအီၣ်စံာ်ဘၣ်သ့ၣ်တဖၣ်ကွၢ်ဆၢၣ်မဲာ်ဘၣ် အီၣ်တလၢကူတလၢသ့၀ဲဒၣ်အဂ့ၢ်န့ၣ် ပဒိၣ်စီၤအ့နဲၤ ပဲာ်ထံနီၤဖးစံး၀ဲန့ၣ်လီၤႉ

“ခီဖျိဘုဃၢ်လီၤဘုအလၣ်ဂီၤအဃိၦၤထူစံာ်ဖိသ့ၣ်တဖၣ်န့ၣ်သူၣ်ဟးဂီၤသးဟါဂီၤဒိၣ်မးလီၤႉဘၣ်မနုၤလဲၣ်ဘုဃၢ်လီၤဂီၤ၀ဲဒၣ်ဒီဘ့ၣ်ၦၢ်ဘျီလၢကဖီထီၣ်သၣ်ထီၣ်န့ၣ်အပတီၢ်တအိၣ်လၢၤအါအါဘၣ်မီၤႉအဃိလၢကဟဲခါဆူညါကလုၢ်အီၣ်သးသမူလၢတနံၣ်အဂီၢ်န့ၣ်ကကွၢ်ဆၢၣ်မဲာ်ဘၣ်ဘုဟုတကပၤကီကီခဲခဲန့ၣ်ကအိၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ

တကီၢ်ခါခဲအံၤၦၤကမျၢၢ်လၢအဘုသံသ့ၣ်တဖၣ်တနီၤန့ၣ်ၦၤလၢအဘုဖိအိၣ်ဒံးတဖၣ်သူၣ်လီၤကရီက့ၤ၀ဲအဘုအိၣ် ဒီးဘၣ်ဆၣ်မ့မ့ၢ်ၦၤလၢအဘုဖိတအိၣ်လၢၤဘၣ်သ့ၣ်တဖၣ်တသူၣ်လီၤဘၣ်ဘုထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တကးဒံးဘၣ်ကီၢ်ဆၣ်ခံဘ့ၣ်လၢအမ့ၢ်မီၤစကိၤဒီးဖၣ်အၣ်ကီၢ်ဆၣ်အံၤ အပူၤကွံာ်လါယူၤလံတၢ်စူၤထံဒိၣ်ထီၣ်အဃိ ဘုသံဘုဟးဂီၤပာ်ဖှိၣ်ခဲလၢာ်အိၣ်၀ဲအအ့ကၢၣ်(၄၀၀၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီပူၤ အသိးလီၤႉ

ဒူသထူၣ်ကီၢ်ရ့ၣ်ဟီၣ်က၀ီၤပူၤ ကမျၢၢ်တဖၣ်လၢတၢ်လုၢ်အီၣ်နီၢ်ခိသးသမူအဂီၢ်အခိၣ်သ့ၣ်န့ၣ်ဖံးအီၣ်မၤအီၣ်၀ဲဒၣ် တၢ်ထူစံာ်ႇတၢ်ဖဲးခုးဖဲးသံၣ်တၢ်ဖံးတၢ်မၤတကးဒံးဘၣ်တနီၤန့ၣ်သူၣ်အီၣ်၀ဲနံၣ်သိႇပဲႇရီဘၢၣ်ကျီးစ့ၢ်ကီးအိၣ်၀ဲတဆံး တက့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