လါအီးကထိဘၢၣ် ၂၂သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်၀တံၣ်၀့ၢ်ဃၢၤ လ့က့ၣ်ကိၥ်ဟီၣ်က၀ီၤ အပူၤ (စွဲၤတီၤကိ)အမျိၥ်သုးကလၢၤလီၤလံဘၣ်ဆၣ်ခီဖျိတၢ်ဘၣ်ယိၣ်အိၣ်ဒံးအဃိတၢ်မၤဆှဲလဲမ့ၣ်ပိၢ်၀ံၤမးတၢ်ကပျဲက့ၤအိၣ် ပှၤကမျၢၢ်တဖၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဖဲလါအီးကထိဘၢၣ် ၁၇ သီ အနံၤန့ၣ် (KNLA)သုးပၥ်ဖှိၣ်ထီၣ်မၤန့ၢ်ကွံၥ်၀ဲ လ့က့ၣ်ကိၥ်(စွဲၤတီၤကိ)အမျိၥ်သုးကလၢၤအံၤလံအဃိ ကမျၢၢ်တဖၣ်သူၣ်ခုသးခုလၢကက့ၤအိၣ်ဘၣ်လၢအကစၢ်တၢ်လီၢ်တၢ်ကျဲအသိးတၢ်ရဲၣ်တၢ်ကျဲၤအိၣ်စ့ၢ်ကီးလၢတၢ်ကက့ၤဆီလီၤပၥ်လီၤက့ၤအ၀ဲသ့ဘၣ်ဆၣ် ခီဖျိဟီၣ်လၥ်မ့ၣ်ပိၢ်,ကျိဖးဒိၣ်လၢအလီၤတဲၥ်တပိၢ်ဖးထီၣ်ဒံးဘၣ်အိၣ်အဃိ တၢ်မၤဆှဲလဲအီၤမ့၀ံၤမး ကပျဲက့ၤအိၣ်ကမျၢၢ်အဂ့ၢ်န့ၣ် ကီးတရံးကီၢ်ဆၣ်ခိၣ် စီၤဖၣ်ထယါ စံး၀ဲန့ၣ်လီၤ.
“ပဟးထီၣ်ဘၣ်လၢလ့က့ၣ်ကိၥ်လၢ(၂၀၂၁)လါဒံၣ်စ့ဘၢၣ်အခါလံမီၤနီၤ.ဘူးကပှဲၤသၢနံၣ်လံ.ခဲအံၤခီဖျိလၢ(စွဲၤတီၤကိ)သုးကလၢၤ ဖျိးကွံၥ်လံအဃိခါဆူညါပနၥ်လၢဒူဖိသ၀ီဖိသ့ၣ်တဖၣ်ကက့ၤမၤပျီမၤကဆှဲကဆှီက့ၤအဟံၣ်,မ့တမၤပျီဘၣ်ဒုတယီၤညါအံၤမ့ၣ်အူအီၣ်လၢၤလီၤ.ပမ့ဘၣ်ကွၢ်န့ၣ်ခဲအံၤဒူဖိသ၀ီဖိသးခုစ့ၢ်မီၤနီၤ.ဒ်သိးကက့ၤအိၣ်ဘၣ်အဂီၢ်ပကရဲၣ်ကကျဲၤဘၣ်မနုၤလဲၣ်န့ၣ်ဟီၣ်လၥ်မ့ၣ်ပိၢ်မ့ၢ်ဂ့ၤ,ကျိချံပှၥ်သၣ်လၢအတပိၢ်ထီၣ်ဒံးဘၣ်သ့ၣ်တဖၣ်န့ၣ်ပကဘၣ်တၢၣ်ပီၣ်ဒီးသုးမုၢ်ဒိၣ်,ပဆှဲပျီအီၤ၀ံၤမးပကက့ၤပၤနုၥ်လီၤအိၣ်ကမျၢၢ်ဒ်န့ၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
(၂၀၂၁)သုးဟံန့ၢ်တၢ်စိတၢ်ကမီၤ၀ံၤလီၢ်ခံ ဖဲလါဒံၣ်စ့ဘၢၣ်အခါန့ၣ်တၢ်ဒုးကဲထီၣ်၀ဲလၢလ့က့ၣ်ကိၥ်ဟီၣ်က၀ီၤအပူၤဒီး လၢန့ၣ်အမဲၥ်ညါ ခီဖျိလၢ(စွဲၤတီကိ)အမျိၥ်သုးကလၢၤလၢအိၣ်ဘူးဖဲလ့က့ၣ်ကိၥ်ကပၤအံၤခးလီၤ၀ဲကျိဖးဒိၣ်အဃိ ကမျၢၢ်လၢအိၣ်ဘူးဖဲန့ၣ်တဖၣ်ဘၣ်ဃ့ၢ်ထီၣ်လဲၤစံၣ်အိၣ်၀ဲလၢတၢ်လီၢ်အဂၤအဂ့ၢ်န့ၣ် ကီးတရံးကီၢ်ဆၣ်ခိၣ် စံးအါထီၣ်၀ဲန့ၣ်လီၤ.
