လါအီးကထိဘၢၣ် ၉ သီ, ၂၀၂၄ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် ဒူသ၀ီတနီၤအပူၤ လၢသုးကီၣ်ကးအတၢ်ဟးထၢဖးဖီမုၢ်စရီအဖီခိၣ်အံၤ ခီဖျိဒူသ၀ီပှၤဘၣ်မူဘၣ်ဒီးကမျၢၢ်တနီၤတတူၢ်လိၥ်၀ဲဘၣ်အဃိဟးပလဲၥ်သးလၢတၢ်လီၢ်အဂၤအိၣ်၀ဲအဂ့ၢ်န့ၣ် လီၢ်က၀ီၤဂံၢ်ခီၣ်ထံးပှၤဟ့ၣ်တၢ်ကစီၣ်ဖိ စံး၀ဲန့ၣ်လီၤ.
ဖၣ်အၣ်ကီၢ်ဆၣ်ပူၤ စးထီၣ်ဖဲလါအီးကထိဘၢၣ် ၁ သီအံၤ သုးကီၣ်ကးနုၥ်လီၤထၢ၀ဲဖးဖီမုၢ်စရီလၢ ဒူသ၀ီစှၤကိၥ်ဖျၢၣ်အပူၤဒီး ခီဖျိတၢ်ထၢဖးဖီမုၢ်စရီဘျီ၀ဲအံၤလီၢ်က၀ီၤပှၤဘၣ်မူဘၣ်ဒါ,ကမျၢၢ်တနီၤတတူၢ်လိၥ်၀ဲဘၣ်အဃိ အ၀ဲသ့ၣ်ဘၣ်ဟးပလဲၥ်အသးကဲထီၣ် ၀ဲဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲန့ၣ်တဖၣ်စံး၀ဲန့ၣ်လီၤ.
သုးကီၣ်ကးအတၢ်ဟးထၢဖးဖီမုၢ်စရီဘျီ၀ဲအံၤမ့မ့ၢ်လၢမဲၢ်ကရီသ၀ီတကပၤန့ၣ်သုးကီၣ်ကးအပှၤတဟဲလၢအနီၢ်ကစၢ်ဘၣ်ဒီး မ့မ့ၢ်တခီကိးမၢ၀ဲဒၣ်ဒူပူၤသ၀ီပူၤကၠိသရၣ်/မုၣ်တဖၣ်လၢကထၢ၀ဲဒၣ်ဖးဖီမုၢ်စရီအိၣ်ဘၣ်ဆၣ် မ့ၢ်လၢကၠိသရၣ်တနီၤတအဲၣ်ဒိး မၤပၣ်ဃုၥ်ပၣ်ဂီၢ်သးဘၣ်အဃိဟးပလဲၥ်သးအိၣ်၀ဲဒီးလၢတၢ်တသ့တဘၣ်ဘၣ်အဖီခိၣ်ဘၣ်မၤထွဲ၀ဲဒ်န့ၣ်စ့ၢ်ကီးအိၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ
ဘၣ်ဃးတၢ်ဂ့ၢ်အံၤန့ၣ်လီၢ်က၀ီၤကမျၢၢ်လၢတအဲၣ်ဒိးပၥ်ဖျါအမံၤတဂၤစံး၀ဲလၢ“မ့မ့ၢ်လၢသူၣ်က့သးပှၢ်သ၀ီသးပှၢ်တဖၣ်န့ၣ်ဒုပယီၤမၢန့ၢ်ဆူၣ်အီၤလီၤ.တမ့ၢ်လၢအသးအိၣ်မၤ၀ဲဘၣ်.အ၀ဲသ့ၣ်ဟးထၢဖးဖီမုၢ်စရီခဲအံၤန့ၣ်လၢစရီတကပၤန့ၣ်ကိး၀ဲအါလၢကၠိသရၣ်မီၤနီၤ.ယနၢ်ဟူလၢကၠိသရၣ်န့ၣ်တမၤ၀ဲဘၣ်ဟးစံၣ်ပလဲၥ်သးအိၣ်ဒီဒူၣ်ညါ.မ့၀ံၤဖဲပှၤဟးထၢဖးဖီမုၢ်စရီအဆၢကတီၢ်န့ၣ်ပှၤသ၀ီဖိတနီၤနီၤန့ၣ်တဒိးကွဲးသးဘၣ်ဟးစံၣ်ပလဲၥ်သးလဲၤထီၣ်အိၣ်လၢထးတတီၤန့ၣ်အိၣ်၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖၣ်အၣ်ကီၢ်ဆၣ်ပူၤ တကီၢ်ခါခဲအံၤသုးကီၣ်ကးဟးထၢဖးဖီမုၢ်စရီအိၣ်ဒံးဒၣ်ထဲသ၀ီ(၄)ဖျၢၣ်လီၤဒီး ဒ်န့ၣ်အသိးဖဲတၢ်ဟးထၢဖးဖီမုၢ်စရီအခါန့ၣ်ပယီၤသုး,ပၢၤကီၢ်သုးဟံန့ၢ်၀ဲတၢ်ဘံၣ်တၢ်ဘၢအဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤ န့ၣ်လီၤ.
