လါစဲးပထ့ဘၢၣ် ၁၃သီ, ၂၀၂၄နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်ဝီၢ်ရီဟီၣ်ကဝီၤလိးရှါသုးကလၢၤအပူၤပယီၤသုးတဖၣ်,ပၥ်တ့ၢ်ကွံၥ်အသုးကလၢၤဒီးစံၣ်ဖျိထီၣ်ကွံၥ်ဝဲဖဲမဟါလါစဲးပထ့ဘၢၣ်(၁၁)သီမုၢ်နၤခီအဆၢကတီၢ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
လိးရှါသုးကီၣ်ကးအသုးကလၢၤအပူၤပယီၤသုးတဖၣ်အံၤ,စးထီၣ်ဖဲလါအီကူးအပူၤ(KNLA)ကညီတၢ်ထူၣ်ဖျဲးသုးမုၢ်ဒိၣ်ဒီးတၢ်ပၢၢ်ဆၢသုးပၥ်ဖှိၣ်တဖၣ်ပၥ်ဖှိၣ်သးကးတံၥ်ကဝီၤထီၣ်ခးအဝဲသ့ၣ်တဖၣ်ဒီးဒြိအိၣ်ဝဲအဃိ,တူၢ်ဝဲတန့ၢ်လၢၤဘၣ်ဒီးဃ့ၢ်ထီၣ်ကွံၥ်ဝဲလၢအသုးကလၢၤအပူၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
အ၀ဲစံးဝဲလၢ“ပယီၤန့ၣ်စံၣ်ထီၣ်ဝဲလၢအသုးကလၢၤအပူၤဖဲမုၢ်နၤတၢ်ခံးအဆၢကတီၢ်လီၤဘၣ်မနုၤအဃိလဲၣ်မုၢ်ဝါထီၣ်အဆၢကတီၢ်တၢ်ပၢၢ်ဆၢသုးပၥ်ဖှိၣ်တဖၣ်လဲၤထီၣ်န့ၣ်အဝဲသ့ၣ်တအိၣ်နီတဂၤလၢၤဘၣ်.တၢ်ပၢၢ်ဆၢသုးပၥ်ဖှိၣ်တကပၤလဲၤမၤဖှိၣ်အဝဲသ့ၣ်ဒီးဒြိအဃိတူၢ်ဝဲတကဲလၢၤဘၣ်ဒီးစံၣ်ထီၣ်ကွံၥ်ဝဲလီၤ.အဝဲသ့ၣ်တဖၣ်အံၤက့ၤစံၣ်လီၤလၢသရိၥ်ဝါတကပၤတခီလီၤ.မ့မ့ၢ်လၢအသုးကလၢၤအပူၤတခီပၥ်တ့ၢ်ဝဲဟီၣ်လၥ်မ့ၢ်ပိၢ်ဒီးမ့ၣ်ပိၢ်တၢ်မဲၥ်ညါတဖၣ်လီၤ”အဂ့ၢ်စံးဝဲန့ၣ်လီၤ.
လၢန့ၣ်အမဲၥ်ညါ,လိးရှါပယီၤသုးလၢအစံၣ်ဖျိးထီၣ်တဖၣ်အံၤက့ၤလီၤက့ၤဝဲဆူသရိၥ်ဝါလၢကပၥ်ဖှိၣ်အသးဒီးမိၢ်ကီၢ်စဲၣ်(စခါကၠံ)သုးကလၢၤအဃိ,ဖဲအက့ၤလၢကျဲဒီတကတီၢ်အပူၤ,တၢ်ပၢၢ်ဆၢသုးပၥ်ဖှိၣ်လူၤကးတံၥ်အခိၣ်လၢကျဲတီၤဒီးလူၤခးအဝဲသ့ၣ်တပယူၥ်ဃီအိၣ်ဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
တကးဒံးဘၣ်,လိးရှါသုးကလၢၤပယီၤသုးတဖၣ်အံၤတချူးဟးထီၣ်ကွံၥ်လၢအသုးကလၢၤပူၤအဆၢကတီၢ်မၤဟးဂီၤကွံၥ်ဝဲတၢ်အီၣ်တၢ်အီလၢစိၥ်ဝဲတန့ၢ်လၢၤဘၣ်တဖၣ်ဒီးခူၣ်လီၤဘၢဝဲအပှၤလၢဘၣ်ဒိဘၣ်ထံးသံတနီၤအိၣ်ဝဲအဂ့ၢ်,ဒီးပယီၤသုးသံတၢ်ဘၣ်ဒိဘၣ်ထံးမ့ၢ်ဂ့ၤ,တၢ်မၤန့ၢ်တၢ်စုကဝဲၤသ့ၣ်တဖၣ်မ့ၢ်အဂ့ၤတၢ်မၤလီၤတံၢ်အီၤအဖၢမုၢ်လီၤအဂ့ၢ်သ့ၣ်ညါဘၣ်ဒ်ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲအသိးန့ၣ်လီၤ.
