လါစဲးပထ့ဘၢၣ် ၂၈ သီ, ၂၀၂၄ နံၣ်, ခ့ၣ်အဲးစံၣ်
လၢဘျံးဒ၀ဲၢ်ကီၢ်ရ့ၣ် တနီသရံၣ်ကီၢ်ဆၣ်အပူၤ သ့ၤဒီ(သိန္ဓော)ပယီၤသုးကလၢၤလၢအဟဲအိၣ်ဆီလီၤသးန့ၢ်၀ဲအနံၣ်(၄၀)ဘျဲၣ်အံၤ ဖဲလါစဲးပထ့ဘၢၣ် ၂၅ သီအနံၤန့ၣ် ပယီၤသုးလၢအိၣ်ဖဲသုးကလၢၤပူၤအံၤတဖၣ်ကၢတီၢ်ကွံၥ်သုးကလၢၤဟးထီၣ်ကွံၥ်၀ဲအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပၥ်ဖှိၣ်သုးကျိၤ-၂ ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
သ့ၣ်ဒီ(သိန္ဓော)သုးကလၢၤအံၤ စးထီၣ်ဖဲတနံၣ်အံၤ(၂၀၂၄)လါအ့ဖြ့ၣ်လၢၤအခါန့ၣ် တၢ်ဒီသဒၢကမျၢၢ်သုးပၥ်ဖှိၣ်သုးကျိၤ(၁)ဒီး သုးကျိၤ(၂)စးထီၣ်က၀ီၤခး၀ဲဒီး အဃိဖဲအပူၤကွံၥ်လါစဲးပထ့ဘၢၣ် ၂၅ သီအနံၤန့ၣ် ပယီၤသုးလၢအိၣ်သုးကလၢၤပူၤအဂၤ(၁၅၀)ဃၣ်ဃၣ် ဟးထီၣ်ကွံၥ်လၢသုးကလၢၤပူၤအဂ့ၢ်န့ၣ် သုးကျိၤပှၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤ.
ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပၥ်ဖှိၣ် သုးကျိၤ-၂ အပှၤတဂၤစံး၀ဲလၢ “သုးကလၢၤ၀ဲန့ၣ်ပတၢ်ပၢၢ်ဆၢသုးကရူၢ်လဲၤခး၀ဲ ထီဘိလီၤ.ပလဲၤခးအီၤဒီးဒြိ,ကျိဖိကျိဖးဒိၣ်ဒ်န့ၣ်အိၣ်ထီဘိလီၤ.သုးကလၢၤ၀ဲန့ၣ်အိၣ်ယံၤဒီး(ပၠံၣ်ထီၣ်စူၣ်)ကျဲမုၢ်အဃိပယီၤသုးအပှၤဟဲထီၣ်တသ့ဘၣ်.အဃိပှၤသ့ၣ်တဖၣ်အံၤဘၣ်သ့ၣ်သ့ၣ်ကက့ၤပၥ်ဖှိၣ်ထီၣ်သးဒီးသုးကီၣ်ကးအပှၤလၢအိၣ်ဖဲကျဲမုၢ်ခိၣ်တဖၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါ(သ့ၣ်ဒီ)ပယီၤသုးကလၢၤအံၤတၢ်ပၢၢ်ဆၢသုးကရူၢ်ထီၣ်မၤန့ၢ်၀ဲလံဒီးတကးဒံးဘၣ်လၢသုးကလၢၤအပူၤန့ၣ် တၢ်မၤန့ၢ်ဃုၥ်၀ဲ ကျိချံပှၥ်သၣ်အိၣ်၀ဲတနီၤစ့ၢ်ကီးအဂ့ၢ်န့ၣ် သုးကျိၤအပှၤတဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
(သ့ၣ်ဒီ)ပယီၤသုးကလၢၤအံၤ ဟဲအိၣ်ဆီလီၤဖဲဟီၣ်က၀ီၤပူၤ၀ဲန့ၣ်စးထီၣ်လၢ(၁၉၈၀)နံၣ် မ့ဘၣ်ဒွးတုၤလၢခဲအံၤအိၣ်ဆီလီၤသး န့ၢ်၀ဲ(၄၄)နံၣ်လံဒီး ဒ်န့ၣ်အသိးသုးကလၢၤ၀ဲအံၤမ့ၢ်တၢ်မဲၥ်ညါသုးကလၢၤတဖျၢၣ်လၢအဟ့ၣ်၀ဲတၢ်တိစၢၤမၤစၢၤဆူ(ဝါးနွယ်)သုးကလၢၤ, (လေကေ)သုးကလၢၤ,ပွဲး(၃၀၀၀)သုးကလၢၤသ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤ ပယီၤသုးလၢအိၣ်သ့ၤဒီ(သိန္ဓော)သုးကလၢၤလၢအဟးကွံၥ်သ့ၣ်တဖၣ်ဒီးတၢ်ပၢၢ်ဆၢသုးကရူၢ်အဘၢၣ်စၢၤ တၢ်ခးလိၥ်သးကဲထီၣ်၀ဲလၢ(ဘန်ကြုပ်)သ၀ီဃၢၤအဃိ လီၢ်က၀ီၤကမျၢၢ်တဖၣ်ဖဲဟးထီၣ်က့ၤလီၤအဆၢကတီၢ် ကလူၤပိၥ်မၤထွဲဒ်တနီသရံၣ်ထုးထီၣ်ပၥ်ဖျါဃၥ်တၢ်ဘိးဘၣ်သ့ၣ်ညါတၢ်သိတၢ်သီအသိးအဂ့ၢ်န့ၣ် လံၥ်တၢ်ပၥ်ဖျါအပူၤစံး၀ဲန့ၣ်လီၤ.
