လါအီးကထိဘၢၣ် ၁၄ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်သုးက့(၄)ဟီၣ်ကဝီၤကစၢၢ်ဒိၣ်ကီၢ်ဆၣ်အပူၤဖဲအပူၤကွံၥ်လါအီးကထိဘၢၣ်(၁၂)ဒီး(၁၃)သီအနံၤန့ၣ်ပ ယီၤသုးကီၣ်ကးနုၥ်လီၤဟံးက့ၤစိၥ်ကွံၥ်ဝဲ(ပါပၠ့ၣ်သဝီ)ဒီး(အူတူသဝီ)ကမျၢၢ်တၢ်ဖိတၢ်လံၤသ့ၣ်တဖၣ်အါအါဂီၢ်ဂီၢ်ဒီးသိလ့ၣ်ဖးဒိၣ်ဆူအသုးကလၢၢၤပူၤအဂ့ၢ်န့ၣ်လီၢ်ကဝီၤအပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ပယီၤသုးကီၣ်ကးအစုတီၤဖီလၥ်အပှၤမၤတၢ်ဖိလၢအထၢဖးဖီမုၢ်စရီသ့ၣ်တဖၣ်ခီဖျိလၢလီၢ်ကဝီၤတၢ်ပၢၢ်ဆၢကရူၢ်ဖီၣ်ဃၥ်ဝဲအဃိပယီၤသုးအံၤဟဲနုၥ်လီၤဝဲလၢသဝီအပူၤဒီးဟံးန့ၢ်ကွံၥ်ဝဲကမျၢၢ်တၢ်ဖိတၢ်လံၤဒ်အမ့ၢ်ကမျၢၢ်သိလ့ၣ်ယီၢ်ဆဲးကဲၣ်,သိလ့ၣ်ဒီးတၢ်ဖီအီၣ်တ့ၤအီၣ်တၢ်ဖိတၢ်လံၤသ့ၣ်တဖၣ်အဂ့ၢ်န့ၣ်ကစၢၢ်ဒိၣ်ကီၣ်ဆၣ်အပှၤဘၣ်မူဘၣ်ဒါစံးဝဲဒၣ်ဒ်အံၤန့ၣ်လီၤ.
“အခီၣ်ထံးခီၣ်ဘိန့ၣ်သုးကီၣ်ကးအပှၤထၢဝဲဖးဖီမုၢ်စရီန့ၣ်လီၤ. တချုးအဝဲသ့ၣ်နုၥ်လီၤထၢဖးဖီမုၢ်စရီန့ၣ်ပဖီၣ်ဃၥ်ပၥ်စၢၤအဝဲသ့ၣ်မီၤ နီၤ. လၢတၢ်န့ၣ်အဖီခိၣ်န့ၣ်ဖဲ(၁၂)သီ(၁၃)သီအနံၤန့ၣ်အဝဲသ့ၣ်စးထီၣ်ဟံးန့ၢ်ကမျၢၢ်တၢ်ပီးတၢ်လီဘၣ်ဃးဟံၣ်ပူၤတၢ်ဖိတၢ်လံၤခဲလၢၥ် လီၤ. ကမျၢၢ်သိလ့ၣ်ယီၢ်စဲးမ့ၢ်ဂ့ၤ,သိလ့ၣ်မ့ၢ်ဂ့ၤ,တၢ်ဖီအီၣ်တ့ၤအီၣ်မ့ၢ်ဂ့ၤဟဲက့ၤတီလီၤဝဲဒၣ်ဆူ(၄၀၄)ဒီး(၄၀၃)လၢအမ့ၢ်(သယဲၣ်ခၠီ) တၢ်လီၢ်န့ၣ်လီၤ. ပယီၤသုးအံၤတီဝဲဒၣ်ဒီးသိလ့ၣ်အိၣ်ဝဲအဝီ(၂၀)ဘျဲၣ်လံ,တီဝဲတလၢၥ်ဒံးဘၣ်န့ၣ်လီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဘၣ်ထွဲဒီးပယီၤသုးကီၣ်ကးနုၥ်လီၤဟံန့ၢ်ဝဲကမျၢၢ်တၢ်ဖိတၢ်လံၤသ့ၣ်တဖၣ်အံၤန့ၣ်ခီဖျိတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ဖီၣ်ဃၥ်ဝဲအပှၤထၢဖးဖီမုၢ်စရီသ့ၣ်တဖၣ်ဒီးစံးစ့ၢ်ကီးဝဲလၢဒူသဝီသ့ၣ်တဖၣ်အံၤမ့ၢ်ဝဲဒူသဝီလၢဆီၣ်ထွဲမၤစၢၤဝဲ(PDF)ဒီးပၥ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်ကရၢအဂ့ၢ်ကီၢ်ဆၣ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါပယီၤသုးအံၤတချုးဒံးလၢနုၥ်လီၤဆူဒူသဝီအပူၤဒံးဘၣ်အခါန့ၣ်ခးလီၤဝဲကျိဖးဒိၣ်ဆူဒူသဝီပူၤအဃိဘၣ်ဟးဂီၤကွံၥ်ဝဲဟံၣ်ဃီတဖျၢၣ်ဒီးတၢ်မၤလိကၠိတဖျၢၣ်စ့ၢ်ကီးအဂ့ၢ်သ့ၣ်ညါဘၣ်အသိးမ့မ့ၢ်လၢပှၤဒူဖိသဝီဖိသ့ၣ်တဖၣ်တခီပယီၤသုးသ့ၣ်တဖၣ်ပၥ်ဝဲလၢသီခါဖၠၣ်ကရၢၢ်အပူၤဒီးတကီၢ်ခါခဲအံၤန့ၣ်မ့ၢ်တၢ်ပျၢ်လီၤတပျၢ်လီၤဒံးခီန့ၣ်တၢ်မၤလီၤတံၢ်အီၤတန့ၣ်ဒံးဘၣ်ခီဖျိပယီၤသုးအံၤအိၣ်ဒံးဝဲလၢဒူသဝီခံဖျၢၣ်အံၤအပူၤလီၤအဂ့ၢ်န့ၣ်အဝဲစံးအါထီၣ်ဝဲဒၣ်န့ၣ်လီၤ.
ဒ်န့ၣ်အသိးကစၢၢ်ဒိၣ်ကီၢ်ဆၣ်ဟီၣ်ကဝီၤအပူၤပယီၤသုးကီၣ်ကးတကပၤနုၥ်လီၤဟူးဂဲၤထၢဝဲဒၣ်ဖးဖီမုၢ်စရီအံၤစးထီၣ်ဖဲတလါအံၤလါအီးကထိဘၢၣ်ထီၣ်သီအတီၢ်ပူၤအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲအသိးသုးကီၣ်ကးအပှၤမၤတၢ်ဖိလၢတၢ်ဖီၣ်ဃၥ်အီၤသ့ၣ်တဖၣ်န့ၣ်ကတီၢ်အံၤတၢ်တပျၢ်လီၤဒံးဘၣ်ဒီးတၢ်ဖီၣ်ဃၥ်ဝဲအံၤန့ၣ်မ့ၢ်ဒ်သိးတၢ်ကမၤတံၥ်တၥ်ဝဲသုးကီၣ်ကးအတၢ်မၤကျဲလီၤအဂ့ၢ်စံးဝဲစ့ၢ်ကီးန့ၣ်လီၤ.