တကတီၢ်ဃီ,လိးရှါသုးကီၣ်ကးပယီၤသုးကလၢၤအံၤအပူၤကွံၥ်မ့ၢ်ဝဲ(KNLA)သုးက့(၆)သုးရ့ၣ်(၁၆)အိၣ်ဆိးတၢ်ဘံၣ်တၢ်ဘၢအတၢ်လီၢ်တတီၤဒီးစးထီၣ်ဖဲ(၂၀၂၁)နံၣ်အပူၤသုးကီၣ်ကးအပှၤတဖၣ်ဟဲထီၣ်ဆီလီၤသးအိၣ်ဆိးက့ၤဝဲဒီးအသုးဂံၢ်ဘါအိၣ်ဝဲလၢ(၇၀)ဃၣ်ဃၣ်ဘၣ်ဆၣ်အိၣ်ဆိးဝဲယံၥ်(၃)နံၣ်ဘျဲၣ်အလီၢ်ခံ,တၢ်ပၢၢ်ဆၢသုးပၥ်ဖှိၣ်က့ၤထီၣ်မၤန့ၢ်က့ၤဝဲအနီၢ်ကစၢ်တၢ်လီၢ်အဂ့ၢ်,သ့ၣ်ညါဘၣ်န့ၣ်လီၤ.
ဒီးဖဲသုးကီၣ်ကးအိၣ်ဆိးလၢ(၃)နံၣ်ဘျဲၣ်အတီၢ်ပူၤအံၤန့ၣ်,ခံခီခံကပၤတၢ်ခးလိၥ်သးကဲထီၣ်တဘျီလၢ်လၢ်အခါသုးကီၣ်ကးတကပၤခးလီၤစၢၤဝဲကျိဖးဒိၣ်,မၤပျံၤမၤဖုးဝဲကမျၢၢ်လီၢ်ကဝီၤဖိအမဲၥ်ညါ,ကဘီယူၤဟဲခးလီၤစ့ၢ်ကီးတၢ်အဃိ,ဒူသဝီအပူၤကမျၢၢ်ဟံၣ်ဃီဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်ဘၣ်ဟးဂီၤကွံၥ်ဝဲအသိး,လိးရှါကမျၢၢ်ဒူသဝီဖိတဖၣ်ဘၣ်ဃ့ၢ်ထီၣ်ကွံၥ်ဝဲလၢသဝီပူၤအိၣ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
ဒ်န့ၣ်အသိး,လိးရှါသုးကလၢၤပယီၤသုးတဖၣ်အံၤအပူၤကွံၥ်လါအီကူးအပူၤလၢကမၤအါထီၣ်ဂံၢ်ဘါအဂီၢ်,ဟဲထီၣ်ဝဲလၢကျဲအခါဖီၣ်ဝဲဖါပြးလီၢ်ကဝီၤသးစၢ်ခံဂၤဃုၥ်ဒီးမဲၥ်ကျုၢ်လီၢ်ကဝီၤသးစၢ်တဂၤဒ်တၢ်ဒီသဒၢဒီးမၢဝဲတၢ်လဲၤဒုးနဲၣ်ကျဲ,ဝံတၢ်ယိးတၢ်ဝံၤအလီၢ်ခံတုၤလၢအခဲအံၤတၢ်ဆဲးကျိးက့ၤသးစၢ်(၃)ဂၤအံၤတန့ၢ်လၢၤဘၣ်အဂ့ၢ်,ဖါပြးသဝီပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
