လါအီးကထိဘၢၣ် ၁၁ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ကီၢ်ဆၣ်အိၣ်(၅)ဘ့ၣ်အကျါ မီၤစကိၤကီၢ်ဆၣ်ပူၤ သုးကီၣ်ကးအတၢ် ဟးထၢဟံၣ်ခိၣ်စရီန့ၢ်၀ဲအမျးကယၤပှဲၤပှဲၤဘၣ်ဆၣ် မ့မ့ၢ်ကီၢ်ဆၣ်အဂၤလၢခ့ၣ်အဲၣ်ယူၣ်ဆီလီၤတၢ်ပၢတၢ်ြပးန့ၢ်သ့ၣ်တဖၣ်န့ၣ် ထၢ၀ဲဟံၣ်ခိၣ်စရီတန့ၢ်ဘၣ်အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
ဒူသထူၣ်ကီၢ်ရ့ၣ်ပူၤ လီၤဆီဒၣ်တၢ် မီၤကိၤကီၢ်ဆၣ်အံၤ သုးကီၣ်နုၥ်လီၤထၢ၀ဲဟံၣ်ခိၣ်စရီလၢဒူသ၀ီကိးဖျၢၣ်ဒဲးအပူၤန့ၢ်၀ဲဒီး ဘၣ်ဆၣ်မ့မ့ၢ်လၢကၠဲးထိၣ်,ဘံလ့,ဖၣ်အၣ်,သထူၣ်ကီၢ်ဆၣ်ဒူသ၀ီတကပၤန့ၣ် ခီဖျိခ့ၣ်အဲၣ်ယူၣ်ပၢဆှၢ၀ဲန့ၢ်အဃိ တၢ်ဟဲထၢဟံၣ်ခိၣ် စရီတအိၣ်၀ဲဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤ.
အ၀ဲစံး၀ဲလၢ“မီၤစကိၤကီၢ်ဆၣ်ပူၤန့ၣ်(ခ့ၣ်အဲၣ်ယူၣ်)တၢ်ပၢတၢ်ြပးအိၣ်ဘၣ်ဆၣ်တၢ်ပၢဆှၢရဲၣ်ကျဲၤအီၤတန့ၢ်လၢလၢပှဲၤပှဲၤ ဒံးဘၣ်. အဃိတၢ်လီၢ်ဖဲကျဲမုၢ်အခိၣ်အဃၢၤန့ၣ်တၢ်ထၢဖးဖီမုၢ်စရီတုၤသ၀ီကိးဖျၢၣ်ဒဲးလီၤ.မ့မ့ၢ်တၢ်လီၢ်လၢခ့ၣ်အဲၣ်ယူၣ်ပၥ်လီၤတၢ်ပၢတၢ်ြပးန့ၢ်တဖၣ်န့ၣ်သုးကီၣ်ကးဟးထၢဟံၣ်ခိၣ်စရီတအိၣ်နီတဖျၢၣ်ဘၣ်.ဒ်သိး၀့ၢ်တကူၣ်-မီၣ်လမၠဲၣ်ကျဲမုၢ်ဆၢလၥ်တကပၤန့ၣ် အထၢ၀ဲ အိၣ်.ဒီးလၢဘံလ့ကီၢ်ဆၣ်န့ၣ်ထၢ၀ဲဖဲဘံလ့၀့ၢ်က၀ီၤဒ့တဖၣ်လီၤ. မ့မ့ၢ်လၢဒူသ၀ီကရူၢ်န့ၣ်ထၢ၀ဲသ၀ီတအိၣ်နီတဖျၢၣ်ဘၣ်. သထူၣ်နါက့ဒ်န့ၣ်လီၤထၢ၀ဲဖဲ၀့ၢ်ပူၤက၀ီၤဒ့ပူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါအီးကထိဘၢၣ် ၁၁ သီ အနံၤန့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် ကၠဲးထိၣ်ဆၣ်ပူၤ ဒူသ၀ီအိၣ်(၁၁၀)ဖျၢၣ်,ဘံလ့ကီၢ်ဆၣ် သ၀ီအိၣ်(၈၄)ဖျၢၣ်, ဖၣ်အၣ်ကီၢ်ဆၣ် သ၀ီအိၣ်(၉၁)ဖျၢၣ်, သထူၣ်ကီၢ်ဆၣ် သ၀ီအိၣ်(၈၁)ဖျၢၣ်ဒီး လီၤဆီဒၣ်တၢ်ဒူသ၀ီလၢအိၣ်မီၤစကိၤကီၢ်ဆၣ်ပူၤ တဖၣ်တၢ်လဲၤထၢဟံၣ်ခိၣ်စရီန့ၢ်၀ဲကိးဖျၢၣ်ဒဲးအသိး ဖၣ်အၣ်ကီၢ်ဆၣ်စ့ၢ်ကီးသုးကီၣ်ကးဟးထၢ၀ဲဟံၣ်ခိၣ်စရီန့ၢ်၀ဲဒၣ်ထဲ သ၀ီ(၄)ဖျၢၣ်လီၤ အဂ့ၢ်န့ၣ် သ့ၣ်ညါဘၣ်န့ၣ်လီၤ
ဘၣ်ဃးကီၢ်ဆၣ်(၄)ဘ့ၣ်လၢအတပၣ်ဃုၥ်မီၤစကိၤကီၢ်ဆၣ်အံၤဘၣ်န့ၣ် ဘၣ်မနုၤအဃိလၢသုးကီၣ်ကးအတၢ်လဲၤထၢ ဖးဖီမုၢ်စရီတန့ၢ်ဘၣ်အဂ့ၢ်ဒ်လဲၣ်န့ၣ် ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ ဆှဲပၠး၀ဲဒ်အံၤန့ၣ်လီၤ.
“ကီၢ်ဆၣ်လွံၢ်ဘ့ၣ်အံၤတၢ်ထၢဖးဖီမုၢ်စရီတမ့ၢ်ဘၣ်စံးတၢ်န့ၣ်မ့ၢ်ဒၣ်လၢသုးကီၣ်ကးအံၤပၥ်လီၤ၀ဲဒၣ်အကရူၢ်ခိၣ်သးပှၢ်တအိၣ်လၢၤ ဘၣ်မီၤနီၤ.စးထီၣ်လၢအ၀ဲသ့ၣ်ဟံဆူၣ်တၢ်စိတၢ်ကမီၤ၀ံၤန့ၣ်ကဆဲးပၥ်လီၤ၀ဲတၢ်ပၢတၢ်ြပးန့ၣ်ပၥ်လီၤ၀ဲတန့ၢ်လၢၤဘၣ်,အတၢ်ပၢ တၢ်ြပးစ့ၢ်ကီးဟူးဂဲၤ၀ဲတန့ၢ်လၢၤဘၣ်.အဃိခဲအံၤန့ၣ်အိၣ်က့ၤထဲလၢပခ့ၣ်အဲၣ်ယူၣ်အတၢ်ပၢတၢ်ြပးတၢ်ဟူးတၢ်ဂဲၤတဖၣ်လီၤ.အဃိဘၣ်ဃးအတၢ်ဟးထၢဖးဖီမုၢ်စရီအံၤန့ၣ်အ၀ဲသ့ၣ်ထၢ၀ဲတန့ၢ်မၤ၀ဲတန့ၢ်လၢၤဘၣ်မီၤနီၤ.ဘၣ်ဃးလၢစုက၀ဲၤတၢ်သဘံၣ်သဘုၣ်စ့ၢ်ကီးအိၣ်စ့ၢ်အဃိအ၀ဲသ့ၣ်ဟဲထၢ၀ဲတဘူၣ်လၢၤဘၣ်န့ၣ်ပတဲသ့လီၤ.အဃိအ၀ဲသ့ၣ်နါက့အတၢ်ပၢတၢ်ြပးတၢ်ဟူးတၢ်ဂဲၤတအိၣ်လၢၤဘၣ်အဃိတဟဲထၢလၢၤ၀ဲဘၣ်”အဂ့ၢ်န့ၣ် စံး၀ဲန့ၣ်လီၤ.
