လါအီးကထိဘၢၣ် ၁ သီ, ၂၀၂၄ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁) ဖၣ်အၣ်ကီၢ်ဆၣ်အပူၤ (DKBA)သုးခိၣ်ဘိၤဘံၣ်အပှၤလၢဟဲအိၣ်ဆီလီၤသးဖဲနီဖးဒိၣ်ကရူၢ် ၀ၣ်တရဲၢ်သ၀ီပူၤ ကၠိမဲၥ်ညါတဖၣ် ခီဖျိတၢ်လဲၤကွံၥ်၀ဲဒီးစုကွံၥ်မ့ၣ်ပိၢ်အဃိ (DKBA)တကပၤတၢ်ဘၣ်ဒိဘၣ်ထံးအိၣ်၀ဲ အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ စံး၀ဲအသိးသ့ၣ်ညါဘၣ်န့ၣ်လီၤ.
ဖဲလါစဲးပထ့ဘၢၣ် ၂၉ သီ ဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ် ဘူးဒးတၢ်ဂုၤထီၣ်ပသီထီၣ်ကညီသုးမုၢ်ဒိၣ်(DKBA) သုးခိၣ်ဘိၤဘံၣ်အပှၤလၢအဟဲအိၣ်ဆီလီၤသးတ့ထီၣ်သုးတၢ်လီၢ်တၢ်ကျဲလၢ၀ၣ်တရဲၢ် ကၠိမဲၥ်ညါအံၤတဖၣ် ဖီၣ်စုက၀ဲၤလၢ တၢ်တသ့ၣ်ညါအီၤတဖၣ် လဲၤကွံၥ်၀ဲဒီးစုကွံၥ်မ့ၣ်ပိၢ်အဃိဘၣ်ဒိသၢဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လီၢ်က၀ီၤသ၀ီဖိတဂၤစံး၀ဲလၢ“အဘၣ်ဒိသၢဂၤအ၀ဲတဂၤန့ၣ်ပှၤဟဲမၤတၢ်ဖိဟဲတ့စၢၤ(DKBA)တၢ်သူၣ်ထီၣ်မီၤနီၤ. မ့မ့ၢ်လၢအသံဒုတနၢ်ဟူနီၤတဂၤဘၣ်.ခဲအံၤတထံၣ်ပှၤဟဲတ့တၢ်လၢၤဘၣ်ပှၤပျံၤတၢ်.ခဲအံၤပှၤကမျၢၢ်နါက့ပျံၤတၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါတၢ်ကဲထီၣ်သး၀ံၤလီၢ်ခံ(DKBA)သုးသိလ့ၣ် ၃ ခိၣ်ဟဲထီၣ်လၢတၢ်ကဲထီၣ်သးအလီၢ်ဟဲဆှၢအါထီၣ်အပှၤ တကးဒံးဘၣ် ဖဲမဟါလါစဲးပထ့ဘၢၣ် ၃၀ သီအနံၤန့ၣ် (DKBA)အကျိဖးဒိၣ်လၢအိၣ်တရိၥ်ကၢ်ပျိၢ် ထိၣ်သီသံၣ်လူၢ်အံၤတဆီ ခးဆိလီၤ၀ဲ(၆၀ မမ)ကျိဖးဒိၣ်ဆူ ၀ၣ်တရဲၢ် သ၀ီဃၢၤတစှၤန့ၢ်(၄)ဖျၢၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးအံၤ ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“ဖဲမဟါ ၁၂း၄၉ မံးနံးန့ၣ် အ၀ဲသ့ၣ်က့ၤခးလီၤကဒါကျိဖးဒိၣ်(၄)ဖျၢၣ်.လီၤတဲၥ်လၢ၀ၣ်တရဲၢ်သ၀ီစံၥ်ပျီပူၤန့ၣ်(၃)ဖျၢၣ်,လၢထံ၀ၣ်ကျုၣ်ခိၣ်သ၀ီဃၢၤန့ၣ် တဖျၢၣ်.