လါအီးကထိဘၢၣ် ၁၀ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် နီဖးဒိၣ်ကရူၢ်အပူၤ စးထီၣ်လၢ(DKBA) ဟဲအိၣ်ဆီလီၤသးတ့ထီၣ်ဘှီထီၣ်တၢ်သူၣ်ထီၣ်လၢ၀ၣ်တရဲၢ်ကၠိမဲၥ်ညါန့ၣ်၀ံၤလီၢ်ခံန့ၣ် လီၢ်က၀ီၤသ၀ီဖိတဖၣ်ဘၣ်အိၣ်က့ၤလၢ တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီပူၤ အဂ့ၢ်န့ၣ် လီၢ်က၀ီၤကမျၢၢ်စံး၀ဲ အသိးသ့ၣ်ညါဘၣ်န့ၣ်လီၤ.
တကီၢ်ခါခဲအံၤ၀ၣ်တရဲၢ်တီၤထီကၠိမဲၥ်ညါလၢ(DKBA)အိၣ်ဆီလီၤသးအံၤန့ၣ် အပူၤကွံၥ်အိၣ်ဒၣ်ထဲ(DKBA)အပှၤလီၤ ဒီး ဘၣ်ဆၣ်ခဲအံၤဟဲအါထီၣ်လၢပယီၤသုးတကးဒံးဘၣ်လၢအ၀ဲသ့ၣ်တၢ်လီၢ်န့ၣ်(DKBA)သီခါနီၣ်တယၢ်အမဲၥ်ညါ အိၣ်အါထီၣ်၀ဲ လၢ(BGF)နီၣ်တယၢ်အဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပၥ်ဖျါအမံၤတဂၤ စံး၀ဲဒ်အံၤန့ၣ်လီၤ.
အ၀ဲစံး၀ဲလၢ“ ယလဲၤဖၠးလၢတၢ်မဲၥ်ညါန့ၣ်သီခါသုး(DKBA)န့ၣ်အိၣ်လၢအစှၤလီၤ.အိၣ်အါလၢပယီၤသုးလီၤ. ခဲအံၤလၢ (DKBA)ဆီလီၤသးတၢ်မဲၥ်ညါန့ၣ်ဘိးထီၣ်၀ဲဒၣ်နီၣ်တယၢ်ခံဘ့ၣ်(BGF)နီၣ်တယၢ်တဘ့ၣ်ဒီးသီခါအနီၣ်တယၢ်တဘ့ၣ်.” အဂ့ၢ်န့ၣ် စံး၀ဲန့ၣ်လီၤ.
လၢန့ၣ်အမဲၥ်ညါခီဖျိ(DKBA)တကပၤတၢ်ဟူးတၢ်ဂဲၤအိၣ်ဖျါထီၣ်ဒ်အံၤအဖီခိၣ် ကမျၢၢ်ဘၣ်ပျံၤဘၣ်ဖုးတၢ်အမဲၥ်ညါ ကၠိသရၣ်စ့ၢ်ကီး သိၣ်လိတၢ်တဘူၣ်လၢၤဘၣ်အိၣ်၀ဲအသိးကၠိဖိတနီၤဟးထီၣ်ကၠိလဲၤထီၣ်က့ၤကၠိလၢတၢ်လီၢ်အဂၤအိၣ်၀ဲအဂ့ၢ်န့ၣ် လီၢ်က၀ီၤကမျၢၢ် တဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
“ကၠိသရၣ်တဲ၀ဲလၢခဲအံၤအိၣ်အါထီၣ်ဒီးလၢပယီၤသုး,(BGF)ဒီးသီခါသုးအိၣ်ပၥ်ဖှိၣ်သးသၢဒူၣ်အဃိ သိၣ်လိပှၤဖိသၣ်လံၥ်တဘူၣ် လၢၤဘၣ်.ပှၤဆၢတဲၥ်လၢပှၤတဒုးထီၣ်ဖိသၣ်ကၠိလၢၤဘၣ်တဲ၀ဲဒ်န့ၣ်.မ့မ့ၢ်လၢယတခွါမုၣ်တဖၣ်န့ၣ်အမုဂါအိၣ်လၢပလဲခီၣ် သ၀ီအဃိ လဲၤထုးထီၣ်၀ဲဒၣ်(ကၠိလံၥ်ဟးထီၣ်)၀ံၤလဲၤဆှၢက့ၤ၀ဲလၢပလဲခီၣ်ကၠိတနီၤ.”အဂ့ၢ်န့ၣ် စံး၀ဲန့ၣ်လီၤ.
