လါအီးကထိဘၢၣ် ၁၈ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီးကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်အပူၤ ဖဲမဟါလါအီးကထိဘၢၣ် ၁၇ သီ အနံၤ န့ၣ် (KNLA)သုးပၥ်ဖှိၣ်ထီၣ်မၤန့ၢ်၀ဲလ့က့ၣ်ကိၥ်(စွဲၤတီၤကိ)အမျိၥ်သုးကလၢၤအံၤဒီး ဖဲန့ၣ်တၢ်မၤန့ၢ်ဃုၥ်၀ဲကျိချံ ပှၥ်သၣ် အါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
(စွဲၤတီၤကိ)အမျိၥ်သုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ လ့က့ၣ်ကိၥ်၀့ၢ်သီကပၤအံၤ ဖဲမဟါ လါအီးကထိဘၢၣ် ၁၇ သီ ဂီၤခီ ၄း၃၀ အဆၢကတီၢ်န့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), ကညီဒီကလုၥ်ဂၢၤသးကရၢ (KNDO)ဒီးသုးပၥ်ဖှိၣ်တဖၣ်ထီၣ်န့ၢ်၀ဲကွံၥ်၀ဲဒီး လၢတၢ်ထီၣ်န့ၢ်သုးကလၢၤဘျီ၀ဲအံၤအပူၤတၢ်မၤန့ၢ်ဃုၥ်၀ဲကျိဖးဒိၣ်,ကျိဖိ, ကျိချံ ပှၥ်သၣ်အါအါဂီၢ်ဂီၢ်ဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်လံၥ်တၢ်ပၥ်ဖျါအပူၤစံး၀ဲန့ၣ်လီၤ.
ဒ်လံၥ်တၢ်ပၥ်ဖျါပူၤပၥ်ဖျါ၀ဲအသိးတၢ်ထီၣ်န့ၢ်(စွဲၤတီၤကိ)အမျိၥ်သုးကလၢၤပူၤတၢ်မၤန့ၢ်၀ဲ (၁၂၀ မမ)အပျီ ၂ ခိၣ်,(၁၂၀ မမ)အပျီ အခံပၣ် (၂)ခါ,(၁၂၀ မမ)အခီၣ် ၃ ခါ, (၁၂၀ မမ)အသၣ် ၂၄ ဖျၢၣ်,(MA-1)ကျိ ၁၆ ခိၣ်,(MA-3)ကျိ ၃ ခိၣ်,(၆၀ မမ)ကျိ တခိၣ်, (RPG-7) တခိၣ်, (ပွဲး ၅)အချံ ၁၀၀၀ ဖျၢၣ်, (၆၀ မမ)အသၣ် ၃၆ ဖျၢၣ်, (MA)အချံ (၅.၅၆) ၂၀၀၀ ဖျၢၣ်ခိၣ်ဃၢၤ, စဲးလးနၤတိၤချံ ၁၅၀၀ ဖျၢၣ်ခိၣ်ဃၢၤ, မ့ၣ်ပိၢ်(၁၀)ဖျၢၣ် ဃုၥ်ဒီးကျိချံပှၥ်သၣ်အကလုၥ်လၢအဂၤတဖၣ်တၢ်မၤန့ၢ်ဃုၥ်၀ဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ဒုးဘျီ၀ဲအံၤအပူၤတၢ်မၤန့ၢ်ကျိချံပှၥ်သၣ်အမဲၥ်ညါတၢ်ဖီၣ်သမူန့ၢ်ဒုၣ်ဒါအိၣ်ဘၣ်ဆၣ်မ့မ့ၢ်လၢခံခီခံကပၤတၢ်သံတၢ်ဘၣ်ဒိဘၣ်ထံး တၢ်အိၣ်သးခီန့ၣ်(ခ့ၣ်အဲၣ်ယူၣ်)လံၥ်တၢ်ပၥ်ဖျါအပူၤပၥ်ဖျါဃၥ်၀ဲတအိၣ်ဘၣ်န့ၣ်လီၤ.
လၢန့ၣ်အမဲၥ်ညါလၢတၢ်ကထီၣ်န့ၢ်(စွဲၤတီၤကိ)အမျိၥ်သုးကလၢၤအံၤအဂီၢ်န့ၣ် (KNLA)သုးပၥ်ဖှိၣ်ထီၣ်က၀ီၤခး,မၤတဲၥ်ကွံၥ် တၢ်အီၣ်တၢ်အီကျိၤတၢ်ဆၢကတီၢ်ယံၤ၀ဲလၢ(၇)လါဃၣ်ဃၣ်ညါဒီး သုးကလၢၤအံၤအပူၤန့ၣ်သုးနီၣ်ဂံၢ်ကအိၣ်လၢအဂၤ(၁၀၀) ဃၣ်ဃၣ်အဂ့ၢ်န့ၣ် (Cobra)သုးကျိၤ သုးခိၣ်စီၤကီၢ် စံး၀ဲန့ၣ်လီၤ.
“ပထီၣ်သုးကလၢၤတဖျၢၣ်အံၤကန့ၢ်အဂီၢ်န့ၣ်ပတၢ်ဆၢကတီၢ်ဒုလၢၥ်ဖးအါညါ.တၢ်လၢၤဘူၣ်လၢၤစ့တၢ်ကီတၢ်ခဲဒုအိၣ်အါမးဘၣ်မနုၤလဲၣ်အ၀ဲသ့ၣ်န့ၣ်အိၣ်တၢ်လီၢ်ဘၣ်ဒီးပဘၣ်လဲၤထီၣ်ကွၢ်ကဒါအမဲၥ်ဒ်န့ၣ်အဃိနးတစဲးဖိ.အဂံၢ်ဘါန့ၣ်ပတယးကွၢ်န့ၣ်ကအိၣ်လၢ (၁၀၅)ဂၤညါမီၤနီၤ.သနါက့ဒ်လဲၣ်ဂ့ၤသုးမုၢ်သံၣ်ဘိသူၣ်ဆူၣ်သးဂဲၤအဖီခိၣ်န့ၣ်ပမၤတုၤလၢပတၢ်ပညိၣ်လၢၤပှဲၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါလါစဲးပထ့ဘၢၣ် ၁၇ သီအနံၤန့ၣ်လီၤ.
လ့က့ၣ်ကိၥ်(စွဲၤတီၤကိ)အမျိၥ်သုးကလၢၤအံၤ စးထီၣ်ဟဲအိၣ်ဆီလီၤအသးဖဲ(၂၀၀၃)နံၣ်အခါဒီး ဒ်န့ၣ်အသိးဖဲ(၂၀၂၁) သုးဟံန့ၢ် တၢ်စိတၢ်ကမီၤ၀ံၤန့ၣ် သုးကီၣ်ကးအသုးတြိၤ(၂၂),သုးတြိၤ(၄၄)သ့ၣ်တဖၣ်ဟဲဆီလီၤသးဟူးဂဲၤ၀ဲဒၣ်ဒီး ဒ်န့ၣ်အသိးစးထီၣ်တၢ်ဒုး ကဲထီၣ်လၢလ့က့ၣ်ကိၥ်၀့ၢ်သီအခါန့ၣ်သုးကလၢၤအံၤခးလီၤ၀ဲကျိဖးဒိၣ်ဆူမၠၣ်၀တံၣ်,ဖလူလီၢ်က၀ီၤဒူသ၀ီသ့ၣ်တဖၣ်အပူၤ တလီၢ်လီၢ် အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤ.