“နိၣ်ချံးသ၀ီန့ၣ်သုးကီၣ်ကးဟဲထၢဖးဖီမုၢ်စရီစးထီၣ်လၢအီးကထိဘၢၣ် ၁ သီတုၤ ၅ သီ ထၢ၀ဲ၀ံၤလီၤ. လၢဘူၣ်ကတံၥ်သ၀ီ, ခဲတီၣ်သ၀ီတဖၣ်န့ၣ်ထၢ၀ဲ၀ံၤလၢၤစ့ၢ်လံ.မ့မ့ၢ်လၢမဲၢ်ကရီခီန့ၣ်အတၢ်က၀ံၤတနံၤညါအံၤမီၤနီၤ.ဟဲထၢ၀ဲအခါန့ၣ်တၢ်ဟံန့ၢ်၀ဲတၢ်ဘံၣ်တၢ်ဘၢလၢပယီၤသုးဒီးပၢၤကီၢ်သုးလီၤ.မ့မ့ၢ်လၢမဲၢ်ကရီတကပၤခီန့ၣ်မၢ၀ဲဒၣ်ကၠိသရၣ်တဖၣ်န့ၣ်ကွဲးန့ၢ်အီၤဒ်န့ၣ်လီၤ.အကစၢ်န့ၣ်တဟဲထီၣ်နီတဂၤဘၣ်.မ့၀ံၤလီၤလၢလၥ်လၢဘူၣ်ကတံၥ်ဒီးခဲတီၣ်သ၀ီန့ၣ်အ၀ဲသ့ၣ်ဟဲထီၣ်၀ဲဒီးပယီၤသုး,ပၢၤကီၢ်သုးဘျီကွဲး၀ဲဖဲန့ၣ်.ဖၣ်အၣ်ကီၢ်ဆၣ်ပူၤန့ၣ်သုးကီၣ်ကး နုၥ်လီၤထၢ၀ဲသ၀ီ(၄)ဖျၢၣ်အံၤလီၤ.လၢအဂၤန့ၣ်နုၥ်လီၤထၢ၀ဲတအိၣ်ဘၣ်.”အဂ့ၢ်န့ၣ် စံး၀ဲန့ၣ်လီၤ
လၢန့ၣ်အမဲၥ်ညါသုးကီၣ်ကးအတၢ်ဟးထၢဖးဖီမုၢ်စရီဘျီ၀ဲအံၤအပူၤန့ၣ်စ့ၢ်ကီး ဟီၣ်က၀ီၤသုးခိးကီၢ်ဆၢ(BGF) ဒီး ဘူးဒးတၢ်ဘါတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA)သုးခိၣ်ဘိၤဘံၣ်အပှၤဟံန့ၢ်၀ဲတၢ်ဘံၣ်တၢ်ဘၢအိၣ်အဂ့ၢ်န့ၣ် လီၢ်က၀ီၤကမျၢၢ် စံး၀ဲအိၣ်န့ၣ်လီၤ