တချုး(DKBA)ဟဲအိၣ်ဆီလီၤသးလၢကၠိမဲၥ်ညါဒံးဘၣ်အခါန့ၣ်အတၢ်ဒုးသ့ၣ်ညါဆိခ့ၣ်အဲၣ်ယူၣ်လီၢ်က၀ီၤပှၤမူဘၣ်ဒါဒီးကမျၢၢ် တအိၣ်ဘၣ်ဒီးဒ်န့ၣ်အသိးတၢ်တတူၢ်လိၥ်စ့ၢ်ကီး၀ဲလၢကအိၣ်ဆီလီၤအသးအံၤဘၣ်န့ၣ်လီၤ.ဘၣ်ဆၣ်လၢအတၢ်ဟဲအိၣ်ဆီလီၤသး အဖီခိၣ်အံၤကမျၢၢ်တူၢ်လိၥ်ဂ့ၤတတူၢ်လိၥ်ဂ့ၤကဆဲးအိၣ်၀ဲလီၤအဂ့ၢ်န့ၣ် (DKBA)သုးခိၣ်ဘိၤဘံၣ်စံးလီၤဘၣ်ကမျၢၢ်ဖဲ အပူၤကွံၥ် လါစဲးပထ့ဘၢၣ်(၂၄)သီလၢတၢ်အိၣ်ဖှိၣ်အပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိဒ်သိး(DKBA)အံၤသုတဆဲးအိၣ်ဆီလီၤသးဖဲန့ၣ်တဂ့ၤအဂီၢ် ဖဲလါစဲးပထ့ဘၢၣ် ၂၉ သီအနံၤန့ၣ် (KNLA)သုးရ့ၣ် ၁ အပှၤလဲၤကွံၥ်၀ဲဒီးစုကွံၥ်မ့ၣ်ပိၢ်အဃိ (DKBA)တကပၤသံ(၁)ဂၤ,ဘၣ်ဒိ(၂)ဂၤဒီးဖဲန့ၣ် (DKBA)တကပၤစ့ၢ်ကီး ခးလီၤကဒါကျိဖးဒိၣ် (၄)ဖျၢၣ်ဆူ၀ၣ်တရဲၢ်သ၀ီအခိၣ်အဃၢၤကဲထီၣ်အသးဒံးအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဒ်န့ၣ်အသိးစးထီၣ်ဖဲ(DKBA)ဟဲအိၣ်ဆီလီၤသးဒီးတၢ်ဘၣ်ဂံၥ်ဂူၥ်ကဲထီၣ်၀ံၤလီၢ်ခံန့ၣ် ကမျၢၢ်တဖၣ်လၢမုၢ်နၤခီန့ၣ် ကတဲလီ(ဖိ)အဂီၢ် တၢ်ဘံၣ်တၢ်ဘၢတအိၣ်လၢၤဘၣ်ပျံၤဘၣ်ဖုးတၢ်ဒီးခဲအံၤကၠိစ့ၢ်ကီးထီၣ်က့ၤထဲဒၣ်လၢပှၤတီၤထီကၠိဖိလီၤအသိး ခါဆူညါတၢ်အိၣ်သး ကမၤသးဒ်လဲၣ်တသ့ၣ်ညါလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲန့ၣ်လီၤ.
“ပှၤကမျၢၢ်တဖၣ်န့ၣ်မုၢ်မ့ဟါန့ၣ်အ၀ဲသ့ၣ်တဲ(ဖိ)တဘူၣ်ဘၣ်.ခီဖျိပှၤဟးမံလၢအ၀ဲသ့ၣ်ဟံၣ်ဖီလၥ်အိၣ်အဃိမီၤနီၤ.ကၠိနါက့ၤခဲအံၤ ပှၤဟ့ၣ်ဒုးလဲၤက့ၤလၢပှၤတီၤထီတဖၣ်န့ၣ်လီၤ.မ့မ့ၢ်ပှၤဖိသၣ်န့ၣ်တပျဲလဲၤလၢၤဘၣ်.မ့မ့ၢ်ပှၤတီၤထီတဖၣ်န့ၣ်အဘၣ်ဒိးစဲးအိၣ်မီၤနီၤ. ခဲအံၤဘၣ်ပျံၤဘၣ်ဖုးတၢ်ဒိၣ်မးလီၤ.ပှၤကၠိဖိဒိးစဲးမ့၀ံၤမ့ၢ်တၢ်ကကဲထီၣ်သးဒ်လဲၣ်ဒုတသ့ၣ်ညါဒံးဘၣ်,ဘၣ်အိၣ်ခိးကွၢ်တၢ်အိၣ်သးဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်လီၢ်က၀ီၤကမျၢၢ်စံး၀ဲအသိးန့ၣ်(DKBA)သုးခိၣ်ဘိၤဘံၣ်အံၤဒိကနၣ်လူၤပိၥ်မၤထွဲပၥ်ဂံၢ်ပၥ်ဖျါ၀ဲလါမဲၢ်တကီဃိၣ်ဖိသီခါဒီး အ၀ဲသ့ၣ်အံၤ ဖျါစ့ၢ်ကီးလၢအပၥ်ဖှိၣ်မၤသကိးတၢ်ဒီးသုးကီၣ်ကး၀ံၤတၢ်ရဲၣ်တၢ်ကျဲၤအိၣ်လၢကထီဒါက့ၤ၀ဲခ့ၣ်အဲၣ်ယူၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါဒီးကမျၢၢ်တဖၣ် ပဲၥ်ထံနီၤဖးစံး၀ဲန့ၣ်လီၤ.
ဘၣ်ဃး(DKBA)ဟဲအိၣ်ဆီသးဖဲ၀ၣ်တရဲၢ်ကၠိမဲၥ်ညါတၢ်ဂ့ၢ်အံၤ ဒ်သိးကသ့ၣ်ညါအါထီၣ်ဘၣ်တၢ်အိၣ်သးလၢအ၀ဲသ့ၣ်အိၣ် တကပၤလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီတၢ်ကစီၣ်ဆဲးကျိး(DKBA)သုးခိၣ်ဘိၤဘံၣ်ဘၣ်ဆၣ် တုၤလၢခဲအံၤဆဲးကျိးတန့ၢ်ဒံး ဘၣ်န့ၣ်လီၤ.
