ကညီပှၤဒီပုၢ်ဝဲၢ်ဖိသၢဂၤလၢအဃုထံၣ်သ့ၣ်ညါဝဲန့ဆၢၣ်ပီၣ်လဲၣ်ထံဖီလၥ်တၢ်ဃံတၢ်လၤအလီၢ်အဂ့ၢ်အကျိၤန့ၣ်လီၤ.
လါအီးကထိဘၢၣ် ၃၁ သီ, ၂၀၂၄ နံၣ်, ခ့ၣ်အဲးစံၣ်
“လၢ(အၣ်ဒမၣ်)ကီးအပူၤအံၤပမၤဝဲတၢ်ယူၤထံအံၤ,ဟးဃုသ့ၣ်ညါတၢ်လီၢ်သီအါကတၢၢ်လီၤ. တၢ်လီၢ်အမံၤစ့ၢ်ကီးအိၣ်လၢပမံၤ, ဘၣ်မနုၤလဲၣ်န့ၣ်ပယုၢ်န့ၢ်လၢပမံၤအိၣ်လီၤလၢ(World Class Dive Sites)အပူၤန့ၣ်မီၤနီၤ. ပသးဒုပှၢ်လံမီၤနီၤပမၤတၢ်အိၣ် လၢအနံၣ်(၂၀)ဆူအဖီခိၣ်လီၤ. အဃိန့ၣ်ထံကျါဒုယဆိကမိၣ်,ယယူၤထံအနံၣ်ယံၤထဲအံၤန့ၣ်မုၥ်ဘၣ်ယၤဒံးအဖၢမုၢ်လီၤ. တၢ်တကၢၣ်ဘၣ်ယၤဒံးဘၣ်”
အဝဲအံၤမ့ၢ်ဝဲ(Dickson)ဒီးအဒီပုၢ်ဝဲၢ်ခွါ(၂)ဂၤအဂ့ၢ်လၢအမ့ၢ်ပှၤယူၤထံတၢ်သိၣ်လိသရၣ်သ့ၣ်တဖၣ်လၢမၤဝဲတၢ်ယူၤထံအံၤထီၣ်ဘးလၢအနံၣ်(၂၀)ဘျဲၣ်အတီၢ်ပူၤလံန့ၣ်လီၤ. ဒီးအဝဲသ့ၣ်ဃုထံၣ်သ့ၣ်ညါဝဲန့ဆၢၣ်ပီၣ်လဲၣ်ထံဖီလၥ်တၢ်ဃံတၢ် လၤအလီၢ်လၢအဘၣ်တၢ် ယုၢ်ဃုၥ်န့ၣ်ဝဲတၢ်လီၢ်သ့ၣ်တဖၣ်အံၤအမံၤလၢအဝဲသ့ၣ်အနီၢ်ကစၢ်ဒၣ်ဝဲအမံၤန့ၣ်လီၤ.
ကီးတဖျၢၣ်လၢအမ့ၢ်(အၣ်ဒမၣ်)ကီးအပူၤအံၤကညီဖိသ့ၣ်တဖၣ်အိၣ်ဆိးလုၢ်အီၣ်နီၢ်ခိသးသမူဒိးသန့ၤထီၣ်အသးလၢပီၣ်လဲၣ်ပူၤဒီးခိခိၣ်တၢ်ဖံးတၢ်မၤသ့ၣ်တဖၣ်န့ၣ်လီၤ. (အၣ်ဒမၣ်)ကီးအံၤအိၣ်ဝဲဒၣ်လၢကီၢ်အ့ဒယၣ်တၢ်ပၢအဖီလၥ်ဒီးကညီဖိလၢအိၣ်ဆိးဝဲဒၣ်ဖဲ(အၣ် ဒမၣ်)ကီးအပူၤသ့ၣ်တဖၣ်နံၣ်လၢကဟဲ(၂၀၂၅)နံၣ်အတီၢ်ပူၤန့ၣ်အဝဲသ့ၣ်အိၣ်ဆိးပှဲၤထီၣ်ဝဲဒၣ်လၢအနံၣ်(၁၀၀)လံန့ၣ်လီၤ.
