လါအီးကထိဘၢၣ် ၂၅ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်,ဆီထံးကီၢ်ဆၣ်ဟီၣ်ကဝီၤဖဲအပူၤကွံၥ်လါအီးကထိဘၢၣ်အသီ(၂၀)အနံၤန့ၣ်ခီဖျိ လၢပယီၤသုးကီၣ်ကးဟူးဂဲၤခးလီၤကျိဖးဒိၣ်အဃိဘၣ်ဒိဝဲလီၢ်ကဝီၤကမျၢၢ်ပှၤဒီဖိပၢ်(၃)ဂၤအဂ့ၢ်ခ့ၣ်အဲၣ်ယူၣ်တၢ်ကစီၣ်ထုးထီၣ်ပၥ်ဖျါဝဲဖဲမဟါအနံၤလါအီးကထိဘၢၣ်(၂၄)သီအနံၤန့ၣ်လီၤ.
ပယီၤသုးကီၣ်ကးခီၣ်ချ့သုးရ့ၣ်(ခမရ-၃၄၀)အံၤခးလီၤကျိဖးဒိၣ်(၈၁-မၣ်မၣ်)ဆူဆီထံးကီၢ်ဆၣ်,ကွ့ဆ့ၣ်သဝီအပူၤအဃိလီၤ တဲၥ်ပိၢ်ဖးထီၣ်ဘၣ်ဒိဝဲပှၤဒီဖိပၢ်(၃)ဂၤလၢအမ့ၢ်,ပၢ်(အူခၠံၣ်ကိဝဲ)သးနံၣ်(၃၃)နံၣ်,အဖိ(မီၤသံၤဟၣ်ထဲၣ်ပဲၤ)အနံၣ်(၁၀)ဒီး(မၣ်ဆၢၤယတံမ့)သးနံၣ်(၁)နံၣ်ဒီး(၈)လါသ့ၣ်တဖၣ်အံၤအဂ့ၢ်န့ၣ်ဆီထံးကီၢ်ဆၣ်အပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်စ့ၢ်ကီး န့ၣ်လီၤ.
တကီၢ်ခါခဲအံၤပှၤဒီဖိပၢ်သၢဂၤလၢအဘၣ်ဒိဒီးပယီၤသုးကျိဖးဒိၣ်သ့ၣ်တဖၣ်အံၤန့ၣ်အိၣ်ဝဲလၢတၢ်ဆါဟံၣ်ဒီးဟံးန့ၢ်တၢ်ကူဆါယါဘျါသးအဂ့ၢ်န့ၣ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
လၢန့ၣ်အမဲၥ်ညါလၢဆီထံးကီၢ်ဆၣ်ဟီၣ်ကဝီၤပရဲလိၥ်ကျိအမုၢ်ထီၣ်,မုၢ်နုၥ်ဒူသဝီတၢ်လီၢ်သ့ၣ်တဖၣ်အပူၤန့ၣ်ခီဖျိလၢပယီၤသုးကီၣ်ကးဟူးဂဲၤခးလီၤဝဲကျိဖးဒိၣ်ဒီးသူဝဲတၢ်ဟဲတ့ၢ်လီၤဒြိမ့ၣ်ပိၢ်သ့ၣ်တဖၣ်အဃိပှၤဒူဖိသဝီဖိသ့ၣ်တဖၣ်ဘၣ်အိၣ်ဘၣ်ဆိးလၢတၢ်ပျံၤတၢ်ဖုး,တၢ်ပလီၢ်ပဒီသးအဂ့ၢ်န့ၣ်ဆီထံးအပှၤဘၣ်မူဘၣ်ဒါတဂၤစံးဝဲဒၣ်ဒ်အံၤန့ၣ်လီၤ.
