လါအီးကထိဘၢၣ် ၂သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်အပူၤ,သုးကီၣ်ကးအသုးကျိၤလၢဟဲထီၣ်မၤစၢၤနိၣ်ခၠိနဲၣ်ဒုးယၤသုးကလၢၤ(၁၀)ဂၤ,ဃ့ၢ်ဖျိးထီၣ်ကွံၥ်ဝဲဆူ(KNLA)ကညီတၢ်ထူၣ်ဖျဲးသုးမုၢ်ဒိၣ်အစုပူၤအိၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
အပူၤကွံၥ်လါစဲးပထ့ဘၢၣ်လီၢ်ခံကတၢၢ်တနွံအပူၤ,မီၣ်လမၠဲၣ်ခီၣ်ချ့သုးရ့ၣ်ခမရ(၉၀၄)ပယီၤအပှၤသုးဖိလၢဟဲထီၣ်မၤစၢၤနိၣ်ခၠိနဲၣ်ဒုးယၤသုးကလၢၤတဖၣ်အံၤ,စံၣ်ဖျိးထီၣ်ကွံၥ်ဝဲလၢအသုးကျိၤပူၤဒီးလဲၤဃ့ၢ်နုၥ်ဝဲဆူ(KNLA)သုးရ့ၣ်(၁၆)အစုပူၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ပယီၤသုးလၢအဟဲထီၣ်လူၤက့ၤအပှၤ(စစ်ကူ)တဒူၣ်န့ၣ်ဟဲစံၣ်ဖျိးဝဲခဲအံၤခဲလၢၥ်အဂၤ(၁၀)န့ၣ်လီၤ.အဝဲသ့ၣ်စံၣ်ထီၣ်ဝဲလၢအသုးကျိၤပူၤဝံၤလဲၤစံၣ်ဝဲဆူ(ပယီၤဟဲ)သဝီခိၣ်ဃၢၤတၢ်လီၢ်တဖၣ်အပူၤဝံၤတုၤဆိဝဲလၢသုးရ့ၣ်(၁၆)အပူၤအဃိ,ခဲအံၤအိၣ်ဝဲလၢသုးရ့ၣ်(၁၆)အစုပူၤဒီးတၢ်ပၥ်အီၤလၢတၢ်ဘံၣ်တၢ်ဘၢအိၣ်အလီၢ်အမဲၥ်ညါ,ကွၢ်ထွဲအီၤလၢတၢ်အီၣ်တၢ်အီတၢ်အိၣ်တၢ်ဆိးကိးကပၤဒဲးအဂ့ၢ်”စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ပယီၤသုးလၢဟဲထီၣ်မၤစၢၤအပှၤ(စစ်ကူ)တဖၣ်အံၤဒ်တၢ်သမံသမိးဝဲအဝဲသ့ၣ်တဖၣ်အိၣ်ဝဲအဖီခိၣ်ဒီးတနီၤအဲၣ်ဒိးပၥ်ဖှိၣ်မၤသကိးတၢ်ဒီးတၢ်ပၢၢ်ဆၢသုးပၥ်ဖှိၣ်လၢတၢ်ထီဒါက့ၤသုးကီၣ်ကးအိၣ်ဝဲအသိး,တနီၤအဲၣ်ဒိးအိၣ်ဆိးက့ၤဒ်ကမျၢၢ်အိၣ်ဝဲဒၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ.
တကးဒံးဘၣ်,အပူၤကွံၥ်လါစဲးပထ့ဘၢၣ်အဆိကတၢၢ်တနွံအပူၤ,ပယီၤသုးလၢအိၣ်နိၣ်ခၠိနဲၣ်ဒုးယၤသုးကလၢၤအပူၤတဖၣ်စံၣ်ဖျိးထီၣ်ဝဲအိၣ်တနီၤအဃိ,တကီၢ်ခါခဲအံၤတၢ်ပၥ်အဝဲသ့ၣ်တပူၤဃီအိၣ်ဝဲအဂ့ၢ်,သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ.
