လါအီးကထိဘၢၣ် ၃ သီ, ၂၀၂၄ နံၣ်, ခ့ၣ်အဲးစံၣ်
သုးကီၣ်ကးအံၤလၢကမၤတၢ်ဃုထၢအဂီၢ် ကမၤ၀ဲတၢ်ထၢကမျၢၢ်ဟံၣ်ခိၣ်စရီတၢ်ရဲၣ်တၢ်ကျဲၤအဖီခိၣ်အံၤ ကမျၢၢ်ထံဖိကီၢ်ဖိတဖၣ် တဘၣ်မၤပၣ်ဃုၥ်ပၣ်ဂီၢ်သးလၢသုးကီၣ်ကးအတၢ်ရဲၣ်တၢ်ကျဲၤပူၤအံၤဘၣ်အဂ့ၢ်န့ၣ် ကၠဲးထိၣ်တၢ်ပၢၢ်ဆၢကရူၢ် (KRF)ထုးထီၣ် ဟ့ၣ်ပလီၢ်၀ဲဖဲလါအီးကထိဘၢၣ် ၁ သီအနံၤန့ၣ်လီၤ.
သုးကီၣ်ကးအတၢ်မၤတၢ်ထၢဟံၣ်ခိၣ်စရီအံၤအတၢ်ပညိၣ်အိၣ်လၢကမၤ၀ဲတၢ်ဃုထၢအဂီၢ်လီၤဒီးတၢ်ဃုထၢလၢသုးမီၤစရိၤကမၤ ၀ဲအံၤန့ၣ်လ့ၤတက့ၤကၠဲးထိၣ်တၢ်ပၢၢ်ဆၢကရူၢ်(KRF)တတူၢ်လိၥ်၀ဲဘၣ်အဃိတၢ်တဘၣ်ဟ့ၣ်ဂံၢ်ဟ့ၣ်ဘါဆီၣ်ထွဲမၤစၢၤနုၥ်လီၤ ပၣ်ဃုၥ်ပၣ်ဂီၢ်လၢသုးကီၣ်ကးအတၢ်ထၢဟံၣ်ခိၣ်စရီတၢ်ရဲၣ်တၢ်ကျဲၤအပူၤဘၣ်အဂ့ၢ်န့ၣ် (Kyaikhto Revolution Force-KRF) အလံၥ်တၢ်ပၥ်ဖျါအပူၤစံး၀ဲန့ၣ်လီၤ.
ဒ်(KRF)လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် သုးကီၣ်ကးလၢအမၤသံမၤ၀ီ,မၤတရီတပါကမျၢၢ်ထံဖိကီၢ်ဖိ, တကးဒံးဘၣ် သူ၀ဲကဘီယူၤ,ကျိဖးဒိၣ်ခးလီၤ၀ဲတၢ်လၢကၠိ,တၢ်ဘူၣ်တၢ်ဘါတၢ်သူၣ်ထီၣ်,ဟံးန့ၢ်ဆူၣ်၀ဲကမျၢၢ်တၢ်ဖိတၢ်လံၤ တၢ်သ့ၣ်တဖၣ်အံၤ မၤကမၣ်၀ဲဒုးယၤကွီၢ်မ့ၣ်ဖျိဖျိဖျါဖျါအသိးတၢ်ဃုထၢလၢအကမၤ၀ဲအံၤမ့ၢ်ဒၣ်လၢအကဒုးထီထီၣ်သုးမီၤစိရိၤအသးသမူဒီး ကဟ့ၣ် တၢ်ဒီသဒၢလၢအ၀ဲသ့ၣ်မုၢ်ကျိၤ၀ဲၤကွၥ်တၢ်ဖံးတၢ်မၤအဂီၢ်လီၤအဂ့ၢ်န့ၣ် KRF စံး၀ဲန့ၣ်လီၤ.