စးထီၣ်ဖဲ(၁၉၂၅)နံၣ်,လါအ့ဖြ့ၣ်(၂၅)သီအနံၤန့ၣ်ကညီဖိပှၤအဆိကတၢၢ်(၁၂)ဒူၣ်လၢကီၢ်ပယီၤအပူၤဘၣ်တၢ်ဟဲကိးအီၤလၢပှၤအဲကလံးဖိတဆီဆူ(အၣ်ဒမၣ်)ကီးအပူၤဒ်သိးကဖံးကမၤတၢ်ကျီသ့ၣ်ကျီဝၣ်ဒီးမၤတၢ်လၢပှၢ်ယိၥ်ပူၤအဂီၢ်န့ၣ်လီၤ. လၢတၢ်န့ၣ်အဃိကညီဖိ သ့ၣ်တဖၣ်အံၤအိၣ်ဆိးဝဲဒၣ်ဖဲကီးအံၤအပူၤတုၤမုၢ်မဆါတနံၤအံၤဒီးပီၣ်လဲၣ်ပီၣ်တြီၤအံၤမ့ၢ်အဝဲသ့ၣ်တၢ်လုၢ်အီၣ်နီၢ်ခိၣ်သးသမူတခါ တကးဒံးဘၣ်မ့ၢ်စ့ၢ်ကီးဝဲဒၣ်အဝဲသ့ၣ်တၢ်န့ၢ်သါတခါန့ၣ်လီၤ.
(Dickson Poayesay, Jackson Poayesay, Johnny Poayesay)အံၤမ့ၢ်ဝဲပှၤသၢစိၤတစိၤလၢဟဲအိၣ်ဖျဲၣ်ထီၣ်ဝဲဒၣ်ဒီးဒိၣ် ထီၣ်ဘၣ်ဝဲဖဲ(အၣ်ဒမၣ်)ကီးအပူၤလၢပီၣ်လဲၣ်ခိၣ်ဃၢၤအိၣ်ဝးတရံးအီၤန့ၣ်လီၤ. အဝဲသ့ၣ်အဒီပုၢ်ဝဲၢ်ခဲလၢၥ်အိၣ်ဝဲ(၁၃)ဂၤကျါပှၤလၢအ ယူၤထံမ့ၢ်ဝဲဒၣ်ထဲအဝဲသ့ၣ်(၃)ဂၤ အဂ့ၢ်န့ၣ်(Dickson)တဲပၠးဝဲဘၣ်ဃးအဟံၣ်ဖိဃီဖိအဂ့ၢ်ဖုၣ်ကိၥ်ဖိဒ်အံၤန့ၣ်လီၤ.
“ပှၤကိးယၤလၢ(Dickson Poayesay). ပမိၢ်ယပၢ်ယုၥ်န့ၢ်ယမံၤလၢဟံၣ်န့ၣ်ပှၤကိးယၤလၢ(စီၤသိမါ)မီၤနီၤ. ယဒီပုၢ်ဝဲၢ်န့ၣ်အိၣ် (၁၃)ဂၤ, ပှၤလၢအယူၤထံန့ၣ်အိၣ်ဝဲ(၃)ဂၤလီၤ. ပအိၣ်ဖျဲၣ်ထီၣ်ဖဲ(အၣ်ဒမၣ်)ကီးအံၤလီၤ. ပမ့ၢ်ဝဲပှၤသၢစိၤတစိၤမီၤနီၤ. ယမိၢ်ယ ပၢ်စ့ၢ်ကီးအိၣ်ဖျဲၣ်ထီၣ်ဝဲဖဲကီးခိၣ်အံၤလီၤ. ဒီးယဖံဖုန့ၣ်ဟဲလီၤဝဲဒၣ်လၢကီၢ်ပယီၤဖဲ(၁၉၂၅)နံၣ်မီၤနီၤ.နံၣ်လၢကဟဲန့ၣ်ကပှဲၤထီၣ် ဝဲအနံၣ်(၁၀၀)လီၤ.” အဂ့ၢ်(Dickson)စံးဝဲဒၣ်န့ၣ်လီၤ.
လၢအဝဲသ့ၣ်အနီၢ်ဆံးခါလံၤလံၤတၢ်ယူၤထံပီၢ်ထံအံၤန့ၣ်သ့ၣ်ညါနၢ်ပၢၢ်ဝဲဒၣ်ဘၣ်ဆၣ်တၢ်မၤအသးလၢထံဖီလၥ်တခီတသ့ၣ်ညါဝဲဘၣ်ဂ့ၤဂ့ၤဘၣ်ဒီးဖဲ(၁၉၉၅)နံၣ်အခိၣ်ဃၢၤအဆၢကတီၢ်န့ၣ်ခီဖျိလၢပှၤယူရပၤဖိသ့ၣ်တဖၣ်ဟဲနုၥ်လီၤဒုးသ့ၣ်ညါဝဲတၢ်ယူၤထံ(scuba diving)တဆီအဝဲသ့ၣ်စးထီၣ်ဝဲဒၣ်တၢ်ယူၤထံအံၤအဂ့ၢ်(Dickson)စံးဝဲဒၣ်န့ၣ်လီၤ.
