လါအီးကထိဘၢၣ် ၃၁ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ၀ီၢ်ကျီၢ်ကရူၢ်အပူၤ ဖဲမဟါအနံၤ ပယီၤသုး လၢအဟဲနုၥ်လီၤဆူလၢၢ်ပူၣ်သ၀ီပူၤတဖၣ်အံၤ ဒွဲၣ်အူအီၣ်ကွံၥ်၀ဲ(ခ့ၣ်အဲၣ်ယူၣ်)ကရူၢ်တၢ်သမံသမိးတြဲၤတၢ်သူၣ်ထီၣ်ဒီး တၢ်ဒုးစ့ၢ်ကီး ကဲထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဖဲမဟါလါအီးကထိဘၢၣ် ၃၀ သီ ဂီၤခီ ၉ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးခီၣ်သုးရ့ၣ်(ခလရ-၂)ဒီး(ခလရ-၉၆) သုးပၥ်ဖှိၣ် သ့ၣ်တဖၣ်အံၤ ဟဲထီၣ်ဒီးနုၥ်လီၤ၀ဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၃ တၢ်ပၢဟီၣ်က၀ီၤ ၀ီၢ်ကျီၢ်ကရူၢ် လၢၢ်ပူၣ်သ၀ီပူၤ၀ံၤ မၤဟးဂီၤဒွဲၣ်အူအီၣ်ကွံၥ်၀ဲကရူၢ်ဂၢၤသးတၢ်သမံသမိးတြဲၤတကးဒံးဘၣ် တၢ်ဒုးစ့ၢ်ကီးကဲထီၣ်၀ဲလၢခံခီခံကပၤ အဘၢၣ်စၢၤ အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံး၀ဲန့ၣ်လီၤ.
ဘၣ်ဃးဒီးတၢ်ဂ့ၢ်အံၤန့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“ပှၤဟ့ၣ်ထီၣ်ပှၤတၢ်ကစီၣ်လၢ ဖဲမဟါန့ၣ် ပယီၤသုး(ခလရ-၂)ဒီး (ခလရ-၉၆)ပၥ်ဖှိၣ်ထီၣ်သး၀ံၤဟဲထီၣ်၀ဲဒၣ်ဖဲမဲယိလ့သ၀ီ,မဲယိကၠံသ၀ီဘျီ တိ၀ဲဒၣ်ဒူသ၀ီ တၢ်သမံသမိးတြဲၤ၀ံၤအမၤဟးဂီၤဒွဲၣ်အူကွံၥ်၀ဲခဲလၢၥ်.ပယီၤသုးဂံၢ်ဘါန့ၣ်တၢ်တယးကွၢ်၀ဲကအိၣ်လၢ(၂၀၀)ခိၣ်ဃၢၤညါ.မဟါန့ၣ်တၢ်ဒုးကဲထီၣ်လၢလၢၢ်ပူၣ်သ၀ီန့ၣ်တၢ်ခးလိၥ်သးကဲထီၣ်.ခဲအံၤပယီၤသုးန့ၣ်အိၣ်ဒံးဖဲန့ၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
လၢန့ၣ်အမဲၥ်ညါခီဖျိပယီၤသုးကျိၤဟဲထီၣ်ဒီးတၢ်ဒုးကဲထီၣ်တကးဒံးဘၣ်ပယီၤသုးကလၢၤလၢအိၣ်တၢ်ခိၣ်တၢ်ဃၢၤဖဲန့ၣ်တဖၣ် စ့ၢ်ကီးခးလီၤကျိဖးဒိၣ်အိၣ်အဃိ လၢၢ်ပူၣ်သ၀ီဖိခဲလၢၥ်ဃၣ်ဃၣ်ဘၣ်ဟးပလဲးသးလၢတၢ်ဘံၣ်တၢ်ဘၢလီၢ်အဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဒီးတၢ်ကဲထီၣ်သးဖဲန့ၣ်တဂၤ စံး၀ဲဒ်အံၤန့ၣ်လီၤ.
