လါအီးကထိဘၢၣ်(၅)သီ, ၂၀၂၄နံၣ်, ခ့ၣ်အဲးစံၣ်,
ခ့ၣ်အဲးယူၣ်,ကညီဒီကလုၥ်စၢဖှိၣ်ကရၢ,သုးက့(၅)မုၢ်တြီၢ်ကီၢ်ရ့ၣ်အပူၤ,တၢ်မၤဆူၣ်ဒီးဟးထၢန့ၢ်ဆူၣ်ဝဲဒူသဝီဖိကမျၢၢ်တဖၣ်လၢကဘၣ်လဲၤကဲဝဲ(ခ့ၣ်အဲးယူၣ်)သုးအံၤ,မ့ၢ်ဝဲသုးကီၣ်ကးအတၢ်ရၤလီၤမၤကမၣ်တၢ်ကစီၣ်တၢ်ဂ့ၢ်တၢ်ကျိၤအဂ့ၢ်,သုးကီၣ်ကးပှၤရၤလီၤကမၣ်တၢ်ကစီၣ်ဖိတဖၣ်ပၥ်ဖျါဝဲလၢ(Telegram)အပူၤ,ဖဲလါအီးကထိဘၢၣ်(၂၁)သီအနံၤန့ၣ်လီၤ.
ဒီးတၢ်ရၤလီၤဝဲတၢ်ကစီၣ်ကမၣ်အံၤန့ၣ်,သုးကီၣ်ကးအပှၤရၤလီၤမၤကမၣ်တၢ်ကစီၣ်,ပှၤသူစိၤရှၢၣ်မံးဒံးယၢၣ်ဖိ(SnowQueen)လၢအ(Subscriber)အိၣ်ဝဲအဂၤ(၇၀,၀၀၀)ဃၣ်ဃၣ်တဂၤအံၤ,စးထီၣ်ရၤလီၤဝဲတၢ်ဂ့ၢ်အံၤအဆိကတၢၢ်ဒီးတၢ်ကစီၣ်အံၤ,အပှၤကွၢ်တၢ်ဖိခဲလၢၥ်အိၣ်ဝဲတုၤလၢ(၁၂,၀၀၀)ဘျဲၣ်အသိး,ပှၤဟ့ၣ်(Reaction)အိၣ်စ့ၢ်ကီးဝဲ(၁၆၀)ဂၤညါန့ၣ်လီၤ.
ဘၣ်ဃးဒီးသုးကီၣ်ကးအတၢ်ရၤလီၤဝဲတၢ်ကစီၣ်ကမၣ်အံၤနနုၥ်လီၤကွၢ်သ့ဝဲဖဲ (https://archive.ph/3IN2r) န့ၣ်လီၤ.
ခီဖျိတၢ်ရၤလီၤဝဲတၢ်ဂ့ၢ်တၢ်ကျိၤကမၣ်တခါအံၤအဖီခိၣ်,ခ့ၣ်အဲးစံၣ်ပှၤထၢတၢ်ကစီၣ်ဖိတဖၣ်သမံသမိးမၤလီၢ်တံၢ်က့ၤဝဲဒီးဃုထံၣ်သ့ၣ်ညါဘၣ်က့ၤဝဲလၢအမ့ၢ်တၢ်ကစီၣ်ကမၣ်အဂ့ၢ်န့ၣ်,တၢ်ပၥ်ဖျါအိၣ်ဝဲဒ်လၢလၥ်အံၤအသိးန့ၣ်လီၤ.
(တၢ်သမံသမိးဝဲလၢအမ့ၢ်တၢ်ကစီၣ်ကမၣ်ကဲထီၣ်သးအဂ့ၢ်)
(SnowQueen)အ(Telegram)အပူၤရၤလီၤဝဲလၢ“ဖၣ်ပူၣ်တၢ်ဒုးအပူၤသုးက့(၅)(KNU)အပှၤသုးဖိတဖၣ်အံၤဘၣ်ဒိဝဲနးနးကလဲၥ်အဃိ,ဟးလူၤကိးဝဲဖၣ်ပူၣ်ဟီၣ်ကဝီၤဒူသဝီဖိကမျၢၢ်တဖၣ်လၢကလဲၤကဲသုးဒီး,လၢကဒုးထီဒါတၢ်ဒီးတီခိၣ်ရိၢ်မဲပၢတၢ်ြပးတၢ်အဂီၢ်,ဟးထၢန့ၣ်ဆူၣ်ပၥ်ဖှိၣ်ထီၣ်ဝဲကမျၢၢ်တဖၣ်အိၣ်ဝဲအဂ့ၢ်”ကွဲးပၥ်ဖျါဝဲတၢ်ဂ့ၢ်တၢ်ကျိၤလၢဂံၢ်ခီၣ်ထံးတၢ်ကစီၣ်လီၤတံၢ်လီၤမံတပၣ်ဃုၥ်ပၣ်ဂီၢ်ဝဲဒၣ်ဘၣ်အိၣ်ဝဲန့ၣ်လီၤ.