တကတီၢ်ဃီ,သုးကီၣ်ကးအပှၤတဖၣ်အံၤ,အါတက့ၢ်မ့ၢ်ဝဲပှၤလၢအဘၣ်တၢ်ဖီၣ်မၢဆူၣ်အီၤလၢ“သုးကီၣ်ကးကမျၢၢ်တၢ်ဘၣ်ကဲသုးသဲစး”အဃိအဝဲသ့ၣ်တဖၣ်,ဒ်သိးကပူၤဖျဲးထီၣ်လၢသုးကီၣ်ကးအစုပူၤအဂီၢ်,ဂုၥ်ကျဲးစၢးဃုတ့ၢ်ဝဲကျဲအဘိဘိအိၣ်ဝဲအဂ့ၢ်,(၉၀၄)သုးရ့ၣ်ပယီၤသုးအပှၤလၢဃ့ၢ်နုၥ်ဆူ(KNLA)ကညီတၢ်ထူၣ်ဖျဲးသုးမုၢ်ဒိၣ်အစုပူၤတဂၤစံးဝဲဒၣ်န့ၣ်လီၤ.
ဒီးတကီၢ်ခါခဲအံၤခီဖျိအနီၢ်ကစၢ်ပူၤဖျဲးထီၣ်ကွံၥ်ဝဲလၢသုးကီၣ်ကးအစုပူၤလံအဃိသးခုဝဲဒီး,ဆီၣ်တခူထီၣ်ဝဲအသကိးတဖၣ်လၢကဂုၥ်ကျဲးစၢးဃ့ၢ်ပူၤဖျဲးထီၣ်အသးအဂ့ၢ်,အဝဲစံးဝဲဒ်အံၤန့ၣ်လီၤ.
အဝဲစံးဝဲလၢ“သုးကီၣ်ကးကမျၢၢ်တၢ်ဘၣ်ကဲသုးသဲစးန့ၣ်,ပတနုၥ်လီၤဘၣ်လ့ၤတက့ၤတန့ၢ်တသ့ဘၣ်အဃိ,ပဘၣ်နုၥ်လီၤတ့ၢ်လီၤ.ပနီၢ်ကစၢ်သးပတအဲၣ်ဒိးနုၥ်လီၤဘၣ်.ပှၤဒုးထီၣ်ပှၤတၢ်မၤလိဝံၤဆှၢဃီၤပှၤဆူမီၣ်လမၠဲၣ်အလီၢ်ခံ,ပှၤဆှၢကဒီးပှၤလၢတၢ်မဲၥ်ညါ,ပဘၣ်အိၣ်ဘၣ်အီၣ်ဖှီၣ်ဖှီၣ်နးနးသဂၢၢ်ဘၣ်တၢ်ကီတၢ်ခဲအါမးလီၤ.အခဲအံၤယဃ့ၢ်ပူၤဖျဲးထီၣ်ကွံၥ်ယသးလၢသုးကီၣ်ကးအစုပူၤန့ၣ်လံအဃိယသးခုဒိၣ်မးလီၤ.ပအိၣ်လၢန့ၣ်အဆၢကတီၢ်ပှၤတဲပျံၤတဲဖုးပှၤအမံၤမံၤဘၣ်ဆၣ်ပဟဲတုၤဖဲအံၤတကပၤပှၤတူၢ်လိၥ်ပှၤမုၥ်မုၥ်န့ၣ်လီၤ.အဃိန့ၣ်ယအဲၣ်ဒိးဆီၣ်တခူထီၣ်သကိးလၢအိၣ်လၢတ့ၢ်လၢ(၉၀၄)သုးရ့ၣ်,တဖၣ်လၢကဃ့ၢ်ပူၤဖျဲးအသးန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
အပူၤကွံၥ်လါစဲးပထ့ဘၢၣ်(၁၁)သီအနံၤအပူၤ,ပယီၤသုးလၢအိၣ်လိးရှါသုးကလၢၤအပူၤတဖၣ်ဟးထီၣ်ကွံၥ်ဝဲခဲလၢၥ်ဒီးက့ၤလီၤပၥ်ဖှိၣ်က့ၤဝဲအသးဆူ(တလၢၤကီၢ်စဲၣ်)စခါကၠံသုးကလၢၤဝံၤအလီၢ်ခံ,ဟဲထီၣ်ကဒီးဝဲလၢကလဲၤမၤစၢၤဝဲနိၣ်ခၠိနဲၣ်ဒုးယၤသုးကလၢၤအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,တကီၢ်ခါခဲအံၤပယီၤသုးလၢဟဲထီၣ်(စစ်ကူ)တဖၣ်အံၤအဂံၢ်ဘါအိၣ်ဝဲ(၂၀၀)ဘျဲၣ်ဒီးအိၣ်ဝဲဒၣ်ဖဲသရိၥ်ဝါကျဲခိၣ်ဃၢၤတၢ်လီၢ်တဖၣ်အပူၤအဂ့ၢ်,သ့ၣ်ညါဘၣ်ဒ်ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲအသိးန့ၣ်လီၤ.
