လါစဲးပထ့ဘၢၣ် ၁၁သီ, ၂၀၂၄နံၣ်, ခ့ၣ်အဲးစံၣ်,
ရၤမတံကီးတရံးအ့ရှၢၣ်ကျဲမုၢ်အလီၢ်,တၢ်သူက့ၤဝဲလၢတီနီၢ်ကစၢၢ်ကျဲလီၢ်လံၤဒီးတၢ်ဟးထီၣ်က့ၤလီၤကျဲဒီတဘိအပူၤဖီၣ်စုကဝဲၤကရူၢ်ကရၢတြဲၤတၢ်ခိးအလီၢ်တဖၣ်ထၢဝဲခိသွဲလၢသိလ့ၣ်ပှၤတီတၢ်ဖိတၢ်လံၤဖိတဖၣ်အအိၣ်အါထီၣ်ဝဲအဂ့ၢ်,သိလ့ၣ်ကစၢ်တဖၣ်စံးဝဲန့ၣ်လီၤ.
ကီၢ်ကၠီၣ်တဲၣ်ကီၢ်ပယီၤကီၢ်ဆၢ,ထံကီၢ်(၂)ဘ့ၣ်အဘၢၣ်စၢၤတၢ်ဝံၥ်စိၥ်တီဆှၢပနံၥ်ဖီကၤတၢ်ဟးထီၣ်က့ၤလီၤကညီကဘှါဝဲအဂီၢ်,တၢ်အိးထီၣ်ဝဲအ့ရှၢၣ်ကျဲမုၢ်အိၣ်ဝဲဘၣ်ဆၣ်ခီဖျိတၢ်ဒုးတၢ်ယၤဆူၣ်အဃိအ့ရှၢၣ်ကျဲအံၤတၢ်ကးတံၥ်ကွံၥ်ဝဲန့ၢ်လၢ(၁)နံၣ်ဘျဲၣ်ဃၣ်ဃၣ်လံဒီး,တၢ်ကးတံၥ်ကွံၥ်ကျဲအံၤအလီၢ်ခံ,ကီၢ်ပူၤဒီးကီၢ်ဆၢရၤမတံဝ့ၢ်အဘၢၣ်စၢၤပှၤနီသိလ့ၣ်ဖိလၢအတီပနံၥ်တၢ်ကၤဒီးပှၤဟးထီၣ်က့ၤလီၤဖိတဖၣ်ဘၣ်သူက့ၤဝဲဒၣ်ကျဲလီၢ်လံၤဒီးပှၢ်ပူၤကျဲတဖၣ်န့ၣ်လီၤ.
ဒီးကျဲလီၢ်လံၤလၢကမျၢၢ်လ့ၢ်ထီၣ်လ့ၢ်လိၤဝဲအံၤ,သုးကီၣ်ကးအမဲၥ်ညါဖီၣ်စုကဝဲၤကရူၢ်ကရၢတၢ်အိၣ်ခိးတြဲၤတဖၣ်ထၢဝဲကျဲတၢ်ခိတၢ်သွဲအလဲလၢသိလ့ၣ်ကစၢ်တဖၣ်အအိၣ်အါထီၣ်ဝဲကွ့ၢ်ကွ့ၢ်အဂ့ၢ်,တန့ခၠါကမျၢၢ်လၢအတီဆှၢပနံၥ်တၢ်ဖိတၢ်လံၤပှၤနီသိလ့ၣ်ဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“စးထီၣ်ဖဲထီၣ်ကစၢၢ်တုၤဃီက့ၤလၢအဝဲတကပၤန့ၣ်ကလၢၥ်လၢတကလီၢ်ဘျဲၣ်လံ,အန့ၣ်ကါ(ဖိဝံ)လၢအတီတၢ်ဖိတၢ်လံၤတဖၣ်ဒံးလီၤ.