“မဟါန့ၣ်သ၀ီကရူၢ်ဂၢၤသးခးအီၤဖဲလၢၢ်ပူၣ်သ၀ီတဘျီ.တၢ်ဒုးကဲထီၣ်န့ၣ်ဘူးဘူးဖိလီၤအဃိပယီၤသုးတကပၤအသံဘၣ်ဒိထံးအိၣ်ဘၣ်ဆၣ်တသ့ၣ်ညါလီၤတံၢ်ဘၣ်.ပှၤသ၀ီဖိဒုစံၣ်လၢၥ်လံတဂၤမးတအိၣ်လၢၤဘၣ်သ၀ီပူၤန့ၣ်.အိၣ်၀ဲဘူၣ်လၢၤ၀ဲလဲၣ်ပယီၤသုးခးနၢၤလီၤကျိဖးဒိၣ်နဲဒၣ်ခီနကျိဖးဒိၣ်မးတအိၣ်န့ၣ်.ခး၀ဲကျိဖးဒိၣ်ခံထံၣ်ညါ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတနံၤအံၤ န့ၣ်လီၤ.
ဒ်လီၢ်က၀ီၤသုးဂ့ၢ်၀ီပှၤဘၣ်မူဘၣ်ဒါစံး၀ဲအသိး ပယီၤသုးကျိၤလၢအဟဲထီၣ်ဟူးဂဲၤဖဲ၀ီၢ်ကျီၢ်ကရူၢ်ပူၤသ့ၣ်တဖၣ်အံၤ ကလဲၤထီၣ်လၢ ထးခီတကပၤအဂီၢ်လဲၤထီၣ်၀ဲဒီးသိလ့ၣ်တဘူၣ်ဘၣ်ခီဖျိတၢ်ခိးခးအ၀ဲသ့ၣ်လၢကျဲပူၤအဃိ အ၀ဲသ့ၣ်ရၤလီၤသး ဟဲထီၣ်၀ဲလၢ အခီၣ်ဒီးပယီၤသုးသ့ၣ်တဖၣ်အံၤအတၢ်ပညိၣ်အိၣ်လၢကလဲၤထီၣ်ဆူဖၣ်အၣ်ဒီးဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်က၀ီၤ ပူၤ လၢတၢ်ဒုးတၢ်ယၤကဲထီၣ်အလီၢ်တဖၣ်သ့၀ဲအဂ့ၢ်န့ၣ် စံး၀ဲန့ၣ်လီၤ.
သုးဟံန့ၢ်တၢ်စိတၢ်ကမီၤ၀ံၤလီၢ်ခံ ဒူသထူၣ်ကီၢ်ရ့ၣ်ပူၤ လီၤဆီဒၣ်တၢ်ကၠဲးထိၣ်,ဘံလ့ဒီးသထူၣ်ကီၢ်ဆၣ်သ့ၣ်တဖၣ်အံၤအပူၤန့ၣ် ပယီၤသုးလၢအဟဲထီၣ်တလၢတၢ်ပၥ်ပနီၣ်လီၢ်က၀ီၤသ့ၣ်တဖၣ်အံၤဒီးဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ်အဘၢၣ်စၢၤတၢ်ဒုးကဲထီၣ်၀ဲတလီၢ်လီၢ်အသိးပယီၤသုးတကပၤစ့ၢ်ကီးပညိၣ်ခးလီၤကဒါကျိဖးဒိၣ်ဆူလီၢ်က၀ီၤဒူသ၀ီကမျၢၢ်အိၣ်အလီၢ်ကဲထီၣ်သးခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်တလါအံၤ ၁၂ သီအနံၤန့ၣ်စ့ၢ်ကီး ကၠဲးထိၣ်ကီၢ်ဆၣ် ခရၢၢ်ကရူၢ် သိခွးသ၀ီဃၢၤ KNLA သုးရ့ၣ်(၃)သုးပၥ်ဖှိၣ် တၢ်သမံသမိးတြဲၤလီၢ်န့ၣ် တၢ်ဖီၣ်န့ၢ်၀ဲသုးကီၣ်ကးအမျိၥ်သုး(၃၁၀)သုးရ့ၣ် အသုးခိၣ်ဒီးအမါခံဂၤကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
