လါစဲးပထ့ဘၢၣ် ၂၇ သီ, ၂၀၂၄ နံၣ်, ခ့ၣ်အဲးစံၣ်
ဒ်သိးတၢ်ကဟ့ၣ်ပျဲသူ (ရၤမတံ-ကီးတရံး)အ့ၡါကျဲမုၢ်အဂီၢ် ဖဲလါစဲးပထ့ဘၢၣ်(၂၄)သီအနံၤ ကညီဖီၣ်စုကဝဲၤကရူၢ်မၤဝဲတၢ်ထံၣ်လိၥ် အိၣ်သကိးလၢကီၢ်သူလ့ၤဟီၣ်ကဝီၤတၢ်လီၢ်တတီၤဒီးတၢ်အိၣ်ဖှိၣ်အပူၤတၢၣ်ပီၣ်တဲသကိးဘၣ်ဃးကျဲတၢ်လဲၤထီၣ်က့ၤလီၤအဂ့ၢ်အကျိၤသ့ၣ်တဖၣ်အဂ့ၢ်န့ၣ် ခိၣ်နၢ်လၢအလဲၤထီၣ်တၢ်အိၣ်ဖှိၣ်တဂၤ စံးဝဲဒၣ်န့ၣ်လီၤ.
တကီၢ်ခါခဲအံၤ(ရၤမတံ-ကီးတရံး)ကျဲမုၢ်အံၤန့ၣ်ဘၣ်တၢ်ပၢဆှၢအီၤလၢခ့ၣ်အဲၣ်ယူၣ်-ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ဒီးသိၣ်မှံၤသုးပၥ်ဖှိၣ်သ့ၣ်တဖၣ်ဒီး ဖဲတၢ်ကစီၣ်ဟူထီၣ်သါလီၤလၢဖီၣ်စုကဝဲၤကရူၢ်ကရၢတနီၤအဲၣ်ဒိးလၢတၢ်ကဟ့ၣ်တၢ်ပျဲအိးထီၣ် က့ၤကျဲအံၤဝံၤလီၢ်ခံ ကညီဖီၣ်စုကဝဲၤကရူၢ်ကရၢသ့ၣ်တဖၣ်မၤဝဲတၢ်ထံၣ်လိၥ်တၢၣ်ပီၣ်တဲသကိးဒ်အံၤန့ၣ်လီၤ.
“ခဲအံၤကျဲဝဲအံၤန့ၣ်တၢ်ပံၥ်ဃၥ်ဝဲလီၤ. အဃိလၢတၢ်ဝံစိၥ်တီဆှၢပနံၥ်တၢ်ဖိတၢ်လံၤမ့ၢ်ဂ့ၤ, တၢ်လဲၤတၢ်က့ၤတကပၤမ့ၢ်ဂ့ၤ ပှၤသူ ဝဲကျဲ လၢအဂၤတဘိမီၤနီၤ. ကျဲလၢပှၤသူအီၤသ့ၣ်တဖၣ်န့ၣ်စ့ၢ်ကီးတဂ့ၤဘၣ်အသိးသိၣ်လ့ၣ်ကျဲကတံၥ်အိၣ်လီၤ. ဖဲတၢ်အိၣ်ဖှိၣ်အခါန့ၣ်တၢ်တၢၣ်ပီၣ်တဲသကိးဘၣ်ဃးလၢကျဲအဂ့ၢ်အကျိၤအိၣ်မီၤနီၤ.လၢကက့ၤအိးထီၣ်အဂီၢ်ဒုသးတဆူၣ်ဘၣ်.” အဂ့ၢ်န့ၣ် ကညီဖီၣ်စုကဝဲၤကရူၢ်ခိၣ်နၢ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါစဲးပထ့ဘၢၣ်(၂၆)သီအနံၤန့ၣ်လီၤ.