မ့မ့ၢ်တီပှၤကညီသ့ၣ်တဖၣ်န့ၣ်ဒုကွၢ်ကျဲၤဝဲလၢပှၤနီၢ်ဂံၢ်နီၢ်ဒွးလီၤ.ဒီးမ့မ့ၢ်ကါဖးဒိၣ်(၆)ပၣ်တဖၣ်န့ၣ်ဒုတပၣ်န့ၣ်(၁)ကလီၢ်အဃိန့ၣ်,(၆)ပၣ်ဃုကလီၢ်လီၤ.အအံၤန့ၣ်အိၣ်ဒၣ်ထဲစးထီၣ်,ထီၣ်ကစၢၢ်တုၤလၢကစၢၢ်ခီၣ်ထံးဒံလီၤမီၤ.မ့ပၣ်ဃုၥ်ဒီးကျဲတၢ်ပၢၤခိၣ်ခဲလၢၥ်ခဲဆ့န့ၣ်ဒုမ့မ့ၢ်ပကါန့ၣ်စးထီၣ်လၢဟံၣ်တုၤလၢရၤမတံန့ၣ်လၢၥ်လၢ(၂)ကလီၢ်ဃၣ်ဃၣ်လံ,အန့ၣ်ထဲအလဲၤတခါဒံးလီၤ.အက့ၤတပၣ်ဒံးဘၣ်,ကျဲနါက့ဖးနးညါ,တၢ်လီၤဘၣ်ယိၣ်အိၣ်ဒိၣ်မး”အဂ့ၢ်,စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ကီၢ်ကၠီၣ်တဲၣ်ကီၢ်ပယီၤကီၢ်ဆၢတၢ်စိၥ်ဆှၢပနံၥ်ဖီကၤကျဲလၢဃိၣ်သၢဖျၢၣ်ဝ့ၢ်တကပၤအံၤသနါက့,သိလ့ၣ်တၢ်ဟးထီၣ်က့ၤလီၤအါဝဲအဃိ,ပနံၥ်လၢတၢ်ကစိၥ်ဆှၢဝဲဆူရၤမတံဝ့ၢ်တဖၣ်အလဲစ့ၢ်ကီးတဒ်သိးဝဲဒ်လၢညါဘၣ်ဒီးအါထီၣ်ဝဲအဖီခိၣ်,တၢ်ဘၣ်ဟ့ၣ်ဝဲကျဲခိသွဲဒီးတီဆှၢဝဲပနံၥ်အံၤတကြၢးကၢကီၣ်လိၥ်သးဘၣ်အဂ့ၢ်,အဝဲစံးဝဲန့ၣ်လီၤ.
အပူၤကွံၥ်လါစဲးပထ့ဘၢၣ်အပူၤတၢ်စူၤဒိၣ်ဒံးဝဲအဃိ,ကျဲတဖၣ်ဟးဂီၤဝဲဒီးထိၣ်ကီကိ,ကၠဲးအူၣ်တီၤဒီး(၁၀၁၈)ကျဲတဖၣ်အံၤတၢ်ဟးထီၣ်က့ၤဝဲတသ့လၢၤဘၣ်အဖီခိၣ်ကျဲလီၢ်လံၤအံၤမ့ၢ်ဝဲကျဲထဲတဘိလၢသိလ့ၣ်လ့ၢ်ထီၣ်လ့ၢ်လိၤအါဝဲဒၣ်န့ၣ်လီၤ.
