လါအီးကထိဘၢၣ် ၁၃သီ, ၂၀၂၄နံၣ်, ခ့ၣ်အဲးစံၣ်
သုးက့(၇)ဖၣ်အၣ်ကီၢ်ရ့ၣ်,ဖၣ်အၣ်ဝ့ၢ်,ကၠါကလ့စၣ်သပၠ့ၤကျဲဟီၣ်ကဝီၤသုးကီၣ်ကးတၢ်ခိးတြဲၤတဖၣ်အပူၤသုးကီၣ်ကးတဖၣ်,ဖီၣ်ဃ့ဝဲစ့လၢကမျၢၢ်လီၢ်ကဝီၤဖိလၢအလ့ၢ်ထီၣ်လ့ၢ်လိၤတဖၣ်အအိၣ်လၢတၢ်ဂ့ၢ်အကလုၥ်ကလုၥ်အဖီခိၣ်အိၣ်အါထီၣ်ဝဲအဂ့ၢ်,လီၢ်ကဝီၤကမျၢၢ်တဖၣ်စံးဝဲန့ၣ်လီၤ.
ကီးတရံးကီၢ်ဆၣ်အပူၤ,ကီးဘ့,မ့ယွၤ,ဖယါကိ,သရၣ်နၣ်သဝီတဖၣ်အပူၤ,တလၢၤကလုၥ်ဒူၣ်လီၢ်ကဝီၤဖိလၢအဃ့ၢ်တၢ်ဒုးအိၣ်ကဒုအသးဖဲဖၣ်အၣ်ဒီးစၣ်သပၠ့ၤသဝီကရူၢ်တကပၤတဖၣ်,တလါအံၤလါအီးကထိဘၢၣ်အပူၤသုးကီၣ်ကးတၢ်သမံသမိးတြဲၤပှၤအိၣ်ခိးတၢ်တဖၣ်စံးဝဲလၢဒိးသိလ့ၣ်ဒီးဆဲးကဲးလၢအလံၥ်လဲၢ်(လဲၤစ့ၣ်)တအိၣ်ဘၣ်အဃိဖီၣ်ဃ့ဝဲဝံၤမးဒုးလ့ၢ်ထီၣ်လ့ၢ်လိၤဝဲအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ.
လီၢ်ကဝီၤပှၤဟ့ၣ်တၢ်ကစီၣ်ဖိလၢတအဲၣ်ဒိးပၥ်ဖျါအမံၤတဂၤစံးဝဲလၢ“သုးကီၣ်ကးအံၤစးထီၣ်လၢ,ခယါ,သၣ်လဲၤ,ကၠါကလ့,ကျဲဒီတဘိတုၤလၢစၣ်သပၠ့ၤန့ၣ်အတၢ်သမံသမိးတြဲၤအိၣ်ဒီဒူၣ်လီၤ.လၢသရၣ်နၣ်,မ့ယွၤ,ဖယါကိတကပၤဆူဖၣ်အၣ်စၣ်သပၠ့ၤတကပၤန့ၣ်စ့ၢ်ကီးသုးကီၣ်ကးအံၤဟးဟံကွံၥ်ဝဲပှၤဃ့ၢ်တၢ်ဒုးဖိတဖၣ်အသိလ့ၣ်,ဆဲးကဲးတဖၣ်အိၣ်ဝဲဒၣ်အသိး,ဖီၣ်ဝဲအိၣ်န့ၣ်လီၤ.ပှၤမ့ဟ့ၣ်အသုစ့လၢအကလီၢ်မးပျၢ်က့ၤဝဲ,ဆဲးကဲးတခိၣ်န့ၣ်,(၃)ကလီၢ်,မ့တမ့ၢ်(၅)ကလီၢ်,မ့မ့ၢ်လၢကါဒု(အကလီၢ်တဆံန့ၣ်လီၤ.”အဂ့ၢ်စံးဝဲဒၣ်လီၤ.
အပူၤကွံၥ်လါမးရှးဘူးကလၢၥ်အပူၤတၢ်ခးလိၥ်သးကဲထီၣ်လၢကီးဘ့အဆၢကတီၢ်,ကမျၢၢ်လီၢ်ကဝီၤဖိတဖၣ်ကးတံၥ်ကွံၥ်ဟံၣ်ဃီ,ဃ့ၢ်ထီၣ်အိၣ်ကဒုဝဲအသးဒီးအစုလီၢ်ခီၣ်ခိၣ်သိလ့ၣ်,ဆဲးတဖၣ်တၢ်အီၣ်ဟုၣ်ကွံၥ်ဝဲအိၣ်ဝဲအဃိ,လီၢ်ကဝီၤဖိလၢဃ့ၢ်ထီၣ်အိၣ်ကဒုအသးခဲအံၤတဖၣ်အံၤစိၥ်ဝဲအတၢ်ဖိတၢ်လံၤတဘျီဃီအဖီခိၣ်,တၢ်သမံသမိးဝဲအဝဲသ့ၣ်တဖၣ်အဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,စးထီၣ်ဖဲအပူၤကွံၥ်လါအီးကထိဘၢၣ်(၁)သီအနံၤအပူၤ(ကၠဲမၠ့ၣ်)ကျိအပူၤသုးကဘီဒီး(ကြုၢ်တု)ခီၣ်ချ့သုးရ့ၣ်ခလရ(၅၄၅)သုးရ့ၣ်,ခးလီၤဝဲကျိဖးဒိၣ်ဆူတလၢၤကလုၥ်ဒူၣ်သဝီအိၣ်ဆိးတၢ်လီၢ်ဒီးမၤဝဲတၢ်ထၢဖးဖီမုၢ်စရီအိၣ်ဝဲဒၣ်န့ၣ်လီၤ.
ဒီးခီဖျိသုးကီၣ်ကးတဖၣ်အံၤခးလီၤကျိဖးဒိၣ်အဃိ,တၢ်ခးလိၥ်သးဒီး(KNLA)တၢ်ပၢၢ်ဆၢသိၣ်မှံၤသုးပၥ်ဖှိၣ်ကဲထီၣ်ဝဲသ့အဖီခိၣ်,စၣ်သပၠ့ၤ,ကြုၢ်တု,ကၠါကလ့,ထိအဲ,ကီးလဲၣ်သဝီလီၢ်ကဝီၤဖိတဖၣ်,ဃ့ၢ်ပဒ့ၣ်ထီၣ်ဝဲအသးအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