“ဘၣ်ဃးဒီးပှၤယူၤထံလၢ(Cylinder)ဒီး(Oxygen)အံၤစးထီၣ်အသးတယံၤဒံးဘၣ်ဖဲ(၁၉၉၅)နံၣ်ဆူအဖီခိၣ်ဒီးတုၤအခဲအံၤလီၤ. လၢအခီၣ်ထံးန့ၣ်ပှၤယူရပၤဖိသ့ၣ်တဖၣ်ဟဲဝဲဒီးထံၣ်ဝဲလၢ(အၣ်ဒမၣ်)ကီးအံၤတၢ်ခွဲးတၢ်ယၥ်အိၣ်အါဝဲလၢယူၤထံအဂီၢ်မီၤ. အဃိ န့ၣ်ပဝဲလၢပနီၢ်ဆံးခါန့ၣ်ပယူၤထံ,ပပီၢ်ထံလၢထံကျိပူၤ,ပီၣ်လဲၣ်ပူၤန့ၣ်တကီခဲဘၣ်. ဘၣ်ဆၣ်လၢထံကျါန့ၣ်တၢ်အိၣ်သးအိၣ်ဒ် လဲၣ်န့ၣ်ပတသ့ၣ်ညါဂ့ၤဂ့ၤဘၣ်. အဃိအဝဲသ့ၣ်ဟဲဒုးသ့ၣ်ညါဝဲဒီးပစးထီၣ်လၢအဝဲသ့ၣ်အိၣ်တဆီဒီးအဝဲသ့ၣ်သိၣ်လိပှၤလီၤ. ယၤဒီးယဒ့ဖိစ့ၢ်ကီးပဟဲထီၣ်ဘၣ်ဝဲ (Instructor)တၢ်သိၣ်လိလၢကီၢ်ကၠီၣ်တဲၣ်န့ၣ်လီၤ.” အဂ့ၢ်(Dickson)စံးအါထီၣ်ဝဲဒၣ်န့ၣ်လီၤ.
(Scuba Diving)တၢ်ယူၤထံအံၤမ့ၢ်ဝဲဒၣ်တၢ်လဲၤဟးကွၢ်ကီထံဖီလၥ်န့ဆၢၣ်တၢ်ဃံတၢ်လၤအလီၢ်သ့ၣ်တဖၣ်ဒီးတၢ်လဲၤဃုသ့ၣ်ညါ တၢ်သးသမူအိၣ်သ့ၣ်တဖၣ်လၢထံအဖီလၥ်အကတီၢ်န့ၣ်တၢ်ခဲလၢၥ်ပကသါအီၤသ့ဝဲဒၣ်ဒီးဒ်န့ၣ်အသိးတၢ်သ့ၣ်တဖၣ်အံၤတမ့ၢ်တၢ်လၢအမၤဟးဂီၤ,မၤဘၣ်ဒိထံဖီလၥ်န့ဆၢၣ်ဒီးတၢ်ဖိတၢ်လံၤသ့ၣ်တဖၣ်ဘၣ်အဂ့ၢ်(Dickson)တဲပၠးဝဲဒၣ်ဘၣ်ဃးအတၢ်မၤတၢ်ယူၤထံအံၤန့ၣ်လီၤ.
ဒ်န့ၣ်အသိးအဝဲသ့ၣ်ဒီပုၢ်ဝဲၢ်သၢဂၤအံၤဃုထံၣ်သ့ၣ်ညါဝဲဒၣ်ပီၣ်လဲၣ်ထံဖီလၥ်တၢ်လီၢ်သီလၢအဘၣ်တၢ်သ့ၣ်ညါအီၤအါလၢအမ့ၢ်(Dickson’s Pinnacle, Jackson’s Bar, Jonny’s Gorge)တၢ်လီၢ်သ့ၣ်တဖၣ်အံၤအဝဲသ့ၣ်ဒီပုၢ်ဝဲၢ်သၢဂၤဃုထံၣ်သ့ၣ်ညါဝဲကိးန့ၢ်အမံၤ လၢအဝဲသ့ၣ်နီၢ်ကစၢ်အမံၤအဂ့ၢ်(Dickson)စံးဝဲဒၣ်ဒ်အံၤန့ၣ်လီၤ.