ပှၤလဲၤခးအ၀ဲသ့ၣ်ဘျီ(DKBA)န့ၣ်ခးသဖှိထီၣ်၀ဲကျိဖိဆူတၢ်ဖီခိၣ်ဆိမိၣ်၀ဲလၢဒြိလဲၤတ့ၢ်လီၤမ့ၣ်ပိၢ်ဒ်န့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တၢ်လဲၤကွံၥ်(DKBA)သုးတၢ်လီၢ်ဒီးမ့ၣ်ပိၢ်ဘျီ၀ဲအံၤ ကမျၢၢ်တကပၤစံး၀ဲလၢတၢ်သံတၢ်ပှၢ်တအိၣ်ဘၣ်ဘၣ်ဆၣ် မ့မ့ၢ်ဂံၢ်ခီၣ်ထံးပှၤဟ့ၣ် တၢ်ကစီၣ်ဖိလၢအိၣ်ဘူးဖဲန့ၣ်တဖၣ်စံး၀ဲအသိးန့ၣ်(DKBA)တကပၤသံ၀ဲ(၁)ဂၤဒီးဘၣ်ဒိ(၂)ဂၤန့ၣ်လီၤ.ဒ်သိးကသ့ၣ်ညါဘၣ် တၢ်သံတၢ်ဘၣ်ဒိဘၣ်ထံးတၢ်အိၣ်သးလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီတၢ်ကစီၣ်ဆဲးကျိး(DKBA)ပှၤဘၣ်မူဘၣ်ဒါဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤ
တၢ်ကဲထီၣ်သး၀ံၤလီၢ်ခံခီဖျိကျိဖးဒိၣ်အံၤအဃိ တကီၢ်ခါခဲအံၤ၀ၣ်တရဲၢ်သ၀ီဃုၥ်ဒီးဒူသ၀ီကမျၢၢ်လၢအိၣ်ဘူးဖဲန့ၣ် သ့ၣ်တဖၣ် ပျံၤတၢ်ဖုးတၢ်အိၣ်ဒီးတၢ်ဘၣ်ယိၣ်ဘၣ်ဘှီ,လဲၤလၢတၢ်ဖံးလီၢ်မၤလီၢ်ကျီးပူၤတဘူၣ်လၢၤ၀ဲဘၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
ဖဲအပူၤကွံၥ်လါစဲးပထ့ဘၢၣ် ၁၉ သီအနံၤန့ၣ် (DKBA)သုးခိၣ်ဘိၤဘံၣ်အပှၤဟဲဆီလီၤပၥ်လီၤအသုးမုၢ်သံၣ်ဘိဖဲ (KNLA) သုးရ့ၣ်(၁) ဟီၣ်က၀ီၤ ၀ၣ်တရဲၢ်ကၠိမဲၥ်ညါအံၤဒီး လၢအတၢ်ဟဲအိၣ်ဆီလီၤသးအံၤအဖီခိၣ် ဘၣ်ဒိ၀ဲကူၣ်သ့ခွဲးယၥ်တကးဒံးဘၣ် သုးက့ပှၤဘၣ် မူဘၣ်ဒါဃုၥ်ဒီးသ၀ီဖိတဖၣ်စ့ၢ်ကီးတတူၢ်လိၥ်၀ဲဘၣ်ဘၣ်ဆၣ် တုၤလၢခဲအံၤ(DKBA)ဆဲးတ့ထီၣ်ဘှီထီၣ်၀ဲ သုးတၢ်လီၢ်တၢ်ကျဲ တုၤလၢခဲအံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤ.
ဒ်န့ၣ်အသိးလီၢ်က၀ီၤဒူသ၀ီဖဲန့ၣ်အပူၤစးထီၣ်လၢ(DKBA)သုးခိၣ်ဘိၤဘံၣ်အပှၤဟဲအိၣ်ဆီသး၀ံၤလီၢ်ခံတုၤလၢခဲအံၤန့ၣ် ပှၤကၠိဖိစ့ၢ်ကီးထီၣ်ကၠိအနီၣ်ဂံၢ်တပှဲၤဒ်သိး လၢအပူၤကွံၥ်လၢၤဘၣ်အမဲၥ်ညါခဲအံၤတၢ်ဖ့ၣ်စၢစးထီၣ်အိၣ်ထီၣ်ဒ်အံၤအဖီခိၣ် ကဲထီၣ်တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီလၢကမျၢၢ်အဂီၢ်ဒီးခါဆူညါမ့ၢ်တၢ်ကမၤအသးဒ်လဲၣ်တသ့ၣ်ညါဘၣ်အဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲန့ၣ်တဖၣ်စံး ၀ဲန့ၣ်လီၤ.