တကးဒံးဘၣ်,ပၥ်ဖျါစ့ၢ်ကီးဝဲလၢ(KNU)အတၢ်ဟးထၢဝဲပှၤသုးဖိအံၤန့ၣ်ထၢဃုၥ်ဝဲဒီးပိၥ်မုၣ်ပိၥ်မၢၤတဖၣ်လၢကလဲၤဖီၣ်အီၣ်တ့ၤအီၣ်တၢ်ဒီးကဘိၣ်မ့ၤဘိၣ်ထံ,ဆှၢမ့ၤဘိၣ်လၢပှၤသုးဖိလၢကဘၣ်ဒုးတၢ်တဖၣ်အဂီၢ်အိၣ်ဝဲအဂ့ၢ်,ရၤလီၤမၤကမၣ်စ့ၢ်ကီးဝဲတၢ်ကစီၣ်တဖၣ်အိၣ်ဝဲဒၣ်န့ၣ်လီၤ.
လၢတၢ်န့ၣ်အဃိ,ခီဖျိရၤလီၤဝဲတၢ်ကစီၣ်တဖၣ်ဒ်အံၤအဖီခိၣ်,ခ့ၣ်အဲးစံၣ်ကညီတၢ်ကစီၣ်သံကွၢ်သံဒိးဝဲခ့ၣ်အဲၣ်ယူၣ်သုးက့(၅)ပှၤကတိၤတၢ်ပၢ,သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်အဖီခိၣ်,သုးခိၣ်ဒိၣ်ဂီၢ်ဂ့ၢ်စီၤကျၢၢ်ဒိၣ်စံးဝဲဒ်အံၤန့ၣ်လီၤ.
အဝဲစံးဝဲလၢ“ဒ်သိးအဝဲသ့ၣ်တဖၣ်ရၤလီၤဝဲအသိးန့ၣ်ဖဲသုးက့(၅)အံၤပမၤတအိၣ်နီတဘျီဘၣ်,ဒီးတၢ်လၢ(KNLA)အတၢ်သူၣ်ထီၣ်ဆီလီၤအပူၤနါက့န့ၣ်,တၢ်ပၥ်ပနီၣ်ဝဲလၢဟံၣ်ဖိဃီဖိတဒူၣ်န့ၣ်ပှၤလၢအသးနံၣ်ပှဲၤန့ၣ်ကဘၣ်ပၣ်ဝဲတဂၤန့ၣ်တၢ်တခါန့ၣ်,မ့ၢ်တၢ်ဂ့ၢ်လၢအပူၤကွံၥ်တၢ်ပၢၢ်ဆၢစးထီၣ်အခီၣ်ထံးလံၤလံၤလံ.အဃိန့ၣ်ဟံၣ်ဖိဃီဖိတဒူၣ်န့ၣ်အသးနံၣ်မ့ပှဲၤထီၣ်တဘျီန့ၣ်အဝဲသ့ၣ်အနီၢ်ကစၢ်ဒၣ်ဝဲဟဲပၥ်ဖျါထီၣ်အနီၢ်ကစၢ်အသးလီၤ.အန့ၣ်မးန့ၣ်(ခ့ၣ်အဲၣ်ယူၣ်)တကပၤမ့ပၥ်ပနီၣ်တူၢ်လိၥ်မးဒီးအဝဲသ့ၣ်နုၥ်လီၤကဲဝဲသုးသ့လီၤ”အဂ့ၢ်စံးဝဲန့ၣ်လီၤ.
လၢန့ၣ်အမဲၥ်ညါ,ပိၥ်မုၣ်ပိၥ်မၢၤတဖၣ်နါက့န့ၣ်တမ့ၢ်လၢ(KNU)ကိးမၢဝဲလၢကဘၣ်ဖီၣ်မ့ၤဘၣ်အသိး,ပိၥ်ခွါတဖၣ်အံၤနါက့တမ့ၢ်တၢ်မၢကိးဆူၣ်မၤဆူၣ်အဝဲသ့ၣ်တဖၣ်ဘၣ်,မ့မ့တခီလီၢ်ကဝီၤဒူသဝီဖိသ့ၣ်တဖၣ်အံၤ,အနီၢ်ကစၢ်တၢ်သးအိၣ်အဖီခိၣ်လဲၤနုၥ်လီၤကဲဝဲသုးဒီးပိၥ်မုၣ်ပိၥ်မၢၤတဖၣ်အံၤသးအိၣ်တိစၢၤမၤစၢၤဝဲလၢတၢ်ဖီၣ်အီၣ်တ့ၤအီၣ်ဆှၢတၢ်အီၣ်တကပၤလၢအနီၢ်ကစၢ်တၢ်သးဆူၣ်အဖီခိၣ်လီၤအဂ့ၢ်,သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဝဲအါထီၣ်ဝဲန့ၣ်လီၤ.