“လၢအခီၣ်ထံးန့ၣ်ကီးခိၣ်အံၤမ့ၢ်ဝဲတၢ်အသီတခါလီၤ. ဒီးပမၤတၢ်လဲၤဃုသ့ၣ်ညါဝဲတၢ်လီၢ်အသီဒ်သိးပကလဲၤကိးပှၤတမှံၤအဂီၢ် မီၤနီၤ. ပဒီပုၢ်ဝဲသၢဂၤအံၤ,ပမၤတၢ်ဟးဃုသ့ၣ်ညါတၢ်လီၢ်သီအံၤန့ၣ်ယဆိကမိၣ်ဒု(အၣ်ဒမၣ်)အပူၤန့ၣ်ပမၤအါကတၢၢ်လီၤ. တၢ် လီၢ်အမံၤစ့ၢ်ကီးပယုၢ်န့ၢ်အီၤလၢပမံၤအိၣ်ဝဲလၢ(World Class Dive Sites)အပူၤန့ၣ်မီၤနီၤ. ယဒ့ဖိ(Jackson)တၢ်လီၢ်န့ၣ် ကိးဝဲအမံၤလၢ(Jackson’s Bar). နမ့ၢ်ကွၢ်လၢ(Google)အပူၤန့ၣ်နကထံၣ်ဘၣ်ဝဲလီၤ. ယဲယတၢ်လီၢ်အမံၤလၢ(Dickson’s Pinnacle)ဒီးလၢယဒ့ဖိ(Johnny)စ့ၢ်ကီးအတၢ်လီၢ်မံၤလၢ(Johnny’s Gorge)န့ၣ်လီၤ. အဃိပမံၤဒုးအိၣ်ထီတ့ၢ်ဃၥ်ဝဲဒီး ပှၤမ့ၢ်ဟဲဟးဒီးပှၤဃုသ့ၣ်ညါဝဲမီၤနီၤ.”
“ပှၤတခွဲညၣ်ဖိသ့ၣ်တဖၣ်ပလဲၤဃုသ့ၣ်ညါလၢအဝဲသ့ၣ်ဒီးဖဲန့ၣ်ပထံလၢညၣ်ဖးဒိၣ်တဘ့ၣ်တဘ့ၣ်န့ၣ်ကံလိအိၣ်လၢသၢကယၤ,လွံၢ်ကယၤ. ပကွၢ်ဒီးတၢ်လီၢ်ဂ့ၤမး,ညၣ်စ့ၢ်ကီးအိၣ်ဝဲကလုၥ်ကလုၥ်မီၤနီၤ. စးထီၣ်လၢနံၣ်အဝဲန့ၣ်တုၤလၢခဲအံၤန့ၣ်ပှၤလဲၤယူၤ ထံဖဲတၢ်လီၢ်အဝဲန့ၣ်ကိးဘျီဒဲးလီၤ. ယဒ့ဖိ(Johnny)တၢ်လီၢ်န့ၣ်ပှၤယူၤထံလၢလၢၢ်သ့ၣ်ဖးအကဆူၣ်လီၤ. မ့မ့ၢ်(Jackson)တၢ် လီၢ်န့ၣ်ထံၣ်ဝဲဒၣ်ညၣ်ဖးဒိၣ်အိၣ်ဝဲသၢကလုၥ်လွံၢ်ကလုၥ်ဒီးညါအိၣ်ဝဲအါမးလီၤ.” အဂ့ၢ်စံးဝဲဒၣ်န့ၣ်လီၤ.
