လါအီးကထိဘၢၣ် ၄သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ, သုးက့(၅),မုၢ်ြတီၢ်ကီၢ်ရ့ၣ်,လူၤသီကီၢ်ဆၣ်,စီၤမုၢ်ပျီဟီၣ်ကဝီၤ တၢ်ဒုးကဲထီၣ်ဝဲလၢ သုးက့(၅)ဂၢၤကီၢ်သုးဒ့(၁)ဒီးပယီၤသုးကီၣ်ကးအဘၢၣ်စၢၤ (၃)နၣ်ရံၣ်ဘျဲၣ်ဒီးပယီၤသုးသံအဂၤ(၃၀)အကျါပၣ်ဃုၥ် သုးရ့ၣ်ခိၣ်တဂၤဒီးသုးဒ့ခိၣ်(၂)ဂၤအဂ့ၢ် သ့ၣ်ညါဘၣ်လၢ ကီၢ်ရ့ၣ်အပှၤဘၣ်မူဘၣ်ဒါအိၣ်န့ၣ်လီၤ.
ဖဲအပူၤကွံၥ်လါစဲးပထ့ဘၢၣ် အသီ(၃၀)အနံၤန့ၣ် ပယီၤသုးကီၣ်ကးအပှၤလၢအိၣ် ဖါဂီၤလိ သ့ၣ်တဖၣ်ဆီတလဲအလီၢ်ဝံၤဒ်သိးကက့ၤလီၤဆူ ဖိဃ့ခိၣ်အဂီၢ် ဖဲတၢ်ဘၢၣ်စၢၤတုၤဖဲဒါဝါထၣ်တၢ်လီၢ်န့ၣ် သုးက့(၅)ဂၢၤကီၢ်သုးဒ့(၁)ခိးထုးအဝဲသ့ၣ်ဒီးမ့ၣ်ပိၢ်ဒီးခးအဝဲသ့ၣ်အဃိ ပယီၤသုးတကပၤသံဝဲဂၤ(၃၀)အဂ့ၢ် မုၢ်တြီၢ်ကီၢ်ရ့ၣ်အပှၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ဖဲလါစဲးပထ့ဘၢၣ် အသီ(၃၀)ဂီၤခီ (၆)နၣ်ရံၣ်တခီ တုၤ (၉)နၣ်ရံၣ်အဆၢကတီၢ်န့ၣ် ဖဲယီၤသုးလၢဖါဂီၤလိသ့ၣ်တဖၣ်ဆီတလဲအလီၢ်ဝံၤဒ်သိးကက့ၤလီၤဆူ ဖိဃ့ခိၣ်အဂီၢ် ဖဲကျဲဘၢၣ်စၢၤတုၤဖဲဒါဝါထၣ်တၢ်လီၢ်အဆၢကတီၢ် ပပှၤခိးခးအီၤ,ထုးဃုၥ်အီၤဒီးမ့ၣ်ပိၢ်အဃိသတးန့ၣ်, ဖဲန့ၣ်သံဝဲ ဒၣ်အသုးရ့ၣ်ခိၣ်(၁)ဂၤ, အသုးဒ့ခိၣ်(၂)ဂၤလၢတၢ်ဘၣ်ဒိဘၣ်ထံးခီန့ၣ်တသ့ၣ်ညါဘၣ်ဘၣ်, ဘၣ်ဆၣ်သနၥ်က့ကအိၣ်လီၤ.”အဂ့ၢ်ဝဲစံးဝဲဒၣ်န့ၣ်လီၤ.
လၢန့ၣ်အမဲၥ်ညါ ဖဲ(၃)နၣ်ရံၣ်ဘျဲၣ်တၢ်ဒုးဘျီဝဲန့ၣ်န့ၣ် သုးက့(၅)ဂၢၤကီၢ်သုးဒ့(၁)မၤန့ၢ်ဝဲ ပယီၤသုးတၢ်စုကဝဲၤအဒိၣ်,အဆံးခဲလၢၥ်(၃၅)ခိၣ်ဃုၥ်ဒီး တၢ်ဆဲးကျိးဆဲးဖးဒိၣ်ခံအဖျၢၣ်အဂ့ၢ်,ပယီၤသုးလၢဟဲက့ၤလီၤသ့ၣ်တဖၣ်န့ၣ်တၢ်တယးကွၢ်လၢအိၣ်အဂၤ(၄၀)ဘျဲၣ်ဒီးမ့ၢ်အဃ့ၢ်ဖျိးကွံၥ်ပှဲၤဂၤလဲၣ်န့ၣ်တၢ်တသ့ၣ်အီၤဘၣ်ဘၣ်ဆၣ်တၢ်ထံၣ်လၢမဲၥ်လၢအဃ့ၢ်ဖျိးန့ၣ်အိၣ်(၁)ဂၤအဂ့ၢ်သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်တဲအါထီၣ်ဝဲအသိး ပယီၤသုး အသုးရ့ၣ်ခိၣ်လၢအသံဃုၥ်ဒီးအပှၤသ့ၣ်တဖၣ်အံၤမ့ၢ်အသုးထံးဖဲလဲၣ်န့ၣ်တၢ်မၤလီၤတ့ၢ်အီၤတန့ၢ်ဒံးဘၣ်အဂ့ၢ်အဝဲတဲအါထီၣ်ဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိးလီၤ ခ့ၣ်အဲၣ်ယူၣ်,သုးက့(၅),မုၢ်တြီၢ်ကီၢ်ရ့ၣ်ဟီၣ်ကဝီၤ လါစဲးပထ့ဘၢၣ်(၁)သီတုၤအသီ(၃၀)အတီၢ်ပူၤ တၢ်ဒုးကဲထီၣ်ဝဲလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့(၅),သုးပၥ်ဖှိၣ်ဒီး ပယီၤသုးကီၣ်ကးအဘၢၣ်စၢၤခဲလၢၥ်အိၣ်ဝဲ (၁၄၄)ဘျီဒီး လၢတၢ်ဒုးကဲထီၣ်အဘျီ(၁၄၀)ဘျဲၣ်ဒ်န့ၣ်အဖီခိၣ် ပယီၤသုးသံ(၇၄)ဂၤဒီးဘၣ်ဒိဝဲ(၄၁)အဂ့ၢ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ပၥ်ဖျါဝဲလါအီးကထိဘၢၣ်(၃)သီအနံၤန့ၣ်လီၤ.
တကတီၢ်ဃီ ခီဖျိတၢ်ဒုးကဲထီၣ်လၢခံခီခံကပၤဒ်အံၤအဖီခိၣ် ပယီၤသုးသူဝဲကဘီယူၤလၢကဆှၢန့ၢ်အပှၤတၢ်အီၣ်အိၣ်ဝဲထီဘိအသိး ဟဲခးလီၤတၢ်ဒီးကဘီယူၤ,ခးတပျုၤတပျီၤကျိဖးဒိၣ်ခဲအံၤခဲအံၤအဃိ တလါအတီၢ်ပူၤ ဘၣ်သံ သုးက့(၅)ကမျၢၢ်(၅)ဂၤအဂ့ၢ် သ့ၣ်ညါဘၣ်ဒ် ခ့ၣ်အဲၣ်ယူၣ်တြီၢ်တၢ်ကစီၣ်ပၥ်ဖျါဝဲအသိးန့ၣ်လီၤ.