လၢတၢ်န့ၣ်အဃိဒ်သိးတၢ်ဃုထၢလၢသုးကီၣ်ကးကမၤ၀ဲအံၤကဟးဂီၤအဂီၢ်န့ၣ် ကမျၢၢ်တဖၣ်ကဟ့ၣ်သုးကီၣ်ကးတၢ်ဂ့ၢ်တၢ်ကျိၤ လၢအကမၣ်,တဘၣ်ဟ့ၣ်လီတဲစိနီၣ်ဂံၢ်လိၤလိၤဘၣ်(မ့မ့ၢ်တခီ)ကဟ့ၣ်လီတဲစိနီၣ်ဂံၢ်လၢအကမၣ်သ့ၣ်တဖၣ်အဂ့ၢ်န့ၣ် (KRF)ဃ့ကညး၀ဲကမျၢၢ်ထံဖိကီၢ်ဖိသ့ၣ်တဖၣ်န့ၣ်လီၤ.
ဖဲအပူၤကွံၥ်(၂၀၂၀)လါနိၣ်၀့ဘၢၣ်အခါန့ၣ် ကီၢ်ပယီၤဒီတဘ့ၣ်အပူၤတၢ်မၤ၀ဲတၢ်ဟ့ၣ်တၢ်ဖးဒီးတၢ်ဃုထၢထီၣ်ပဒိၣ်လၢအသီ ဘၣ်ဆၣ် ခီဖျိသုးကီၣ်ကးအံၤတတူၢ်လိၥ်၀ဲဘၣ်အဃိ ဖဲ(၂၀၂၁)နံၣ် လါဖ့ၤဘြူၤအါရံၤ ၁ သီအနံၤန့ၣ် ဟံဆူၣ်န့ၢ်၀ဲထံကီၢ်တၢ်စိ တၢ်ကမီၤဒီးခဲအံၤဂုၥ်ကျဲးစၢးမၤကဒါ၀ဲတၢ်ဃုထၢအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဘၣ်ဃးသုးကီၣ်ကးကမၤ၀ဲတၢ်ထၢဟံၣ်ခိၣ်စရီတၢ်ရဲၣ်တၢ်ကျဲၤအံၤအဖီခိၣ်န့ၣ် ထံရူၢ်ကီၢ်သဲးကရူၢ်ကရၢဒီး ကလုၥ်ဒူၣ်ဖီၣ်စုက၀ဲၤကရူၢ်ကရၢလၢအထီဒါသုးကီၣ်ကးတဖၣ်တတူၢ်လိၥ်၀ဲဘၣ်အဃိ တၢ်ထုးထီၣ်ဘိးဘၣ်ရၤလီၤဟ့ၣ်ပလီၢ်၀ဲ ကမျၢၢ်ထံဖိ ကီၢ်ဖိလၢတဘၣ်ပၣ်ဃုၥ်ပၣ်ဂီၢ်လၢတၢ်ရဲၣ်တၢ်ကျဲၤအံၤအပူၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးကီၣ်ကးဘိးဘၣ်ရၤလီၤလၢကမၤတၢ်ထၢဟံၣ်ခိၣ်နီၣ်ဂံၢ်စရီ၀ံၤလီၢ်ခံတကီၢ်ခါခဲအံၤစးထီၣ်ဖဲလါအီးကထိဘၢၣ် ၁ သီန့ၣ် လၢခူပူၤ၀့ၢ်ပူၤ,က၀ီၤဒ့,ဒူသ၀ီတၢ်လီၢ်အါတီၤအပူၤ သုးကီၣ်ကးအပှၤစးထီၣ်လူၤထၢ၀ဲဟံၣ်ခိၣ်စရီလံဒီးဒ်န့ၣ်အသိး တၢ်ထၢဟံၣ်ခိၣ်စရီဘျီ၀ဲအံၤသုးကီၣ်ကးကမၤ၀ဲလၢ(၁၅)သီအတီၢ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