“အခဲအံၤတၢ်အိၣ်သးလၢဆီထံးကီၢ်ဆၣ်ပရဲလိၥ်ကျိမုၢ်ထီၣ်တၢ်လီၢ်ဒ်အမ့ၢ်(အီကလါ,ကိကါ,ဒီၣ်ခီၣ်,ထမယိယွၤဟီ,သဆ့ၣ်ယွၤမၣ်,သဲၣ်ကဲၤကိ,သဲၣ်တူကိ,ညီၤအဲၤ,ဝဲၤကၠိ,ညီၤပ့ၣ်အ့ယွၤ-(၁)ဒီး(၂),စၣ်စူၣ်,စၣ်ဖဲ,ကဆ့ပ့ၤ,ကၠီၣ်ပိၤစ့ၣ်)ဒီးမ့မ့ၢ်လၢပရဲလိၥ်ကျိမုၢ်နုၥ်တ ကပၤန့ၣ်အိၣ်ဝဲသဝီ(မိခိၣ်,ထဲၣ်မိခိၣ်,အီၣ်မိခိၣ်,စွ့ၤကဲစူၣ်,အ့ပိၤဝၣ်,ယဲကၠဲၣ်,ဘိပဲစၣ်,ဘှ့ကိ,ကီၢ်မိၢ်သိၣ်,ခၠိၣ်အ့)ဒူသဝီသ့ၣ်တဖၣ်အံၤဘၣ်အိၣ်ဝဲလၢတၢ်ဘၣ်ယိၣ်ဘၣ်ဘှီထီဘိလီၤ. ပယီၤသုးလၢ(ခလရ-၂၆၄)ဒီးပယီၤသုးနီၣ်ဂံၢ်(၂၀)ခးလီၤဝဲတၢ်မီၤနီၤ. အဝဲသ့ၣ်အိၣ် ဟးတီဝဲအကျိဖးဒိၣ်လၢဟဲတီဝဲဒီးသိလ့ၣ်ဝံၤခးလီၤဝဲတၢ်မုၢ်နၤ,မုၢ်ဆါဒ်န့ၣ်လီၤ.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
အပူၤကွံၥ်ဖဲလါအီးကထိဘၢၣ်(၁၁)သီအနံၤန့ၣ်စ့ၢ်ကီးခီဖျိလၢပယီၤသုးကီၣ်ကးခီၣ်သုးရ့ၣ်ခလရ-၂၀,ခလရ-၅၇ဒီးခီၣ်ချ့သုးရ့ၣ်ခမရ-၃၄၉,ခမရ-၃၅၀သုးပၥ်ဖှိၣ်သ့ၣ်တဖၣ်ခးလီၤကျိဖးဒိၣ်ဒီးလီၤတဲၥ်ပိၢ်ဖးထီၣ်ဝဲလၢ(ညီၣ်ပ့ၤကၠံ)သဝီပူၤအဃိဘၣ်ဒိဝဲပှၤဒီဖိမိၢ်ခံဂၤအဂ့ၢ် န့ၣ်ခ့ၣ်အဲၣ်ယူၣ်ပၥ်ဖျါတ့ၢ်ဃၥ်ဝဲဖဲလါအီးကထိဘၢၣ်(၁၅)သီအနံၤန့ၣ်လီၤ.
ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်မူကီၢ်ဆၣ်,ဆီံထံးကီၢ်ဆၣ်ဒီးလၢၢ်ဒိၣ်ကီၢ်ဆၣ်သ့ၣ်တဖၣ်အပူၤပယီၤသုးကီၣ်ကးအံၤတၢ်ဒုးတၢ်ယၤကဲထီၣ်အသးတအိၣ်ဘၣ်သနါက့ဟူးဂဲၤဟဲတ့ၢ်လီၤဝဲဒြိမ့ၣ်ပိၢ်သ့ၣ်တဖၣ်ဒီးခးလီၤဝဲကျိဖးဒိၣ်သ့ၣ်တဖၣ်ဆူဒူသဝီကမျၢၢ်တၢ်အိၣ်တၢ်ဆိးလီၢ်ကျဲပူၤအိၣ်ဝဲခဲအံၤခဲအံၤအမဲၥ်ညါကမျၢၢ်တၢ်သူၣ်ထီၣ်ဒ်အမ့ၢ်ကၠိ,ကသံၣ်ဒၢး,တၢ်ဘူၣ်တၢ်ဘါအလီၢ်သ့ၣ်တဖၣ်ဘၣ်ဟးဂီၤကွံၥ်စ့ၢ်ကီးအဂ့ၢ်သ့ၣ်ညါဘၣ်လၢလီၢ်ကဝီၤပှၤဟ့ၣ်တၢ်ကစီၣ်ဖိသ့ၣ်တဖၣ်အအိၣ်န့ၣ်လီၤ.