ခီဖျိဘၣ်ဝဲအတၢ်အိၣ်မူလၢတၢ်ယူၤထံအနံၣ်(၂၀)ဘျဲၣ်ဒီတကတီၢ်(Johnny, Jackson, Dickson)ဒီပုၢ်ဝဲၢ်သၢဂၤအံၤအခဲအံၤမၤ က့ၤဝဲတၢ်မၤလၢအနီၢ်ကစၢ်ဒၣ်ဝဲတၢ်ယူၤထံခီပနံၥ်တဖျၢၣ်လၢအမ့ၢ်(Ocean Tribe)အံၤန့ၢ်ဝဲ(၁၃)နံၣ်လံန့ၣ်လီၤ.(Ocean Tribe) အခီပညီအံၤမ့ၢ်ဝဲတၢ်ဒုးနဲၣ်ဖျါထီၣ်ဝဲကညီကလုၥ်ဒူၣ်ဖိအတၢ်အိၣ်မူအိၣ်ဂဲၤလၢ(အၣ်ဒမၣ်)ကီးအပူၤဒီးမ့ၢ်ဝဲပှၤ(Ocean)ဖိသ့ၣ်တဖၣ်အဂ့ၢ်စံးဝဲန့ၣ်လီၤ.
“တချုးပစးထီၣ်ဒုးအိၣ်ထီၣ်(Ocean Tribe)ခီပနံၥ်ဝဲအံၤန့ၣ်ပမၤတၢ်လၢခီပနံၥ်အဂၤနွံနံၣ်,ဃိးနံၣ်ဝံၤမးဒီးပစးထီၣ်ဝဲဒၣ် (Ocean Tribe)အံၤဖဲ(၂၀၁၁)နံၣ်မီၤနီၤ. ပစးထီၣ်ဝဲဒၣ်အိၣ်(၁၃)နံၣ်လံန့ၣ်လီၤ. ယၤဒီးယဒ့ဖိသ့ၣ်တဖၣ်ဒီးပပှၤအမၤသကိး တၢ်ဖိပဒုးအိၣ်ထီၣ်ဝဲဒၣ်ခီပနံၥ်ဝဲအံၤလီၤ. (Ocean Tribe)အံၤဘၣ်မနုၤပကိးန့ၢ်အမံၤလဲၣ်န့ၣ်ပဝဲဒၣ်မ့ၢ်ပှၤကညီဖိလၢအမ့ၢ် ဝဲကလုၥ်ဒူၣ်ဖိတဒူၣ်လီၤ. ပအိၣ်လၢ(အၣ်ဒမၣ်)ကီးခိၣ်လၢပီၣ်လဲၣ်ပူၤလီၤ. ပဝဲပှၤကညီကလုၥ်ဒူၣ်ဖိသ့ၣ်တဖၣ်ပအိၣ် လၢပီၣ်လဲၣ်ပူၤဒီးပမ့ၢ်ပှၤ(Ocean)ဖိလီၤ. အဃိန့ၣ်ပယုၢ်န့ၢ်အမံၤလၢ(Ocean Tribe)မီၤနီၤ.” အဂ့ၢ်စံးဝဲဒၣ်န့ၣ်လီၤ.
လၢတၢ်န့ၣ်အဃိကညီဖိလၢအိၣ်(အၣ်ဒမၣ်)ကီးအပူၤသ့ၣ်တဖၣ်ဘၣ်ဃးဒီးတၢ်ယူၤထံအံၤဟဲသးစဲအါထီၣ်ဝဲဒၣ်အသိးပှၤလၢအကဲထီၣ်ဘၣ်ဝဲပှၤယူၤထံတၢ်သိၣ်လိသရၣ်စ့ၢ်ကီးအိၣ်ဝဲအါဂၤလံန့ၣ်လီၤ. အါန့ၣ်အမဲၥ်ညါပှၤကီၢ်ယူရပၤဖိထံကီၢ်ဒ်အမ့ၢ်(ဖိလဲ,ယူၣ် ခ့ၣ်,ကၠၢမနံၤ,ဖြဲၣ်,နီၣ်ဝ့)ဒီးထံကီၢ်အဂၤသ့ၣ်တဖၣ်ဟဲယူၤထံဖဲ(Ocean Tribe)ခီပနံၥ်အိၣ်ဝဲအါမးအဂ့ၢ်(Dickson)စံးဝဲဒၣ်အသိး (Dickson)အနီၢ်ကစၢ်ဒၣ်ဝဲသိၣ်လိနဲၣ်ယုၥ်ဘၣ်ဝဲပှၤတၢ်သိၣ်လိဖိထီၣ်ဘးအဂၤလၢအကထိဘျဲၣ်လံန့ၣ်လီၤ.