အပူၤကွံၥ်လါစဲးပထ့ဘၢၣ်(၂၄)သီအနံၤ လၢတၢ်မၤဝဲကညီဖီၣ်စုကဝဲၤကရူၢ်ကရၢတၢ်ထံၣ်လိၥ်သကိးအပူၤန့ၣ် (ခ့ၣ်အဲၣ်ယူၣ်-ကညီဒီ ကလုၥ်တၢ်ထူၣ်ဖျဲးသုးမုၢ်ဒိၣ်-KNLA သုးက့(၆) သုးက့(၇) ခိၣ်နၢ်သ့ၣ်တဖၣ်, ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ်-DKBA ခိၣ်နၢ်တဖၣ်, သုးခိးကီၢ်ဆၢ-BGF ခိၣ်နၢ်ဃုၥ်ဒီးကညီတၢ်မုၥ်တၢ်ခုၣ်ကီၣ်ကးကရၢ-PC ခိၣ်နၢ်သ့ၣ်တဖၣ်ဟဲထီၣ် ပၥ်ဃုၥ်ပၥ်ဂီၢ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါဘၣ်ဃးတၢ်ကက့ၤအိးထီၣ်က့ၤဝဲကျဲအံၤအဖီခိၣ်န့ၣ် ကၠီၣ်တဲၣ်ပနံၥ်မုၢ်ကျိၤဝဲၤကွၥ်တၢ်မၤကစၢ်ဒီးကညီဖီၣ်စုကဝဲၤ ကရူၢ်သ့ၣ်တဖၣ်မၤဝဲတၢ်တၢၣ်ပီၣ်တဲသကိးန့ၣ်တၢ်ကစီၣ်ဟူထီၣ်သါလီၤဝဲလၢရၤမတံဝ့ၢ်ပနံၥ်တၢ်မၤအဒူၣ်အထၢကျါအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံး၀ဲန့ၣ်လီၤ.
“တၢ်တၢၣ်ပီၣ်ဘၣ်ဃးတၢ်ခိတၢ်သွဲ,တၢ်ထၢကျဲအပှ့ၤမ့ၢ်ဘၣ်ဂီၢ်န့ၣ်ပနၢ်ဟူလၢပှၤကက့ၤအိးထီၣ်ကျဲမီၤနီၤ. လၢတၢ်ကက့ၤအိးထီၣ် ကျဲအဂီၢ်န့ၣ်ပနၢ်ဟူလၢကၠီၣ်တဲၣ်ပနံၥ်မုၢ်ကျိၤဝဲၤကွၥ်တၢ်မၤကစၢ်ဒီးကညီဖီၣ်စုကဝဲၤတဖၣ်တဲဝဲဒၣ်အိၣ်မီၤ. မ့ၢ်ကဆဲးကဲ ထီၣ်အသး ဒ်လဲၣ်ဒုတသ့ၣ်ညါဒံးဘၣ်” အဂ့ၢ်န့ၣ် ရၤမတံဝ့ၢ်လီၢ်ကဝီၤဖိလၢအမၤပနံၥ်တၢ်မၤတဂၤစံးဝဲဒၣ်န့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါစဲးပထ့ဘၢၣ်(၉)သီအနံၤစ့ၢ်ကီး လၢဖၣ်အၣ် သုးကီၣ်ကးအဝဲၤဒၢးပူၤန့ၣ် ကီၢ်ပယီၤဘၣ်ထွဲ ကီၢ်ကၠီၣ်တဲၣ်မီၢ်သီ(H.E.Mr.Mongkol Visitstump)ဒီး သုးကီၣ်ကးအစုတီဖီၥ်လၥ် ကညီကီၢ်စဲၣ်ကိတိၥ်ခိၣ်ကျၢၢ် (စီၤမၠ့ၣ်အူ)အံၤမၤဝဲတၢ်ထံၣ်လိၥ်တဲသကိးအသိးလၢတၢ်တၢၣ်ပီၣ်တဲသကိးအပူၤတဲသကိးဘၣ်ဃး ထံကီၢ်ခံဘ့ၣ်ကီၢ်ဆၢ တၢ်ဝံစိၥ်ခီဆှၢပနံၥ်တၢ်ဖိတၢ်လံၤ,ကျဲတၢ်လဲၤထီၣ်က့ၤလီၤအဂ့ၢ်အကျိၤသ့ၣ်တဖၣ်အဂ့ၢ်န့ၣ် ကီၢ်စဲၣ်သုးကီၣ်ကးထုးထီၣ်ပၥ်ဖျါဝဲဒၣ် န့ၣ်လီၤ.