ထိၣ်ကီးကိကျဲပှၢ်ကျဲအံၤဖီၣ်စုကဝဲၤကရူၢ်ကရၢ,တၢ်ခိးတြဲၤတဖၣ်ဃ့ဝဲကျဲခိသွဲအိၣ်ဝဲဘၣ်ဆၣ်တၢ်ဃ့ဝဲကျဲခိသွဲတအါန့ၢ်ဒံးကျဲလီၢ်လံၤဘၣ်အဃိ,မူခိၣ်ကလံၤသီၣ်ဂီၤမ့ဘၣ်ဘှီးဘၣ်ဒါထီၣ်ကဒါက့ၤန့ၣ်,ဒ်သိးတၢ်ဘၣ်ဟ့ၣ်ကျဲခိသွဲကကိညၢ်ထီၣ်အဂီၢ်,ပှၤနီသိလ့ၣ်ဖိတဖၣ်မုၢ်လၢ်ဝဲလၢကက့ၤသူဘၣ်ဝဲကျဲအံၤန့ၣ်လီၤ.
တကးဒံးဘၣ်,ဒ်သိးတၢ်ကဘှါရှဲဝဲတၢ်စိၥ်ဆှၢပနံၥ်ဖီကၤအကျဲတၢ်ဘၣ်တံၥ်တၥ်တၢ်ကီတၢ်ခဲအံၤအဂီၢ်,တၢ်ဆီၣ်သနံးဝဲဖီၣ်စုကဝဲၤကရူၢ်ကရၢလၢဟူးဂဲၤဖဲရၤမတံကီးတရံးဟီၣ်ကဝီၤတဖၣ်လၢကက့ၤအိးထီၣ်ဝဲအ့ရှၢၣ်ကျဲမုၢ်အံၤအိၣ်ဝဲအဂ့ၢ်,သ့ၣ်ညါဘၣ်လၢရၤမတံလီၢ်ကဝီၤဖိလၢအတီဆှၢပနံၥ်တၢ်ဖိတၢ်လံၤတဖၣ်အအိၣ်န့ၣ်လီၤ.
တကတီၢ်ဃီ,ဘၣ်ဃးဒီးကျဲအံၤအပူၤကွံၥ်လါစဲးပထ့ဘၢၣ်အပူၤ(ခ့ၣ်အဲၣ်ယူၣ်)ကညီဒီကလုၥ်စၢဖှိၣ်ကရၢ,ဃုၥ်ဒီးဖီၣ်စုကဝဲၤကရူၢ်ကရၢလၢအဂၤတဖၣ်မၤဝဲတၢ်ထံၣ်လိၥ်တဲသကိးအိၣ်ဝဲဘၣ်ဆၣ်,လၢတၢ်ကအိးထီၣ်ဝဲအ့ရှၢၣ်ကျဲမုၢ်အံၤအဂီၢ်တၢ်ရဲၣ်တၢ်ကျဲၤတအိၣ်ဒံးဝဲဘၣ်အဂ့ၢ်,ပှၤဘၣ်မူဘၣ်ဒါလၢအပၣ်ဃုၥ်ပၣ်ဂီၢ်လၢတၢ်အိၣ်ဖှိၣ်တၢၣ်ပီၣ်တဲသကိးတၢ်အပူၤတဂၤစံးဝဲန့ၣ်လီၤ.
ဒ်အန့ၣ်အသိး,ဖီၣ်စုကဝဲၤကရူၢ်ကရၢဟူးဂဲၤဆီလီၤသးအိၣ်ခိးတၢ်ဘံၣ်တၢ်ဘၢတၢ်လီၢ်,ကျဲတြဲၤတၢ်အိၣ်ခိးတဖၣ်အပူၤဘၣ်ဃးဒီးတၢ်ထၢဝဲခိသွဲအါတလၢအဖီခိၣ်,(ခ့ၣ်အဲၣ်ယူၣ်)ပှၤဘၣ်မူဘၣ်ဒါတဖၣ်ဃုထံၣ်သ့ၣ်ညါဝဲဘၣ်ဆၣ်,လၢကရဲၣ်သဲကတီၤပၢြပးဝဲအဂီၢ်,မၤဝဲတန့ၢ်တသ့ဒံးဘၣ်အဂ့ၢ်သ့ၣ်ညါဘၣ်ဒ်ခ့ၣ်အဲၣ်ယူၣ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