ဒူသထူၣ်ကီၢ်ရ့ၣ်ပူၤ အပူၤကွံၥ်(၂၀၁၄)နံၣ်တၢ်မၤတၢ်ထၢဖးဖီမုၢ်စရီအခါန့ၣ် ဆၢကတီၢ်ဖဲန့ၣ်ခီဖျိတၢ်အိၣ်သးတမ့ၢ်ဒ်တကီၢ်ခါ ခဲအံၤဘၣ်အဃိ တၢ်ဟဲထၢဟံၣ်ခိၣ်စရီလၢဒူသ၀ီကိးဖျၢၣ်ဒဲးအပူၤအိၣ်၀ဲဘၣ်ဆၣ် သုးဟံန့ၢ်တၢ်စိတၢ်ကမီၤ၀ံၤလီၢ်ခံ မ့ၢ်လၢ ခံခီခံကပၤတၢ်မၤသကိးတအိၣ်လၢၤဘၣ်အဃိအ၀ဲသ့ၣ်ဟးထၢဟံၣ်ခိၣ်စရီတန့ၢ်၀ဲလၢၤဘၣ်ကဲထီၣ်သးဒ်အံၤလီၤအဂ့ၢ်န့ၣ် ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ စံးအါထီၣ်၀ဲန့ၣ်လီၤ.
“ဖဲန့ၣ်အခါဒုအ၀ဲသ့ၣ်ဟဲထၢစရီန့ၢ်ခဲလၢၥ်လီၤ.အခါဖဲန့ၣ်ခီဒုတၢ်မၤတၢ်ပတုၥ်တၢ်ဒုးတၢ်ယၤဆၢကတီၢ်အဃိအ၀ဲသ့ၣ်ပၥ်ဖှိၣ်မၤသကိး တၢ်ဒီးပကရူၢ်သ့ၣ်တဖၣ်အိၣ်အဃိထၢဟံန့ၢ်၀ဲဖးဖီမုၢ်စရီန့ၢ်၀ဲလီၤ.ခဲအံၤဘျီအ၀ဲသ့ၣ်တၢ်ပၢတၢ်ြပးဟူးဂဲၤတအိၣ်လၢၤ,ကဟဲမၤသကိးတၢ်ဒီးပှၤစ့ၢ်ကီးမၤသကိးတၢ်တသ့လၢၤဘၣ်.မ့မၤသကိးစ့ၢ်ကီးလၢပ၀ဲဒၣ်တကပၤပတတူၢ်လိၥ်အတၢ်ပၢတၢ်ြပးဘၣ်အဃိဘၣ်ဃးတၢ်ထၢဖးဖီမုၢ်စရီန့ၣ်ဖဲပကီၢ်ရ့ၣ်ဟီၣ်က၀ီၤပူၤကီၢ်ဆၣ်ဒုးအိၣ်ထီၣ်ကရူၢ်တဖၣ်န့ၣ်အ၀ဲသ့ၣ်ထၢဟံန့ၢ်စရီတန့ၢ်လၢၤ၀ဲဘၣ်မီၤနီၤ”
ကီၢ်ပယီၤထံကီၢ်ဒီတဘ့ၣ်အပူၤ စးထီၣ်ဖဲတလါအံၤလါအီးကထိဘၢၣ် ၁ သီတုၤ ၁၅ သီန့ၣ် သုးကီၣ်ကးမၤ၀ဲတၢ်ထၢဖးဖီမုၢ်စရီဒီး လၢတၢ်ရဲၣ်တၢ်ကျဲၤဘျီ၀ဲအံၤအဖီခိၣ်ကမျၢၢ်ထံဖိကီၢ်ဖိတဘၣ်နုၥ်လီၤပၣ်ဃုၥ်ပၣ်ဂီၢ်ဘၣ်,ပှၤလၢအနုၥ်လီၤမၤစၢၤဟ့ၣ်ဂံၢ်ဟ့ၣ်ဘါ ဆီၣ်ထွဲသုးကီၣ်ကးလၢတၢ်ထၢဟံၣ်ခိၣ်စရီတၢ်ရဲၣ်တၢ်ကျဲၤအပူၤတဖၣ်စ့ၢ်ကီးကဟံ၀ဲအရ့အဂ့ၢ်န့ၣ် ဖီၣ်စုက၀ဲၤကရူၢ်ကရၢလၢ အထီဒါသုးကီၣ်ကးတဖၣ်ထုးထီၣ်ပၥ်ဖျါ၀ဲလံၥ်တၢ်ပၥ်သးအိၣ်၀ဲန့ၣ်လီၤ.
