လါအီးကထိဘၢၣ် ၂ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကၠဲးထိၣ်ကီၢ်ဆၣ်အပူၤ KNLA သုးရ့ၣ်(၃)သုးပၥ်ဖှိၣ် လဲၤခး၀ဲပယီၤသုးအသုးရ့ၣ်(၂)ရ့ၣ်တၢ်လီၢ်ခံတီၤဒီးဒြိအဃိ ပယီၤသုးတကပၤဘၣ်ဒိဘၣ်ထံးတစှၤန့ၢ်(၈)ဂၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲန့ၣ်လီၤ.
သ့ၣ်စ့ၣ်ယး သုးကီၣ်ကးအမျိၥ်သုး(၃၁၀)သုးရ့ၣ်ဒီး ၀ါဒၣ်ကွ့ ခီၣ်ချ့သုးရ့ၣ်(ခမရ-၂၀၇)သ့ၣ်တဖၣ်အံၤ ဖဲလါစဲးပထ့ဘၢၣ် ၃၀ သီ ဂီၤခီ ၁၁ နၣ်ရံၣ်ဃၣ်ဃၣ်အဆၢကတီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃)သုးပၥ်ဖှိၣ် လဲၤခးဆိ၀ဲဒီးကျိဖးဒိၣ်, ဒြိအဃိ ပယီၤသုးတကပၤဘၣ်ဒိဘၣ်ထံးကအိၣ်လၢအဂၤ(၁၀)ခိၣ်ဃၢၤညါအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤ စံး၀ဲန့ၣ်လီၤ.
“ပနၢ်ဟူတၢ်ကစီၣ်န့ၣ်ပှၤတဲလၢပယီၤသုးတကပၤန့ၣ်အဘၣ်ဒိကအိၣ်လၢအဂၤ(၁၀)ခိၣ်ဃၢၤညါ.မ့မ့ၢ်လၢအသံပှဲၤဂၤလဲၣ်ခီန့ၣ် တသ့ၣ်ညါဘၣ်. ပှၤလၢအဘၣ်ဒိတဖၣ်န့ၣ်ပယီၤသုးတီၣ်ထီၣ်၀ဲလၢသိလ့ၣ်ပူၤအခါန့ၣ်ပှၤထံၣ်ထွဲအခံအိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
လၢန့ၣ်အမဲၥ်ညါတၢ်လဲၤခးပယီၤသုးကလၢၤခံဖျၢၣ်အံၤ၀ံၤတနံၤဃီအတီၢ်ပူၤပယီၤသုးက့ၤခးလီၤကဒါကျိဖးဒိၣ်(၃၅)ဖျၢၣ်ဃၣ်ဃၣ်ဆူ မိၣ်ကမီၣ်သ၀ီ, ခရၢၢ်,အခဲၤ,သိခွး,၀့ကး,ကၠီၣ်ပိၤကၠံ,၀ါဒးကွ့ ,ယ့ၤကၠီၤသ၀ီပူၤသ၀ီချၢအဃိ ကမျၢၢ်ဘၣ်ဒိ၀ဲဒၣ်တဂၤဒီး ဟံၣ်တၢ်သူၣ်ထီၣ်, တၢ်ထူၣ်တၢ်ဘိစ့ၢ်ကီးဟးဂီၤအိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
တကးဒံးဘၣ်ဖဲမဟါလါအီးကထိဘၢၣ် ၁ သီအနံၤစ့ၢ်ကီး ပယီၤသုးတဒူၣ်ဃီ၀ဲအံၤခးလီၤကဒီးကျိဖးဒိၣ်(၄)ဖျၢၣ် လီၤတဲၥ်ပိၢ်ဖးထီၣ်၀ဲလၢမဲးရူၢ်ခံ(မဲယိကၠံ)သ၀ီတၢ်သွၣ်ခိၣ်ကပိၤကပၤဒီးဘၣ်ဆၣ်ခီဖျိကျိဖးဒိၣ်အံၤလီၤတဲၥ်လၢသ၀ီဃၢၤ အဃိ တၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
ပယီၤသုးကလၢၤခံဖျၢၣ်လၢအခးလီၤကျိဖးဒိၣ်ခဲအံၤတဖၣ် အပူၤကွံၥ်တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ညီနုၢ်န့ၣ်ခးလီၤ၀ဲကျိဖးဒိၣ်ဆူဒူသ၀ီပူၤအိၣ်၀ဲတလီၢ်လီၢ်အဃိကမျၢၢ်သံဘၣ်ဒိဘၣ်ထံးကဲထီၣ်သးအိၣ်၀ဲခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
သ့ၤစ့ၤယၣ်အမျိၥ်သုး(၃၁၀)ဒီး(ခမရ-၂၀၇)အံၤ အပူၤကွံၥ်သုးရ့ၣ်တဘ့ၣ်စုၥ်စုၥ်န့ၣ်ပှၤနီၣ်ဂံၢ်ကအိၣ်ထဲ(၃၀)ခိၣ်ဃၢၤလီၤဒီး ဘၣ်ဆၣ်စးထီၣ်ဖဲသုးကီၣ်ကးထုးထီၣ်တၢ်ကလုၢ်လၢတၢ်ကဘၣ်ကဲသုး၀ံၤလီၢ်ခံတကီၢ်ခါခဲအံၤ သုးရ့ၣ်တရ့ၣ်စုၥ်စုၥ်န့ၣ် ပှၤနီၣ်ဂံၢ်ကအိၣ်လၢ(၇၀)ခိၣ်ဃၢၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတယးကွၢ်စံး၀ဲန့ၣ်လီၤ.
တကီၢ်ခါခဲအံၤဒ်လီၢ်က၀ီၤကမျၢၢ်စံး၀ဲအသိးန့ၣ် လၢကၠဲးထိၣ်-မိၣ်ပလ့ၤကျဲမုၢ်ဒီတကျိၤန့ၣ် ပယီၤသုးဆီလီၤမၤအါထီၣ်၀ဲ တၢ်ဘံၣ်တၢ်ဘၢ,အိၣ်ခိးခူသူၣ်တၢ်လၢကျဲကပၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