“သုးကလၢၤတဖျၢၣ်အံၤဆီလီၤသးလၢ(၂၀၀၃)အခါလံ.ကျိဖးလူၢ်တဖျၢၣ်အံၤခးလီၤကျိဖးဒိၣ်တုၤဃီၤ၀ဲဒၣ်ဆူကၠီးခဲးတဖၣ်. အပူၤကွံၥ်မဟိတၢ်ဒုးကဲထီၣ်လၢ(မၠ့ၣ်တၤလ့မၠဲၤ)အခါစ့ၢ်ကီးန့ၣ်အါဒၣ်တက့ၢ်ကျိဖးဒိၣ်န့ၣ်ဟးထီၣ်အါကတၢၢ်ဖဲန့ၣ်လီၤ. မ့၀ံၤဒူဖိ သ၀ီဖိလၢအဘူးတဖၣ်လၢအမ့ၢ်လ့က့ၣ်ကိၥ်,ထံမဲး၀ါခံ,တလးအ့းသံးဖၠၣ်ဒူသ၀ီတဖၣ်န့ၣ်အိၣ်၀ဲတဘူၣ်လၢၤဘၣ်. ဘၣ်မနုၤအဃိ လဲၣ်န့ၣ်ခီဖျိသုးကလၢၤတဖျၢၣ်အံၤခးလီၤကျိဖးဒိၣ်အဃိကဲထီၣ်တၢ်တံၥ်တၥ်လၢဒူဖိသ၀ီဖိဖံးအီၣ်မၤအီၣ်ဂီၢ်ဖးဒိၣ်ညါလီၤ” အဂ့ၢ်န့ၣ် စံး၀ဲန့ၣ်လီၤ.
ခီဖျိတၢ်ဒုးတၢ်ယၤဒီးကျိဖးဒိၣ်အံၤအဃိလ့က့ၣ်ကိၥ်၀့ၢ်သီဃုၥ်ဒီးယသ့ၣ်ကူၤ,မဲၢ်ကနဲ,ထံမူထၣ်, မဲး၀ါခံသ၀ီဖိတဖၣ် ဘၣ်ဃ့ၢ်ထီၣ်လဲၤစံၣ်အိၣ်ကဒုသးဆူကီၢ်ကၠီၣ်တဲၣ်-ကီၢ်ပယီၤကီၢ်ဆၢ သ့ၣ်ဘီဘိ,ဖလူသ၀ီတကပၤဒီး တုၤလၢခဲအံၤလီၢ်က၀ီၤ ပှၤဃ့ၢ်တၢ်ဒုးဖိတဖၣ်တက့ၤဘၣ်ဒံးလၢအဟံၣ်အဃီဘၣ်အိၣ်ဒံး၀ဲဖဲလီၢ်အိၣ်ကဒုလီၢ်အဖၢမုၢ်အဂ့ၢ်န့ၣ် သ့ၣ်ညါဘၣ်လီၤ.
လၢန့ၣ်အမဲၥ်ညါလ့က့ၣ်ကိၥ်အမျိၥ်သုးကလၢၤလီၤလံဘၣ်ဆၣ်လၢပှၤလီၢ်အိၣ်ကမှံဖိကက့ၤအိၣ်ဆီလီၤသးအဂီၢ် တဘၣ်ယိၣ်ဘၣ်ဘှီအိၣ်ဒံး၀ဲလၢကဘီယူၤတကပၤအဂ့ၢ်န့ၣ် သ့ၣ်ဘီဘိသ၀ီသးပှၢ် စီၤလါဒိၣ် လၢအကွၢ်ထွဲပှၤလီၢ်အိၣ်ကမှံဖိအံၤ စ့ၢ်ကီး၀ဲန့ၣ်လီၤ.
“မ့မ့ၢ်ဒ်သိးလ့က့ၣ်ကိၥ်န့ၣ်တၢ်လီၢ်ဒုလီၤလံဘၣ်ဆၣ်လၢကက့ၤဆ့ၣ်နီၤခီဒုန့ၣ်ယဆိမိၣ်ခဲအံၤပှၤက့ၤအိၣ်တသ့ဒံးဘၣ်.ဘၣ်မနုၤ အဃိလဲၣ်န့ၣ်ခဲအံၤကဲထီၣ်သးကိၢ်ကိၢ်လၢၤလၢၤဒံးအဃိလၢကဘီယူၤတကပၤန့ၣ်ဘၣ်ပျံၤအလီၢ်အိၣ်ဒံးမီၤနီၤ.ယဆိမိၣ်တလါခံလါဒုအဆၢကထီၣ်တခါခါဧါသၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးတကီၢ်ခါခဲအံၤလ့က့ၣ်ကိၥ်အမျိၥ်သုးကလၢၤလီၤလံဒီးကမျၢၢ်က့ၤအိၣ်လၢအဟံၣ်အဃီသ့လံဘၣ်ဆၣ် ဘၣ်ဃးလၢ တၢ်က့ၤဆီလီၤပၥ်လီၤက့ၤကမျၢၢ်တကပၤန့ၣ်ပၢြပးပှၤဘၣ်မူဘၣ်ဒါကဟံဖီၣ်ထီၣ်က့ၤမူဒါအဂ့ၢ်န့ၣ် KNLA ပှၤဘၣ်မူဘၣ်ဒါ စံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်ဖဲအပူၤကွံၥ်စှၤသီအခါန့ၣ်လီၤ.