တကတီၢ်ဃီ,(KNU/KNLA)သုးက့(၅)အပူၤအံၤ,တၢ်ထၢဆူၣ်မၤဆူၣ်ဝဲကမျၢၢ်တဖၣ်လၢကဘၣ်လဲၤကဲသုးတၢ်ဂ့ၢ်အံၤမ့ၢ်အိၣ်ဧါတအိၣ်ဘၣ်ဧါအဂ့ၢ်န့ၣ်,တၢ်သံကွၢ်သံဒိးဝဲကမျၢၢ်လီၢ်ကဝီၤဖိတဖၣ်အဖီခိၣ်,ဘုသိၣ်ကီၢ်ဆၣ်သဝီလီၢ်ကဝီၤဖိတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“မၤဝဲတၢ်ထၢသုးန့ၣ်မၤဝဲဒ်ပၥ်လီၤဝဲတၢ်သိၣ်တၢ်သီတၢ်ဘျၢအသိးလီၤ.အခဲအံၤပဟီၣ်ကဝီၤအပူၤတၢ်ဒုးကဲထီၣ်ဒီးသုးကီၣ်ကးလီၤ.အဃိန့ၣ်ပဟံၣ်ဖိဃီဖိအပူၤပှၤလၢအသးနံၣ်ပှဲၤထီၣ်တဖၣ်န့ၣ်,အသးဆူၣ်လၢကနုၥ်လီၤကဲသုးဒီးနုၥ်လီၤဝဲလၢအနီၢ်ကစၢ်တၢ်ဘၣ်သးလီၤ.ကီၢ်ရ့ၣ်ပှၤဘၣ်မူဘၣ်ဒါတလိၣ်လဲၤကိးအဝဲသ့ၣ်ဘၣ်.”အဂ့ၢ်စံးဘၣ်ဝဲခ့ၣ်အဲးစံၣ်န့ၣ်လီၤ.
မုၢ်ြတီၢ်ကီၢ်ရ့ၣ်အပူၤ,ဘၣ်ဃးဒီးတၢ်ထၢသုးအံၤဖဲအပူၤကွံၥ်စှၤသီအဆၢကတီၢ်,ကမးမိၢ်ဟီၣ်ကဝီၤအပူၤတၢ်ထၢဝဲသုးအိၣ်ဝဲဘၣ်ဆၣ်,တမ့ၢ်လၢ(KNU)တကပၤဘၣ်ဒီး,မ့မ့ၢ်တခီမ့ၢ်ဝဲလၢတၢ်ကမၤအါထီၣ်သုးကီၣ်ကးအသုးအဂီၢ်ဒီး,ပှၤလၢအထၢသုးတီခိၣ်ရိၢ်မဲတၢ်တဖၣ်အံၤမ့ၢ်ဝဲသုးခိးကီၢ်ဆၢ(BGF)န့ၣ်လီၤ.ဒီးသုးခိးကီၢ်ဆၢ(BGF)တဖၣ်အံၤမၢဆူၣ်ဝဲလီၢ်ကဝီၤဖိတဖၣ်လၢကဆဲးလီၤစုမုၢ်ကျၢၢ်အိၣ်ဝဲအမဲၥ်ညါ,ထၢဝဲပှၤကဘၣ်လဲၤကဲသုးအမံၤစရီအိၣ်ဝဲအဂ့ၢ်န့ၣ်,ခ့ၣ်အဲးစံၣ်တၢ်ကစီၣ်ကွဲးပၥ်ဖျါတ့ၢ်ဝဲအိၣ်ဝဲဒၣ်န့ၣ်လီၤ.
ဘၣ်ဃးဒီးတၢ်ကစီၣ်ဝဲအံၤနနုၥ်လီၤဖးအီၤဖဲအံၤ(https://archive.ph/0d48H) သ့ဝဲန့ၣ်လီၤ.
ဒ်န့ၣ်အသိး,လီၢ်ကဝီၤတၢ်ကစီၣ်သဘျ့ဒ်အမ့ၢ်(DVB,PeopleSpring)သ့ၣ်တဖၣ်စ့ၢ်ကီးအပူၤကွံၥ်ပၥ်ဖျါဝဲလၢဖၣ်ပူၣ်,ကမးမိၢ်ဟီၣ်ကဝီၤအပူၤသုးကီၣ်ကးဒီးသုးခိးကီၢ်ဆၢ(BGF)ပၥ်ဖှိၣ်သးဟးထၢဝဲကမျၢၢ်လၢကလဲၤကဲသုးတၢ်ဂ့ၢ်တဖၣ်အိၣ်ဝဲဒၣ်အဖီခိၣ်ဘၣ်ဃးဒီးအဝဲသ့ၣ်တၢ်ပၥ်ဖျါတဖၣ်န့ၣ်နနုၥ်လီၤကွၢ်အီၤသ့ဒ်လၢလၥ်အံၤန့ၣ်လီၤ.
DVB အတၢ်ပၥ်ဖျါ (https://burmese.dvb.no/post/657888)
People Spring အတၢ်ပၥ်ဖျါ (https://www.ludunwayoo.com/news-mm/2024/10/01/100598/)
