လါစဲးပထ့ဘၢၣ် ၂၇သီ, ၂၀၂၄နံၣ်, ခ့ၣ်အဲးစံၣ်,
လၢကဘှါဆှဲကီၢ်ပယီၤထံရူၢ်ကီၢ်သဲးတၢ်ဂ့ၢ်ကီလၢထံရူၢ်ကီၢ်သဲးအကျဲသနူအဂီၢ်န့ၣ် သုးကီၣ်ကးကွဲမုၥ်ဝဲကလုၥ်ဒူၣ် ဖီၣ်စုကဝဲၤကရူၢ်ကရၢဒီးတၢ်ဒီသဒၢကမျၢၢ်သုး(PDF)တဖၣ်လၢကတၢၤကွံၥ်စုက၀ဲၤတၢ်စုဆူၣ်ခီၣ်တကးကျဲသနူ၀ံၤကနုၥ်လီၤဆူထံရူၢ်ကီၢ်သဲးပၣ်တံၣ်ဒီးတၢ်ဃုထၢအကျိၤအကျဲပူၤအဂ့ၢ်န့ၣ် ထုးထီၣ်ပၥ်ဖျါ၀ဲဖဲပၥ်ဖျါဝဲဖဲမဟါလါစဲးပထ့ဘၢၣ် (၂၆)သီအနံၤန့ၣ်လီၤ.
ဒ်သုးကီၣ်ကးအလံၥ်တၢ်ဘိးဘၣ်ရၤလီၤပူၤပၥ်ဖျါ၀ဲအသိးန့ၣ် ခီဖျိတၢ်သူ၀ဲဖီၣ်စုကဝဲၤကျဲဒီးတၢ်စုဆူၣ်ခီၣ်တကးကျဲသနူ အဃိကီၢ်ပယီၤထံကီၢ်ဘၣ်ကီဘၣ်ခဲ,ကမျၢၢ်တၢ်စုလီၢ်ခီၣ်ခိၣ်ဘၣ်ဟးဂီၤဘၣ်သံဝဲဒီးတကးဒံးဘၣ်တံၥ်တၥ်ဝဲထံကီၢ်တၢ်လဲၤထီၣ်လဲၤထီအဖီခိၣ်ကကွၢ်ထံက့ၤတၢ်ကဲထီၣ်သးတဖၣ်ဒီးဒ်သိးထံကီၢ်တဘ့ၣ်အံၤကအိၣ်ဒီးတၢ်မုၥ်တၢ်ခုၣ်,တၢ်လဲၤထီၣ်လဲၤထီအဂီၢ် ကွဲမုၥ်ဝဲကလုၥ်ဒူၣ်ဖီၣ်စုကဝဲၤကရူၢ်ကရၢဃုၥ်ဒီး(PDF)သ့ၣ်တဖၣ်လၢ ကပၥ်ဖှိၣ်မၤသကိးက့ၤတၢ်ဒီး ထံဖိကီၢ်ဖိအဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါ၀ဲန့ၣ်လီၤ.
လၢန့ၣ်အမဲၥ်ညါလံၥ်တၢ်ပၥ်ဖျါအပူၤ သုးကီၣ်ကးအတၢ်ကွဲမုၥ်ဝဲကလုၥ်ဒူၣ်ဖီၣ်စုကဝဲၤကရူၢ်ကရၢဒီး(PDF)သ့ၣ် တဖၣ်အိၣ်ဝဲဘၣ်ဆၣ် တၢ်ကွဲမုၥ်အပူၤအံၤထံၣ်ဘၣ်လၢဒီကလုၥ်ဃူဖိးပဒိၣ်(NUG)ကရူၢ်ကရၢအံၤ တပၣ်ဃုၥ်ဝဲဘၣ် န့ၣ်လီၤ.
ဘၣ်ဃးသုးကီၣ်ကးအတၢ်ကွဲမုၥ်ဘျီ၀ဲအံၤ တမ့ၢ်တၢ်သးအိၣ်နီၢ်နီၢ်လၢတၢ်ကဘှါဆှဲထံရူၢ်ကီၢ်သဲးတၢ်ဂ့ၢ်ကီလၢ စီၤနီၢ်ခိၣ်ဘၣ်ဒီးမ့မ့ၢ်တခီမ့ၢ်ဒၣ်တၢ်ကမၤပူၤဖျဲးထီၣ်အနီၢ်ကစၢ်သးလၢတၢ်ဂ့ၢ်ကီအပူၤလီၤအဂ့ၢ်န့ၣ် ခ့ၣ်အဲၣ်ယူၣ် ပှၤကတိၤတၢ်ပၢ ပဒိၣ်စီၤကျၢၤစ့ စံးဝဲဒ်အံၤန့ၣ်လီၤ.