လၢန့ၣ်အမဲၥ်ညါလၢကဟဲခါဆူညါအဂီၢ်ဒ်သိးပှၤအါဂၤကထံၣ်သ့ၣ်ညါအါထီၣ်ဘၣ်ဝဲ(Ocean Tribe)အံၤဒီးပှၤလၢမ့ၢ်အဲၣ်ဒိးဟဲမၤ လိတၢ်ယူၤထံ(scuba diving)သ့ၣ်တဖၣ်ဒ်သိးတၢ်ဆဲးကျိးဆဲးကျၢကညီအဂီၢ်အဝဲသ့ၣ်အိၣ်ဝဲဒီးတၢ်တိၥ်ပၥ်လၢကမၤဂ့ၤထီၣ်ဝဲ (Social Media)တကပၤဒ်သိးပှၤအါဂၤကထံၣ်ဘၣ်ဝဲဒီးသးစဲးအါထီၣ်ဝဲဒၣ်အဂ့ၢ်(Dickson)စံးအါထီၣ်ဝဲဒၣ်န့ၣ်လီၤ.
(Johnny,Jackson,Dickson)ဒီပုၢ်ဝဲၢ်သၢဂၤအံၤလၢအဝဲသ့ၣ်သးစၢ်အခါလံၤလံၤဒီးတုၤလၢအခဲအံၤတစုန့ၣ်မၤဝဲတၢ်ယူၤထံအိၣ် ထီၣ်ဘးဝဲလၢအနံၣ်(၂၀)ဘျဲၣ်လံန့ၣ်လီၤ. ဒ်န့ၣ်အသိး(Dickson)စံးဝဲဒၣ်လၢအဝဲယူၤထံထီၣ်ဘးလၢအနံၣ်ယံၤဝဲထဲထဲအံၤလံဘၣ် ဆၣ်တုၤလၢအခဲအံၤတစုန့ၣ်ယူၤထံမုၥ်ဘၣ်ဒံးအီၤအဖၢမုၢ်အဂ့ၢ်စံးဝဲဒၣ်ဒ်အံၤန့ၣ်လီၤ.
“ပဒီပုၢ်ဝဲၢ်လၢယူၤထံန့ၣ်အိၣ်ဝဲသၢဂၤမီၤနီၤ. ပညါဒုပှၢ်ထီၣ်လံ,ယသးနံၣ်အိၣ်လံလၢ(၅၃)နံၣ်, (Jackson)န့ၣ်အိၣ်(၅၁)နံၣ်,ဒီး (Johnny)ကအိၣ်လၢ(၄၈)မ့တမ့ၢ်(၄၉)လွံၢ်နံၣ်လံမီၤနီၤ. ပမၤတၢ်န့ၣ်အိၣ်လၢအနံၣ်(၂၀)ဆူအဖီခိၣ်လီၤ. အဃိန့ၣ်ထံကျါဒု ယဆိကမိၣ်အနံၣ်ယံၤဝဲအံၤဒုယယူၤထံမုၥ်ဘၣ်ယၤဒံးအဖၢမုၢ်လီၤ,တၢ်တကၢၣ်ယသးဒံးဘၣ်” အဂ့ၢ်န့ၣ်စံးအါထီၣ်ဝဲန့ၣ်လီၤ.
ဒ်အဝဲသ့ၣ်မ့ၢ်ဝဲတၢ်သိၣ်လိသရၣ်အသိးထံၣ်ဘၣ်စ့ၢ်ကီးဝဲတၢ်သိၣ်လိဖိတနီၤပျံၤတၢ်,ဖုးတၢ်အိၣ်ဝဲအဖီခိၣ်ဒ်သိးအသုတကဲထီၣ်တၢ်ကီတၢ်ခဲဖဲလၢအိၣ်ထံကျါအဆၢကတီၢ်တဂ့ၤဒီးအသုတပျံၤတၢ်တဂ့ၤအဂီၢ်ဘၣ်သိၣ်လိနဲၣ်ယုၥ်ဝဲလီၤတံၢ်လီၤဆဲးအိၣ်ဝဲဒၣ်အသိးညၣ်ဖးဒိၣ်လၢကဟဲဆၢၣ်မဲၥ်အဝဲသ့ၣ်ဒ်န့ၣ်တအိၣ်ဘၣ်ဘၣ်ဆၣ်ထီဘိအိၣ်လၢတၢ်ပလီၢ်ပဒီပူၤအဂ့ၢ်(Dickson)စံးဘၣ်ဝဲဒၣ်န့ၣ်လီၤ.