အဝဲစံးဝဲလၢ“ဘၣ်ထွဲဒီးသုးကီၣ်ကးအတၢ်ဘိးဘၣ်ရၤလီၤတခါအံၤန့ၣ်,အဝဲသ့ၣ်ဆဲးကျိးဧါတဆဲးကျိးပှၤဧါဒုယတသ့ၣ်ညါဘၣ်.ဘၣ်ဆၣ်ဒ်ပတၢ်ပၥ်သးအသိးန့ၣ်အပူၤကွံၥ်ပဂုၥ်ကျဲးစၢးထံၣ်လိၥ်တဲသကိးဒီးအဝဲသ့ၣ်အဘျီတဖၣ် အဘျီလၢတၢ်ကဘှါဆှဲထံရူၢ်ကီၢ်သဲးဂ့ၢ်ဝီလၢစီၤနီၢ်ခိၣ်လိၤလိၤတီတီဘၣ်ဆၣ်ပထံၣ်ဘၣ်လၢအဝဲသ့ၣ်တအၢၣ်လီၤတူၢ်လိၥ်ဝဲဘၣ်.အဃိန့ၣ်အတၢ်ကွဲမုၥ်ဘျီဝဲအံၤသနၥ်က့မ့ၢ်ဒၣ်တၢ်အယိၥ်အဘျၣ်လီၤ.ဒီးအဝဲသ့ၣ်တၢ်ကွဲမုၥ်အံၤန့ၣ်ပနၢ်ပၢၢ်လၢ,ကတီၢ်ခဲအံၤအတၢ်ဖံးတၢ်မၤအဖီခိၣ်သဂၢၢ်ဘၣ်ဝဲထံကီၢ်တၢ်ကီတၢ်ခဲတၢ်အိၣ်သးအဖီခိၣ်အိၣ်ဒၣ်ပညိၣ်ဝဲလၢကယူထူၣ်ဖျဲးထီၣ်အသးဒ်သိးကပူၤဖျဲးလၢတၢ်ကီတၢ်ခဲအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
တကးဒံးဘၣ်လၢန့ၣ်အမဲၥ်ညါဒ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အတၢ်အိၣ်ဆၢထၢၣ်အသိးန့ၣ် လ့ၤတက့ၤတဒုးအိၣ်ထီၣ်ဝဲ(ထံရူၢ်ကီၢ်သဲးပၣ်တံၣ်)ဘၣ်ဒီးမ့မ့ၢ်တခီလိၣ်ဘၣ်ဝဲဒၣ်ထဲကလုၥ်ဒူၣ်နီၢ်ကစၢ်တၢ်စံၣ်ညီၣ် ပၢလီၤသးလီၤအဂ့ၢ်န့ၣ် ပဒိၣ်စီၤကျၢၤစ့ စံးအါထီၣ်ဝဲဒၣ်န့ၣ်လီၤ.
တကတီၢ်ဃီသုးကီၣ်ကးအံၤလၢတၢ်ကမၤဝဲပၣ်တံၣ်ဒံၣ်မိၣ်ကရ့ၣ်စံၣ်တၢ်ဃုထၢအဂီၢ် ဒ်သိး(မဲ)တၢ်ဖးစရီတဖၣ် ကလီၤတံၢ်လီၤမံသုတကမၣ်တဂ့ၤအဂီၢ် လါလၢကဟဲလါအီးကထိဘၢၣ်(၁)သီအံၤ ကစးထီၣ်ထၢ၀ဲကမျၢၢ်ဟံၣ်ဒူၣ် အလံၥ်စရီ(အ့ၤဒီၤစုၣ်စယ့)တဖၣ်အဂ့ၢ်န့ၣ် သုးကီၣ်ကးအလံၥ်တၢ်ဘိးဘၣ်ရၤလီၤအပူၤ ပၥ်ဖျါဃုၥ်၀ဲန့ၣ်လီၤ.
လၢန့ၣ်အမဲၥ်ညါတၢ်ဃုထၢဘျီဝဲအံၤကကဲထီၣ်လိၣ်ထီၣ်အဂီၢ် ဆၢကတီၢ်ခဲအံၤမ့ၢ်ဆၢကတီၢ်လၢကဘၣ်ဂုၢ်ကျဲးစၢး ထဲးဂံၢ်ထဲးဘါသပှၢ်ပှၢ်လၢတၢ်ကအိၣ်ကတီၤဆိပၥ်သးလၢတၢ်ရဲၣ်တၢ်ကျဲၤတဖၣ်အဂီၢ်အဂ့ၢ်န့ၣ် သုးကီၣ်ကးစံး၀ဲန့ၣ်လီၤ.
ကီၢ်ပယီၤပူၤ သုးကီၣ်ကးအံၤလၢကမၤတၢ်ဃုထၢအဂီၢ် ဖဲအပူၤကွံၥ်လါယူၤအခါန့ၣ် ဘိးဘၣ်ရၤလီၤဝဲလၢ ကမၤ၀ဲတၢ်ဃုထၢဖဲလၢကဟဲ(၂၀၂၅)နံၣ် လါနိၣ်ဝ့ဘၢၣ်အတီၢ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
